31 C
Phnom Penh

លោក​ កឹម សុខា ​ស្វែង​រក​ការ​តែង​តាំង​អ្នកវិភាគ​នយោបាយ​​ល្បី​ឈ្មោះ​ជា​ទីប្រឹក្សា​ផ្ទាល់​

ដោយ ឌឹ ខេមបូឌា ដេលី

បទវិភាគ

លោក កឹម សុខា អនុប្រធាន​រដ្ឋសភា​​បាន​ស្នើ​សុំ​​តែង​តាំង​លោក ឡៅ ម៉ុងហៃ អ្នក​វិភាគ​នយោបាយ​ល្បី​ឈ្មោះ និងជា​អតីត​សម្ពន្ធមិត្ត​​នៅ​ក្នុង​ចលនា​តស៊ូ​ប្រឆាំង​រដ្ឋាភិបាល​ ដែល​គាំទ្រ​ដោយ​វៀតណាម​​ នៅ​ទសវត្សរ៍​ឆ្នាំ​១៩៨០ ធ្វើ​ជា​ទីប្រឹក្សា​ផ្ទាល់​របស់​លោក នេះ​បើ​យោង​តាម​លិខិត​មួយ​ច្បាប់​ផ្ញើជូន​លោក ហេង សំរិន ប្រធាន​រដ្ឋសភា​។

លោក មុត ចន្ថា ប្រធាន​​ខុទ្ទកាល័យ​​របស់​លោក កឹម សុខា ​បាន​មាន​ប្រសាសន៍​កាលពី​ថ្ងៃ​សុក្រ​ថា ការ​តែង​តាំង​នេះ​មិន​ទាន់​ចប់​សព្វ​គ្រប​់​នៅ​ឡើយ​ទេ​តាម​រយៈ​ព្រះរាជក្រឹត្យ​ ប៉ុន្តែ​ថា ការ​ជ្រើស​តាំង​នេះ​ត្រូវ​បាន​ធ្វើ​ឡើង​ដោយ​ផ្អែក​លើ​ “គុណសម្បត្តិ​ ចំណេះ​ដឹង​ និង​បទ​ពិសោធន៍​របស់​លោក ឡៅ ម៉ុងហៃ។

លោក​បាន​មាន​ប្រសាសន៍​ថា “គាត់​គឺ​ជា​ឥស្សរជន​ល្បី​ឈ្មោះ​ ពីព្រោះ​គាត់​បាន​ធ្វើ​កិច្ច​ការ​យ៉ាង​ជ្រៅ​ដើម្បី​នាំ​មក​នូវ​​លទ្ធិ​ប្រជា​ធិបតេយ្យ​ និង​សិទ្ធិ​មនុស្ស​នៅ​កម្ពុជា​។ គាត់​គឺ​ជា​បុគ្គល​មួយ​រូប​ដែល​មាន​ចំណេះ​ដឹង​បំផុត​ ដែល​បាន​ជួយ​​លោក​ [លោក កឹម សុខា] ឲ្យ​ទទួល​បាន​អាណត្តិ​នៅ​រដ្ឋសភា”។

លិខិត​​ចុះ​ថ្ងៃ​ទី៣ ខែ​ធ្នូ​នេះ​ ដែល​លោក កឹម សុខា បាន​ផ្ញើជូន​​លោក ហេង សំរិន ​ក៏​ស្នើ​សុំ​តែង​តាំង​លោក សាយ បូរី ជា​មេធាវី​ដែល​ធ្លាប់​ការ​ពារក្ដី​​ ខៀវ សំផន អតីត​ប្រធាន​រដ្ឋ​ខ្មែរ​ក្រហម ធ្វើ​ជា​ទីប្រឹក្សា​ផ្ទាល់​របស់​លោក​ផង​ដែរ​។

លោក កឹម សុខា បាន​លើក​ឡើង​នៅ​ក្នុង​លិខិត​នោះ​ថា “ខ្ញុំ​សូម​ជម្រាប​ជូន​សម្ដេច​ប្រធាន​​មេត្តា​ជ្រាប​ថា ដើម្បី​បំពេញ​ការ​ងារ​ជូន​រដ្ឋសភា​​ដែល​ជា​ស្ថាប័ន​កំពូល​របស់​ជាតិ​ឲ្យ​បាន​ជោគ​ជ័យ និង​មាន​ប្រសិទ្ធភាព​ខ្ពស់​ ខ្ញុំ​ស្នើ​សុំ​សម្ដេច​ប្រធាន​មេត្តា​ជួយ​សម្រួល​ឲ្យ​មាន​ការ​តែង​តាំង​​ទីប្រឹក្សា​ផ្ទាល់​ខ្លួន​របស់​ខ្ញុំ​ចំនួន​ពីរ​រូប​ដូច​ខាង​ក្រោម​៖ ទី១​ បណ្ឌិត​ សាយ បូរី ជាទីប្រឹក្សា​ មាន​ឋានៈ​ស្មើ​រដ្ឋមន្ត្រី ទី២ បណ្ឌិត ឡៅ ម៉ុងហៃ ជា​ទីប្រឹក្សា​​ មាន​ឋានៈ​ស្មើ​រដ្ឋមន្ត្រី​”។

កាលពី​ខែ​កញ្ញា មិន​យូរ​ប៉ុន្មាន​បន្ទាប់ពី​ត្រូវ​បាន​បោះ​ឆ្នោត​ជ្រើស​តាំង​ឲ្យ​ធ្វើ​​អនុប្រធាន​រដ្ឋសភា​ លោក​ កឹម សុខា ដែល​ជា​អនុប្រធាន​​គណបក្ស​សង្គ្រោះ​ជាតិ​ដែរ​នោះ បាន​ស្នើ​សុំ​តែង​តាំង​ទីប្រឹក្សា​ចំនួន​២១​រូប​។ លោក​ មុត ចន្ថា បាន​មាន​ប្រសាសន៍​កាលពី​ម្សិលមិញ​ថា ទីប្រឹក្សា​ចំនួន​១៤​រូប​ត្រូវ​បាន​អនុម័ត​ដោយព្រះរាជក្រឹត្យ​រួច​ហើយ។

លោក​ ងួន ញ៉ិល តំណាង​រាស្ត្រ​គណបក្ស​ប្រជា​ជន​កម្ពុជា និង​ជា​អនុប្រធាន​ទី២​នៃ​រដ្ឋសភា​ មាន​ទីប្រឹក្សា​ចំនួន​៦៣​រូប​ ដែល​ត្រូវ​បានឡាយ​ព្រះហត្ត​លេខា​យល់​ព្រម​​ដោយ​ព្រះមហាក្សត្រ​ នរោត្តម សីហមុនី កាលពី​ខែ​តុលា។

លោក ឡៅ ម៉ុងហៃ អតីត​នាយក​ប្រតិបត្តិ​​វិទ្យាស្ថាន​ខ្មែរ​ ដើម្បី​ប្រជា​ធិបតេយ្យ ដែល​ជាញឹក​ញាប់​នៅ​ក្នុង​ប្រព័ន្ធ​ផ្សព្វ​ផ្សាយ​ត្រូវ​បាន​​គេ​លើក​ឡើង​ថា ជា​អ្នក​វិភាគ​នយោបាយ​ឯករាជ្យ​នោះ មិន​អាច​ទាក់​ទង​បានទេ​កាលពី​ថ្ងៃ​សុក្រ។

ទាំង​លោក ឡៅ ម៉ុងហៃ និង​លោក កឹម សុខា សុទ្ធ​តែ​ជា​បុគ្គល​សកម្ម​នៅ​ក្នុង​រណសិរ្ស​ជាតិ​រំដោះ​ប្រជា​ពលរដ្ឋ​ខ្មែរ ដឹកនាំ​ដោយ​លោក​តា សឺន សាន ដែល​រួប​រួម​​គ្នា​ជាមួយ​​កង​កម្លាំង​ដែល​មាន​ភក្ដី​ភាព​ចំពោះ​សម្ដេច​ឪ​ នរោត្តម សីហនុ និង​ ប៉ុល ពត បាន​ប្រយុទ្ធ​តតាំង​នឹង​រដ្ឋាភិបាល​ក្រុង​ភ្នំពេញ ដែល​វៀតណាម​បាន​លើក​បន្តុប​ បន្ទាប់ពី​ផ្ដួល​រំលំ​របប​​ខ្មែរ​ក្រហម​។

លោក ឡៅ ម៉ុងហៃ ​ដែល​ជា​គ្រូបង្រៀន​នៅ​តាម​​ជំរំ​គ្រប់គ្រង​ដោយ​រណសិរ្ស​ជាតិ​រំដោះ​ប្រជា​ពល​រដ្ឋខ្មែរ តាម​បណ្ដោយ​ព្រំដែន​ថៃ បាន​ដឹក​នាំ​ក្រុម​នេះ​នៅ​ក្នុង​ការ​ចរចា​ដើម្បី​បញ្ចប់​សង្គ្រាម​ស៊ីវិល​ក្នុង​ឆ្នាំ​១៩៩១​។ លោក កឹម សុខា បាន​​ឈាន​ជើង​ចូល​​រដ្ឋ​​សភា​​ជា​លើក​ដំបូង​ក្នុង​ឋានៈ​ជា​តំណាង​រាស្ត្រ​មកពី​គណបក្ស​ប្រជា​ធិបតេយ្យ សេរីនិយម ព្រះពុទ្ធ​សាសនា របស់​លោក​តា សឺន សាន។

លើក​ឡើង​ពី​លោក កឹម សុខា នៅ​មុន​ការ​បោះ​ឆ្នោត​ជាតិ​​កាលពី​ឆ្នាំ​មុន លោក ឡៅ ម៉ុងហៃ បាន​មាន​ប្រសាសន៍​ថា អនុប្រធាន​គណបក្ស​ប្រឆាំង​រូប​នេះ​​មាន​ភាព​ទាក់​ទាញ​​ប្រជា​ពលរដ្ឋ​ ជា​ហេតុ​ធ្វើ​ឲ្យ​លោក (ឡៅ ម៉ុងហៃ)​ ឃ្លាត​ឆ្ងាយ​ពី​លោក សម រង្ស៊ី ប្រធាន​គណបក្ស​សង្គ្រោះ​ជាតិ​។ លោក​បាន​មាន​ប្រសាសន៍​នៅ​ពេល​នោះ​ថា “រវាង​អ្នក​ទាំង​ពីរ​​ សុខា មាន​​ភាព​ទាក់​ទាញ​ជាង។ គាត់​និយាយ​ភាសា​​របស់​​ប្រជាជន​សាមញ្ញ​ទូទៅ​”៕ សុខុម​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស