30 C
Phnom Penh

អគ្គិភ័យ​​​ឆាប​​​ឆេះ​​​ផ្សារ​​​ចាស់​​​ទាំង​​​ព្រឹក​​​ព្រលឹម​​​

ដោយ ឌឹ ខេមបូឌា ដេលី

បទវិភាគ

អគ្គិភ័យ​​​បាន​​​ឆាប​​​ឆេះ​​​ផ្សារ​​​ចាស់​​​​​​នៅ​​​ក្នុង​​​រាជ​​​ធានី​​​ភ្នំពេញ​​​​​​កាល​​​ពី​​​ព្រឹក​​​ម្សិលមិញ ដោយ​​​ធ្វើ​​​ឲ្យ​​​​​​តូប​​​រាប់​​​រយ​​​នៅ​​​ក្នុង​​​ផ្សារ​​​ប្រវត្តិសាស្ត្រ​​​នេះ​​​ត្រូវ​​​ឆេះ​​​ខ្ទេច​​​ ហើយ​​​ធ្វើ​​​ឲ្យ​​​តូប​​​រាប់​​​រយ​​​​​​ផ្សេង​​​ៗ​​​ទៀត​​​រង​​​ការ​​​ខូច​​​ខាត​​​ មុន​​​ពេល​​​រថយន្ត​​​ពន្លត់​​​អគ្គិភ័យ​​​ជា​​​ច្រើន​​​គ្រឿង​​​អាច​​​គ្រប់​​​​​​គ្រង​​​អគ្គិភ័យ​​​នេះ​​​​​​​​​​​​បាននៅ​​​រយៈ​​​ពេល​​​ជាង​​​ពីរ​​​ម៉ោង​​​ក្រោយ​​​។front

លោក ឃួង ស្រេង អភិបាល​​​រង​​​រាជ​​​ធានី​​​ភ្នំពេញ ដែល​​​អម​​​ដំណើរ​​​ជាមួយ​​​អ្នក​​​ពន្លត់​​​អគ្គិភ័យ​​​​​​ទៅ​​​​​​កន្លែង​​​កើត​​​ហេតុ​​​បាន​​​ឲ្យ​​​ដឹង​​​​​​ថា ផ្សារ​​​ចាស់​​​ដែល​​​មក​​​ទល់​​​ពេល​​​កាល​​​ពី​​​ម្សិលមិញ ជា​​​កន្លែង​​​ដែល​​​មាន​​​តូប​​​ជិត​​​១.០០០​​​ និង​​​ដែល​​​មាន​​​អ្នក​​​លក់​​​ដូរ​​​តាម​​​ផ្លូវ​​​ព័ទ្ធ​​​ជុំ​​​វិញ​​​ជា​​​រៀង​​​រាល់​​​ថ្ងៃ​​​​​​នៅ​​​មិន​​​ទាន់​​​បើក​​​ទ្វារ​​​នៅ​​​ឡើយ​​​ទេ​​​ ពេល​​​អគ្គិភ័យ​​​បាន​​​ឆាប​​​ឆេះ​​​ឡើង​​​​​​នៅ​​​ចំណុច​​​កណ្តាល​​​នៃ​​​ផ្សារ មុន​​​ម៉ោង​​​៧​​​និង​​​៣០​​​នាទី​​​។​​​ហើយ​​​ប្រសិនបើ​​​ផ្សារ​​​នេះ​​​បាន​​​បើ​​​កទ្វារ​​វិញ​​​នោះ​​​ ម្លេ៉ះ​​​អគ្គិភ័យ​​​ប្រហែល​​​ជា​​​​​​អាច​​​បង្ក​​​គ្រោះ​​​ថ្នាក់​​​ដល់​​​អាយុ​​​ជីវិត​​​មនុស្ស​​​ជា​​​ច្រើន​​​នាក់។​​​​​​​​​

