កាលពីថ្ងៃសុក្រ រដ្ឋសភាបានអនុម័តថវិកាជាតិចំនួន៣,៨ពាន់លានដុល្លារសម្រាប់ឆ្នាំ២០១៥ ទោះបីជាក្រុមតំណាងរាស្ត្រគណបក្សប្រឆាំងបានរិះគន់សេចក្តីព្រាងថវិកានេះយ៉ាងខ្លាំងថា ខ្វះសេចក្តីលម្អិត និងមិនបានបោះឆ្នោតក្តី។
កាលពីពេលព្រឹក គណបក្សប្រជាជនកម្ពុជាកំពុងកាន់អំណាច បានធ្វើការបោះឆ្នោតដើម្បីលើកយកសេចក្តីព្រាងច្បាប់នេះមកពិភាក្សាដេញដោល ដោយតំណាងរាស្ត្រចំនួន៦៥រូបបានបោះឆ្នោតគាំទ្រ ចំណែកឯតំណាងរាស្ត្រគណបក្សសង្គ្រោះជាតិចំនួន៤៧រូបមិនបានបោះឆ្នោតនោះទេ។ នៅចុងបញ្ចប់នៃការពិភាក្សាដេញដោលពេញមួយថ្ងៃនេះ តំណាងរាស្ត្រគណបក្សប្រឆាំងដែលមានវត្តមាននៅក្នុងរដ្ឋសភា នៅសល់តែ១៩រូបប៉ុណ្ណោះ នៅពេលគណបក្សកាន់អំណាចបោះឆ្នោតអនុម័តថវិកានេះនៅវេលាម៉ោង៦ល្ងាច។
ថវិកាជាតិឆ្នាំ២០១៥ ដែលបានរាប់បញ្ចូលការចំណាយ៤០០លានដុល្លារបន្ថែមពីលើឆ្នាំ២០១៤ និងដែលបានលៃទុកថវិកាភាគច្រើនសម្រាប់វិស័យការពារជាតិ សន្តិសុខ និងអប់រំនេះ មិនបានផ្តល់ការវិភាគលម្អិតថា តើត្រូវចំណាយថវិកាទាំងនោះដោយរបៀបណាឡើយ។
លោក យឹម សុវណ្ណ តំណាងរាស្ត្រគណបក្សសង្គ្រោះជាតិ និងជាអ្នកនាំពាក្យគណបក្សនេះ បានមានប្រសាសន៍ថា គណបក្សរបស់លោកមិនបានចូលរួមបោះឆ្នោតទេ ពីព្រោះសេចក្តីព្រាងថវិកានេះមាន “ចន្លោះប្រហោងច្រើន” ពាក់ព័ន្ធនឹងចំណូលចំណាយ។
លោកបានមានប្រសាសន៍អំឡុងសម័យប្រជុំសភាពេញអង្គថា “ជាធម្មតា ដើម្បីអនុម័តសេចក្តីព្រាងច្បាប់ដ៏មានសារៈសំខាន់មួយសម្រាប់ការអភិវឌ្ឍប្រទេស យ៉ាងហោចណាស់ក៏ត្រូវការពេលពីរបីខែដែរ ដើម្បីសិក្សាស៊ីជម្រៅលើចំណូលដែលរដ្ឋប្រមូលបាន និងប្រមូលបានពីគ្រប់ប្រភពទាំងអស់តាមរយៈការយកពន្ធ ព្រមទាំងការចំណាយដោយវិស័យនានាផង [ដើម្បីធានាបាននូវ] ផ្លូវត្រឹមត្រូវ និងប្រសិទ្ធភាព”។
នៅពេលទាក់ទងតាមទូរស័ព្ទ លោក យឹម សុវណ្ណ បានអះអាងថា រដ្ឋអាចទទួលបានចំណូល១.០០០លានដុល្លារបន្ថែមទៀត ប្រសិនបើរដ្ឋាភិបាលប្រមូលពន្ធមានប្រសិទ្ធភាពជាងនេះ។ លោកមានប្រសាសន៍ថា “វិស័យដែលយើងអាចរកចំណូលបានបន្ថែមទៀត គឺពីក្រុមហ៊ុនកាស៊ីណូ និងជាពិសេសពន្ធលើប្រេងសាំង ដែលអាចរកបានចន្លោះពី២០០ទៅ៣០០លានដុល្លារក្នុងមួយឆ្នាំ”។
លោកបានមានប្រសាសន៍បន្តថា គណបក្សប្រឆាំងក៏ចង់ឃើញការបង្កើនការចំណាយលើវិស័យអប់រំ វិស័យសុខាភិបាល និងសេវាសាធារណៈផងដែរ ព្រមទាំងការដំឡើងប្រាក់ខែមន្ត្រីរាជការឲ្យដល់យ៉ាងហោចណាស់២លាន ឬប្រហែល៥០០ដុល្លារក្នុងមួយខែ។
លោកបានលើកឡើងបន្តថា “យើងមានការសោកស្តាយដែលសេចក្តីព្រាងច្បាប់នេះមិនពន្យល់ច្បាស់លាស់អំពីបញ្ជីសារពើភណ្ឌរបស់រដ្ឋ ដែលផ្តល់ឱកាសឲ្យជនមួយចំនួនធ្វើការដោះដូរ លក់ និងជួលអចលនទ្រព្យសាធារណៈរបស់រដ្ឋដោយគ្មានតម្លាភាព និងគណនេយ្យភាព”។
លោក ជាម យៀប តំណាងរាស្ត្រគណបក្សប្រជាជន និងជាប្រធានគណៈកម្មកាសេដ្ឋកិច្ច និងហិរញ្ញវត្ថុនៃរដ្ឋសភា បានការពារសេចក្តីព្រាងថវិកាឆ្នាំ២០១៥នេះ អំឡុងពេលពិភាក្សាដេញដោល។ លោកបានមានប្រសាសន៍ថា វាជារឿងសំខាន់ពាក់ព័ន្ធនឹងគោលនយោបាយហិរញ្ញវត្ថុសារធារណៈដើម្បី “ធានាបាននូវការបន្តសម្រេចបានកំណើនសេដ្ឋកិច្ចខ្ពស់ និងប្រកបដោយនិរន្តរភាព ព្រមទាំងដើម្បីធានាស្ថិរភាពសេដ្ឋកិច្ច និងហិរញ្ញវត្ថុនៅក្នុងបរិបទអតិផរណាទាប និងស្ថិរភាពនៃអត្រាប្តូរប្រាក់ផងដែរ”។
មួយភាគធំនៃថវិកាជាតិនេះ ពោលគឺចំនួន៥៦៧លានដុល្លារ ឬស្មើប្រហែល១៥ភាគរយនៃការចំណាយសរុប នឹងទុកសម្រាប់ក្រសួងការងារជាតិ និងក្រសួងមហាផ្ទៃ។ វិស័យអប់រំនឹងទទួលបាន៤៣៣លានដុល្លារ សម្រាប់ឆ្នាំ២០១៥ ពោលគឺច្រើនជាងឆ្នាំ២០១៤ជិត១០០លានដុល្លារ។
ក្នុងចំណោមថវិកាសរុប គឺមានតែចំនួន២០០លានដុល្លារប៉ុណ្ណោះ ដែលនឹងត្រូវលៃទុកសម្រាប់រដ្ឋបាលខេត្ត ក្រុង ស្រុក ខណ្ឌ៕សុខុម