30 C
Phnom Penh

ក្រុម​​​គ្រួសារ​​​ជន​​​រងគ្រោះ​​​ធ្វើបុណ្យ​​​១០០ថ្ងៃចាប់​​​តាំង​​​ពី​​​​​​កូន​​​ស្រី​​​របស់​​​ខ្លួន​​​ស្លាប់

ដោយ ឌឹ ខេមបូឌា ដេលី

បទវិភាគ

ក្រុម​គ្រួសារ​​អ្នកស្រី អុី ស៊ីឡែន ជនជាតិ​ខ្មែរ​ដែល​នគរ​បាល​​កូរ៉េ​ខាង​ត្បូង​សង្ស័យ​ថា ត្រូវ​ប្ដី​របស់​ខ្លួន​ដែល​ជា​​​ជន​ជាតិ​កូរ៉េ​​សម្លាប់​នោះ ​​​បាន​​​ធ្វើ​​​បុណ្យ​១០០​ថ្ងៃ​ចាប់​តាំងពី​ស្ត្រី​​​រូប​​​នេះ​​​បាន​​​​ស្លាប់​កាលពី​ថ្ងៃ​​​សៅរ៍​​​នៅ​ក្នុង​ពិធី​មួយ​ដែល​មាន​អ្នក​យក​​​ព័ត៌​​​មាន​ជាច្រើន​មក​ពី​ស្ថានីយ​​​ទូរទស្សន៍​កូរ៉េ​​​ល្បីៗ​ចំនួន​ពីរ​​​ចូលរួម។

សពអ្នក​ស្រី អុី ស៊ីឡែន ត្រូវ​បាន​បូជា​ក្នុង​ប្រទេស​កូរ៉េ​ខាង​ត្បូង​កាលពី​ថ្ងៃ​ទី​២៥ ខែ​សីហា ពីរ​ថ្ងៃ​បន្ទាប់ពី​គាត់​​បាន​ស្លាប់​នៅ​ក្នុង​គ្រោះ​ថ្នាក់​ចរាចរណ៍​រថយន្ត ដែល​នគរ​បាល​នៅ​ទីនោះ​ជឿ​ថា ប្ដី​របស់​គាត់​ដែល​ជា​អ្នក​បើកបរ​រថយន្ត​​​រៀបចំ​ឡើង ​ហើយ​ជន​​​នេះ​​​នៅ​រស់​​​នោះ ដើម្បី​​​ទទួល​បាន​​ប្រាក់​ពី​ក្រុម​ហ៊ុន​ធានា​រ៉ាប់រង​​ជីវិត​ចំនួន​២៦​ដែល​គាត់​បាន​ទិញ​ឲ្យ​​ប្រពន្ធ​របស់​ខ្លួន ដែល​មាន​ទឹក​ប្រាក់​ជាង​៨,៦លាន​ដុល្លារ​។

យោង​តាម​អ្នកស្រី ឱក សាវេង ជា​ម្ដាយ​របស់​ជនរងគ្រោះ​បាន​ឲ្យ​ដឹង​ថា ប៉ុន្តែ​អដ្ឋិធាតុ​របស់​អ្នកស្រី អុី ស៊ីឡែន មិន​ទាន់​ត្រូវ​បាន​ប្រគល់​ឲ្យ​ក្រុម​គ្រួសារ​របស់​​​គាត់​ដែល​រស់​នៅ​ក្នុង​ស្រុក​ក្រូចឆ្មារ ខេត្ត​ត្បូងឃ្មុំ​នៅឡើយ​ទេ ហើយ​ឪពុក​ម្ដាយ​របស់​បុរស​ជា​​​ប្ដី​ជនជាតិ​កូរេ៉​នោះ ឥឡូវ​នេះ​កំពុង​មើល​ថែ​កូនស្រី​អាយុ​៥ឆ្នាំ​របស់​នាង​។

អ្នកស្រី​បាន​និយាយ​កាលពី​ម្សិលមិញ​ថា ” ក្រសួង​ការ​បរទេស​បាន​ណែនាំ​ខ្ញុំ​ឲ្យ​ដាក់​សំណើ​​​​កាលពី​ថ្ងៃ​ច័ន្ទ ដើម្បី​សុំ​អដ្ឋិធាតុ ចៅស្រី​របស់​ខ្ញុំ និង​ទាម​ទារ​ប្រាក់​ដែល​ជា​របស់​កូន​ស្រី​ខ្ញុំ”។

អ្នកស្រី សាវេង បាន​និយាយ​​​ថា អ្នកស្រី​បាន​សម្រេច​ចិត្ត​ឲ្យ​កូនស្រី​របស់​គាត់​រៀបការ​ជាមួយ​បុរស​ជនជាតិ​កូរ៉េ​ខាង​ត្បូង​នេះ​កាលពី​ឆ្នាំ​២០០៨ គឺ​ជា​គំនិត​ល្អ​មួយ​បន្ទាប់​ពី​ឃើញ​អ្នក​ជិត​ខាង​មួយ​ចំនួនធ្លាប់​រៀបការ​កូនស្រី​របស់​ខ្លួន​ឲ្យ​បុរស​ជនជាតិ​កូរ៉េ​​​ដែរ ដោយ​ទទួល​បាន​ប្រាក់​ជា​បន្ត​បន្ទាប់ពី​បរទេស​។

អ្នកស្រី​បាន​និយាយ​ថា កូនស្រី​របស់​ខ្ញុំ​បាន​យល់​ព្រម​រៀបការ​ជាមួយ​បុរស​ជនជាតិ​កូរ៉េ​ដែល​ជា​ប្ដី​របស់​នាង ពីព្រោះ​នាង​ឃើញ​ថា មនុស្ស​មួយ​ចំនួន​ទៀត​មាន​គ្រួសារ​ល្អ​បន្ទាប់ពី​រៀបការ​ជាមួយ​បុរស​ជនជាតិ​កូរ៉េ ហើយ​​ពួកគេ​ទទួល​បាន​ការ​ងារ​ដែល​មាន​ប្រាក់​ខែ​ខ្ពស់ ដូច្នេះ​ពួកគេ​អាច​ផ្ញើប្រាក់​មក​ជួយ​ផ្គត់​ផ្គង់​ក្រុម​គ្រួសារ​របស់​ខ្លួន​នៅ​ក្នុង​ប្រទេស​កម្ពុជា​”។

អ្នកស្រី​បាន​បន្ថែម​ថា ” យើង​ឃើញ​មនុស្ស​ជាច្រើន​រៀបការ​កូន​ជាមួយ​បុរស​ជនជាតិ​កូរ៉េ ហើយ​ពួកគេ​មិន​មាន​បញ្ហា​ទេ”។

អ្នកស្រី​ សាវេង បាន​និយាយ​ថា គាត់​ទទួល​បាន​ព័ត៌មាន​ដំបូង​ពី​ការ​ស្លាប់​កូនស្រី​របស់​ខ្លួន​កាលពី​ខែ​សីហា ដោយ​សារ​គ្រោះ​ថ្នាក់​ចរាចរណ៍ ហើយ​របាយការណ៍​ថ្មី​ថា វា​អាច​ជា​ករណី​មនុស្ស​ឃាត​ដោយ​គិត​ទុក​ជាមុន បាន​ធ្វើ​ឲ្យ​គាត់​​​មាន​ការ​ភ្ញាក់​ផ្អើល​យ៉ាង​ខ្លាំង​។

អ្នកស្រី​បាន​និយាយ​ដល់​បុរស​ជា​​​ប្ដី​ដែល​នគរ​បាល​កូរ៉េ​ខាង​ត្បូង​​បង្ហាញ​អត្តសញ្ញាណ​ថា ឈ្មោះ លី ថា ” គាត់​មាន​អាកប្បកិរិយា​ល្អ ហើយ​តែង​តែ​ផ្ញើ​ប្រាក់​​​មួយ​ចំនួន​មក​ឲ្យ​ខ្ញុំ។ ខ្ញុំ​ភ្ញាក់​ផ្អើល​ជា​ខ្លាំង​នៅ​ពេល​ទទួល​បាន​ព័ត៌មាន​នេះ ពីព្រោះ​ខ្ញុំ​មិន​ដែល​គិត​ថា គាត់​សម្លាប់​ប្រពន្ធ​របស់​ខ្លួន​ដូច្នេះ​​​ឡើយ”។

យោង​តាម​លោក វ៉ា សម្បត្តិ ​អធិការ​នគរ​បាល​ស្រុក​ក្រូចឆ្មារ​បាន​ឲ្យ​ដឹង​ថា អ្នក​យក​ព័ត៌​​​មាន​មក​ពី​បណ្ដាញ​ផ្សព្វផ្សាយ​ព័ត៌មាន​រដ្ឋ​របស់​កូរេ៉​ខាង​ត្បូង​ Seoul Broadcasting System និង​ប្រព័ន្ធ​ផ្សព្វផ្សាយ​ឯកជន​ Munhwa បាន​​មក​សួរ​សុខ​​​ទុក្ខ​ក្រុម​គ្រួសារ​​របស់​អ្នកស្រី អុី ស៊ីឡែន កាលពី​ចុង​សប្ដាហ៍។

ទោះ​ជា​​​យ៉ាង​ណា ​លោក គីម ហានស៊ូ ឯកអគ្គរដ្ឋទូត​កូរ៉េ​ខាង​ត្បូង​ប្រចាំ​ប្រទេស​កម្ពុជា​បាន​មាន​ប្រសាសន៍​​កាលពី​ម្សិលមិញ​ថា លោក​មិន​ទាន់​ទទួល​បាន​ព័ត៌មាន​ណាមួយ​ពី​ករណី​នេះ​​​នៅ​​​ឡើយ​​​ទេ ដែល​លោក​ឮ​តែ​​​តាម​របាយ​​​ការណ៍​​​ប្រព័ន្ធ​​​ផ្សព្វ​​​ផ្សាយ​​​​​ប៉ុណ្ណោះ។

លោក​បាន​មាន​ប្រសាសន៍​ថា ” ស្ថានទូត​កូរ៉េ​ប្រចាំ​ប្រទេស​កម្ពុជា​​មិន​ដឹង​ពី​រឿង​នេះ​​​ទេ”។ លោក​បាន​បន្ថែម​ថា ការ​ស៊ើបអង្កេត​កំពុង​​​ស្ថិត​ក្នុង​ដៃ​នគរ​បាល​កូរ៉េ​ខាង​ត្បូង​នៅ​ឡើយ៕ សារុន​​​ (រាយការណ៍​​​បន្ថែម​ដោយ Colin Meyn)​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស