កាលពីម្សិលមិញ រដ្ឋាភិបាលបាននិយាយការពារការបដិសេធម្ដងហើយម្ដងទៀតមិនផ្ដល់អាជ្ញាប័ណ្ណទូរទស្សន៍ដល់លោក ម៉ម សូណង់ដូ បើទោះជាមានការព្រមព្រៀងកាលពីសប្ដាហ៍មុនយល់ព្រមឲ្យគណបក្សសង្គ្រោះជាតិដំណើរការស្ថានីយទូរទស្សន៍ប្រើប្រព័ន្ធអាណាឡូក ក៏ដោយ។
លោក ម៉ម សូណង់ដូ ម្ចាស់ស្ថានីយវិទ្យុមួយ និងជាអ្នករិះគន់គណបក្សប្រជាជនកម្ពុជាជារឿយនិងឥតសំចៃនោះបានស្នើសុំអាជ្ញាប័ណ្ណទូរទស្សន៍តាំងពីឆ្នាំ២០០៥មកម្លេ៉ះ។ ប៉ុន្តែរដ្ឋមន្ត្រីក្រសួងព័ត៌មានបានច្រានចោលសំណើទាំងនោះដោយលើកឡើងពីមូលហេតុជាច្រើន ដែលជារឿយៗអះអាងថា មិនមានហ្វ្រេកង់នៅទំនេរឡើយ។
ទីភ្នាក់ងារព័ត៌មានរដ្ឋ (AKP) ក៏បានដកស្រង់សម្តីរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មានដែលបានលើកឡើងថា លោក ម៉ម សូណង់ដូ ពាក់ព័ន្ធនយោបាយខ្លាំងពេកហើយថា គណបក្សនយោបាយទាំងអស់ត្រូវបានហាមឃាត់មិនឲ្យដំណើរការស្ថានីយទូរទស្សន៍ទេ។ បើទោះជាមានការច្រានចោលពីនិន្នាការនយោបាយរបស់លោក ម៉ម សូណង់ដូ ក៏ដោយ ក៏កាលពីសប្ដាហ៍មុន លោកនាយករដ្ឋមន្ត្រី ហ៊ុន សែន បានមានប្រសាសន៍ថា គណបក្សសង្គ្រោះជាតិនឹងទទួលបានស្ថានីយទូរទស្សន៍ផ្ទាល់ខ្លួននៅពេលឆាប់ៗនេះ ដោយបំពេញតាមសំណើដែលលោកបានធ្វើជាមួយគណបក្សប្រឆាំងនេះកាលពីខែកក្កដា ដើម្បីជួយទម្លាយភាពទាល់ច្រកនយោបាយជុំវិញការបោះឆ្នោតជាតិដ៏ចម្រូងចម្រាសកាលពីឆ្នាំមុន។
ក្រសួងព័ត៌មានបានធ្វើតាមលិខិតមួយច្បាប់ដោយធ្វើការពន្យល់ថា ក្រសួងនឹងផ្ដល់ហ្វ្រេកង់ដល់គណបក្សសង្គ្រោះជាតិដោយ “ការដកហូត” អាជ្ញាប័ណ្ណចាស់ពីអ្នកផ្សេង”។
នៅពេលត្រូវបានសួរកាលពីម្សិលមិញអំពីការអះអាងកន្លងមករបស់ក្រសួងព័ត៌មានដែលថា មិនមានហ្វ្រេកង់សម្រាប់លោក ម៉ម សូណង់ដូ នោះ លោក ខៀវ កាញារីទ្ធ បានលើកឡើងតាមបណ្ដាញផ្សព្វផ្សាយសង្គមថា លោកនៅតែប្រកាន់ ” ជំហរដដែល” ប៉ុន្តែបានបដិសេធមិនពន្យល់ថា តើហ្វ្រេកង់អាចផ្ដល់ឲ្យគណបក្សសង្គ្រោះជាតិតាមរៀបណាឡើយ។
លោក ខៀវ កាញារីទ្ធ ក៏បានបដិសេធថា លោកមិនបានធ្វើការអត្ថាធិប្បាយនយោបាយពាក់ព័ន្ធលោក ម៉ម សូណង់ដូ ឬស្ថានីយវិទ្យុសម្បុកឃ្មុំរបស់លោកឡើយ បើទោះជាសេចក្តីរាយការណ៍កាលពីខែមករារបស់ AKP ដែលគ្រប់គ្រងដោយក្រសួងរបស់លោកលើកឡើងថា លោកបានអត្ថាធិប្បាយក៏ដោយ។
ទីភ្នាក់ងារព័ត៌មានរដ្ឋនេះបានរាយការណ៍នៅពេលនោះថា “ឯកឧត្តមរដ្ឋមន្ត្រី ខៀវ កាញារីទ្ធ បានមានប្រសាសន៍ថា ក្រសួងខ្វះហ្វ្រេកង់ ហើយយោងតាមច្បាប់ អាជ្ញាប័ណ្ណទូរទស្សន៍ផ្ដល់ឲ្យចំពោះវិស័យឯកជនតែប៉ុណ្ណោះ មិនមែនសម្រាប់គណបក្សនយោបាយឡើយ ហើយវិទ្យុសម្បុកឃ្មុំធ្លាប់ប្រកាសពីការគាំទ្ររបស់ខ្លួនចំពោះគណបក្សនយោបាយ”។
តាមលក្ខណៈបច្ចេកទេស គណបក្សសង្គ្រោះជាតិបានចុះឈ្មោះជាក្រុមហ៊ុនឯកជន ប្រព័ន្ធផ្សព្វផ្សាយឯករាជ្យកម្ពុជាជាមួយក្រសួងពាណិជ្ជកម្ម ដើម្បីដំណើរការស្ថានីយទូរទស្សន៍ថ្មីរបស់ខ្លួន។
កាលពីម្សិលមិញ លោក ម៉ម សូណង់ដូ បានមានប្រសាសន៍ថា តម្រូវការនោះគ្រាន់តែជាមធ្យោបាយសម្រាប់លោក ហ៊ុន សែន ដើម្បីបត់បែនតាមច្បាប់ដែលរារាំងគណបក្សទាំងអស់មិនឲ្យដំណើរការស្ថានីយទូរទស្សន៍ដើម្បីធ្វើកិច្ចព្រមព្រៀងជាមួយលោក សម រង្ស៊ី ប្រធានគណបក្សសង្គ្រោះជាតិ និងឲ្យគណបក្សប្រឆាំងនេះបញ្ចប់ការធ្វើពហិការមិនចូលរដ្ឋសភារបស់ខ្លួនប៉ុណ្ណោះ។
លោកបានមានប្រសាសន៍ថា “វាអយុត្តិធម៌បំផុតមិនមែនសម្រាប់តែរូបខ្ញុំទេ ប៉ុន្តែសម្រាប់គណបក្សនយោបាយដទៃទៀតទាំងអស់ផងដែរ។ លោក ហ៊ុន សែន ដឹងច្បាស់ថា ក្រុមហ៊ុនឯកជននេះបម្រើឲ្យគណបក្សសង្គ្រោះជាតិ។ ក្នុងនាមជាប្រមុខរដ្ឋាភិបាលលោក ហ៊ុន សែន គួរប្រព្រឹត្តមកលើមនុស្សគ្រប់គ្នាឲ្យបានស្មើភាពទាក់ទងនឹងការផ្ដល់អាជ្ញាប័ណ្ណសម្រាប់ស្ថានីយទូរទស្សន៍ និងវិទ្យុថ្មី។ លោកបានមានប្រសាសន៍ថា ដោយការលើកលែងសម្រាប់គណបក្សសង្គ្រោះជាតិ លោកនាយករដ្ឋមន្ត្រី “កំពុងបង្រៀនមនុស្សឲ្យរំលោភច្បាប់ហើយ”។
ដោយមិនរួញរា លោក ម៉ម សូណង់ដូ បានមានប្រសាសន៍ថា លោកត្រៀមរៀបចំដាក់ពាក្យសុំអាជ្ញាប័ណ្ណទូរទស្សន៍ជាថ្មីម្ដងទៀត។ លោកបានមានប្រសាសន៍ថា រដ្ឋាភិបាលអះអាងថា នឹងដកហូតអាជ្ញាប័ណ្ណចាស់ពីអ្នកផ្សេងនោះ គ្រាន់តែជាលេសថាមិនមានហ្វ្រេកង់សម្រាប់ទូរទស្សន៍តែប៉ុណ្ណោះ។
លោក មឿន ឈានណារិទ្ធ ដែលជាប្រធានវិទ្យាស្ថានកម្ពុជាសម្រាប់ការសិក្សាប្រព័ន្ធផ្សព្វផ្សាយ បានមានប្រសាសន៍ថា បច្ចុប្បន្ននេះមានស្ថានីយទូរទស្សន៍ប្រហែល១២តែប៉ុណ្ណោះកំពុងបើកដំណើរការ ហើយច្បាស់ជាមានហ្វ្រេកង់ឲ្យបង្កើតច្រើនទៀត។ ហើយសេចក្ដីសម្រេចរបស់រដ្ឋាភិបាលដើម្បីត្រួសត្រាយផ្លូវសម្រាប់ស្ថានីយទូរទស្សន៍ដែលគ្រប់គ្រងដោយគណបក្សសង្គ្រោះជាតិនោះ គឺជាភ័ស្តុតាងបន្ថែមទៀតថា អាចផ្ដល់ហ្វ្រេកង់សម្រាប់លោក ម៉ម សូណង់ដូ ដែរប្រសិនបើរដ្ឋាភិបាលចង់ផ្ដល់ឲ្យ។
លោក មឿន ឈានណារិទ្ធ បានមានប្រសាសន៍ថា “ប្រសិនបើរដ្ឋាភិបាលមានឆន្ទៈមែន…ពួកគេនឹងធ្វើ”។ លោកបានបន្ថែមថា លោកមិនដឹងពីច្បាប់ណាដែលហាមឃាត់គណបក្សនយោបាយមិនឲ្យដំណើរការស្ថានីយទូរទស្សន៍នោះឡើយ។ លោកបានមានប្រសាសន៍ថា “រហូតមកទល់ពេលនេះស្ថានីយទូរទស្សន៍ទាំងអស់ទាំងគ្រប់គ្រងដោយរដ្ឋាភិបាល ឬមានទំនាក់ទំនងជាមួយរដ្ឋាភិបាល ហើយគេចង់មានសិទ្ធិផ្ដាច់មុខ”៕ សារុន