កាលពីម្សិលមិញ សាលាដំបូងរាជធានីភ្នំពេញបានផ្ដន្ទាទោសបុរសប្រាំនាក់ឲ្យជាប់ពន្ធនាគារម្នាក់ៗ៧ឆ្នាំពីបទចាប់រំលោភស្ត្រីអាយុ១៩ឆ្នាំម្នាក់នៅជាយរាជធានីភ្នំពេញកាលពីខែធ្នូ ឆ្នាំមុន។
ឡុង រ៉ាវុធ ផាន់ ចាន់ធឿន ស ធន អ្នកទាំងបីអាយុ២៤ឆ្នាំដូចគ្នា និង យ៉ា សុខុម អាយុ២៥ឆ្នាំ ត្រូវបានចាប់ខ្លួនបន្ទាប់ពីការចាប់រំលោភកាលពីឆ្នាំមុន។ ឆុន ចាន់ណែត ជាជនល្មើសទី៥កំពុងរត់គេចខ្លួននៅឡើយ ហើយត្រូវបានកាត់ទោសកំបាំងមុខ។
នៅក្នុងតុលាការកាលពីម្សិលមិញ លោក នូ វាសនា ចៅក្រមប្រធានក្រុមប្រឹក្សាជំនុំជម្រះបានផ្ដន្ទាទោសជនទាំងនេះពីបទរំលោភមានស្ថានទម្ងន់ទោសតាមមាត្រា ២៤០ នៃក្រមព្រហ្មទណ្ឌ ឲ្យជាប់ពន្ធនាគារម្នាក់ៗ៧ឆ្នាំ និងបង្គាប់ឲ្យបង់ប្រាក់សំណងដល់ជនរងគ្រោះសរុបចំនួន២.០០០ដុល្លារ។
អំឡុងសវនាការកាត់ក្ដីកាលពីថ្ងៃទី១៧ ខែវិច្ឆិកា ជនទាំងនេះបានអះអាងថា ពួកគេបានជួបស្ត្រីរូបនេះកាលពីថ្ងៃទី១០ ខែធ្នូ ឆ្នាំ២០១៣ ខណៈពេលផឹកស្រាបៀរនៅតូបលក់សាច់ក្រកមួយក្នុងសង្កាត់ចោមចៅ ខណ្ឌពោធិ៍សែនជ័យ ហើយក្រោយមកបានទៅសង្កាត់បឹងធំ កន្លែងដែលពួកគេផ្លាស់ប្ដូរគ្នារួមភេទជាមួយនាងដោយការស្ម័គ្រចិត្ត។
ទោះជាយ៉ាងណា តាមចម្លើយរបស់ជនរងគ្រោះដែលបានអាននៅតុលាការអំឡុងសវនាការកាត់ក្ដី ស្ត្រីរូបនេះបាននិយាយថា បុរសម្នាក់ក្នុងចំណោមបុរសទាំងនោះបានឌុបនាងទៅកាន់ព្រៃស្ងាត់មួយ ដែលនៅទីនោះជននេះ និងបុរសមួយក្រុមទៀតបានសម្រាតខោអាវនាង ហើយបានចាប់រំលោភនាងតែម្ដង៕សារុន