នគរបាលបានបាញ់ស្លាប់បុរសអាយុ២៥ឆ្នាំម្នាក់ នៅកន្លែងជល់មាន់មួយកន្លែងក្នុងខេត្តត្បូងឃ្មុំកាលពីម្សិលមិញ ជាអ្វីដែលពួកគេបានអះអាងថាជាឧបទ្ទវហេតុមួយអំឡុងការឆ្មក់ចូលកន្លែងជល់មាន់ខុសច្បាប់។
លោក ម៉ៅ ពៅ ស្នងការនគរបាលខេត្តបានឲ្យដឹងថា លោក ឆាយ អឿន គឺស្ថិតក្នុងចំណោមអ្នកឈរមើលជាច្រើននាក់នៅខាងក្រៅកន្លែងជល់មាន់ក្នុងឃុំចាន់មូល ស្រុកមេមត់ នៅពេលនគរបាលស្រុកបានឆ្មក់ចូលទៅក្នុងកន្លែងនោះ ហើយបានចាប់ផ្ដើមបាញ់គំរាម ដើម្បីកុំឲ្យអ្នកដែលនៅកន្លែងជល់មាន់នោះរត់គេចខ្លួន។
លោកបានមានប្រសាសន៍ថា “ពួកគេ [នគរបាល] គ្មានបំណងបាញ់សម្លាប់មនុស្សនោះទេ។ ពួកគេបាញ់ដើម្បីគំរាមកុំឲ្យមនុស្សនៅកន្លែងជល់មាន់រត់គេចគេចខ្លួនតែប៉ុណ្ណោះ។ ពួកគេបានបាញ់ឡើងលើ ហើយគ្រាប់កាំភ្លើងមួយគ្រាប់ហោះទៅត្រូវដើមឈើរួចប្លាតមកចំបុរសម្នាក់នេះ”។
លោក ឆ ដារិទ្ធ នាយប៉ុស្តិ៍ឃុំចាន់មូល បានឲ្យដឹងថា នគរបាលបានឆ្មក់ចូលកន្លែងជល់មាន់មួយកន្លែងក្នុងភូមិគ នៅម៉ោងប្រហែល១១និង៣០នាទីព្រឹក ហើយបានចាប់ខ្លួនបុរសចំនួនប្រាំនាក់ ដែលនៅតែត្រូវបានឃុំខ្លួននៅអធិការដ្ឋាននគរបាលស្រុកនៅឡើយកាលពីរសៀលម្សិលមិញ។ លោកបានលើកឡើងទៀតថា នគរបាលរឹបអូសបានម៉ូតូចំនួន៤៥គ្រឿង មាន់ជល់ចំនួនប្រាំក្បាល និងមេអាប៉ោងមួយអំឡុងការឆ្មក់ចូលនោះ។ លោកបានមានប្រសាសន៍ថា ” នគរបាលបានបាញ់ឡើងលើ។ ឆាយ អឿន បានស្លាប់ភ្លាមៗបន្ទាប់ពីគាត់ត្រូវគ្រាប់ក្បែរដោះខាងឆ្វេង”។
លោក ដារិទ្ធ បានលើកឡើងបន្តថា ក្រុមលេងល្បែងស៊ីសងខុសច្បាប់បានមានសកម្មភាពនៅក្នុងឃុំនេះប្រហែល១ខែមកហើយ ដោយបានប្ដូរកន្លែងជល់មាន់ជាច្រើនកន្លែងដើម្បីគេចពីនគរបាល។
លោក មួង ឈាង មេភូមិគបានលើកឡើងថា បុរសដែលនៅកន្លែងជល់មាន់អំឡុងការការចុះបង្ក្រាបរបស់នគរបាលបានប្រាប់គាត់ថា នគរបាលបានបាញ់ភ្ជុចដីមិនមែនបាញ់ឡើងលើទេ។ លោកបានមានប្រសាសន៍ថា “អ្នកភូមិដែលឃើញការចុះបង្ក្រាបនេះបាននិយាយថា នគរបាលបានបាញ់ចំនួនប្រាំពីរគ្រាប់ភ្ជុចដី។ គាត់ [ឆាយ អឿន] បានត្រូវគ្រាប់ត្រង់ទ្រូងខណៈកំពុងអង្គុយលើម៉ូតូរបស់ខ្លួន”។
លោក សេង គុណ អាយុ៤២ឆ្នាំ ជាឪពុកក្មេករបស់ ឆាយ អឿន បានឲ្យដឹងថា គាត់ជឿជាក់ថា នគរបាលមានបំណងសម្លាប់កូនប្រសារបស់ខ្ញុំ។ លោកបាននិយាយថា “អាជ្ញាធរមានបំណងសម្លាប់កូនប្រសារបស់ខ្ញុំ។ ប្រសិនបើនគរបាលបាញ់គ្រាន់តែគំរាមនោះ ម្លេ៉ះគ្រាប់កាំភ្លើងមិនហោះទៅត្រូវទ្រូងរបស់គាត់ឡើយ វាអាចនឹងហោះទៅកន្លែងផ្សេង ហើយគាត់ប្រហែលជាមិនស្លាប់នោះទេ”៕ ស៊ុយឈាង