កាលពីម្សិលមិញ នគរបាលបានឲ្យដឹងថា ខ្លួនបានបញ្ចប់ការស៊ើបអង្កេតលើហេតុការណ៍ឆេះក្លឹបកម្សាន្តមួយក្នុងក្រុងសៀមរាបកាលពីខែមុន ដែលបណ្ដាលឲ្យជនជាតិខ្មែរចំនួនបួននាក់ និងជនជាតិអូស្ត្រាលីម្នាក់បានបាត់បង់ជីវិត ហើយបានសម្រេចមិនធ្វើការចាប់ខ្លួននរណាម្នាក់ឡើយ ទោះបីវាទំនងជាមានការរំលោភលើបទដ្ឋានសុវត្ថិភាពក្ដី។
អគ្គិភ័យកាលពីថ្ងៃទី៨ ខែវិច្ឆិកា បានឆាបឆេះក្លឹបកម្សាន្តហ៊ីបហប់មួយ ហើយបណ្ដាលឲ្យមានមនុស្សស្លាប់មួយចំនួនដូចជាឈ្មោះ ព្រំ ភិរុណ និង សឿន សាវូន ដែលសុទ្ធតែមានអាយុ៣១ឆ្នាំដូចគ្នា ហើយនិង ចេង សាវៀន អាយុ៣៣ឆ្នាំ ជា ស្រីនី អាយុ៣៦ឆ្នាំ ព្រមទាំងជនជាតិអូស្ត្រាលីម្នាក់ទៀតឈ្មោះ Tom Ricketson អាយុ៣២ឆ្នាំ។
លោក សត ណាឌី ស្នងការនគរបាលខេត្តសៀមរាបបានលើកឡើងថា នគរបាលបានសាកសួរម្ចាស់ និងបុគ្គលិកក្លឹបកម្សាន្ត ហើយបានកំណត់ថា អគ្គិភ័យនេះគឺជាឧបទ្ទវហេតុមួយ ហើយថា គ្មានការចាប់ខ្លួននរណាម្នាក់ឡើយ។
ឧត្តមសេនីយ៍ត្រី សត ណាឌី បានមានប្រសាសន៍ថា “យើងមិនបានចាប់ខ្លួននរណាម្នាក់ឡើយ ព្រោះវាកើតឡើងដោយសារទុស្សេខ្សែភ្លើង ហើយគ្មាននរណាម្នាក់ចង់ឲ្យវាកើតឡើងនោះទេ ទោះជាយ៉ាងណា ម្ចាស់ក្លឹបកម្សាន្តត្រូវតែទទួលខុសត្រូវ ហើយផ្ដល់សំណងដល់គ្រួសារជនរងគ្រោះ”។
ឧត្ដមសេនីយ៍ត្រី ណាឌី បានបន្ថែមទៀតថា របាយការណ៍របស់នគរបាលលើករណីនេះត្រូវបានបញ្ជូនទៅសាលាដំបូងខេត្តហើយ។
លោក សំរឹទ្ធ សុខុន ព្រះរាជអាជ្ញារងអមសាលាដំបូងខេត្តបានឲ្យដឹងថា សាលាដំបូងខេត្តនៅមិនទាន់សម្រេចថា តើនរណាម្នាក់នឹងត្រូវចាប់ខ្លួនចំពោះហេតុការណ៍ឆាបឆេះនេះនៅឡើយទេ។ លោកបានមានប្រសាសន៍ថា “យើងនៅមិនទាន់សម្រេចនៅឡើយទេថាតើម្ចាស់ក្លឹបកម្សាន្តនឹងត្រូវផ្ដន្ទាទោសឬក៏អត់ ព្រោះករណីនេះកើតឡើងដោយសារទុស្សេខ្សែភ្លើង”។
លោក លី ម៉េងស្រុិន ម្ចាស់ក្លឹបកម្សាន្ត និងប្អូនប្រុសរបស់ខ្លួនគឺ លី គង់វង្ស ក៏ជាម្ចាស់ក្លឹបកម្សាន្ត Hip Hop Classic ដែលនៅក្បែរនោះ និងក្លឹបកម្សាន្តមួយទៀតឈ្មោះ Temple ក្នុងក្រុងសៀមរាបផងដែរ។
លោក ម៉ៃ ឃីម ដែលគ្រប់គ្រងក្លឹបកម្សាន្តហ៊ីបហប់ទាំងពីរបានលើកឡើងថា ម្ចាស់ក្លឹបកម្សាន្តបានបង់ប្រាក់សំណងចន្លោះពី៣.០០០ដុល្លារទៅ៤.០០០ដុល្លារឲ្យគ្រួសារជនរងគ្រោះនីមួយៗ។ លោកបាននិយាយថា “យើងមិនដែលចង់ឲ្យបញ្ហានេះកើតឡើងទេ។ យើងបានខាតបង់ជិត១លានដុល្លារ ដោយសារការខូចខាតដែលបង្កឡើងដោយអគ្គិភ័យនេះ និងការបង់ប្រាក់សំណង”។
លោក ថោង សាគុណ ស្នងការរងនគរបាលខេត្តសៀមរាបដែលដឹកនាំការស៊ើបអង្កេតនេះបានបញ្ជាក់ថា នគរបាលបានបិទការស៊ើបអង្កេត ហើយគ្មានបំណងចាប់ខ្លួននរណាម្នាក់ឡើយ។ លោក សាគុណ បានមានប្រសាសន៍ថា ”បន្ទាប់ពីការស៊ើបអង្កេត នគរបាលរបស់យើងបានសន្និដ្ឋានថា វាមិនមែនជាអំពើឃាតកម្មនោះទេ។ មន្ត្រីមកពីអគ្គិសនីកម្ពុជា និងអ្នកជំនាញខាងអគ្គិភ័យបាននិយាយថា មូលហេតុដែលបង្កឲ្យមានអគ្គិភ័យនេះគឺបណ្ដាលមកពីទុស្សេខ្សែភ្លើង”។
លោក សាគុណ បានលើកឡើងទៀតថា លោកមិនដឹងទេថាតើអគារក្លឹបកម្សាន្តត្រូវបានសាងសង់ឡើងដោយគោរពតាមបទដ្ឋានសុវត្ថិភាពឬក៏អត់នោះទេ តែទោះជាយ៉ាងណា លោកមិនបានខិតខំស្វែងរកការពិតឡើយ។ លោកបានមានប្រសាសន៍ថា “យើងមិនអាចនិយាយបានទេ ថាតើអគារនេះសាងសង់ឡើងតាមបទដ្ឋានឬក៏អត់នោះ ព្រោះយើងមិនមែនជាអ្នកជំនាញ។ លើកក្រោយយើងនឹងសហការជាមួយអ្នកជំនាញខាងសំណង់ដើម្បីត្រួតពិនិត្យលើបញ្ហានេះ”។
នៅថ្ងៃកើតមានអគ្គិភ័យនោះ លោក ទិត្យ ណារ៉ុង អធិការនគរបាលក្រុងសៀមរាបបានលើកឡើងថា ក្លឹបកម្សាន្តនេះគ្មានបង្អួច ហើយមានច្រកចេញតែមួយគត់ ដោយវាបង្កការលំបាកយ៉ាងខ្លាំងដល់ការគេចខ្លួន ហើយថា មានខ្សែភ្លើងច្រើនណាស់នៅលើពិដាន ជាទីដែលអគ្គិភ័យបានឆាបឆេះឡើង ហើយម្ចាស់ក្លឹបកម្សាន្តត្រូវបានណែនាំឲ្យធ្វើយ៉ាងណារៀបចំកន្លែងរបស់ខ្លួនឲ្យស្របតាមបទដ្ឋានដ៏ត្រឹមត្រូវ។ លោកបានមានប្រសាសន៍នៅពេលនោះថា ”ប៉ុន្តែពួកគេមិនស្ដាប់ទេ ព្រោះពួកគេមានលុយ។ ប្រសិនបើពួកគេមានលុយ ពួកគេអាចធ្វើអ្វីៗបានទាំងអស់”។
លោក ដួង សុខា នាយការិយាល័យនគរបាលព្រហ្មទណ្ឌខេត្តបានលើកឡើងថា ម្ចាស់ក្លឹបកម្សាន្តកំពុងតែចរចាអំពីប្រាក់សំណងជាមួយគ្រួសារជនរងគ្រោះមួយចំនួននៅឡើយ ហើយថា នគរបាលនឹងបើកការស៊ើបអង្កេតឡើងវិញ ប្រសិនបើសាលាដំបូងបង្គាប់ឲ្យធ្វើដូច្នោះ។ លោកបានមានប្រសាសន៍ថា ”ភ័ស្តុតាងកំពុងស្ថិតនៅក្នុងដៃរបស់តុលាការនៅឡើយ ហេតុដូច្នេះប្រសិនបើសាលាដំបូងខេត្តចង់ឲ្យយើងសើរើករណីនេះ យើងនឹងធ្វើតាម”។
ទាំងលោក ម៉េងស្រុិន និងលោក គង់វង្ស ព្រមទាំងគ្រួសារជនរងគ្រោះមិនអាចទាក់ទងសុំការធ្វើអត្ថាធិប្បាយបានឡើយ។
លោក ម៉ៃ ឃីម បានឲ្យដឹងបន្តថា ក្លឹបកម្សាន្ត Hip Hop Classic មានចម្ងាយត្រឹមតែប្រហែល១ម៉ែត្រប៉ុណ្ណោះពីកន្លែងកើតមានអគ្គិភ័យ ហើយត្រូវបានបិទអំឡុងការស៊ើបអង្កេតរបស់នគរបាល ប៉ុន្តែត្រូវបានបើកឡើងវិញកាលពីថ្ងៃសៅរ៍។ លោកបាននិយាយថា “ចាប់តាំងពីថ្ងៃសៅរ៍មក យើងបានបើកក្លឹបកម្សាន្តផ្សេងទៀតឡើងវិញហើយ ហើយបានបញ្ចុះតម្លៃពី៥០ទៅ៧០ភាគរយលើភេសជ្ជៈដើម្បីទាក់ទាញភ្ញៀវឲ្យបានច្រើន”។
លោក ឃីម បានលើកឡើងទៀតថា ក្លឹបកម្សាន្ត Hip Hop Classic ត្រូវបានបើកឡើងវិញនេះគឺបន្ទាប់ពីម្ចាស់ក្លឹបកម្សាន្តបានជួលជាងភ្លើងមកត្រួតពិនិត្យខ្សែភ្លើងរួច។ លោកបាននិយាយទៀតថា ” យើងបានធ្វើតេស្ត ហើយត្រួតពិនិត្យដើម្បីបញ្ជាក់ថា អ្វីៗគ្មានបញ្ហា”។ លោកបានបន្ថែមថា ថៅកែរបស់លោកគ្មានផែនការបើកក្លឹបកម្សាន្តដែលត្រូវអគ្គិភ័យឆាបឆេះនេះឡើងវិញឡើយ។ លោកបាននិយាយបន្តទៀតថា ” យើងទុកឲ្យវានៅអ៊ីចឹងចុះ”៕ ស៊ុយឈាង