28 C
Phnom Penh

ជនឆបោក​តាម​វីង​នៅ​ខេត្ត​ស្វាយ​រៀង​​ ​ត្រូវ​បាន​ចោទ​ប្រកាន់​បន្ទាប់ពី​ផែន​ការ​របស់​ខ្លួន​បរាជ័យ

ដោយ ឌឹ ខេមបូឌា ដេលី

បទវិភាគ

នគរ​បាល​បាន​ឲ្យ​ដឹង​ថា បុរស​អាយុ​៣៥​ឆ្នាំ​ម្នាក់​​នៅក្នុង​ខេត្ត​ស្វាយរៀង​ ត្រូវ​បាន​ចោទ​ប្រកាន់​ពីបទ​​ឆបោក​កាលពី​ម្សិលមិញ បន្ទាប់​ពី​ជន​នេះ​បាន​សារភាព​ថា ខ្លួន​បាន​ឆបោក​​ប្រាក់​រាប់​រយ​ដុល្លារ​ពី​មន្ត្រី​នគរ​បាល​នៅ​ក្នុង​ខេត្ត​មួយ​ចំនួន​ ដោយ​ក្លែង​បន្លំ​ថា​ខ្លួន​ធ្វើ​ការ​នៅ​នាយកដ្ឋាន​ផ្គត់ផ្គង់​នៃទីស្ដីការ​គណៈរដ្ឋមន្ត្រី​។

យោង​តាម​​លោក កែវ សុថា នាយ​រង​​​ការិយាល័យ​​​ព្រហ្មទណ្ឌ​កម្រិត​ស្រាល​នៃ​​​ស្នងការ​​​ដ្ឋាន​​​នគរបាល​​​ខេត្ត​ស្វាយរៀង​បាន​ឲ្យ​ដឹង​ថា រូ សិទ្ធ អាយុ​៣៥​ឆ្នាំ​​ត្រូវ​បាន​ចាប់​ខ្លួន​កាលពី​ថ្ងៃ​អង្គារ​ ​ខណៈ​​កំពុង​​​ចាំ​យក​ប្រាក់​ពី​ជនរង​គ្រោះ​ចុង​ក្រោយ​ គឺ​លោក ងួន គឿន ស្នង​ការ​នគរ​បាល​ខេត្ត​រតនគិរី។

កាល​ពីព្រឹក​ថ្ងៃ​អង្គារ​ ជន​ឆបោក​ឈ្មោះ រូ សិទ្ធ នេះ​​បាន​​ហៅ​ទូរស័ព្ទ​​ទៅ​ឧត្ដម​សេនីយ៍​ត្រី ងួន គឿន ដោយ​ប្រាប់​ថា ​ខ្លួន​ឈ្មោះ​ សេង ទៀង អនុប្រធាន​នាយកដ្ឋាន​ផ្គត់​ផ្គង់​​នៅ​ទីស្ដីការ​​គណៈរដ្ឋមន្ត្រី ហើយ​​បាន​ស្នើ​ប្រាក់​ចំនួន​២៥០​ដុល្លារ​ ដែល​ជននេះ​លើក​ឡើង​ថា នឹង​ត្រូវ​យក​ទៅ​សាង​សង់​វត្ត​ថ្មី​មួយ។ លោក សុថា ​បាន​ឲ្យ​ដឹង​ទៀត​ថា រូ សិទ្ធ ​​បាន​ស្នើ​ឲ្យ​មាន​ការ​ប្រគល់​ប្រាក់​តាម​កន្លែង​ផ្ទេរ​លុយ​វីង។

លោកបាន​មាន​ប្រសាសន៍​​ថា “លោក ងួន គឿន បាន​និយាយ​ថា លោក​គិត​ថា សំឡេង​ដែល​ហៅ​ទូរស័ព្ទ​មក​ស្ដាប់​ទៅ​​ទំនង​ជា​ឆបោក​​​ ហេតុ​ដូច្នេះ​លោក​បាន​ស្នើ​ឲ្យ​ក្រុម​ហ៊ុន​ប្រព័ន្ធ​​ទូរស័ព្ទ​​ឆែក​លេខ​របស់​ជនសង្ស័យ​”។ លោក​បាន​បន្ថែម​ថា បន្ទាប់​មក​ឧត្ដម​សេនីយ៍ត្រី ងួន គឿន បាន​ជូន​ដំណឹង​ដល់​នគរ​បាល​។

លោក សុថា បាន​លើក​ឡើង​បន្ត​ថា បន្ទាប់​មក​​មន្ត្រី​បាន​រៀប​អន្ទាក់​ចាប់​ រូ​​​ សិទ្ធ ដោយ​ប្រាប់​ឲ្យ​ឧត្ដម​សេនីយ៍​ត្រី ងួន គឿង ​វេរ​ប្រាក់​ត្រឹម​តែ​១០​ដុល្លារ​បាន​ហើយ។ នៅ​ពេល​ជន​សង្ស័យ​មក​ដក​ប្រាក់​​នៅ​កន្លែង​វេរ​លុយ​វីង​ក្នុង​ខេត្ត​ស្វាយរៀង នគរ​បាល​ក៏​សម្រុក​ចូល​តែ​ម្ដង។ លោក​បាន​មាន​ប្រសាសន៍​បន្ថែម​ទៀត​ថា “យើង​បាន​ចាប់​ខ្លួន​ជនសង្ស័យ​នៅ​ពេល​ជន​នេះ​រង់ចាំ​ដក​ប្រាក់​ពី​​​សាខា​ផ្ទេរលុយ​វីង​ ហើយ​តុលាការ​បាន​ចោទ​ប្រកាន់​ជននេះ​ពីបទ​ឆបោក​នៅ​ព្រឹក​នេះ​”។

លោក សុថា បាន​លើក​ឡើង​ថែម​ទៀត​ថា រូ សិទ្ធ បាន​សារភាព​ថា ពិត​ជា​បាន​​ព្យាយាម​ឆបោក​ប្រាក់​ពី​ឧត្ដម​សេនីយ៍​ត្រី ងួន គឿន មែន ហើយ​ថា​ខ្លួន​បាន​​បោក​មន្ត្រី​​នគរ​បាល​ចំនួន​បី​នាក់​ផ្សេង​ទៀត​ដោយ​ជោគជ័យ​នៅ​ក្នុង​ខេត្ត​ផ្សេងៗ​គ្នា ដោយ​ប្រើ​ឈ្មោះ​របស់​លោក សេង ទៀង រាល់​លើក​។ លោក​បាន​មាន​ប្រសាសន៍​ថា “រាល់​លើក ​​ជនសង្ស័យ​​បាន​ស្នើ​ប្រាក់​ពី​២០០​ដុល្លារ​ទៅ​៣០០​ដុល្លារ”។

លោក សេង​ ទៀង ពិត​ប្រាកដ​បាន​លើក​ឡើង​កាលពី​ម្សិលមិញ​ថា ​លោក​មិន​​បាន​ដឹង​ថា ជន​ឆបោក​ប្រើ​ឈ្មោះ​របស់​លោក​ឡើយ ហើយ​បាន​​អំពាវ​នាវ​ឲ្យ​តុលាការ​ផ្ដន្ទាទោស​ រូ សិទ្ធ។ លោក​បាន​មាន​ប្រសាសន៍​ថា “បុរស​នេះ​​គួរ​តែ​ត្រូវ​បាន​ផ្ដន្ទាទោស​ដោយ​ច្បាប់ ព្រោះ​ជន​នេះ​​ប្រើ​ឈ្មោះ​ខ្ញុំ​ដើម្បី​ឆបោក​គេ​”៕ ស៊៊ុយឈាង​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស