ក្រុមមន្ត្រីបានលើកឡើងកាលពីម្សិលមិញថា បុរសម្នាក់ដែលជាប់សង្ស័យថា បានជួយមនុស្សពីរនាក់ទៀតក្នុងការបាញ់មន្ត្រីរដ្ឋបាលព្រៃឈើម្នាក់នៅក្នុងខេត្តមណ្ឌលគិរីកាលពីខែកក្កដានោះ ត្រូវបានចាប់ខ្លួននៅច្រកទ្វារអន្តរជាតិប៉ោយប៉ែតកាលពីថ្ងៃសៅរ៍ ខណៈដែលព្យាយាមរត់គេចខ្លួនទៅប្រទេសថៃ ហើយត្រូវបានចោទប្រកាន់ពីបទបិទបាំងភ័ស្តុតាង។
លោក ហេង ចាន់ត្រា នាយរងខណ្ឌរដ្ឋបាលព្រៃឈើក្រុងសែនមនោរម្យក្នុងខេត្តមណ្ឌលគិរីត្រូវបានបាញ់មួយគ្រាប់ចំដៃឆ្វេងកាលពីយប់ថ្ងៃទី៤ខែកក្កដា នៅពេលទៅស៊ើបអង្កេតសេចក្តីរាយការណ៍ថា រថយន្តមួយចំនួនដឹកឈើប្រណីតខុសច្បាប់បានព្យាយាមបើកឆ្លងចូលទៅប្រទេសវៀតណាម។
លោក យ៉ា ណារិន ព្រះរាជអាជ្ញាអមសាលាដំបូងខេត្តមណ្ឌលគិរីបានមានប្រសាសន៍កាលពីម្សិលមិញថា លោក ស្លេស ទ្រីយ៉ា អាយុ៣៥ឆ្នាំ ជាអ្នករកស៊ីឈើក្នុងមូលដ្ឋានម្នាក់មិនត្រូវបានសង្ស័យថា មានវត្តមាននៅកន្លែងកើតហេតុនៅពេលបាញ់ទេ ប៉ុន្តែបានសារភាពថា បានកាន់កាំភ្លើងខ្លីដែលត្រូវបានប្រើនោះ។
លោក ណារិន បានមានប្រសាសន៍ថា “ទ្រីយ៉ា មិនមែនជាអ្នកបាញ់ទេ ប៉ុន្តែគាត់មានពិរុទ្ធភាពដោយការបិទបាំងភ័ស្តុតាង។ យើងបានចោទប្រកាន់គាត់កាលពីម្សិលមិញ [ថ្ងៃអង្គារ]ពីបទបិទបាំងភ័ស្តុតាង ហើយឥឡូវនេះគាត់កំពុងត្រូវឃុំខ្លួនបណ្តោះអាសន្នរង់ចាំការការជំនុំជម្រះ”។
លោក ស៊ូ សុវណ្ណ ស្នងការរងនគរបាលខេត្តមណ្ឌលគិរី បានមានប្រសាសន៍ថា អាជ្ញាធរទទួលបានព័ត៌មានពីការជាប់ពាក់ព័ន្ធរបស់លោក ទ្រីយ៉ា តាមរយៈលោក ឡែន កម្រៃ អាយុ៣៧ឆ្នាំ ជាអ្នករកស៊ីឈើម្នាក់ទៀត ដែលត្រូវបានចាប់ខ្លួនជុំវិញការបាញ់កាលពីថ្ងៃទី១៧ ខែកក្កដា ហើយបានសារភាពចំពោះការបាញ់នោះ។
លោកបានមានប្រសាសន៍ថា លោក ពុំ ពឿន អាយុ៤៨ឆ្នាំ ជាអ្នកយកព័ត៌មានឲ្យកាសែត អង្គរបុរី ត្រូវបានចាប់ខ្លួនកាលពីថ្ងៃទី១១ ខែវិច្ឆិកា ហើយបានសារភាពថានៅជាមួយ លោក កម្រៃ នៅពេលបាញ់នោះ។
ទាំងលោក កម្រៃ និងលោក ពឿន ត្រូវបានចោទប្រកាន់ពីបទប៉ុនប៉ងមនុស្សឃាត។ យោងតាមលោក សុវណ្ណ បានឲ្យដឹងថា អ្នកទាំងពីរបានអះអាងថា ពួកគេស្រវឹងស្រា ហើយបានបាញ់លោក ចាន់ត្រា បន្ទាប់ពីមន្ត្រីរដ្ឋបាលព្រៃឈើរូបនេះធ្វើឲ្យរថយន្តរបស់ពួកគេក្រឡាប់ ហើយពួកគេចាប់ផ្តើមទាស់សម្តីគ្នា។ ពួកគេបដិសេធថា ពួកគេមិនបានដឹកឈើខុសច្បាប់ទេ។
លោកបានមានប្រសាសន៍ថា “យើងបានសាកសួរមនុស្សទាំងបីនាក់នេះ ហើយពួកគេបានប្រាប់យើងដូចគ្នា ថា ពួកគេបានបាញ់មន្ត្រីរដ្ឋបាលព្រៃឈើរូបនេះ ពីព្រោះពួកគេស្រវឹងស្រា។ ប៉ុន្តែខ្ញុំគិតថា ការបាញ់នេះគឺជាការសងសឹក ពីព្រោះពួកគេខឹងមន្ត្រីរូបនេះចំពោះការចាត់វិធានការនៅពេលពួកគេដឹកឈើខុសច្បាប់”។
នៅពេលត្រូវទាក់ទងកាលពីម្សិលមិញ លោក ចាន់ត្រា បានមានប្រសាសន៍ថា គឺលោក ពឿន ដែលបានបាញ់គាត់ ហើយថា លោកបានទាមទារប្រាក់សំណងចំនួន២០០លានរៀល (ប្រហែល ៥០.០០០ដុល្លារ)៕សារុន