បីសប្តាហ៍បន្ទាប់ពីបានក្លាយជាសមាជិកសភាអាមេរិកដើមកំណើតខ្មែរទី១ លោក ម៉ម រ៉ាឌី បានចូលរួមជាមួយអ្នកតវ៉ារាប់រយនាក់ក្នុងក្រុងភ្នំពេញកាលពីថ្ងៃអាទិត្យ ដើម្បីទាមទារឲ្យមានការដោះលែងសកម្មជន សមាជិកបក្សប្រឆាំង និងព្រះសង្ឃ១៧អង្គនិងនាក់ ពីពន្ធនាគារព្រៃស។
លោក ម៉ម រ៉ាឌី វ័យ៤៥ឆ្នាំ ដែលបានជាប់ជាតំណាងរាស្ត្ររដ្ឋម៉ាសាឈូសេត ក្នុងការបោះឆ្នោតពាក់កណ្តាលអាណត្តិនៅអាមេរិកកាលពីថ្ងៃទី៤ខែវិច្ឆិកា បានមកដល់ប្រទេសកម្ពុជាកាលពីសប្តាហ៍មុនសម្រាប់ការបំពេញទស្សនកិច្ចរយៈពេល២សប្តាហ៍នៅប្រទេសកម្ពុជា។
ក្នុងទឹកមុខស្រពាប់ស្រពោនលោក ម៉ម រ៉ាឌី បានប្រាប់អ្នកតវ៉ាប្រហែល២០០នាក់នៅខាងក្រៅពន្ធនាគារដែលមានការយាមកាមតឹងរ៉ឹង មុនពេលលោកហុចក្បាលមីក្រូហ្វូនទៅលោក ខែម ចន្ថា អ្នកនាំពាក្យរបស់លោកថា “ខ្ញុំមានអារម្មណ៍អាណិតអាសូរចំពោះបងប្អូនប្រុសស្រី”។
លោក ចន្ថា បានប្រាប់ក្រុមអ្នកតវ៉ាថា “យើងអំពាវនាវតាមរយៈសារព័ត៌មាននិងបណ្តាញព័ត៌មាន សុំឲ្យរដ្ឋាភិបាលដោះលែងបងប្អូនប្រុសស្រីរបស់យើង។ ទោសរបស់ពួកគាត់ពិតជាមិនធ្ងន់ទេ ការបិទផ្លូវមិនមែនជាទោសព្រហ្មទណ្ឌឡើយ”។
សកម្មជន៧នាក់មកពីសហគមន៍បឹងកក់ដែលរងគ្រោះ ត្រូវបានកាត់ទោសឲ្យជាប់ពន្ធនាគាររយៈពេលមួយឆ្នាំកាលពីថ្ងៃទី១១ខែវិច្ឆិកា បន្ទាប់ពីត្រូវផ្តន្ទាទោសតាមច្បាប់ចរាចរណ៍ទាក់ទិននឹងការបិទផ្លូវ បន្ទាប់ពីពួកគេបានដាក់គ្រែមួយនៅកណ្តាលមហាវិថីព្រះមុនីវង្ស។ ការខំប្រឹងប្រែងនោះគឺដើម្បីឲ្យមានការចាប់អារម្មណ៍ដល់ការជន់លិចក្នុងតំបន់របស់ខ្លួន។
អ្នកតវ៉ា និងលោក ម៉ម រ៉ាឌី សង្ឃឹមថានឹងជួបជាមួយអ្នកទោស១៧នាក់ រួមមានសកម្មជន១១ មន្ត្រីគណបក្សសង្គ្រោះជាតិ៣នាក់ និងព្រះសង្ឃ៣អង្គ ប៉ុន្តែមិនត្រូវបានគេអនុញ្ញាតឲ្យចូលពន្ធនាគារទេ។
អ្នកស្រី យ៉ោម បុប្ផា សកម្មជនប្រឆាំងនឹងការបណ្តេញចេញ មកពីសហគមន៍បឹងកក់ បាននិយាយថា ក្នុងពេលមានការខកចិត្តដោយសារគេមិនឲ្យចូលពន្ធនាគារនោះ អ្នកតវ៉ាត្រេកអរពេលឃើញវត្តមានរបស់លោក ម៉ម រ៉ាឌី កាលពីថ្ងៃអាទិត្យ។
អ្នកស្រី ម៉ម បុប្ផា បាននិយាយថា “ការគាំទ្ររបស់គាត់លើកទឹកចិត្តនិងញ៉ាំងយើងឲ្យប្រយុទ្ធដើម្បីយុត្តិធម៌ និងបង្ហាញថា យើងមិនឯកោទេ។ យើងរីករាយដែលបានឃើញគាត់ចូលរួមជាមួយយើង ក្នុងការទាមទារឲ្យមានការដោះលែងមនុស្សទាំង១៧នាក់ ដែលជាប់ពន្ធនាគារដោយអយុត្តិធម៌”។
មុនចូលរួមបាតុកម្មកាលពីថ្ងៃអាទិត្យ លោក ម៉ម រ៉ាឌី បានជួបលោកនាយករដ្ឋមន្ត្រី ហ៊ុន សែន កាលពីថ្ងៃព្រហស្បតិ៍ និងលោក សម រង្ស៊ី មេបក្សប្រឆាំងកាលពីថ្ងៃសៅរ៍។ លោកមានផែនការជួបជាមួយមន្ត្រីមួយចំនួនពីគណបក្សប្រជាជនកម្ពុជានិងគណបក្សសង្គ្រោះជាតិក្នុងរយៈពេលមួយសប្តាហ៍កន្លះទៀតនេះ។
នៅពេលធ្វើទស្សនកិច្ចនៅសាលារៀនមួយក្នុងវត្តស្វាយពពែ ក្រុងភ្នំពេញកាលពីរសៀលថ្ងៃអាទិត្យនោះ លោក ម៉ម រ៉ាឌី បានមានប្រសាសន៍ថា ថ្វីបើបានចូលរួមក្នុងបាតុកម្មនៅព្រឹកនោះក្តី ក៏បំណងនៃការបំពេញបេសកកម្មរបស់លោក មិនពាក់ព័ន្ធនឹងនយោបាយទេ។
លោកបានមានប្រសាសន៍ថា “[មូលហេតុ]ដំបូងគឺមានពេលវិស្សមកាលបន្តិច។ ខ្ញុំពិតជាចង់មានទំនាក់ទំនង ចង់ឃើញប្រទេសដែលផ្តល់កំណើតឲ្យខ្ញុំ ពីទស្សនផ្សេងៗ”។
លោក ម៉ម រ៉ាឌី មានប្រសាសន៍ថា ជំនួបរបស់លោកជាមួយលោក ហ៊ុន សែន កាលពីសប្តាហ៍មុន ជាវិធីមួយសម្រាប់រូបលោកសម្លឹងមើលប្រទេសកម្ពុជាតាមរយៈភ្នែកបុរសដែលគ្រប់គ្រងប្រទេសនេះអស់រយៈពេលជាង៣០ឆ្នាំ។
“[ជំនួបនោះ] គឺជួបមនុស្សម្នាក់ នាយករដ្ឋមន្ត្រីម្នាក់ ដែលគ្រប់គ្រងប្រទេសដ៏ធំនេះ…ដើម្បីស្វែងយល់បន្តិចបន្តួច ថាគាត់ចាត់ទុកប្រទេសនេះយ៉ាងណា”។
ពេលសួរថាតើទស្សនៈរបស់លោកអំពីនាយករដ្ឋមន្ត្រីបានផ្លាស់ប្តូរឬយ៉ាងណា បន្ទាប់ពីនិយាយជាមួយអ្នកតវ៉ានិងសមាជិកសភាគណបក្សប្រឆាំង ដែលចោទរដ្ឋាភិបាលរបស់លោក ហ៊ុន សែន អំពីការរៀបចំឲ្យមានការចាប់ខ្លួនមនុស្សមួយចំនួននោះ លោក ម៉ម រ៉ាឌី បាននិយាយថា លោកមិនបានដឹងគ្រប់ជ្រុងជ្រោយដែលទាក់ទងនឹងស្ថានការណ៍នយោបាយ ដើម្បីធ្វើអត្ថាធិប្បាយទេ។ លោកនិយាយថា “ខ្ញុំមិនដឹងរឿងនឹងទាំងមូលទេ។ ខ្ញុំខ្វល់ច្រើន[អំពី]កន្លែងដែលខ្ញុំចាប់កំណើត”។
លោក ម៉ម រ៉ាឌី បានជាប់ឆ្នោតនៅខែនេះជាតំណាងរាស្ត្រក្រុងឡូវែល រដ្ឋម៉ាសាឈូសេត។ ក្រុងឡូវែលមានចំនួនប្រជាជនខ្មែរសញ្ជាតិអាមេរិកច្រើនបំផុតទី២រស់នៅអាមេរិក គឺមានប្រហែល៣0.000នាក់។ លោក រ៉ាឌី បានទៅរស់នៅអាមេរិកជាមួយគ្រួសាររបស់លោកកាលពីឆ្នាំ១៩៨២ បន្ទាប់ពីភៀសខ្លួនពីរបបខ្មែរក្រហម និងបានរស់នៅក្នុងជំរំថៃមួយកន្លែងជាច្រើនឆ្នាំ។
កាលពីថ្ងៃអាទិត្យ លោក រ៉ាឌី បាននិយាយថា លោកសង្ឃឹមថា រឿងរបស់លោកនឹងជំរុញទឹកចិត្តមិនត្រឹមតែអ្នកបោះឆ្នោតក្នុងមណ្ឌលរបស់លោកប៉ុណ្ណោះទេ ប៉ុន្តែថែមទាំងជំរុញទឹកចិត្តយុវជនខ្មែរផងដែរ។
លោកបានឲ្យដឹងថា “ខ្ញុំបានទៅសហរដ្ឋកាលពីឆ្នាំ១៩៨២ដោយមិនចេះអង់គ្លេសមួយម៉ាត់ផង។ ខ្ញុំចង់ឲ្យបងប្អូនដឹង…មិនថាតើពួកគេនៅសហរដ្ឋអាមេរិក ឬនៅទីនេះ គឺជំរុញពួកគេឲ្យខិតខំឡើង មានមោទនភាពចំពោះអ្វីដែលពួកគេចង់ឃើញឲ្យផ្លាស់ប្តូរ។ កុំគ្រាន់តែចង់បាន ប៉ុន្តែត្រូវខិតខំឡើង និងត្រូវធ្វើអ្វីម្យ៉ាង”៕មានិត