លោក ឃួង ស្រេង បាន​​​មាន​​​ប្រសាសន៍​​​ថា “យើង​​​បាន​​​ចុះ​​​ទៅ​​​ផ្សារ​​​ចាស់​​​នៅ​​​ព្រឹក​​​មិញ​​​នេះ នៅ​​​ពេល​​​អគ្គិភ័យ​​​បាន​​​កើត​​​ឡើង​​​ ហើយ​​​ខ្ញុំ​​​គិត​​​ថា ក្នុង​​​ចំណោម​​​តូច​​​ចំនួន​​​៩១៤​​​​​​ មាន​​​តូប​​​ជាង​​​៣០០​​​ត្រូវ​​​បាន​​​ឆាប​​​ឆេះ​​​អស់​​​ ប៉ុន្តែ គ្មាន​​​អ្នក​​​ស្លាប់ និង​​​​​របួស​​​ឡើយ​​​​​​។ ក្តី​​​ព្រួយ​​​បារម្ភ​​​ដ៏​​​ធំ​​​របស់​​​យើង​​​គឺ​​​ការ​​​ពារ​​​អាយុ​​​ជីវិត​​​អាជីវករ​​​ ហេតុ​​​ដូច្នេះ​​​យើង​​​មិន​​​បាន​​​គិត​​​អំពី​​​មូល​​​ហេតុ​​​​​ ដែល​​​បង្ក​​​ឲ្យ​​​កើត​​​មាន​​​​​​អគ្គិភ័យ​​​ ឬ​​​ទំហំ​​​នៃ​​​ការ​​​ខូច​​​ខាត​​​នោះ​​​ទេ​​​”។

នៅ​​​ពេល​​​អ្នក​​​ពន្លត់​​​អគ្គិភ័យ​​​បាន​​​មក​​​ដល់​​​ អណ្ដាត​​​ភ្លើង​​​បាន​​​ឆាប​​ឆេះ​​​ដល់​​​ច្រក​​​ទ្វារ​​​មុខ​​​ភាគ​​​ខាង​​កើត​​​ទៅ​​​ហើយ​​​។ អាជីវករ​​​បាន​​​ប្រញាប់​​​ប្រញាល់​​​យក​​​របស់​​​បរ​​​​​​តាម​​​ដែល​​​​​​ខ្លួន​​​អាច​​​យក​​​ចេញ​​​បាន​​​។

យោង​​​តាម​​​លោក ព្រំ យ៉ន នាយការិយាល័យ​​​ពន្លត់​​​អគ្គិភ័យ​​​​​​រាជ​​​ធានី​​​ភ្នំពេញ​​​​​​បាន​​​ឲ្យ​​​ដឹង​​​ថា រថយន្ត​​​ពន្លត់​​​អគ្គិភ័យ​​​ចំនួន​​​២៩​​​គ្រឿង​​​មក​​​ពី​​​អង្គភាព​​​ផ្សេង​​​ៗ​​​គ្នា​​​ចំនួន​​​ប្រាំ​​​មួយ​​​បាន​​​បើក​​​ក្រឡឹង​​​ជុំ​​​វិញ​​​ផ្សារ​​​នេះ​​​ ដោយ​​​បាន​​​បាញ់​​​ទឹក​​​អស់​​​៦៦០​​​ម៉ែត្រ​​​គូប ដើម្បី​​​ពន្លត់​​​អណ្ដាត​​​ភ្លើង។

ការ​​​ឆាប​​​ឆេះ​​​ផ្សារ​​​តែង​​តែ​​​កើត​​​ឡើង​​​ជា​​​រឿយ​​​ៗ​​​នៅ​​​ក្នុង​​​ប្រទេស​​​កម្ពុជា​​​ ហើយ​​​ជា​​​រឿយ​​​ៗ​​​តែង​​​តែ​​​បង្ក​​​ឡើង​​​ដោយ​​​ខ្សែ​​​ភ្លើង​​​ដែលគ្មាន​​​សណ្តាប់​​​ធ្នាប់​​​ ហើយ​​​ស្ថានភាព​​​នេះ​​​​​​វា​​​កាន់តែ​​​ធ្ងន់​​​ធ្ងរ​​​ទៅ​​​ៗ​​​ដោយសារ​​​គ្មាន​​​ការ​​​អនុវត្ត​​​បទប្បញ្ញត្តិ​​​​​​​​​​​​​​​​​​​​​​ស្តី​​​ពី​​​ការ​​​ពារ​​​សុវត្ថិភាព និង​​​អគ្គិភ័យ។ កាល​​​ពី​​​ខែ​​​ធ្នូ​​​ ឆ្នាំ​​​២០១២ មនុស្ស​​​ចំនួន​​​៨​​​អ្នក​​​បាន​​​​​​ស្លាប់​​​ក្នុង​​​អគ្គិភ័យ​​​មួយ​​​ដែល​​​ឆាប​​​ឆេះ​​​ផ្សារ​​​រាត្រី​​​​​​ដ៏​​​មាន​​​ប្រជាប្រិយ​​​ភាព​​​នៅ​​​ក្នុង​​​ក្រុង​​​សៀមរាប។

