40.6 C
Phnom Penh

ជន​ជាតិ​​ភាគ​តិច​ម៉ុងតាញ៉ា​កំពុង​លាក់​ខ្លួន​ក្នុង​ខេត្ត​រតនគិរី តែ​នៅ​មាន​សង្ឃឹម

ដោយ ឌឹ ខេមបូឌា ដេលី

បទវិភាគ

ស្រុក​លំផាត់, ខេត្ត​រតនគិរី-ក្រោម​ស្បៃ​ងងឹត​ក្នុង​ព្រៃ​ជ្រៅ​នៃ​ខេត្ត​ភាគឦសាន លោក រ៉ាស់ លេនវ៉ាន បាន​និយាយ​រៀបរាប់​អំពី​ការ​ធ្វើ​បាប​គាប​សង្កត់ រហូត​ដល់​រូបគាត់​និង​ជនជាតិ​ម៉ុងតាញ៉ា​៧​នាក់​ផ្សេងទៀត​បង្ខំ​ចិត្ត​រត់​ភៀសខ្លួន​ពី​ប្រទេស​វៀតណាម មក​ប្រទេស​កម្ពុជា​កាលពី​ថ្ងៃ​ទី​៣០​ខែ​តុលា។

លោក លេនវ៉ាន អាយុ​២៨​ឆ្នាំ បាន​និយាយ​កាលពី​យប់​ថ្ងៃ​ពុធ ដោយ​សំដៅ​លើ​មូលនិធិ​មាន​មូលដ្ឋាន​នៅ​អាមេរិក ដែល​គាំទ្រ​សិទ្ធិ​ក្រុម​ជនជាតិ​ភាគ​តិច​ម៉ុងតាញ៉ា​ថា “ប៉ូលិស​បាន​គំរាម​ចាប់​ខ្លួន​ខ្ញុំ​និង​សម្លាប់​ខ្ញុំ បើ​ខ្ញុំចូលរួម​ជាមួយ​អ្នក​ដែល​គាំទ្រ​មូលនិធិ ដេហ្គា Degar Foundation និង​បន្ត​គោរព​ប្រតិបត្តិ​សាសនា​គ្រិស្ត​ទៀត​នោះ ដូច្នេះ ខ្ញុំ​បាន​សម្រេច​ចិត្ត​រត់​ភៀសខ្លួន​ពី​ប្រទេស​វៀតណាម​ម្តងទៀត”។

លោក​បាន​និយាយ​ថា ការ​ព្យាយាម​លើក​ដំបូង​របស់​លោក​រត់​ភៀសខ្លួន​ចេញ​ពី​ប្រទេស​កំណើត បានជួប​នឹង​បរាជ័យ បន្ទាប់ពី​អាជ្ញាធរ​បាន​រក​ឃើញ​រូបលោក​លាក់​ខ្លួន​ក្នុង​ក្រុង​ភ្នំពេញ​កាលពី​ឆ្នាំ​២០០៨ ហើយ​បាន​នាំ​លោក​ត្រឡប់​ទៅ​ប្រទេស​វៀតណាម​វិញ។ លោក លេនវ៉ាន បាន​និយាយ​ថា គាត់​បាន​ជាប់​ឃុំ​មួយ​រយៈ​ពេល​ខ្លី​នៅ​ពន្ធនាគារ​ខេត្ត​ ជី ឡាយ ប្រទេស​វៀតណាម មុន​ពេល​បញ្ចូល​ជាថ្មី​ទៅ​ក្នុង​សង្គម​មួយ​ដែល​គ្រប់គ្រង​យ៉ាង​តឹង​ដោយ​គណបក្ស​កម្មុយនិស្ត ដែលបាន​ធ្វើ​ទុក្ខ​បុកម្នេញ​ក្រុម​ម៉ុងតាញ៉ា​ ឬ​ហៅ​ថា ដេហ្គា (Degars) ជា​យូរ​មកហើយ ជា​ក្រុម​ជនជាតិ​ដើម​ភាគតិច​កាន់គ្រិស្ត​សាសនា​ភាគច្រើន មកពី​តំបន់​ខ្ពង់រាប​កណ្តាល​ប្រទេស​វៀតណាម។

