យោងតាមនគរបាលចរាចរបានឲ្យដឹងថា ពាណិជ្ជករជនជាតិកូរ៉េខាងត្បូងម្នាក់បានបើករថយន្តរបស់លោកម៉ាក Hyundai បុកអ្នកជិះម៉ូតូម្នាក់ឲ្យរងរបួសកាលពីថ្ងៃសៅរ៍ បន្ទាប់មកបានបើករត់គេចពីកន្លែងកើតហេតុ ហើយបើកបានចម្ងាយ៣គីឡូម៉ែត្រមុនពេលរថយន្តរបស់គាត់ឆេះ ហើយគាត់ត្រូវបានចាប់ខ្លួនតែម្តង។
យោងតាមលោក សេង ចាន់ថុន នាយរងនគរបាលផ្នែកបទល្មើសចរាចរណ៍នៃនគរបាលចរាចររាជធានីបានឲ្យដឹងថា លោក លី ស៊ុនហុង អាយុ៣៤ឆ្នាំ ម្ចាស់ភោជនីយដ្ឋានទន្លេមេគង្គនៅក្នុងរាជធានីភ្នំពេញបានបើកបររថយន្តនៅក្នុងសង្កាត់ទឹកល្អក់១ ខណ្ឌទួលគោកកាលពីរំលងអធ្រាត្រឈានចូលថ្ងៃសៅរ៍ ស្រាប់តែគាត់បានបុកជាមួយលោក សាន រ៉ាស៊ី ហើយបានធ្វើឲ្យជនរងគ្រោះធ្លាក់ពីលើម៉ូតូ បន្ទាប់មកជននេះបានបន្ថែមល្បឿនយ៉ាងលឿន។
លោក ចាន់ថុន បានមានប្រសាសន៍កាលពីម្សិលមិញថា “គាត់មិនបានឈប់រថយន្តរបស់គាត់ទេ ពីព្រោះគាត់បានបាត់បង់ម្ចាស់ការ ដោយសារគាត់ស្រវឹងស្រា។ គាត់ព្យាយាមរត់គេចខ្លួន”។ លោកបានមានប្រសាសន៍ថា ខណៈបុរសជនជាតិកូរ៉េរូបនេះបើករត់ពីកន្លែងកើតហេតុរថយន្តរបស់គាត់បានអូសម៉ូតូទៅជាមួយផង បណ្តាលឲ្យលេចសាំងដែលបានបណ្តាលឲ្យយានយន្តទាំងពីរគ្រឿងឆេះតែម្តង។
លោក ចាន់ថុន បានមានប្រសាសន៍ថា “រថយន្តបានអូសម៉ូតូពីត្រឡោកបែកដល់កាំកូស៊ីធីចម្ងាយប្រហែល៣គីឡូម៉ែត្រ។ ម៉ូតូនោះត្រូវបានអូស ហើយបានលេចសាំង។ ម៉ូតូបានឆេះ ហើយរថយន្តក៏ឆេះដែរ”។ លោកបានមានប្រសាសន៍ថា “ទីបំផុតលោក លី បានបង្ខំចិត្តបោះបង់ចោលរថយន្តរបស់គាត់នៅពេលភ្លើងឆេះកាន់តែខ្លាំង ហើយត្រូវនគរបាលចាប់ខ្លួននៅខាងក្រៅកាំកូស៊ីធី”។
យោងតាមលោក ទិន វណ្ណស៊ី នាយនគរបាលចរាចររាជធានីបានឲ្យដឹងថា លោក លី ត្រូវបានបញ្ជូនទៅតុលាការកាលពីម្សិលមិញដើម្បីប្រឈមការចោទប្រកាន់នៅក្នុងករណីនេះ។ មន្ត្រីតុលាការមិនអាចទាក់ទងបានទេ។
លោក រ៉ាស៊ី ដែលជាជនរងគ្រោះបាននិយាយកាលពីម្សិលមិញថា លោកបានយល់ព្រមមិនដាក់ពាក្យបណ្ដឹងប្ដឹងលោក លី ទេ ពីព្រោះបុរសជនជាតិកូរ៉េរូបនេះបានផ្ដល់ប្រាក់សំណងដល់លោកចំនួន១.៩០០ដុល្លារ ដើម្បីបញ្ចប់ករណីនេះ។ លោក រ៉ាស៊ី បាននិយាយថា លោកសន្លប់បាត់ស្មារតីបន្ទាប់ពីគ្រោះថ្នាក់ចរាចរណ៍ ហើយត្រូវបានដឹកទៅកាន់មន្ទីរពេទ្យដើម្បីព្យាបាលរបួសត្រង់មុខ និងស្មា មុនពេលត្រូវបានអនុញ្ញាតឲ្យចេញពីមន្ទីរពេទ្យនៅល្ងាចថ្ងៃដដែលនោះ៕ សារុន