27.1 C
Phnom Penh

ឧកញ៉ា ថោង សារ៉ាត់ ការ​ពារ​អង្គរក្ស​របស់​ខ្លួន​ ខណៈ​នគរ​បាល​កំពុង​ស៊ើបអង្កេត​

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់​ខ្ពស់​មួយ​រូប​នៅ​ក្រសួង​ការ​ពារ​ជាតិ​​ ដែល​អង្គរក្ស​របស់​ខ្លួន​ត្រូវ​បាន​ចាប់​ខ្លួន​កាល​ពី​ថ្ងៃ​ច័ន្ទ ពី​បទ​ជាប់​ពាក់​ព័ន្ធ​នៅ​ក្នុង​អំពើ​ឃាតកម្ម​លើ​អ្នក​ជំនួញ​ដ៏​លេចធ្លោ​ម្នាក់​ក្នុង​រាជ​ធានី​ភ្នំពេញ​កាលពី​ខែ​មុន បាន​លើក​ឡើង​កាលពី​ម្សិលមិញ​ថា អង្គរក្ស​របស់​ខ្លួន​គ្មាន​ទោស​ពៃរ៍​​អ្វីឡើយ​ ហើយ​ពួកគេ​នឹង​ត្រូវ​ដោះ​លែងវិញ​ក្នុង​ពេល​ឆាប់ៗ​។

ឧត្តម​សេនីយ៍ទោ ថោង ​​​​​​សារ៉ាត់ នាយរង​ខុទ្ទកាល័យ​ក្រសួង​ការ​ពារ​ជាតិ​​ ដែល​ក៏ជា​ឧកញា៉​ដែរ​នោះ​ និង​ដែល​មាន​ទំនាក់​ទំនង​យ៉ាង​ជិត​ស្និទ្ធ​ជាមួយ​គណបក្ស​ប្រជាជន​កម្ពុជា ត្រូវ​នគរ​បាល​រាជ​ធានី​ឃាត់​​ខ្លួន​​​នៅ​ក្នុង​ខណ្ឌ​ចំការមន ជាមួយ​នឹង​អង្គរក្ស​បី​នាក់​របស់​លោក។

អង្គរក្ស​ទាំង​នេះ​ត្រូវ​បាន​ចាប់​ខ្លួន ហើយ​​ត្រូវ​បាន​នាំ​ទៅ​ស្នង​ការដ្ឋាន​នគរ​បាល​រាជ​ធានី ដើម្បី​សាក​សួរ​ពាក់​ព័ន្ធ​នឹង​ការ​ធ្វើ​ឃាត​​លោក អុឹង ម៉េងជឺ ដែល​ត្រូវ​​គ្រាប់​កាំភ្លើង​ចំនួន​ប្រាំមួយ​គ្រាប់​នៅ​ខាង​ក្រៅ​ហាង​លក់​ផ្លែឈើ​មួយ កាលពី​ល្ងាច​ថ្ងៃទី​២២​ ខែ​វិច្ឆិកា។

កាលពី​ម្សិលមិញ ឧត្ដម​សេនីយ៍ទោ ថោង សារ៉ាត់ បាន​ជំទាស់​នឹង​ការ​លើក​ឡើង​ដែល​ថា អង្គរក្ស​ម្នាក់​ក្នុង​ចំណោម​អង្គរក្ស​ផ្សេងៗ​ទៀត​របស់​លោក​មាន​ជាប់​ពាក់​ព័ន្ធ​នឹង​អំពើ​​ឃាតកម្ម​នេះ ដែល​មាន​វីដេអូ​ឃ្លីប​ថត​​​បាន​ដោយ​កាមេរ៉ា​សុវត្ថិភាព ហើយ​ត្រូវ​បាន​គេ​ចែក​រំលែក​គ្នា​យ៉ាង​សុះសាយ​តាម​បណ្ដាញ​ទំនាក់​ទំនង​សង្គម។

លោក​បាន​មាន​​ប្រសាសន៍​ថា “ពួកគេ​ទាំង​បី​នាក់​កំពុង​ឃុំខ្លួន​នៅ​ស្នង​ការដ្ឋាន​នគរ​បាល​​នៅ​ឡើយ​ ប៉ុន្តែ​ពួកគេ​មិន​ពាក់​ព័ន្ធ​ក្នុង​ការ​ធ្វើ​ឃាត​នេះ​ទេ។ ពួកគេ​នឹង​ត្រូវ​បាន​ដោះ​លែង​​វិញ បន្ទាប់ពី​​ត្រូវ​ឃុំខ្លួន​៤៨​ម៉ោង​”។

យោង​តាម​ឧត្ដម​សេនីយ៍​ ថោង សារ៉ាត់ បាន​ឲ្យ​ដឹង​ថា អ្នក​ស៊ើបអង្កេត​ជឿជាក់​ថា អង្គរក្ស​ម្នាក់​​របស់​លោក​ ដែល​​លោក​ប្រាប់​ឈ្មោះ​ត្រឹម​ថា ” ស្នា ” នោះ​​មាន​ជាប់​ពាក់​ព័ន្ធ​នៅ​ក្នុង​អំពើ​ឃាតកម្ម​នេះ​។ ប៉ុន្តែ​លោក​បានអះអាង​ថា ពួកគេ​ទាំង​បី​មាន​ភ័ស្តុតាង​ដែល​បញ្ជាក់​ថា ពួកគេ​មិន​ជាប់​ពាក់​ព័ន្ធ​នៅ​ក្នុង​បទឧក្រិដ្ឋ​នេះ​។

លោក​បាន​ពន្យល់​ថា ភ័ស្តុតាង​នោះ​​​មាន​ស្នាម​មេដៃ​របស់​អង្គរក្ស​លោក​​​ដែល​ពួកគេ​​បាន​ស្គែន​រាល់​ពេល​ដែល​ពួកគេ​មក​ធ្វើ​ការ​ និង​ចេញ​ពី​ធ្វើ​​ការ​វិញ​។ លោក​បាន​មាន​ប្រសាសន៍​ថា “យើង​ជា​មាស​សុទ្ធ​។ យើង​មិន​ខ្លាច​ភ្លើង​នោះ​ទេ”។

ឧត្ដមសេនីយ៍​ទោ​ ថោង សារ៉ាត់ បាន​ទទួល​ស្គាល់​ថា អង្គរក្ស​របស់​លោក​ពិត​ជា​មាន​​កាំភ្លើង​ខ្លី​មែន ក្នុង​នោះ​មាន​ទាំង​កាំភ្លើង​ខ្លីពណ៌​ស​ដូចកាំភ្លើង​ខ្លី​ដែល​ខ្មាន់​កាំភ្លើង​បាន​ប្រើ​នៅ​ក្នុង​វីដេអូ​ឃ្លីប​ដែរ ប៉ុន្តែ​លោក​បាន​លើក​ឡើង​ថា កាំភ្លើង​នេះ​មិន​អាច​បញ្ជាក់​អ្វី​បាន​ឡើយ។ លោក​បាន​មាន​ប្រសាសន៍​បន្ថែម​ថា “យោង​តាម​វីដេអូឃ្លីប​ អង្គរក្ស​របស់​ខ្ញុំ​មើល​ទៅ​មិន​ដូច​ខ្មាន់​កាំភ្លើង​នោះ​ទេ។ ប្រពន្ធ​របស់​ពួកគេ​បាន​ហៅ​ទូរស័ព្ទ​មកខ្ញុំ​ទាំង​យំសោក​។ ខ្ញុំ​ប្រាប់​ពួកគេ​ថា កុំព្រួយ​បារម្ភ​អី​”។

លោក អុឹង ម៉េងជឺ ដែល​ជា​ប្រធាន​ក្រុម​ហ៊ុន​ Shimmex Group ​ដែល​មាន​ក្រុម​ហ៊ុន​សាខា​លក់​គ្រឿង​សំណង់​ សង្ហារិម គ្រឿង​ពេជ្រ និង​​អចលនទ្រព្យ​នោះ ​ត្រូវ​បាន​បាញ់​សម្លាប់​ភ្លាមៗ​បន្ទាប់ពី​ចុះ​ពី​រថយន្ត​ម៉ាក Lexus របស់​លោក​ដើម្បី​ទៅ​ទិញ​ផ្លែឈើ​នៅ​ក្នុង​ហាង​មួយ​ក្នុង​ខណ្ឌ​ចំការមន​ រាជធានីភ្នំពេញ។ បន្ទាប់ពី​ហេតុការណ៍​បាញ់​សម្លាប់​ បុគ្គលិក​ហាង​​លក់​ផ្លែឈើ​​វ័យ​ជំទង់​ម្នាក់ ដែល​បើក​​ទ្វារ​រថយន្ត​ឲ្យ​លោក អុឹង ម៉េងជឺ បាន​និយាយ​ថា បុរស​ពីរ​នាក់​បាន​ជិះ​ម៉ូតូ​មួយ​គ្រឿង​មក​ឈប់​ក្បែរ​នោះ ហើយ​អ្នក​​ជិះពីក្រោយ​បាន​ដើរ​ពីក្រោយ​លោក​ឧកញ៉ា​ស្ងាត់ៗ មុន​ពេល​បាញ់​លោក​ទៅ​លើ​ដង​ខ្លួន​ចំនួន​១០គ្រាប់​។

