កាលពីថ្ងៃសៅរ៍ នគរបាលបានចាប់ខ្លួនបុរសជនជាតិរុស្ស៊ីម្នាក់ ដែលត្រូវបានគេឃើញលួចដំឡូងមីពីចម្ការមួយក្នុងស្រុកអណ្ដូងមាស ខេត្តរតនគិរី ដោយសង្ស័យថា ជននេះបានឆ្លងមកពីប្រទេសវៀតណាមដោយថ្មើរជើងចូលមកប្រទេសកម្ពុជាដោយខុសច្បាប់។
លោក សុវណ្ណ ភិន អធិការនគរបាលស្រុកបានមានប្រសាសន៍ថា មន្ត្រីរបស់លោកបានចាប់ខ្លួនជនជាតិរុស្ស៊ីរូបនេះ ដែលនៅក្នុងលិខិតឆ្លងដែនបង្ហាញអត្តសញ្ញាណថា គាត់ឈ្មោះ វ៉ាស៊ីលី ដូរ៉ូខូវ អាយុ៣៥ឆ្នាំ បន្ទាប់ពីអ្នកស្រុកនៅឃុំម៉ាលិក ទាក់ទងមកដែលពួកគាត់បានឃើញជននេះកំពុងដកដំឡូងមីច្រកក្នុងបាវ។
លោកបានមានប្រសាសន៍កាលពីម្សិលមិញថា “ខ្ញុំមិនដឹងថា ជននេះមកពីណាពិតប្រាកដនោះទេ ប៉ុន្តែអ្នកភូមិបានប្រាប់យើងថា ជននេះបានដើរមកទីនេះពីស្រុកលំផាត់មក”។ លោកបានបន្ថែមថា នគរបាលជឿថា ជនជាតិរុស្ស៊ីរូបនេះដំបូងទំនងជាចូលក្នុងប្រទេសកម្ពុជាតាមខេត្តមណ្ឌលគិរី។ លោក ភិន បានមានប្រសាសន៍ថា បន្ទាប់ពីការចាប់ខ្លួន ដូរ៉ូខូវ ត្រូវបានបញ្ជូនទៅស្នងការដ្ឋាននគរបាលខេត្តរតនគិរីដើម្បីធ្វើការសាកសួរ។
លោក ងួន គឿន ស្នងការនគរបាលខេត្តបានមានប្រសាសន៍ថា “ដូរ៉ូខូវ បានប្រាប់យើងថា គាត់មកពីខេត្តសៀមរាប ហើយបានស្នាក់នៅក្នុងស្រុកអណ្ដូងមាសរយៈពេលពីរបីថ្ងៃ។ យើងមិនអាចនិយាយពិតប្រាកដថា តើគាត់មកពីកន្លែងណាបានទេ ពីព្រោះវាលំបាកទទួលបានព័ត៌មានពីជននេះណាស់ ពីព្រោះគាត់ដូចជាមនុស្សសរសៃប្រសាទអ៊ីចឹង”។ លោកឧត្ដមសេនីយ៍ទោ ងួន គឿន បានមានប្រសាសន៍ថា ដូរ៉ូខូវ ត្រូវបានបញ្ជូនទៅនាយកដ្ឋានអន្តោប្រវេសន៍ក្រសួងមហាផ្ទៃនៅក្នុងរាជធានីភ្នំពេញកាលពីម្សិលមិញ៕ សារុន