រឿងរ៉ាវ​របស់​លោក លេនវ៉ាន គឺ​ដូច​គ្នា​នឹង​រឿង​របស់​ជនជាតិ​ម៉ុងតាញ៉ា​១៣​នាក់ ដែល​បាន​ឆ្លង​ចូល​ប្រទេស​កម្ពុជា​កាលពី​ខែ​មុន ហើយ​សព្វ​ថ្ងៃ​កំពុង​លាក់​ខ្លួន​ពួន​សម្ងំ​នៅ​ស្រុក​លំផាត់។​ ដោយ​ចែក​ជា​៣​ក្រុម បុរស​១២​នាក់​និង​ស្ត្រី​ម្នាក់ រហូត​មកដល់​ពេល​នេះ​បាន​ព្យាយាម​គេចចេញ​ពី​ការ​ចាប់​ខ្លួន​ពី​សំណាក់​ប៉ូលិស​មូលដ្ឋាន។

ពេល​ឆ្លង​ព្រំដែន លោក លេនវ៉ាន បាន​ជួប​បង​ប្រុស រ៉ាស់ លេនផល និង​បង​ប្អូន​បង្កើត កូសាល យ៉ុនណា និង​ កូសាល លី ដែល​ទាំង​អស់​គ្នា​បាន​ចូល​ប្រទេស​នេះ​តាម​កន្លែង​ដោយ​ឡែក​ពីគ្នា តាម​ព្រៃ​បណ្តោយ​ព្រំដែន​ដែល​ងាយ​ឆ្លង​ចូល នៅ​ខេត្ត​រតនគិរី។ អ្នក​ភូមិ​ជនជាតិ​ដើម​ភាគ​តិច​ចារ៉ាយ​បាន​ជួប​អ្នក​ទាំង​បួន ហើយ​បាន​នាំ​ពួកគេ​ទៅ​កន្លែង​មួយ​ក្នុង​ព្រៃ និង​បាន​ផ្តល់​កន្ទេល ទឹក និង​អង្ករ​ដល់​ពួកគេ។

និយាយ​ជា​ភាសា​ចារ៉ាយ​របស់​ខ្លួន ដោយ​មាន​ការ​បកប្រែ​ជា​ភាសា​ខ្មែរ លោក យ៉ុនណា អាយុ​២០​ឆ្នាំ បាន​រៀបរាប់​អំពី​ការ​រស់​នៅ​ក្រោម​ការ​តាម​ឃ្លាំ​មើល​ជា​ប្រចាំ​របស់​វៀតណាម និង​មាន​សេរីភាព​តិចតួច​ចំពោះ​ជនជាតិ​ភាគតិច​ម៉ុងតាញ៉ា។

លោក យ៉ុនណា បាន​និយាយ​ថា “ប៉ូលិស​បាន​ចាប់​ខ្លួន​ខ្ញុំ ពីព្រោះ​ខ្ញុំ​កាន់​សាសនា​គ្រិស្ត ហើយ​ពួកគេ​បាន​ឃើញ​ខ្ញុំ​មាន​ទង់​មូលនិធិ ដេហ្គា លើ​ហ្វេសប៊ុក​របស់​ខ្ញុំ”។ លោក​បាន​បន្ថែម​ថា លោក​ត្រូវ​ប៉ូលិស​វាយ​ធ្វើ​បាប​យ៉ាង​ដំណំ ​នៅ​ពេល​ជាប់​គុក​កាលពី​ខែ​មិថុនា។

