កាលពីម្សិលមិញ លោក សាយ សំអាល់ រដ្ឋមន្ត្រីក្រសួងបរិស្ថានបានស្នើឲ្យសកម្មជនការពារបរិស្ថាន និងអ្នកនយោបាយមកពីគណបក្សប្រឆាំងអត់ធ្មត់ ខណៈការវាយតម្លៃកំពុងត្រូវបានធ្វើឡើងលើផលប៉ះពាល់នៃគម្រោងសាងសង់ទំនប់វារីអគ្គិសនីដ៏ចម្រូងចម្រាសនៅក្នុងតំបន់ជ្រលងអារ៉ែង ខេត្តកោះកុង។
គណៈកម្មការកសិកម្មនៅរដ្ឋសភាដែលដឹកនាំដោយលោក ប៉ុល ហំម សមាជិកសភាមកពីគណបក្សសង្គ្រោះជាតិបានកោះហៅលោក សាយ សំអាល់ មកសភាកាលពីម្សិលមិញ ដើម្បីឆ្លើយសំណួរលើប្រធានបទមួយចំនួនរួមទាំងគម្រោងសាងសង់ទំនប់វារីអគ្គិសនីស្ទឹងឆាយអារ៉ែង កម្លាំង១០៨មេហ្គាវ៉ាត់ផងដែរ។
កាលពីសប្តាហ៍មុន លោក ប៉ុល ហំម បានជិះឧទ្ធម្ភាគចក្រទៅកាន់តំបន់ដែលគេគ្រោងសាងសង់ទំនប់វារីអគ្គិសនីនេះ ហើយបានប្រាប់អ្នកយកព័ត៌មាន បន្ទាប់ពីកិច្ចប្រជុំកាលពីម្សិលមិញថា លោកបានធ្វើរបាយការណ៍ស្តីពីការសិក្សារបស់លោកផ្ញើជូនលោក សាយ សំអាល់ រួចហើយ។
លោកបានមានប្រសាសន៍ថា “គណៈកម្មការទី៣ បានចុះទៅតំបន់អារ៉ែង។ បន្ទាប់ពីយើងបានឃើញដោយផ្ទាល់ភ្នែក និងបានជួបជាមួយប្រជាជន យើងឃើញថា វានឹងមានផលប៉ះពាល់លើវប្បធម៌ ជីវភាពប្រចាំថ្ងៃរបស់ពួកគាត់ ព្រៃឈើ និងជីវិតសត្វព្រៃប្រសិនបើទំនប់វារីអគ្គិសនីនេះត្រូវបានសាងសង់ឡើង”។
លោក ប៉ុល ហំម បានលើកឡើងថា គណៈកម្មការក៏បានស្នើឲ្យលោក សាយ សំអាល់ ជួយជំរុញឲ្យមានការបង្កើតច្បាប់ដ៏ជាក់លាក់មួយ ដែលតម្រូវឲ្យមានការវាយតម្លៃពីផលប៉ះពាល់បរិស្ថានជំនួសឲ្យអនុក្រឹត្យដែលមានស្រាប់ផងដែរ។
លោកបានមានប្រសាសន៍ថា “ក្រៅពីបញ្ហាទាំងនេះ យើងបានស្នើឲ្យឯកឧត្តមរដ្ឋមន្ត្រីពិភាក្សាអំពីការវាយតម្លៃពីផលប៉ះពាល់បរិស្ថាននៅថ្នាក់តំបន់មិនមែនគ្រាន់តែនៅថ្នាក់មូលដ្ឋាននោះទេ ព្រោះមានកន្លែងខ្លះដូចជាប្រទេសឡាវជាដើម គឺកំពុងតែសាងសង់ទំនប់វារីអគ្គីសនីដែលអាចប៉ះពាល់ដល់ប្រទេសកម្ពុជា”។
បន្ទាប់ពីកិច្ចប្រជុំរបស់គណៈកម្មការនេះរួច លោក សាយ សំអាល់ បានប្រាប់អ្នកយកព័ត៌មានថា លោកបានប្រាប់លោក ប៉ុល ហំម ឲ្យអត់ធ្មត់ ខណៈការវាយតម្លៃអំពីផលប៉ះពាល់បរិស្ថានកំពុងត្រូវបានធ្វើឡើងលើគម្រោងសាងសង់ទំបន់វារីអគ្គិសនីនេះ។
លោក សាយ សំអាល់ បានមានប្រសាសន៍ថា “សម្រាប់អារ៉ែង សុំផ្តល់ឱកាសឲ្យយើងធ្វើការវាយតម្លៃឲ្យបានហ្មត់ចត់ជាមុនសិន។សេចក្តីសម្រេចថា តើត្រូវសាងសង់ ឬមិនសាងសង់គឺជារឿងមួយផ្សេង ប៉ុន្តែ យើងចាំចាច់ត្រូវតែធ្វើការសិក្សានៅពេលឥឡូវនេះ”។
អ្នកភូមិដែលរស់នៅជុំវិញជ្រលងអារ៉ែងកំពុងព្រួយបារម្ភខ្លាចក្រែងរដ្ឋាភិបាលអនុម័តគម្រោងសាងសង់ទំនប់វារីអគ្គិសនីនេះ ដោយមិនខ្វល់ពីលទ្ធផលនៃការវាយតម្លៃ។ ក្តីព្រួយបារម្ភទាំងនេះបានកើតមានឡើងនៅពេលក្រុមហ៊ុនសំណង់ចិនមួយបានប្រកាសកាលពីពេលថ្មីៗនេះថា ខ្លួនបានចុះហត្ថលេខាលើកិច្ចសន្យាមួយជាមួយក្រុមហ៊ុនដែលគាំទ្រគម្រោងសាងសង់ទំនប់វារីអគ្គិសនីនេះ។
រដ្ឋមន្ត្រីក្រសួងបរិស្ថានបានស្នើសហគមន៍មូលដ្ឋានកុំឲ្យរារាំងដល់ដំណើរការនៃការវាយតម្លៃបែបនេះ។
លោក សាយ សំអាល់ បានមានប្រសាសន៍បន្តថា “ប្រសិនបើការសិក្សាត្រូវបានរារាំង ខ្ញុំគិតថា វាគឺជាបញ្ហា ហើយយើងមិនគួរដើរផ្លូវនេះទៀតទេ”។ លោកក៏បានលើកឡើងទៀតដែរថា ច្បាប់ដ៏ជាក់លាក់មួយស្តីពីការវាយតម្លៃអំពីផលប៉ះពាល់លើបរិស្ថានកំពុងត្រូវបានធ្វើសេចក្តីព្រាងរួចហើយ។
លោកបានមានប្រសាសន៍ថា “យើងបានព្យាយាមអស់ពីសមត្ថភាព ដើម្បីទទួលបានការផ្តល់យោបល់ពីគ្រប់ទិសទីទាំងអស់សម្រាប់ច្បាប់នេះ ព្រោះយើងសង្ឃឹមថា ការអនុវត្តនឹងមានប្រសិទ្ធភាពនៅពេលច្បាប់នេះស្ថិតនៅចំពោះមុខរដ្ឋសភា”៕ស៊ុយឈាង