កាលពីម្សិលមិញ តំណាងរាស្ត្របីរូបមកពីគណៈកម្មការសិទ្ធិមនុស្សនៃរដ្ឋសភា ដែលដឹកនាំដោយលោក អេង ឆៃអ៊ាង តំណាងរាស្ត្រគណបក្សសង្គ្រោះជាតិ បានវិលត្រឡប់ពីការបំពេញបេសកកម្មរយៈពេលពីរថ្ងៃចុះទៅពិនិត្យមើលស្ថានភាពសហគមន៍ចំនួនបួនក្នុងខេត្តកោះកុង ដែលមានវិវាទដីធ្លីជាមួយក្រុមហ៊ុនដែលមានដីសម្បទានឯកជន។
លោក អេង ឆៃអ៊ាង ដែលអមដំណើរដោយលោក ឡូយ សុផាត និងលោកស្រី ឡោក ខេង ដែលជាតំណាងរាស្ត្រគណបក្សប្រជាជនកម្ពុជា បានមានប្រសាសន៍ថា គោលបំណងនៃការចុះទៅដល់មូលដ្ឋាននេះ គឺដើម្បីនិយាយជាមួយគ្រួសារដែលរងផលប៉ះពាល់ដោយសារវិវាទដីធ្លីនៅក្នុងស្រុកស្រែអំបិល ស្រុកបទុមសាគរ និងស្រុកគិរីសាគរ។
ក្រោយពីដំណើរចុះទៅដល់មូលដ្ឋាននេះ តំណាងរាស្ត្រទាំងនេះបានលើកឡើងថា ពួកលោកបានអំពាវនាវឲ្យរដ្ឋាភិបាលពិនិត្យមើលឡើងវិញនូវសម្បទាន ដែលផ្ដល់ឲ្យក្រុមហ៊ុនពាក់ព័ន្ធដូចជា ក្រុមហ៊ុន Heng Huy Agricultural Group ក្រុមហ៊ុន Union Development Group និងក្រុមហ៊ុនពីរទៀតដែលពាក់ព័ន្ធនឹងលោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា ដែលមានដូចជាក្រុមហ៊ុន Koh Kong SEZ និងក្រុមហ៊ុន Koh Kong Sugar។
លោក អេង ឆៃអ៊ាង បានមានប្រសាសន៍ថា “យើងបានមើលឃើញថា ក្រុមហ៊ុនទាំងនេះមិនបានគោរពតាមគោលនយោបាយរបស់រដ្ឋាភិបាលទេ ហើយបានពាក់ព័ន្ធនឹងការបណ្ដេញចេញទាំងបង្ខំ និងការដុតបំផ្លាញផ្ទះសំបែងរបស់អ្នកភូមិ ហេតុដូច្នេះហើយយើងនឹងស្នើឲ្យរដ្ឋាភិបាលពិនិត្យមើល [សម្បទានរបស់ពួកគេ]”។ លោកបានមានប្រសាសន៍បន្ថែមទៀតថា គណៈកម្មការនេះនឹងកោះហៅលោកអភិបាលខេត្ត ប៊ុន ឡឺត និងអាជ្ញាធរពាក់ព័ន្ធផ្សេងទៀតដើម្បីធ្វើការសាកសួរនៅរដ្ឋសភា។
លោក ឡូយ សុផាត តំណាងរាស្ត្រគណបក្សប្រជាជនកម្ពុជា ក៏បានមានប្រសាសន៍ដែរថា មានភ័ស្តុតាងយ៉ាងច្បាស់បង្ហាញថា ក្រុមហ៊ុនមួយចំនួននៅក្នុងខេត្តកោះកុង “មិនបានគោរពតាមគោលនយោបាយរបស់រដ្ឋាភិបាលទេ”។ លោកបានមានប្រសាសន៍បន្តថា “យើងបានមើលឃើញស្ថានភាពនៅទីនេះដោយផ្ទាល់ភ្នែក និងបានស្ដាប់ឮក្ដីបារម្ភរបស់អ្នកភូមិ ហើយមានការយល់ដឹងច្រើនជាងមុនអំពីបញ្ហានៅទីនេះ។ យើងនឹងបន្តស៊ើបអង្កេតករណីនីមួយៗ”។
លោក អុិន គង់ចិត្រ មន្ត្រីសម្របសម្រួលនៅអង្គការសិទ្ធិមនុស្សក្នុងស្រុកលីកាដូ ប្រចាំខេត្តកោះកុង បានមានប្រសាសន៍ថា គណៈប្រតិភូនេះបានជួបជាមួយប្រជាពលរដ្ឋចំនួន៥២១គ្រួសារ នៅក្នុងស្រុកចំនួនបីនេះ។ ប៉ុន្តែលោកបានលើកឡើងដែរថា លោកមានមន្ទិលថា របាយការណ៍របស់គណៈកម្មការនេះនឹងគ្មានឥទ្ធិពលលើស្ថានភាពរបស់អ្នកភូមិទាំងនេះឡើយ។
លោកបានមានប្រសាសន៍ទៀតថា “រដ្ឋាភិបាលតែងតែធ្វើអ្វីទៅតាមបុព្វសិទ្ធិផ្ទាល់ខ្លួន ដោយចុះហត្ថលេខាលើសម្បទានដីធ្លីដោយមិនស្ដាប់ពាក្យបណ្ដឹង។ ដូច្នេះ ខ្ញុំមិនសូវមានសង្ឃឹមថា ការចុះទៅពិនិត្យនេះនឹងដោះស្រាយវិវាទនេះបានឡើយ ពីព្រោះរដ្ឋាភិបាលគឺជាអ្នកធ្វើសេចក្ដីសម្រេច និងជាអ្នកដែលបានចុះកិច្ចសន្យាទាំងនេះ”៕ សុខុម