ធ្វើ​ដំណើរ​តាម​ផ្លូវ​លំ​បត់បែន​កាត់​ដី​ព្រៃ​របោះ អ្នក​រៀបចំ​ការ​ណាត់​ជួប​បាន​នាំ​អ្នក​យក​ព័ត៌មាន​ឆ្លង​ស្ទឹង​មួយ​ទៅ​ជួប​ក្រុមម៉ុងតាញ៉ា​មួយ​ផ្សេងទៀត​មាន​គ្នា​បួន​នាក់ ដែល​បាន​លេច​មុខ​ចេញ​ពីខ្ទម​ឈើ​មួយ។

លោក ណាយ ក្លេញ ដែល​បាន​ចូល​ប្រទេស​កម្ពុជា​កាលពី​ថ្ងៃ​ទី​៣០​ខែ​តុលាដែរ​នោះ បាន​អះអាង​ថា គាត់​ត្រូវ​អាជ្ញាធរ​វៀតណាម​ធ្វើ​ទារុណកម្ម បន្ទាប់ពី​ជាប់​គុក​នៅ​ឆ្នាំ​២០០៨​និង​ឆ្នាំ​២០១១ ហើយ​បាន​ភៀសខ្លួន​មក​ប្រទេស​កម្ពុជា ព្រោះ​ខ្លាច​ថា គាត់​នឹង​ត្រូវ​គេ​ចាប់​ម្តង​ទៀត។

លោក ក្លេញ បាន​និយាយ​ថា “លើកទី​មួយ​ដែល​ពួកគេ​ចាប់​រូប​ខ្ញុំ ពួកគេ​បាន​ចង​ដៃ​របស់​ខ្ញុំ​ក្រពាត់​ទៅ​ក្រោយ ហើយ​អាជ្ញាធរ​វាយ​ខ្ញុំ​នឹង​ដំបង​វែង និង​យក​ដែក​ស្រួច​ចាក់​ខ្នង​ខ្ញុំ បន្ទាប់ពី​ពួកគេ​បាន​ដឹង​ថា ខ្ញុំ​បាន​ជួប​ជាមួយគ្រិស្តសាសនិក​ផ្សេងទៀត”។

បន្ទាប់ពី​ជាប់​គុក​មួយ​ខែ កសិករ​អាយុ​៤០​ឆ្នាំ​មកពី​ខេត្ត​ចាឡាយ​រូប​នេះ​បាន​និយាយ​ថា អាជ្ញាធរ​បាន​តាម​ដាន​និង​រំខាន​យាយី​រូបគាត់ មុនពេល​ចាប់​ខ្លួន​ម្តងទៀត​កាលពី​ខែ​វិច្ឆិកា​ឆ្នាំ​២០១១ ព្រោះតែ​មាន​ការ​ទាក់ទង​សាច់ញាតិ​ម្នាក់​នៅ​អាមេរិក​តាម​អិុនធើណិត ជាហេតុ​នាំ​ឲ្យ​មាន​ការ​ចោទ​ប្រកាន់​ថា គាត់​”ទាក់ទង​ជាមួយ​ចលនា​តស៊ូ​ប្រឆាំង​វៀតណាម”។

ក្នុង​ក្រុម​ជាមួយ​លោក ក្លេញ នេះ​ដែរ គឺ សាល យឿម ជា​ស្ត្រី​តែ​ម្នាក់​ក្នុង​ចំណោម​មនុស្ស​១៣​នាក់ ដែល​បាន​និយាយ​ថា អ្នកស្រី​ក៏​ត្រូវ​គេ​ចាប់​ដាក់​គុក​ពីបទ​ចូលរួម​ក្នុង​ពិធី​សាសនា​គ្រិស្ត​សម្ងាត់​ដែរ។

ជាយូរ​មក​ហើយ រដ្ឋាភិបាល​ក្រុង​ហាណូយ​មាន​អរិភាព​ជាមួយ​ក្រុម​ជនជាតិ​ដើម​ភាគតិច​ម៉ុងតាញ៉ា ព្រោះតែ​ភាពស្មោះត្រង់​របស់​ពួកគេ​ចំពោះ​កម្លាំង​អាមេរិក​ក្នុង​សង្គ្រាម​ឥណ្ឌូចិន​លើក​ទី​២ ជំនឿ​សាសនា​របស់​ពួកគេ និង​សេចក្តី​សង្ឃឹម​មាន​យូរ​មក​ហើយ​ គឺ​ចង់​បាន​មាតុភូមិ​ស្វ័យយ័ត​មួយ។

