អភិបាលខណ្ឌជ្រោយចង្វារ បានលើកឡើងថា លោកបានស្នើឲ្យក្រុមហ៊ុនវិនិយោគទុនអាណិកជនកម្ពុជា (OCIC) សងសំណងដល់ម្ចាស់ភោជនីយដ្ឋានចំនួនពីរ ដែលត្រូវទឹកជន់លិចកាលពីម្សិលមិញ បន្ទាប់ពីគ្រឿងចក្រឈូសឆាយរបស់ក្រុមហ៊ុននេះបានធ្វើឲ្យបាក់ទំនប់ទប់ទឹកមួយក្បែរនោះ។
លោក ឃ្លាំង ហួត ដែលជាអភិបាលខណ្ឌជ្រោយចង្វារនេះ បានលើកឡើងទៀតថា បុគ្គលិករបស់ក្រុមហ៊ុន OCIC ដែលកំពុងអភិវឌ្ឍទីក្រុងរណបមួយក្នុងទឹកប្រាក់ប្រហែល៣ពាន់លានដុល្លារនៅតំបន់នោះ បានប្រើគ្រឿងចក្រឈូសឆាយដើម្បីជីកដីក្បែរទំនប់ ហើយទំនប់នោះបានបាក់នៅអំឡុងពេលរសៀល។ ហើយការបាក់នេះបានធ្វើឲ្យទឹកភក់ដែលស្ថិតនៅពីក្រោយទំនប់ហូរចូលភោជនីយដ្ឋានចំនួនពីរក្បែរនោះ ដោយធ្វើឲ្យមានការខូចខាតយ៉ាងច្រើន បើគិតជាទឹកប្រាក់រាប់ម៉ឺនដុល្លារ ក្នុងនោះក៏មានត្រីប្រហែល៤.០០០ក្បាល ដែលនាំចូលពីទន្លេអាម៉ាហ្សូនមកបានងាប់ផងដែរ។
លោក ឃ្លាំង ហួត បានមានប្រសាសន៍ថា “នេះគឺជាកំហុសរបស់ក្រុមហ៊ុន OCIC ព្រោះពួកគេបានជីកដីរហូតធ្វើឲ្យទំនប់បាក់។ ក្រុមហ៊ុនត្រូវតែទៅត្រួតពិនិត្យមើលការខូចខាតនៅភោជនីយដ្ឋានទាំងនេះ ហើយសងសំណងដល់ពួកគេ ព្រោះម្ចាស់ភោជនីយដ្ឋានខិតខំរកស៊ីខ្លាំងណាស់”។ លោកបានបន្ថែមថា ម្ចាស់ភោជនីយដ្ឋានទាំងពីរបានដាក់ពាក្យប្ដឹងមកការិយាល័យលោករួចហើយ។
លោកអភិបាលបានឲ្យដឹងទៀតថា លោកនឹងស្នើឲ្យក្រសួងសាធារណការ និងដឹកជញ្ជូន ផ្ដល់យោបល់ថាតើត្រូវសាងសង់ទំនប់ឡើងវិញដោយរបៀបណា ដើម្បីកុំឲ្យការបាក់ទំនប់កាលពីម្សិលមិញកើតឡើងម្ដងទៀត។
លោក សេង លី ម្ចាស់ភោជនីយដ្ឋានបឹងមាសបានលើកឡើងថា ទឹកបានជន់លិចឆាកមួយនៅខាងក្រៅ និងគ្រឿងសង្ហារិម ព្រមទាំងឧបករណ៍ខារ៉ាអូខេក្នុងបន្ទប់ចំនួន១២ ដោយធ្វើឲ្យមានការខូចខាតគិតជាទឹកប្រាក់សរុបប្រហែល៥០០.០០០ដុល្លារ។ លោក លី បានចោទប្រកាន់ក្រុមហ៊ុន OCIC ថា មានបំណងយកដីរបស់គាត់ ដោយមានចេតនាធ្វើឲ្យមានទឹកជន់លិចនេះ។ លោកបាននិយាយថា “ក្រុមហ៊ុន OCIC មានចេតនាធ្វើឲ្យរឿងនេះកើតឡើង។ វាមិនដែលកើតឡើងទេពីមុនមក ហេតុអ្វីទើបតែកើតឡើងនៅពេលនេះ?”។
លោក ឌឿន ដុន ដែលជាអ្នកគ្រប់គ្រងភោជនីយដ្ឋានមួយទៀតឈ្មោះ ម៉ែក្មេក២ បានលើកឡើងថា ភោជនីយដ្ឋានរបស់គាត់មានការខូចខាតតិចជាង ប៉ុន្តែថា ទឹកជន់លិចនេះបានធ្វើឲ្យត្រីនាំចូលពីទន្លេអាមា៉ហ្សូនមកងាប់អស់ជាច្រើនក្បាល នៅពេលទឹកប្រៃបានហូរចូលក្នុងស្រះចិញ្ចឹមត្រីទាំងនេះ។ ហើយអតិថិជនដែលទៅទទួលទានអាហារចំពេលដែលមានទឹកហូរចូលមកក៏បានចាកចេញទៅដោយមិនឲ្យលុយដែរ។ លោកបាននិយាយថា “យើងបានខាតបង់ជាង៥.០០០ដុល្លារ ដោយសារទឹកជន់លិចនេះ។ ម្ចាស់ភោជនីយដ្ឋានបានដាក់ពាក្យប្ដឹងរួចហើយ ប៉ុន្តែអ្វីៗនៅទីនេះត្រូវបានជន់លិច ហើយខូចខាតរួចអស់ហើយ”។
លោក ទូច សំណាង អ្នកគ្រប់គ្រងគម្រោងរបស់ក្រុមហ៊ុន OCIC បានលើកឡើងថា លោកដឹងអំពីទឹកជន់លិចនេះ ប៉ុន្តែថា នេះគឺជាបញ្ហារបស់លោក ឃ្លាំង ហួត។ លោកបាននិយាយថា “អ្នកគួរតែសួរលោកអភិបាលខណ្ឌ ព្រោះក្រុមហ៊ុន OCIC កំពុងធ្វើការនៅក្នុងខណ្ឌជ្រោយចង្វារ ហេតុដូច្នេះលោកអភិបាលនឹងដឹងថា ត្រូវដោះស្រាយដូចម្ដេចនោះ”៕ ស៊ុយឈាង