ឧត្ដម​សេនីយ៍​ទោ អុិន បូរ៉ា ប្រធាន​នាយកដ្ឋាន​នគរបាល​ព្រហ្មទណ្ឌ​នៅ​ក្រសួង​មហាផ្ទៃ​បាន​លើក​ឡើង​កាលពី​ម្សិលមិញ​ថា មន្ត្រី​សាលា​រាជ​ធានី​ទទួល​បាន​តម្រុយ​​នៅ​ក្នុង​ការ​សាក​សួរ​អង្គរក្ស​ទាំង​នេះ​ហើយ ហើយ​កំពុង​តែ​ធ្វើ​របាយការណ៍​ផ្ញើជូន​នាយកដ្ឋាន​របស់​លោក។ លោក​បាន​មាន​ប្រសាសន៍​ថា “បន្ទាប់ពី​នោះ យើង​នឹង​ប្រើ​ប្រាស់​ព័ត៌មាន​នេះ​ដើម្បី​រក​ឲ្យ​ឃើញ​ថា តើនរណា​ជា​ឃាតករ​​នៅ​ក្នុង​កិច្ច​ប្រជុំ​កង​កម្លាំង​ចម្រុះ​លើក​ក្រោយ​”។

លោក ជួន ណារិន ស្នង​ការ​រង​នគរ​បាល​រាជ​ធានី​ភ្នំពេញ​ ដែល​មន្ត្រី​របស់​លោក​កំពុង​ធ្វើ​ការ​ស៊ើបអង្កេត​លើ​​ករណី​ឃាត​កម្ម​នេះ​ជាមួយ​កង​រាជ​អាវុធ​ហត្ថ និង​នគរ​បាលព្រហ្មទណ្ឌ​នៅ​ក្រសួង​មហាផ្ទៃ​មិន​អាច​ទាក់​ទង​បាន​ទេ​កាលពី​ម្សិលមិញ​។

ឧត្ដម​សេនីយ៍​ត្រី ជួន ណារិន បាន​លើក​ឡើង​​កាលពី​លើក​មុន​ថា លោក​ឧកញា៉ អុឹង ម៉េងជឺ ត្រូវ​​បាន​សម្លាប់​ពាក់​ព័ន្ធ​នឹង​ជម្លោះ​ក្នុង​មុខ​ជំនួញ​។

លោក​ឧត្ដមសេនីយ៍​ទោ ថោង សារ៉ាត់ ដែល​ក្រុម​ហ៊ុន មានជ័យ International Investment ​​​​​​របស់​លោក​​​មាន​គម្រោង​អភិវឌ្ឍន៍​​អចលន​ទ្រព្យ​មួយ​ចំនួន​ក្នុង​រាជ​ធានី​ភ្នំពេញ​បាន​លើក​ឡើង​កាលពី​ម្សិលមិញ​ថា លោក​មិន​ដែល​មាន​ការ​រក​ស៊ី​ណាមួយ​ជាមួយ​លោក​ឧកញ៉ា អុឹង ម៉េងជឺ​ ឡើយ។ លោក​បាន​មាន​ប្រសាសន៍​ថា “ខ្ញុំ​មិន​ដែល​ស្គាល់​លោក អុឹង ម៉េងជឺ​ ទេ​។ ខ្ញុំ​មិន​ដែល​មាន​ការ​រក​ស៊ី​ជាមួយ​លោក អុឹង ម៉េងជឺ​ ទេ។ ខ្ញុំ​គ្មាន​ពាក់​ព័ន្ធ​ជាមួយ​លោក​ទាល់​តែ​សោះ”៕ ស៊ុយឈាង​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស