26 C
Phnom Penh

ធនាគារ​ ADB អនុម័ត​ហិរញ្ញប្បទាន​​៨០០លាន​ដុល្លារ​ជួយ​ដល់​កម្ពុជា​សម្រាប់​រយៈ​ពេល​៥ឆ្នាំ​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ ធនាគារ​អភិវឌ្ឍន៍​អាស៊ី (ADB) បាន​ប្រកាស​ហិរញ្ញប្បទាន​សម្បទាន​៨០០​លាន​ដុល្លារ​ជួយ​ដល់​កម្ពុជា​សម្រាប់​រយៈ​ពេល៥ឆ្នាំ ដោយ​ភាគ​ច្រើន​នៃ​ហិរញ្ញប្បទាន​ទាំង​នេះ​​ត្រូវ​បាន​លៃទុក​សម្រាប់​ការ​អភិវឌ្ឍ​ហេដ្ឋារចនាសម្ព័ន្ធ​ វិស័យ​សាធារណៈ និង​វិស័យ​អប់រំ។

លោក ជែន ហ៊ែនសេន (Jan Hansen) សេដ្ឋវិទូ​នៅ​ធនាគារ​ ADB ប្រចាំ​ប្រទេស​កម្ពុជា​បាន​មាន​ប្រសាសន៍​ថា ហិរញ្ញប្បទាន​ដែល​ត្រូវ​បាន​អនុម័ត​​ក្រោម​យុទ្ធសាស្ត្រ​ភាព​ជា​ដៃគូ​របស់​ធនាគារ​នេះ​សម្រាប់​ឆ្នាំ​២០១៤​-២០១៨ មាន​បំណង​ជួយ​កម្ពុជា​ធ្វើពិពិធកម្ម​សេដ្ឋកិច្ច​របស់​ខ្លួន​នៅពេល​វា​រីក​ពង្រីក​ខ្លួន​កាន់​តែ​ធំ។

លោក​បាន​ថ្លែង​ទៅ​កាន់​ក្រុម​អ្នកយក​ព័ត៌មាន​នៅ​ក្នុង​ពិធី​ប្រកាស​ចាប់​ផ្ដើម​យុទ្ធសាស្ត្រ​នេះ​ថា “តាម​ការ​រំពឹង​ទុក​​ថា មិន​យូរ​ទេ​កម្ពុជា​នឹង​វិវឌ្ឍ​ខ្លួន​ពី​ប្រទេស​ដែល​មាន​ប្រាក់​ចំណូល​ទាប​ទៅ​ជា​ប្រទេស​ដែល​មាន​ចំណូល​មធ្យម​។ វា​អាច​នឹង​កើត​ឡើង​នៅ​ឆ្នាំ​នេះ ឬ​​យូរ​បំផុត​នៅ​ឆ្នាំ​ក្រោយ”។

ប្រទេស​ដែល​មាន​ចំណូល​មធ្យម​ត្រូវ​បាន​កំណត់​ថា ជា​ប្រទេស​ដែល​មាន​ផលិត​ផលជាតិ​សរុប​ក្នុង​ម្នាក់​ៗ (GNI)យ៉ាង​ហោច​ណាស់​១.០៤៥​ដុល្លារ​។ យោង​តាម​ធនាគារ​ពិភព​លោក​បាន​ឲ្យ​ដឹង​ថា កាលពី​ឆ្នាំ​មុន​ GNI ក្នុង​មនុស្ស​ម្នាក់ៗ​របស់​កម្ពុជា​មាន​ចំនួន​៩៥០​ដុល្លារ​។ ប៉ុន្តែ​ធនាគារ​ ADB លើក​ឡើង​ថា ៤០ភាគរយ​នៃ​ប្រជា​ជន​សរុប​នៅ​តែ​រស់​នៅ​ដោយ​​អាស្រ័យ​លើ​ចំណូល​តិច​ជាង​២ដុល្លារ​ក្នុង​មួយ​ថ្ងៃ។

កាលពី​ម្សិលមិញ ទោះ​បី​ជា​ធនាគារ​ ADB មិន​បាន​បញ្ចេញ​សេចក្ដី​លម្អិត​ជាក់​លាក់​អំពី​គម្រោង​នានា​ក្ដី ក៏​ធនាគារ​នេះ​លើក​ឡើង​​ថា យុទ្ធសាស្ត្រ​នេះ​នឹង​គាំទ្រ​ដល់​ការ​ធ្វើ​ពិពិធ​ភាវូនីយកម្ម​កសិកម្ម​ ការ​អភិវឌ្ឍ​ផ្លូវ​ថ្នល់​ និង​ការ​ផ្គត់​ផ្គង់​ទឹក​ស្អាត ការ​កែ​លម្អ​ការ​ទទួល​បាន​សេវា និង​គុណភាព​អប់រំ ​ហើយ​ជួយ​កែលម្អ​ការ​គ្រប់​គ្រង​ហិរញ្ញវត្ថុ​ក្នុង​វិស័យ​សាធារណៈ។

លោក អេរីក ស៊ិចវិក (Eric Sidgwick) នាយក​ធនាគារ​ ADB ប្រចាំ​​ប្រទេស​កម្ពុជា​បាន​មាន​ប្រសាសន៍​ថា ប្រទេស​កម្ពុជា​ត្រូវ​តែ​ចាប់​ផ្ដើម​​ធ្វើ​យ៉ាង​ណា​ឲ្យ​ខ្លួន​កាន់​តែ​មាន​​ការ​ប្រកួត​ប្រជែង​ ដើម្បី​ត្រៀម​លក្ខណៈ​ទុក​ជាមុន​សម្រាប់​ការ​បាត់​បង់​អត្ថប្រយោជន៍​ពាណិជ្ជកម្ម ដែល​ខ្លួន​ទទួល​បាន​នាពេល​បច្ចុប្បន្ន​ ដូច​ជា​​កម្មវិធី​របស់​សហភាព​អឺរ៉ុប​ដែល​មាន​ឈ្មោះ​ថា​ “ទំនិញ​គ្រប់​មុខ​លើក​លែង​តែ​សព្វាវុធ​” ជា​ដើម​ដែល​អនុគ្រោះ​ដល់​​បណ្ដា​ប្រទេស​ដែល​មាន​ការ​អភិវឌ្ឍ​តិច​ជាង​គេ​បំផុត​ឲ្យ​នាំចូល​ទៅ​កាន់​សហភាព​អឺរ៉ុប​ដោយ​មិន​បាច់​បង់ពន្ធ​​សម្រាប់​ការ​នាំចេញ​ទំនិញ​គ្រប់​មុខ​​លើក​លែង​តែ​សព្វាវុធ។

លោក​បាន​មាន​ប្រសាសន៍​ទៀត​ថា “នៅ​ពេល​អ្នក​ទទួល​បានជោគ​ជ័យ​​ជា​បន្ត​បន្ទាប់​ អ្នក​នឹង​បាត់​បង់​ការ​អនុគ្រោះ​ពន្ធ​​ដែល​អ្នក​កំពុង​ទទួល​បាន​នាពេល​បច្ចុប្បន្ន។ [កម្ពុជា​] កំពុង​ទទួល​បាន​អត្ថប្រយោជន៍​ពី​ការ​ការ​ពារ​នេះ​នៅ​ឡើយ​។ ប៉ុន្តែ​​នៅ​ពេល​ការ​ការ​ពារ​នេះ​ត្រូវ​បាន​ដក​ចេញ​វិញ សេដ្ឋកិច្ច​នេះ​ត្រូវ​តែ​​ធ្វើ​ពិពិធកម្ម​​ និង​​ធ្វើ​យ៉ាង​ណា​ឲ្យ​មាន​ការ​ប្រកួត​ប្រជែង​ជាង​មុន”។

កាលពី​សប្ដាហ៍​មុន ធនាគារ​ ADB បាន​ចេញ​ផ្សាយ​របាយការណ៍​មួយ​ដែល​លើក​ឡើង​ថា ទោះបី​ជា​ឧស្សាហកម្ម​សំខាន់ៗ​របស់​កម្ពុជា​​ដូច​ជា វិស័យ​កាត់​ដេរ វិស័យ​កសិកម្ម វិស័យ​ទេស​ចរណ៍​ និង​វិស័យ​សំណង់ មាន​សារៈសំខាន់​ចំពោះ​ការ​ពង្រីក​សេដ្ឋកិច្ច​របស់​ប្រទេស​ក្ដី ក៏​វិស័យ​ទាំង​នេះ​នឹង​ឈាន​ដល់​កម្រិត​កំណត់​របស់​វា ហើយ​ការ​ធ្វើ​ពិពិធកម្ម​គឺ​មាន​សារៈ​សំខាន់​ខ្លាំង​ណាស់​ចំពោះ​កំណើន​ប្រកប​ដោយ​និរន្តរភាព​។

លោកស្រី សានដ្រា ដាមីកូ (Sandra D’Amico) អនុប្រធាន​សហព័ន្ធ​និយោជក​ និង​សមាគម​ពាណិជ្ជកម្ម​កម្ពុជា បាន​មាន​​ប្រសាសន៍​ថា វា​សំខាន់​ណាស់​ដែល​កម្ពុជា​​​ត្រូវ​​ធ្វើ​ពិពិធកម្ម​​ឲ្យ​បាន​កាន់​តែ​ឆាប់​រហ័ស​។ លោកស្រី​បាន​​លើក​ឡើង​តាមអុីម៉េល​​មួយ​ថា “យើង​មិន​មែន​ជា​ប្រទេស​ដែល​មាន​ប្រាក់​ឈ្នួល​ទាប​ទៀត​ឡើយ ហើយ​ចាំបាច់​ត្រូវ​ស្វែង​រក​វិធី​​ដើម្បី​ប្រកួត​ប្រជែង​លើ​ផលិតកម្ម​តម្លៃ​បន្ថែម​ព្រមទាំង​ផលិតភាព​ផង​ដែរ ដើម្បី​រក្សា​​បាន​នូវ​ការ​ប្រកួត​ប្រជែង និង​ការ​ទាក់​ទាញ​ជា​គោលដៅ​វិនិយោគ”៕ សុខុម​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស