យោងតាមមន្ត្រីនិងអង្គការសិទ្ធិមនុស្សបានឲ្យដឹងថា កាលពីថ្ងៃច័ន្ទ អ្នកភូមិមួយក្រុមមកពីខេត្តពោធិ៍សាត់បានផ្អាកការដើរចម្ងាយ៣០០គីឡូម៉ែត្រមកក្រុងភ្នំពេញ ដោយយល់ព្រមចរចាជាមួយអាជ្ញាធរមូលដ្ឋានជាជំនួសវិញ។ ការធ្វើដំណើរនេះកើតមានឡើងបន្ទាប់ពីញត្តិដែលពួកគាត់បានបញ្ជូនកាលពីខែមុនដើម្បីស្វែងរកអន្តរាគមន៍ពីសភាមិនទទួលបានចម្លើយ។
ប្រជាពលរដ្ឋប្រហែល៨០គ្រួសារនៅឃុំថ្មដានិយាយថា ពួកគាត់កំពុងត្រូវក្រុមហ៊ុនអឹមឌីអេស របស់ឧកញ៉ា ទ្រី ភាព បង្ខំឲ្យចេញពីដី ដែលពួកគាត់បានធ្វើស្រែចម្ការអស់រយៈពេលជាច្រើនឆ្នាំមកហើយ។ ក្រុមហ៊ុននេះទទួលបានដីសម្បទានសេដ្ឋកិច្ចទំហំ២.២៥០ហិកតានៅស្រុកវាលវែង ដើម្បីអភិវឌ្ឍប៉ុស្តិ៍ព្រំដែនថ្មី និងចម្ការកៅស៊ូ។
កាលពីថ្ងៃសៅរ៍សប្តាហ៍មុន ប៉ូលិស កម្លាំងរាជអាវុធហត្ថ និងទាហានរាប់សិបនាក់ ដឹកនាំដោយលោកអភិបាលខេត្តរង កើត ឆែ បានចុះទៅរុះរើផ្ទះចំនួន១២ខ្នងក្នុងភូមិសង្គមថ្មី ឃុំអូរស្វាយ ជាហេតុបណ្តាលឲ្យអ្នកភូមិ២៧នាក់ផ្ទុះកំហឹងដើរមកភ្នំពេញ ដើម្បីសុំឲ្យតំណាងរាស្ត្រជួយស្វែងរកដំណោះស្រាយ។
លោក ភួង សុធា មន្ត្រីស៊ើបអង្កេតសមាគមសិទ្ធិមនុស្សអាដហុកប្រចាំខេត្តពោធិ៍សាត់ បានឲ្យដឹងថា ការបំផ្លាញផ្ទះសំបែងបានបង្កឲ្យមានការតវ៉ានេះ។ លោកបាននិយាយថា “អាជ្ញាធរបានឃាត់ពួកគាត់នៅចម្ងាយប្រហែល១០គីឡូម៉ែត្រពីទីប្រជុំជន និងបានដឹកពួកគាត់មកសាលាខេត្តវិញ ដើម្បីជួបប្រជុំជាមួយអភិបាលខេត្ត”។
អ្នកស្រី ប្រាក់ សុផល អាយុ៦០ឆ្នាំ បាននិយាយថា អ្នកស្រីបានធ្វើស្រែលើដីទំហំ៩ហិកតាក្នុងតំបន់នោះតាំងពីឆ្នាំ១៩៩៨មក និងមានឯកសារបញ្ជាក់ថា អ្នកស្រីជាម្ចាស់ដីនោះ។ អ្នកស្រីនិយាយថា “ខ្ញុំបានចូលរួមការតវ៉ាដើម្បីទាមទារឲ្យមានដំណោះស្រាយ ពីព្រោះយើងបានដាក់ញត្តិទៅសភាជាតិមួយខែមកហើយ ប៉ុន្តែមិនទាន់ទទួលបានការឆ្លើយតបទេ”។
លោក ម៉ៅ ថានីន អភិបាលខេត្ត បាននិយាយថា លោកបានអះអាងនឹងក្រុមនេះថា នឹងដោះស្រាយកង្វល់របស់ពួកគាត់។ លោក បាននិយាយទៀតថា “ខ្ញុំបានហៅមន្ត្រីជំនាញរបស់ខ្ញុំហើយ ដើម្បីពិភាក្សារឿងនេះ ហើយយើងនឹងដោះស្រាយបញ្ហានេះតាមនីតិវិធីច្បាប់”។
លោក ថានីន បាននិយាយថា ជាលក្ខណៈបច្ចេកទេសអ្នកភូមិមិនបានជាប់ពាក់ព័ន្ធក្នុងជម្លោះជាមួយក្រុមហ៊ុនអឹមឌីអេសទេ ព្រោះអីក្រុមហ៊ុនគ្រាន់តែជួលដីប៉ុណ្ណោះ ដូច្នេះ វានៅតែជារបស់រដ្ឋដដែលទេ។
ដោយបដិសេធមិនឆ្លើយសំណួរអំពីការវាយបំផ្លាញផ្ទះសំបែងរបស់ប្រជាពលរដ្ឋចោលកាលពីសប្តាហ៍មុននោះ លោកចៅហ្វាយខេត្តរូបនេះបាននិយាយថា “ក្នុងនាមជាអាជ្ញាធរ យើងដូចជាឪពុកម្តាយរបស់បងប្អូន ហើយយើងនឹងមិនធ្វើបាបកូនចៅរបស់យើងឡើយ”៕មានិត