ប្រធានអង្គភាពប្រឆាំងអំពើពុករលួយ (ACU) បានលើកឡើងកាលពីម្សិលមិញថា លោកនឹងបញ្ជូនមន្ត្រីទៅប្រទេសសិង្ហបុរីនៅថ្ងៃនេះសម្រាប់ការសើុបអង្កេត ”ដំណាក់កាលចុងក្រោយ” លើករណីពុករលួយក្នុងក្រសួងសុខាភិបាល ដែលត្រូវបានលាតត្រដាងលើកដំបូងនៅក្នុងការសើុបអង្កេតមួយដែលមូលនិធិពិភពលោកដើម្បីប្រយុទ្ធប្រឆាំងជំងឺអេដស៍ របេង និងគ្រុនចាញ់ បានប្រកាសជាសាធារណៈកាលពីខែវិច្ឆិកា ឆ្នាំមុន។
ក្នុងចំណោមលទ្ធផលរកឃើញដ៏អាក្រក់បំផុតនៅក្នុងការសើុបអង្កេតរបស់មូលនិធិពិភពលោក (Global Fund) គឺថា មន្ត្រីនៅមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ បារ៉ាស៊ីតសាស្ត្រ-បាណកសាស្ត្រ (CNM) បានឃុបឃិតជាមួយក្រុមហ៊ុនផលិតមុងបរទេស ដើម្បីកឹបកេងប្រាក់របស់មូលនិធិពិភពលោក ដែលទុកសម្រាប់ប្រើប្រាស់នៅក្នុងការប្រយុទ្ធប្រឆាំងជំងឺគ្រុនចាញ់។
ប្រាក់ជាង៣៥០.០០០ដុល្លារត្រូវបានសូកប៉ាន់ទៅលោក ឌួង សុជាតិ ដែលបានចូលនិវត្តពីតំណែងប្រធានរបស់ CNM កាលពីឆ្នាំ២០១១ និងប្រហែល៦០.០០០ដុល្លារសូកប៉ាន់អនុប្រធានរបស់លោក នេះបើយោងតាមរបាយការណ៍ដែលលើកឡើងថា ក្រុមហ៊ុន Vestergaard Frandsen របស់ប្រទេសស្វីស និងក្រុមហ៊ុន Sumitomo Chemical Singapore របស់ប្រទេសសិង្ហបុរី បានសូកប៉ាន់មន្ត្រីទាំងនេះដើម្បីទទួលបានកិច្ចសន្យារបស់មូលនិធិពិភពលោក។
បន្ទាប់ពីកិច្ចប្រជុំមួយជាមួយគណៈកម្មការប្រឆាំងអំពើពុករលួយនៃរដ្ឋសភាកាលពីម្សិលមិញ លោក ឱម យិុនទៀង ប្រធានអង្គភាពប្រឆាំងអំពើពុករលួយបានមានប្រសាសន៍ថា ពេលនេះអង្គភាពរបស់លោកកំពុងធ្វើសហប្រតិបត្តិការជាមួយមន្ត្រីសិង្ហបុរី ដើម្បីបញ្ចប់ការសើុបអង្កេតនេះ។ លោកបានមានប្រសាសន៍ទៀតថា “ថ្ងៃស្អែកយើងនឹងបញ្ជូនអ្នកសើុបអង្កេតរបស់យើងទៅសិង្ហបុរី។ ខ្ញុំគិតថា វាជាដំណាក់កាលចុងក្រោយនៃការសើុបអង្កេតសរុបរបស់យើង”។
នៅពេលក្រុមអ្នកយកព័ត៌មានសាកសួរថា ហេតុអ្វីបានជាការសើុបអង្កេតរបស់អង្គភាពប្រឆាំងអំពើពុករលួយចំណាយពេលយូរម្លេ៉ះ ដោយសារថា មូលនិធិពិភពលោកបានធ្វើកិច្ចការនេះជាច្រើនរួចមកហើយនោះ លោក ឱម យិុនទៀង ហាក់ដូចជារួញរា។ លោកបានឆ្លើយតបថា “វាមិនទាន់លើសមួយឆ្នាំនៅឡើយផង វាមិនយូរពេកទេ។ អស់លោកនិយាយថា មានភ័ស្តុតាងគ្រប់គ្រាន់ ប៉ុន្តែ តើអស់លោកប្រាកដទេ?”។
លោក អ៊ាង មូលី ប្រធានគណៈកម្មការសម្របសម្រួលរបស់មូលនិធិពិភពលោកប្រចាំប្រទេសកម្ពុជា បានមានប្រសាសន៍ថា លោកមិនទាន់ទទួលបានការជូនដំណឹងអំពីស្ថានភាពនៃការសើុបអង្កេតរបស់អង្គភាពប្រឆាំងអំពើពុករលួយនៅឡើយទេ។ និយាយអំពីជោគវាសនារបស់លោក ឌួង សុជាតិ វិញ លោក អ៊ាង មូលី បានបដិសេធមិនធ្វើការប៉ាន់ស្មានថា តើចុងក្រោយនឹងមានវិធានការផ្លូវច្បាប់ឬយ៉ាងណាឡើយ។ លោកបានលើកឡើងថា “អ្វីដែលខ្ញុំដឹងគឺថា គាត់ [លោក សុជាតិ] បានសងប្រាក់នោះវិញហើយ។ ប៉ុន្តែ ថាតើនឹងមានការចោទប្រកាន់ឬយ៉ាងណានោះ ខ្ញុំមិនដឹងទេ។ វាស្រេចលើអង្គភាពប្រឆាំងអំពើពុករលួយ”៕សុខុម (រាយការណ៍បន្ថែមដោយ Colin Meyn)