មន្ត្រីអន្តោប្រវេសន៍ម្នាក់បាននិយាយកាលពីម្សិលមិញថា មនុស្សជាង១.០០០នាក់ដែលរស់នៅខុសច្បាប់ក្នុងប្រទេសកម្ពុជា រួមមានជនជាតិវៀតណាម៩០០នាក់ ឥឡូវនេះត្រូវបាននិរទេសនៅពេលការធ្វើជំរឿននៅទូទាំងប្រទេសជិតបញ្ចប់។
លោក អ៊ុក ហៃសិលា ប្រធានផ្នែកស៊ើបអង្កេតនៅនាយកដ្ឋានអន្តោប្រវេសន៍ក្រសួងមហាផ្ទៃបានមានប្រសាសន៍ថា ជនបរទេសសរុប១.១៦៨នាក់មកពីប្រទេសចំនួន២៥ត្រូវបានចាប់ខ្លួនចាប់តាំងពីការធ្វើជំរឿនកាលពីខែកក្កដា រួមមានជនជាតិចិន៨០នាក់ បង់ក្លាដែស១៧នាក់ កូរ៉េខាងជើង១៦នាក់ កូរ៉េខាងត្បូង១០នាក់ និងនីហ្សេរីយា៉១២នាក់។
លោក ហៃសិលា បានមានប្រសាសន៍ថា “មួយចំនួនក្នុងចំណោមពួកគេមានលិខិតឆ្លងដែន ប៉ុន្តែពួកគេរស់នៅក្នុងប្រទេសកម្ពុជាដោយមានលិខិតឆ្លងដែនហួសសុពលភាព…ប៉ុន្តែជនជាតិវៀតណាមភាគច្រើនបានមករស់នៅក្នុងប្រទេសកម្ពុជាដោយគ្មានលិខិតឆ្លងដែនទេ”។ លោកបានបន្ថែមថា ជនជាតិវៀតណាមខុសច្បាប់ជាង៦០០នាក់ត្រូវបានឃើញរស់នៅក្នុងរាជធានីភ្នំពេញ។
លោកបានមានប្រសាសន៍ថា មនុស្ស១.០៩០នាក់ត្រូវបានបញ្ជូនទៅប្រទេសរបស់ខ្លួនវិញរួចហើយ ហើយថា ៧៨នាក់ទៀតកំពុងត្រូវឃុំខ្លួនដើម្បីរង់ចាំការនិរទេស។
តួលេខថ្មីនេះគឺខ្ពស់ជាងតួលេខដែលផ្ដល់ឲ្យកាលពីចុងខែតុលា ដែលនៅពេលនោះលោក ហៃសិលា បានមានប្រសាសន៍ថា មានការចាប់ខ្លួនមនុស្ស៥៥២នាក់។ កាលពីម្សិលមិញ លោកបានមានប្រសាសន៍ថា ជំរឿនជិតបញ្ចប់ហើយ ប៉ុន្តែលោកមិនច្បាស់ថា តើនឹងត្រូវចប់នៅដំណាច់ឆ្នាំនេះឬយ៉ាងណានោះឡើយ៕ សារុន