កាលពី​ឆ្នាំ​២០០១ ម៉ុងតាញ៉ា​បាន​ធ្វើ​ការ​តវ៉ា​មហាជន​ដែល​ត្រូវ​បាន​ប៉ូលិស​វៀតណាម​បង្ក្រាប​យ៉ាង​ហិង្សា។ ជា​លទ្ធផល មនុស្ស​ជាង​១.០០០​នាក់​បាន​ភៀស​ខ្លួន​ឆ្លង​ព្រំដែន​ដើម្បី​ស្វែង​រក​សិទ្ធិ​ជ្រកកោន​នៅ​ខេត្ត​មណ្ឌល​គិរី និង​ខេត្ត​រតនគិរី។

ព្រឹត្តិការណ៍​បន្តបន្ទាប់​ស្រដៀង​គ្នា​បាន​កើត​ឡើង​នៅ​ឆ្នាំ​២០០៤ ដោយ​មាន​ជន​ម៉ុងតាញ៉ា​រាប់រយ​នាក់​ទៀត​ឆ្លង​ចូល​ប្រទេស​កម្ពុជា។

ការិយាល័យ​នៃ​ឧត្តម​ស្នងការ​អង្គការ​សហ​ប្រជាជាតិ​ទទួល​បន្ទុក​ជន​ភៀសខ្លួន (UNHCR) បាន​រៀបចំ​ជំរំ​ក្នុង​ខេត្ត​ទាំង​ពីរ​នេះ​ដើម្បី​ការពារ​ជន​ស្វែងរក​សិទ្ធិ​ជ្រកកោន ហើយ​ជនជាតិ​ភាគតិច​ម៉ុងតាញ៉ា​ប្រហែល​២.០០០​នាក់​បាន​ទៅ​តាំង​ទី​លំនៅ​ជាថ្មី​នៅ​សហរដ្ឋ​អាមេរិក​នៅ​រវាង​ឆ្នាំ​២០០១​និង​ឆ្នាំ​២០០៤។

ក្រុម​ជនជាតិ​ភាគតិច​ម៉ុងតាញ៉ា ដែល​បច្ចុប្បន្ន​កំពុង​លាក់​ខ្លួន​ក្នុង​ខេត្ត​រតនគិរី មាន​សង្ឃឹម​ថា អង្គការ​សហប្រជាជាតិ​នឹង​ជួយ​អន្តរាគមន៍​ជាថ្មី និង​មាន​មន្ទិល​​អំពី​ការ​ប្រព្រឹត្ត​ឃោរឃៅ​ដែល​ពួកគេ​នឹង​ទទួល​រង បើ​ត្រូវ​ចាប់​បញ្ជូន​ឆ្លង​ព្រំដែន​ត្រឡប់​ទៅ​វិញ​នោះ។

លោក យ៉ុនណា បាន​និយាយ​ថា “ខ្ញុំ​សូម​អំពាវនាវ​ដល់​ UNHCR ឲ្យ​ជួយ​យើង​ផង។ ខ្ញុំ​មិន​ខ្វល់​ថា​ពួកគេ​បញ្ជូន​យើង​ទៅ​ទីណា​នោះ​ទេ នោះ​ជា​សេចក្តី​សម្រេច​របស់​ពួកគេ”។

លោក​ស្រី វីវៀន តាន (Vivian Tan) មន្ត្រី​ផ្នែក​ព័ត៌មាន​ប្រចាំ​តំបន់​នៅ​ការិយាល័យ​ឧត្តម​ស្នង​ការ​សហ​ប្រជា​ជាតិ​ទទួល​បន្ទុក​ជនភៀស​ខ្លួន​ក្នុង​ក្រុង​បាងកក បាន​និយាយ​កាលពី​ថ្ងៃ​សៅរ៍​ថា អង្គការ​នេះ​បាន​ធ្វើ​ការ​ជាមួយ​អាជ្ញាធរ​កម្ពុជា ដើម្បី​ធានា​សុវត្ថិភាព​ក្រុម​នេះ។

លោកស្រី​ តាន បាន​និយាយ​ថា “ការ​ពិភាក្សា​កំពុង​ធ្វើ​ជាមួយ​រដ្ឋាភិបាល​​​ដើម្បី​ព្យាយាម​បញ្ជូន​ក្រុម​នេះ​ចេញ​ពី​កន្លែង​សព្វ​ថ្ងៃ​របស់​ពួកគេ ទើប​ពួកគេ​អាច​ទទួល​បាន​ដំណើរការ​រៀបចំ​បែបបទ​សុំសិទ្ធិ​ជ្រកកោន”។

ប៉ុន្តែ​ក្រុម​ម៉ុងតាញ៉ា​ដែល​គេ​សម្ភាស​កាលពី​ថ្ងៃ​ពុធ មាន​ជំនឿ​ទុក​ចិត្ត​តិចតួច​ដែល​ថា​អាជ្ញាធរ​មូល​ដ្ឋាន​នឹង​អាណិតអាសូរ​ដល់​បុព្វហេតុ​របស់​ពួកគេ​នោះ។

លោក យ៉ុនណា​ បាន​និយាយ​ថា “ខ្ញុំ​បារម្ភ​ណាស់​ថា​យើង​នឹង​ត្រូវ​គេ​ចាប់​ជា​មិន​ខាន​ ព្រោះអី​ យើង​ដឹង​ថា ​ប៉ូលិស​ឃុំ​កំពុង​ស្វែងរក​ពួកយើង”។

កាលពី​ថ្ងៃ​ច័ន្ទ ប៉ូលិស​ក្នុង​ស្រុក​អូរយ៉ាដាវ​ ខេត្ត​រតនគិរី ដែល​មាន​ព្រំប្រទល់​ជាប់​ស្រុក​លំផាត់ បាន​និយាយ​ថា ពួកគេ​កំពុង​ស្វែង​រក​ជនជាតិ​ដើម​ភាគ​តិច​ម៉ុងតាញ៉ា​មួយ​ក្រុម បន្ទាប់ពី​បាន​ទទួល​ព័ត៌មាន​ពី​អ្នកភូមិ​មូលដ្ឋាន ដែល​បាន​ប្រទះ​ឃើញ​ពួកគេ​កំពុង​លាក់​ខ្លួន​ក្នុង​ព្រៃ។

លោក ជា ប៊ុនធឿន ស្នងការ​រង​នគរបាល​ខេត្ត​បាន​ប្តេជ្ញា​នឹង​បញ្ជូន​”ជន​អន្តោប្រវេសន៍​ខុស​ច្បាប់”​ចេញ ប្រសិនបើ​ចាប់​បាន​ពួកគេ​នោះ។

លោក យ៉ុនណា យល់​ច្បាស់​ណាស់​អំពី​គ្រោះថ្នាក់​ដែល​ក្រុម​នេះ​ប្រឈម ប្រសិនបើ​ត្រូវ​គេ​បញ្ជូន​ទៅ​ប្រទេស​វៀតណាម​វិញ​នោះ។ លោក​បាន​និយាយ​ទៀត​ថា “បើ​យើង​ត្រូវ​អាជ្ញាធរ​ខ្មែរ​ចាប់​ខ្លួន​និង​បញ្ជូន​ត្រឡប់​ទៅ​វៀតណាម​វិញ​មែន​នោះ ខ្ញុំ​គិត​ថា ពួកគេ​នឹង​សម្លាប់​យើង​ចោល​ហើយ”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស