30.1 C
Phnom Penh

បុរស​ម្នាក់​​ទៀត​ត្រូវ​បាន​ចោទ​ប្រកាន់​ពីបទ​វាយ​ប្រហារ​ដោយ​ទឹក​អាស៊ីត​​ក្នុង​ករណី​ទី​២​

ដោយ ឌឹ ខេមបូឌា ដេលី

បទវិភាគ

បុរស​ម្នាក់​​ដែល​ត្រូវ​បាន​ចោទ​ប្រកាន់​ពីបទ​​ស្រោច​ទឹក​​អាស៊ីត​លើ​ប្រពន្ធ​​របស់​ខ្លួន​​ នៅ​ក្នុង​ខេត្ត​កំពង់ធំ បន្ទាប់ចាប់​នាង​ចង​ ហើយ​​វាយ​ដំ​នាង​​អស់រយៈ​ពេល​ជាច្រើន​ម៉ោង​ត្រូវ​​បាន​​សាលា​ដំបូង​ខេត្ត​ចោទ​ប្រកាន់​​​កាលពី​ថ្ងៃ​សុក្រ។

នៅ​ក្នុង​ហេតុការណ៍​​វាយ​ប្រហារ​ដោយ​ទឹក​អាស៊ីត​​ជា​លើក​ទី២ ដែល​ត្រូវ​បាន​រាយ​ការណ៍​​​ក្នុង​រយៈ​ពេល​​ប៉ុន្មាន​​សប្ដាហ៍​​មក​នេះ​​ បុរស​ឈ្មោះ​ ប៉ាវ កុល អាយុ​៣៥​ឆ្នាំ​ម្នាក់​​ត្រូវ​បាន​ចោទ​ប្រកាន់​ពីបទ​វាយ​ដំ​ប្រពន្ធ​របស់​ខ្លួន ហើយ​បន្ទាប់​មក​បាន​ស្រោច​ទឹក​អាស៊ីត​លើ​ប្រដាប់​ភេទ​របស់​នាង​នៅ​ក្នុង​ផ្ទះ​របស់​ពួកគេ​​ក្នុង​ស្រុក​សណ្ដាន់ កាលពី​ថ្ងៃ​ព្រហស្បតិ៍។

លោក ម៉ឺន ម៉ៃ មេឃុំ​សុចិត្រ បាន​​​ឲ្យ​ដឹង​ថា ឈ្មោះ បា៉វ កុល នេះ​ត្រូវ​បាន​ចាប់​ខ្លួន​នៅ​ថ្ងៃ​ដដែល​​បន្ទាប់ពី​ចាប់​​ប្រពន្ធ​អាយុ​២៤​ឆ្នាំ​របស់​ខ្លួន​ចង​ភ្ជាប់​នឹង​សសរ​ឈើ​ ហើយ​វាយ​ដំ​នាង​អស់​រយៈ​ពេល​​៩ម៉ោង​មុន​ពេល​មាន​ការ​ដណ្ដើម​ទឹក​អាស៊ីត​។ លោក ម៉ៃ បាន​មាន​ប្រសាសន៍​ថា “ជនសង្ស័យ​បាន​អះអាង​ថា ​ទឹក​អាស៊ីត​អាគុយ​​បាន​​ស្រោច​លើ​ប្រពន្ធ​របស់​ខ្លួន ដោយ​សារ​នាង​​គ្រវាស​ដៃ​មក​ត្រូវ​​នៅ​ពេល​​​​ខ្លួន​គ្រាន់​តែ​គំរាម​នាង”។ ​

លោក យិន សារឿន ​ចៅក្រម​សាលា​ដំបូង​ខេត្ត​​បាន​លើក​ឡើង​ថា លោក​បាន​ចោទ​ប្រកាន់​ជនសង្ស័យ​កាលពី​ថ្ងៃ​សុក្រ​ពីបទ​បង្ក​អំពើ​ហិង្សា​ដែល​ប្រព្រឹត្ត​ដោយ​សហព័ទ្ធ​ឬ​ដៃគូ ហើយ​បាន​បញ្ជូន​ជនសង្ស័យ​នេះ​ទៅ​ពន្ធនាគារ​ដើម្បី​ឃុំ​ខ្លួន​ជា​បណ្ដោះ​អាសន្ន។

នៅ​​ក្នុង​ហេតុការណ៍​ដាច់​ដោយ​ឡែក​មួយ​ទៀត​ នគរ​បាល​​​នៅ​ក្នុង​ស្រុក​គិរីវង់ ខេត្ត​តាកែវ បាន​ឲ្យ​ដឹង​កាលពី​ម្សិលមិញ​ថា ខ្លួន​បាន​ស្នើ​ឲ្យ​អាជ្ញាធរ​វៀតណាម​ជួយ​ក្នុង​ការ​តាម​ចាប់​ខ្លួន​បងប្អូន​​បង្កើត​ចំនួន​ពីរ​នាក់​ ដែលជាប់​ពាក់​ព័ន្ធ​ក្នុង​​ការ​វាយ​ប្រហារ​ដោយ​ទឹក​អាស៊ីត​លើ​ស្ត្រី​ម្នាក់​កាលពី​ខែ​មុន។

អ្នកស្រី មួង ស្រីមុំ អាយុ​៣១​ឆ្នាំ ជា​អាជីវករ​ម្នាក់​​បាន​​រលាក​ខ្លួន​ប្រហែល​៤៤​ភាគរយ​ បន្ទាប់ពី​​គេ​ស្រោច​ទឹក​អាស៊ីត​លើ​។ រីឯ​កូនស្រី​អាយុ​២ឆ្នាំ​របស់​គាត់​​បាន​រង​របួស​ស្រាល​លើ​មុខ និង​លើ​ដៃ​ម្ខាង​។

លោក យុគ សារ៉ាត់ អធិការ​នគរ​បាល​ស្រុក​​បាន​លើក​ឡើង​​ថា នគរ​បាល​ជឿជាក់​ថា ជន​ដៃ​ដល់​​ដែល​ជា​អាជីវករ​ដូច​គ្នា​​ឈ្មោះ ដេង មាស អាយុ​២៨​ឆ្នាំ និង​ប្អូនស្រី​របស់​ខ្លួន​ឈ្មោះ ដេង លក្ខិណា បាន​គេច​ខ្លួន​ទៅ​ប្រទេស​វៀតណាម ​ជា​ទី​ដែល​ពួកគេ​​​ធ្លាប់​ទៅ​ជាញឹក​ញាប់​ដើម្បី​ទិញ​ទំនិញ​។

លោក សារ៉ាត់ បាន​មាន​ប្រសាសន៍​ថា “​យើង​កំពុង​តាម​ស្វែង​រក​ជនសង្ស័យ​ទាំង​ពីរ​នាក់​នេះនៅ​​ឡើយ ហើយ​យើង​បាន​បញ្ជូន​ឯកសារ​ពាក់​​ព័ន្ធ​ទាំង​អស់​ទៅ​តុលាការ​រួច​ហើយ ហើយ​កំពុង​តែ​រង់ចាំ​ដីកា​បង្គាប់​របស់តុលាការ​។ ប្រសិន​បើ​ពួកគេ​នៅ​ក្នុង​ប្រទេស​កម្ពុជា យើង​នឹង​ចាប់​ខ្លួន​ពួកគេ​”។ លោក​បាន​លើក​ឡើង​ទៀត​ថា នគរ​បាល​​ក៏​បាន​ទាក់​ទង​អាជ្ញាធរ​នៅ​​ក្នុង​ខេត្តគៀនយ៉ាង និង​អាង​យ៉ាង​ក្នុង​ប្រទេស​វៀតណាម​ដើម្បី​សុំ​ជំនួយ​ផង​ដែរ​៕ ស៊ុយឈាង​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស