កាលពីម្សិលមិញ អង្គការឃ្លាំមើលសិទ្ធិមនុស្ស និងអង្គការសិទ្ធិមនុស្សក្នុងស្រុកលីកាដូបានជំរុញម្ដងទៀតឲ្យរដ្ឋាភិបាលបិទមណ្ឌលកែប្រែបន្ថែមរបស់ខ្លួន បន្ទាប់ពីបុរសអនាថាម្នាក់បានស្លាប់នៅក្នុងមណ្ឌលកែប្រែមួយបែបនេះកាលពីចុងខែមុន។
នៅក្នុងសេចក្ដីថ្លែងការណ៍រួមមួយ អង្គការទាំងនេះបានលើកឡើងថា អាជ្ញាធរបានចាប់បុរសម្នាក់ដែលគេស្គាល់ឈ្មោះត្រឹមតែ ភា នៅក្នុងការបោសសម្អាតជនអនាថាក្នុងរាជធានីភ្នំពេញកាលពីថ្ងៃទី២ ខែវិច្ឆិកា ហើយបានបញ្ជូនបុរសរូបនេះទៅមជ្ឈមណ្ឌលសង្គមកិច្ចព្រៃស្ពឺ ក្នុងខណ្ឌពោធិ៍សែនជ័យ ជាទីដែលបុរសរូបនេះបានស្លាប់កាលពីថ្ងៃទី២៦ ខែវិច្ឆិកា។
សេចក្ដីថ្លែងការណ៍នេះបានលើកឡើងថា បុគ្គលិកនៅមជ្ឈមណ្ឌលសង្គមកិច្ចព្រៃស្ពឺ និងសាក្សីផ្សេងៗទៀតដែលដឹងអំពីករណីនេះបានប្រាប់អ្នកស៊ើបអង្កេតរបស់អង្គការសិទ្ធិមនុស្សលីកាដូថា បុរសឈ្មោះ ភា នេះត្រូវបានគេឃើញថា មានជំងឺនៅពេលគាត់ត្រូវបានបញ្ជូនដល់មណ្ឌលកែប្រែ ដោយមានរបួសនៅជើង និងផ្នែកខ្លះនៃដងខ្លួនរបស់គាត់។ សាក្សីបាននិយាយថា គេមិនបានផ្ដល់ការព្យាបាលដល់គាត់ឡើយនៅទីនោះ ហើយក៏បដិសេធមិនព្រមយកគាត់ទៅព្យាបាលនៅខាងក្រៅដែរ។
លោកស្រី ណាលី ពីឡូក ប្រធានអង្គការលីកាដូបានមានប្រសាសន៍នៅក្នុងសេចក្ដីថ្លែងការណ៍នោះថា “ការដែលនៅរក្សាមណ្ឌលកែប្រែឲ្យនៅបើកទ្វារ គឺនៅតែមិនអាចបញ្ឈប់អាជ្ញាធរមិនឲ្យរំលោភសិទ្ធិមនុស្សលើជនដែលត្រូវបានចាត់ទុកថាជាជនល្មើសនោះឡើយ។ ការរំលោភបំពានជាប្រព័ន្ធលើអ្នកងាយរងគ្រោះបំផុតក្នុងប្រទេសកម្ពុជាបានកើតឡើងនៅតាមមណ្ឌលកែប្រែទាំងនេះ ហើយរដ្ឋាភិបាលគួរតែបិទមណ្ឌលកែប្រែបែបនេះជាបន្ទាន់”។
លោក សន សុផល ប្រធានមន្ទីរសង្គមកិច្ចរាជធានីបានបញ្ជាក់ពីការស្លាប់របស់បុរសឈ្មោះ ភា នេះនៅក្នុងមណ្ឌលកែប្រែ ប៉ុន្តែថា លោកមិនចាំថ្ងៃច្បាស់លាស់ទេ។ លោក សុផល បានលើកឡើងទៀតថា បុរសឈ្មោះ ភា នេះមានជំងឺរ៉ាំរ៉ៃនៅពេលត្រូវបានបញ្ជូនមកដល់ ប៉ុន្តែថា លោកមិនដឹងពីមូលហេតុនៃការស្លាប់នេះទេ។ លោកបានបដិសេធចំពោះការចោទប្រកាន់ដែលថា គេមិនព្យាបាលបុរសនេះ។ លោកបានមានប្រសាសន៍ថា “យើងបានបញ្ជូនគាត់ទៅមន្ទីរពេទ្យដើម្បីព្យាបាល ប៉ុន្តែគាត់បានស្លាប់ដោយសារគាត់ឈឺធ្ងន់”។
លោក សុផល បានលើកឡើងបន្តថា មណ្ឌលកែប្រែតែងតែបញ្ជូនអ្នកជាប់ឃុំដែលមានជំងឺទៅមន្ទីរពេទ្យ ហើយលោកច្រានចោលការអំពាវនាវរបស់អង្គការសិទ្ធិមនុស្សដែលស្នើឲ្យបិទមណ្ឌលកែប្រែនេះ។ លោកបានមានប្រសាសន៍ថា “វាគឺជាយោបល់របស់ពួកគេ ហើយការរិះគន់បែបនេះមិនមែនជាលើកទី១នោះទេ”។
លោក នេត សុវីរៈ ប្រធានមន្ទីរពេទ្យបង្អែករាជធានីភ្នំពេញ ជាទីដែលលោក សុផល បានអះអាងថា បុរសឈ្មោះ ភា ត្រូវបានបញ្ជូនទៅទីនោះបានលើកឡើងថា មានអ្នកជំងឺច្រើនណាស់ដែលមកមន្ទីរពេទ្យ ដែលជាហេតុធ្វើឲ្យលោកមិនចាំអ្នកជំងឺណាម្នាក់ឡើយ ហើយថា លោកមិនអាចបញ្ជាក់ឬក៏បដិសេធចំពោះការលើកឡើងរបស់លោក សុផល បានឡើយ។
អង្គការសិទ្ធិមនុស្សលីកាដូបានលើកឡើងថា បុគ្គលិកនៅមជ្ឈមណ្ឌលសង្គមកិច្ចព្រៃស្ពឺបានប្រាប់អង្គការថា បុរសឈ្មោះ ភា នេះមិនដែលត្រូវបានគេបញ្ជូនចេញពីមជ្ឈមណ្ឌលនេះឡើយ។
លោកស្រី ណាលី ពីឡូក បានលើកឡើងតាមរយៈអុីម៉េលមួយថា “បុគ្គលិកនៅមណ្ឌលកែប្រែម្នាក់បានប្រាប់អ្នកស៊ើបអង្កេតរបស់យើងថា ពួកគេរវល់ខ្លាំងណាស់មិនអាចមើលថែទាំខុសភាពដ៏ដុនដាបរបស់បុរសឈ្មោះ ភា នេះបានទេ ខណៈគាត់ត្រូវបានឃុំខ្លួនដោយខុសច្បាប់។ យោងតាមការស៊ើបអង្កេតរបស់យើង បុរសឈ្មោះ ភា នេះគឺចាំបាច់ត្រូវតែបញ្ជូនទៅមន្ទីរពេទ្យ ជាទីដែលគាត់មិនត្រូវបានបញ្ជូនទៅឡើយអស់រយៈពេលជាច្រើនសប្ដាហ៍មុនពេលគាត់ស្លាប់”។
លោកស្រីបានលើកឡើងទៀតថា អង្គការលីកាដូមិនអាចបញ្ជាក់ពីមូលហេតុនៃការស្លាប់របស់បុរសឈ្មោះ ភា នេះទេ ព្រោះសពរបស់គាត់ត្រូវបានគេបូជានៅក្នុងវត្តមួយភ្លាមៗបន្ទាប់ពីគាត់បានស្លាប់ ហើយគេមិនដែលធ្វើកោសល្យវិច័យឡើយ។
តាមផ្លូវការនោះ មជ្ឈមណ្ឌលសង្គមកិច្ចព្រៃស្ពឺគឺជាកន្លែងដើម្បីស្ដារសម្បទាជនដែលត្រូវគេឃុំឃាំង ហើយផ្ដល់វគ្គបណ្ដុះបណ្ដាលវិជ្ជាជីវៈដល់ពួកគេ។ ប៉ុន្តែអង្គការសិទ្ធិមនុស្សបានលើកឡើងថា មណ្ឌលនេះមិនដែលធ្វើដូច្នោះឡើយ ហើយបែរជាត្រូវបានប្រើប្រាស់ជាកន្លែងឃុំខ្លួនជនអនាថា ស្ត្រីរកស៊ីផ្លូវភេទ និងអ្នកប្រើប្រាស់គ្រឿងញៀន ដែលតែងតែត្រូវបានគេចាប់ខ្លួនតាមទំនើងចិត្ត និងដោយខុសច្បាប់មុនព្រឹត្តិការណ៍ធំៗផ្សេងៗក្នុងគោលបំណងទាក់ទាញភ្ញៀវទេសចរបរទេស ឬបុគ្គលពិសេសៗមកលេងក្នុងរាជធានីឲ្យបានច្រើនទៅវិញ។
លោក ប្រេដ អាដាម ប្រធានអង្គការឃ្លាំមើលសិទ្ធិមនុស្សប្រចាំតំបន់អាស៊ី បានមានប្រសាសន៍នៅក្នុងសេចក្ដីថ្លែងការណ៍កាលពីម្សិលមិញថា “អាជ្ញាធរកម្ពុជាចាំបាច់ត្រូវទទួលស្គាល់ថា ខ្លួនមិនអាចប្រែក្លាយមជ្ឈមណ្ឌលសង្គមកិច្ចព្រៃស្ពឺ និងមណ្ឌលកែប្រែស្រដៀងៗនេះទៅជាស្ថាប័នដែលគោរពសិទ្ធិមនុស្សបានឡើយ”។ លោកបានបន្ថែមថា “ការស្លាប់ថ្មីបំផុតនៅមជ្ឈមណ្ឌលសង្គមកិច្ចព្រៃស្ពឺនេះ គួរតែជារឿងអាក្រក់ចុងក្រោយដាស់តឿនដល់ម្ចាស់ជំនួយ ទីភ្នាក់ងារអង្គការសហប្រជាជាតិ និងស្ថានទូតនានា ដែលគួរតែរួមគ្នាទាមទារឲ្យមានការបិទមជ្ឈមណ្ឌលសង្គមកិច្ចព្រៃស្ពឺនេះ”។
អង្គការលីកាដូ និងអង្គការឃ្លាំមើលសិទ្ធិមនុស្សបានលើកឡើងថា រដ្ឋាភិបាលក៏កំពុងតែបើកដំណើរមណ្ឌលកែប្រែពីរផ្សេងទៀតស្រដៀងនេះដែរ ដោយបន្ថែមលើមណ្ឌលកែប្រែចំនួនប្រាំមួយ ដែលឃុំខ្លួនអ្នកប្រើប្រាស់គ្រឿងញៀន។
កាលពីឆ្នាំ២០១០ បន្ទាប់ពីកិច្ចសម្ភាសជាមួយអតីតអ្នកដែលត្រូវគេឃុំខ្លួនមួយចំនួននៅក្នុងមណ្ឌលកែប្រែទាំងនេះ រួមទាំងមជ្ឈមណ្ឌលសង្គមកិច្ចព្រៃស្ពឺផងនោះ អង្គការឃ្លាំមើលសិទ្ធិមនុស្សបានលើកឡើងថា ការវាយដំធ្ងន់ធ្ងរ រំលោភបូក និងការរំលោភបំពានផ្លូវភេទផ្សេងៗទៀត ដែលប្រព្រឹត្តដោយបុគ្គលិកនៅមណ្ឌលកែប្រែ គឺជារឿងធម្មតាទៅហើយ។
កាលពីម្សិលមិញ លោក Phil Robertson អនុប្រធានអង្គការឃ្លាំមើលសិទ្ធិមនុស្សប្រចាំតំបន់អាស៊ី បានលើកឡើងថា រឿងស្រដៀងៗនេះកំពុងបន្តលេចឡើង។ លោកបានមានប្រសាសន៍ថា “យើងបានបន្តសាកសួរអ្នកដែលត្រូវបានឃុំខ្លួននៅមជ្ឈមណ្ឌលសង្គមកិច្ចព្រៃស្ពឺ ដែលបន្ទាប់មកបានរត់គេចខ្លួននោះ ហើយយើងកំពុងតែទទួលបានព័ត៌មាននៃការវាយដំ និងការរំលោភបំពានផ្សេងទៀតជាបន្តបន្ទាប់”៕ ស៊ុយឈាង