លោក ព្រំ យ៉ន បាន​​​មាន​​​ប្រសាសន៍​​​ថា “ខ្ញុំ​​​សូម​​​អំពាវ​​​នាវ​​​ដល់​​​អាជីវករ​​​នៅ​​​ផ្សារ​​​ផ្សេង​​​ៗ​​​ទាំង​​​អស់​​​មេត្តា​​​ប្រុង​​​ប្រយ័ត្ន​​​ ហើយ​​​ត្រូវ​​​ប្រាកដ​​​ថា ខ្សែ​​​ភ្លើង​​​របស់​​​ខ្លួន​​​មាន​​​សុវត្ថិភាព ហើយ​​​ត្រូវ​​​តែ​​​មាន​​​បំពង់​​​ពន្លត់​​​អគ្គិភ័យ​​​នៅ​​​ក្នុង​​​តូប​​​របស់​​​ខ្លួន​​​ជាប់​​​ជា​​​និច្ច​​​”។

អ្នកស្រី​​​ សាន់ សុខលាភ អាយុ​​​៣៨​​​ឆ្នាំ​​​ ដែល​​​តូប​​​លក់​​​គ្រឿង​​​អលង្ការ​​​របស់​​​ខ្លួន​​​រួច​​​ផុត​​​ពី​​​អគ្គិភ័យ​​​នេះ​​​បាន​​​និយាយ​​​ថា វា​​​​​​មាន​​​ការ​​​ឆាប​​​ឆេះ​​​បន្តិច​​​បន្តួច​​​នៅ​​​ម៉ោង​​​៦និង​​​៣០​​​នាទី​​​ព្រឹក​​​ ប៉ុន្តែ ត្រូវ​​​សន្តិសុខ​​​ផ្សារ​​​ពន្លត់​​​​​​បាន​​​ភ្លាម​​​។ ប៉ុន្តែ​​​​​​​​​​​​នៅ​​​ពេល​​​វា​​​ឆាប​​​ឆេះ​​​ឡើង​​​ម្តង​​​ទៀត អណ្តាត​​​ភ្លើង​​​បាន​​​ឆាប​​​​ឆេះ​​​ខ្លាំង​​​ភ្លាម​​​ៗ​​​ដោយ​​​មិន​​​​​​អាច​​​គ្រប់​​​គ្រង​​​បាន​​​។

អ្នកស្រី សុខ​​​លាភ បាន​​​និយាយ​​​ថា “ខ្ញុំ​​​កំពុង​​​តែ​​​រៀប​​​ចំ​​​គ្រឿង​​​អលង្ការ​​​ដាក់​​​លក់​​​ ប៉ុន្តែ ​​​នៅ​​​ពេល​​​អគ្គិភ័យ​​​បាន​​​ឆាប​​​ឆេះ​​​រាល​​​ដាល​​​ យើង​​​បាន​​​រត់​​​ចេញ​​​ពី​​​ផ្សារ។ តូប​​​របស់​​​ខ្ញុំ​​​បាន​​​រួច​​​ផុត​​​ពី​​​ការ​​​ឆាប​​​ឆេះ ប៉ុន្តែ តូប​​​លក់​​​ខោ​​​អាវ​​​របស់​​​បងប្អូន​​​ស្រី​​​ខ្ញុំ​​​ត្រូវ​​​ឆេះ​​​គ្មាន​​​សល់​​​”។

អាជីវករ​​​ម្នាក់​​​ទៀត​​​ឈ្មោះ សុខ លាង អាយុ​​​៤២​​​ឆ្នាំ​​ បាន​​​ឲ្យដឹង​​​ថា តូប​​​លក់​​​ខោអាវ​​​ ដែល​​​​​​លោក​​​បាន​​​រក​​​ស៊ី​​​អស់​​​រយៈ​​​ពេល​​​ជាង​​​១០​​​ឆ្នាំ​​​​​​មក​​​ហើយ​​​ ត្រូវ​​​បាន​​​ឆាប​​​ឆេះ​​​ ហើយ​​​ខោអាវ​​​របស់​​​លោក​​​ត្រូវ​​​បាន​​​ឆេះ​​​គ្មាន​​​សល់​​​។ លោក​​​បាន​​​និយាយ​​​ថា “ខ្ញុំ​​​បាន​​​ខាត​​​បង់​​​ចន្លោះ​​​ពី​​​៦.០០០ដុល្លារ​​​ទៅ​​​៧.០០០ដុល្លារ​​​ ខ្ញុំ​​​មាន​​​អារម្មណ៍​​​រន្ធត់​​​ខ្លាំង​​​ណាស់​​​”។fire

នៅ​​​ក្នុង​​​សេចក្តី​​​ថ្លែង​​​ការណ៍​​​មួយ​​​កាល​​​ពី​​​ម្សិលមិញ​​​ សាលា​​​រាជ​​​ធានី​​​បាន​​​លើក​​​ឡើង​​​ថា អគ្គិ​​​ភ័យ​​​បាន​​​ចាប់​​​ផ្តើម​​​នៅ​​​ត្រង់​​​ផ្នែក​​​មួយ​​​នៃ​​​ផ្សារ​​​ជា​​​កន្លែង​​​ដែល​​​អាជីវករ​​​​​​លក់​​​មុង​​​ ភួយ ក្រណាត់ និង​​​ពូក​​​​​​​ ដែល​​​ជា​​​ប្រភេទ​​​ទំនិញ​​​​​​ងាយ​​​នឹង​​​ឆាប​​​ឆេះ។ សេចក្តី​​​ថ្លែង​​​ការណ៍​​​នេះ​​​មាន​​​ខ្លឹម​​​សារ​​​ដូច្នេះ​​​ថា “ដំបូង​​​ឡើយ​​​វា​​​លំបាក​​​ក្នុង​​​ការ​​​ពន្លត់​​​អគ្គិភ័យ​​​​ ព្រោះ​​​តូប​​​នីមួយ​​​ៗ​​​មាន​​​ដំបូល​​​ស័ង្កសី​​​ ដែល​​​ជា​​​ហេតុ​​​ធ្វើ​​​ឲ្យ​​​ពិបាក​​​បាញ់​​​ទឹក​​​ទៅ​​​​​​ក្នុង​​​តូប​​​”។

សេចក្តី​​​ថ្លែង​​​ការណ៍​​​នេះ​​​ក៏​​​បាន​​​បក​​​ស្រាយ​​​ពី​​​ពាក្យ​​​ចចាមអារ៉ាម ដែល​​​គេ​​​បង្ហោះ​​​ និង​​​ចែក​​​រំលែក​​​តាម​​​បណ្តាញ​​​ទំនាក់ទំនង​​​កាល​​​ពី​​​ម្សិលមិញ ដែល​​​ថា អគ្គិភ័យ​​​​​​នេះ​​​កើត​​​ឡើង​​​ដោយ​​​សារ​​​តែ​​​គេ​​​លួច​​​ដុត​​​​​​ក្នុង​​​គោល​​​បំណង​​​យក​​​កន្លែង​​​នេះ​​​ដើម្បី​​​អភិវឌ្ឍ​​​ផង​​​ដែរ​​​។

សេចក្តី​​​ថ្លែង​​​ការណ៍​​​នេះ​​​បាន​​​បក​​​ស្រាយ​​​ដូច្នេះ​​​ថា “សាលា​​​រាជ​​​ធានី​​​សូម​​​​​​ច្រាន​​​ចោល​​​ចំពោះ​​​ការ​​​លើក​​​ឡើង​​​​​​របស់​​​សាធារណជន​​​មួយ​​​ចំនួន​​​ ដែល​​​ថា មាន​​​នរណា​​​ម្នាក់​​​លួច​​​ដុត​​​ផ្សារ​​​នេះ​​​ដើម្បី​​​បើក​​​ផ្លូវ​​​ឲ្យ​​​មាន​​​ការ​​​អភិវឌ្ឍ​​​នោះ”។

តំបន់​​​ផ្សារ​​​ចាស់​​​ដែល​​​ជា​​​តំបន់​​​ដ៏​​​សំខាន់​​​ស្ថិត​​​នៅ​​​ភាគ​​​ខាង​​​ជើង​​​វត្ត​​​​​​ភ្នំ​​​ចន្លោះ​​​មហាវិថី​​​នរោត្តម និង​​​មាត់​​​ទន្លេ​​​ ត្រូវ​​​បាន​​​​​​គេ​​​សម្លឹង​​​ឃើញ​​​មក​​​ជា​​​យូរ​​​ហើយ​​​ថា ជា​​​កន្លែង​​​សម្រាប់​​​អភិវឌ្ឍ​​​ដ៏មាន​​​សក្ដានុពល​​​។ កាល​​​ពី​​​ខែ​​​មិថុនា ក្រុមហ៊ុន​​​ថៃ​​​​​​មួយ​​​បាន​​​ដាក់​​​សំណើ​​​ប្រែ​​​ក្លាយ​​​តំបន់​​​នេះ​​​ទៅ​​​ជា​​​ចំណត​​​រថយន្ត​​​ ដែល​​​មាន​​​កម្ពស់​​​ប្រាំបី​​​ជាន់​​​។

លោក ឡុង ឌីម៉ង់ អ្នក​​​នាំ​​​ពាក្យ​​​សាលា​​​រាជ​​​ធានី​​​បាន​​​លើក​​​ឡើង​​​កាល​​​ពីម្សិល​​​មិញ​​​ថា គ្មាន​​​កិច្ច​​​ព្រម​​​ព្រៀង​​​ណា​​​មួយ​​​ត្រូវ​​​បាន​​​ធ្វើ​​​ឡើង​​​ដើម្បី​​​អភិវឌ្ឍតំបន់​​​នេះ​​​ឡើយ។ លោក​​​បាន​​​មាន​​​ប្រសាសន៍​​​ថា “យើង​​​គ្មាន​​​គម្រោង​​​សាង​​​សង់​​​អគារ​​​ថ្មី​​​​​​នៅ​​​តំបន់​​​ផ្សារ​​​ចាស់​​​នេះ​​​ទេ ហើយ​​​ក៏​​​គ្មាន​​​​​​​​​​​​​​​​​​​​​​ការ​​​វិនិយោគ​​​ឯកជន​​​ [ដើម្បី​​​អភិវឌ្ឍ​​​តំបន់​​​នេះ]​​​ដែរ​​​”។

មនុស្ស​​​រាប់​​​រយ​​​នាក់​​​បាន​​​បន្ត​​​ដើរ​​​រើស​​​អ្វី​​​ដែល​​​ខ្លួន​​​អាច​​​​​​យក​​​បាន​​​មក​​​វិញ​​​​​​ ខណៈ​​​ពេល​​​នៅ​​​មាន​​​ផ្សែង​​​ហុយៗ​​​នៅ​​​ឡើយ​​​ រីឯ​​​អ្នក​​​រើស​​​អេត​​​ចាយ​​​វិញ​​​បាន​​​ទាញ​​​យក​​​កម្ទេចកម្ទី​​​លោហៈ​​​ដាក់​​​លើ​​​រទេះ​​​របស់​​​ខ្លួន​​​ កាល​​​ពី​​​រសៀល​​​ម្សិលមិញ។

នៅ​​​ពេល​​​អង្គុយ​​​លើ​​​កៅអី​​​មួយ​​​ លោក គួច ចំរើន អភិបាល​​​ខណ្ឌ​​​ដូន​​​ពេញ​​​​​​បាន​​​លើក​​​ឡើ​​​ង​​​ថា អាជ្ញាធរ​​​នឹង​​​ធ្វើ​​​ការ​​​ទាំង​​​យប់​​​ដើម្បី​​​បោស​​​សំអាត​​​តំបន់​​​នេះ​​​។ លោក​​​បាន​​​បន្ថែម​​​ថា តូប​​​ដែល​​​ត្រូវ​​​បាន​​​ឆាប​​​ឆេះ​​​ ហើយ​​​​​​អាច​​​រាប់​​​​​​ចំនួន​​​បាន​​​នៅ​​​ពេល​​​នេះ​​​ គឺ​​​មាន​​​ចំនួន​​​២២៩​​​តូប ដោយ​​​មាន​​​តូប​​​រាប់​​​រយ​​​ផ្សេង​​​ទៀត​​​ត្រូវ​​​រង​​​ការ​​​ខូច​​​ខាត​​​។

លោក​​​បាន​​​មាន​​​ប្រសាសន៍​​​ថា “យើង​​​បាន​​​ប៉ាន់​​​ប្រមាណ​​​ចំពោះ​​​ទំហំ​​​ទឹក​​​ប្រាក់​​​ដែល​​​បាន​​​ខាត​​​បង់​​​គឺ​​​ប្រហែល​​​១,៥​​​លាន​​​ដុល្លារ​​​។ រឿង​​​ដែល​​​សំខាន់​​​នៅ​​​ពេល​​​ឥឡូវ​​​នេះ​​​ គឺ​​​ត្រូវ​​​ដើរ​​​រក​​​របស់​​​របរ​​​ដែល​​​នៅ​​​សេស​​​សល់​​​ ហើយ​​​មើល​​​ថា តើ​​​យើង​​​អាច​​​យក​​​អ្វី​​​មក​​​វិញ​​​បាន​​​ខ្លះ​​​ ហេតុ​​​ដូច្នេះ​​​អាជីវករ​​​ទាំងអស់​​​អាច​​​វិល​​​ត្រឡប់​​​​​​មក​​​ ហើយ​​​សាង​​​សង់​​​តូប​​​របស់​​​ខ្លួន​​​​​​ឡើង​​​​​​វិញ​​​”៕ស៊ុយ​​​ឈាង​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស