40.2 C
Phnom Penh

ពល​​​រដ្ឋ​​​ខ្មែរ​​​នាំគ្នា​​​តវ៉ា​​​នៅ​​​ក្នុង​​​ទីក្រុង​​​សេអ៊ូល​​​ ដើម្បី​​​ទាម​​​ទារ​​​ឲ្យ​​​មាន​​​ការ​​​ដោះ​​​លែង​​​សកម្មជន​​​

ដោយ ឌឹ ខេមបូឌា ដេលី

បទវិភាគ

ពល​​​រដ្ឋ​​​ខ្មែរ​​​រាប់​​​រយ​​​នាក់​​​បាន​​​នាំ​​​គ្នា​​​ធ្វើ​​​បាតុកម្ម​​​នៅ​​​ក្នុង​​​ទីក្រុង​​​សេអ៊ូល​​​ប្រទេស​​​កូរ៉េ​​​ខាង​​​ត្បូង​​​កាល​​​ពីថ្ងៃ​​​អាទិត្យ​​​ ដោយ​​​អំពាវ​​​នាវ​​​ឲ្យ​​​មាន​​​ការ​​​ដោះ​​​លែង​​​សកម្ម​​​ជន​​​មួយ​​​ចំនួន​​​ ដែល​​​កំពុង​​​ជាប់​​​ពន្ធនាគារ​​​​​​ក្នុង​​​រាជ​​​ធានី​​​ភ្នំពេញ​​​ពី​​​បទ​​​ចូល​​​រួម​​​នៅ​​​ក្នុង​​​ការ​​​តវ៉ា​​​​​​ផ្សេង​​​ៗ។

ពល​​​រដ្ឋ​​​ខ្មែរ​​​រាប់​​​រយ​​​នាក់​​​​​​ធ្វើ​​​បាតុកម្ម​​​នៅ​​​ក្នុង​​​ទីក្រុង​​​សេអ៊ូល​​​ប្រទេស​​​កូរ៉េ​​​ខាង​​​ត្បូង​​​កាល​​​ពីថ្ងៃ​​​អាទិត្យ​​​ ដើម្បីទាមទារឲ្យដោះ​​​លែង​​​សកម្ម​​​ជន​​​ដែលកំពុង​​​ជាប់​​​ពន្ធនាគារ​​​​​​ក្នុង​​​ទីក្រុង​​​ភ្នំពេញ​​​។ យឹម ស៊ីណន
ពល​​​រដ្ឋ​​​ខ្មែរ​​​រាប់​​​រយ​​​នាក់​​​​​​ធ្វើ​​​បាតុកម្ម​​​នៅ​​​ក្នុង​​​ទីក្រុង​​​សេអ៊ូល​​​ប្រទេស​​​កូរ៉េ​​​ខាង​​​ត្បូង​​​កាល​​​ពីថ្ងៃ​​​អាទិត្យ​​​ ដើម្បីទាមទារឲ្យដោះ​​​លែង​​​សកម្ម​​​ជន​​​ដែលកំពុង​​​ជាប់​​​ពន្ធនាគារ​​​​​​ក្នុង​​​ទីក្រុង​​​ភ្នំពេញ​​​។ យឹម ស៊ីណន

លោក​​​នាយក​​​រដ្ឋ​​​មន្ត្រី​​​ ហ៊ុន សែន គ្រោង​​​នឹង​​​ទៅ​​​ដល់​​​ប្រទេស​​​កូរ៉េ​​​ខាង​​​ត្បូង​​​នៅ​​​ថ្ងៃ​​​ព្រហស្បតិ៍​​​ សម្រាប់​​​ការ​​​បំពេញ​​​ទស្សនកិច្ច​​​រយៈ​​​ពេល​​​បួន​​​ថ្ងៃ​​​ ដើម្បី​​​ចូល​​​រួម​​​ជំនួប​​​កំពូល​​​នៃ​​​មេ​​​ដឹក​​​នាំ​​​ក្នុង​​​តំបន់​​​។

ក្នុង​​​ចំណោម​​​អ្នក​​​រៀប​​​ចំ​​​ការ​​​តវ៉ា​​​កាល​​​ពី​​​ថ្ងៃ​​​អាទិត្យ​​​ គឺ​​​លោក យឹម ស៊ីណន ប្រធាន​​​ចលនា​​​យុវជន​​​ខ្មែរ​​​ដើម្បី​​​ប្រជា​​​ធិបតេយ្យ​​​។ ពេល​​​និយាយ​​​តាម​​​ទូរស័ព្ទ​​​ពី​​​ទី​​​ក្រុង​​​សេអ៊ូល​​​ កាល​​​ពីម្សិល​​​មិញ លោក ស៊ីណន បាន​​​និយាយ​​​ថា អ្នក​​​តវ៉ា​​​ដែល​​​មាន​​​ចំនួន​​​ប្រហែល​​​៥០០នាក់​​​គឺធ្វើ​​​បាតុកម្ម​​​ក្នុង​​​គោល​​​បំណង​​​ទាញ​​​ចំណាប់​​​អារម្មណ៍​​​មេ​​​ដឹក​​​នាំ​​​ក្នុង​​​តំបន់ ដែល​​​នឹង​​​ទៅ​​​ចូល​​​រួម​​​ក្នុង​​​ជំនួប​​​កំពូល​​​ឲ្យ​​​ចាប់​​​អារម្មណ៍​​​អំពី​​​បញ្ហា​​​នេះ​​​ ហើយ​​​នឹង​​​នាំគ្នា​​​តវ៉ា​​​ម្តង​​​ទៀត​​​អំឡុង​​​ជំនួប​​​កំពូល​​​ ប្រសិន​​​បើ​​​សកម្មជន​​​មិន​​​ត្រូវ​​​បាន​​​ដោះ​​​លែង​​​ទេ​​​នោះ​​​។

លោក ស៊ីណន ដែល​​​ធ្វើ​​​ការ​​​នៅ​​​រោង​​​ចក្រ​​​ផលិត​​​គ្រឿង​​​បន្លាស់​​​រថយន្ត​​​​​​ បាន​​​និយាយ​​​ថា “យើង​​​តវ៉ា​​​ព្រោះ​​​យើង​​​ចង់​​​បង្ហាញ​​​​​​អន្តរ​​​​​​​​​​​​​​​​​​​​​ជាតិ​​​ជា​​​ពិសេស​​​មេ​​​ដឹក​​​នាំ​​​ប្រទេស​​​សមាជិក​​​អាស៊ាន​​​​​​ឲ្យ​​​​​​ឃើញ​​​ថា មេដឹកនាំ​​​កម្ពុជា​​​កំពុង​​​តែ​​​ឃុំ​​​ខ្លួន​​​​​​អ្នក​​​ដែល​​​គ្មាន​​​ទោស​​​ពៃរ៍”។

លោក​​​ ស៊ីណន បាន​​​លើក​​​ឡើង​​​ទៀត​​​ថា អ្នក​​​តវ៉ា​​​ចង់​​​ឲ្យ​​​ លោក ស៊ុត ឌីណា ឯក​​​អគ្គ​​​រាជ​​​ទូត​​​កម្ពុជា​​​ប្រចាំ​​​ប្រទេស​​​កូរ៉េ​​​ខាង​​​ត្បូង​​​លើក​​​ឡើង​​​ពី​​​ការ​​​ទាម​​​ទារ​​​របស់​​​ពួក​​​គេ​​​ជា​​​មួយ​​​លោក​​​នាយក​​​រដ្ឋមន្ត្រី​​​ ហ៊ុន សែន នៅ​​​ពេល​​​លោក​​​ទៅ​​​ដល់​​​ទី​​​នោះ​​​។ លោក​​​បាន​​​និយាយ​​​ទៀត​​​ថា “ប្រសិន​​​បើ​​​គ្មាន​​​អន្តរាគមន៍​​​ [ពី​​​ឯកអគ្គរាជ​​​ទូត​​​]​​​​​ ​​​ទេនោះ យើង​​​នឹង​​​​​​ប្រមូល​​​ផ្តុំ​​​គ្នា​​​តវ៉ា​​​ម្តង​​​ទៀត​​​ អំឡុង​​​ការ​​​បំពេញ​​​ទស្សនកិច្ច​​​របស់​​​លោក ហ៊ុន សែន”។

លោក ស៊ុត​​​ ឌីណា ដែល​​​​​​គេ​​​ក៏​​​ទាក់​​​ទង​​​តាម​​​ទូរស័ព្ទ​​​ផង​​​ដែរ​​​កាល​​​ពី​​​ម្សិល​​​មិញ បាន​​​លើក​​​ឡើង​​​ថា លោក​​​​​​គ្មាន​​​បំណង​​​ដោះ​​​ស្រាយ​​​ការ​​​ទាម​​​ទារ​​​របស់​​​អ្នក​​​តវ៉ា​​​ដែល​​​លោក​​​ប៉ាន​​​់​​​ប្រមាណ​​​ថា មាន​​​គ្នា​​​ប្រហែល​​​២០០នាក់នេះ​​​ឡើយ។ លោក​​​បាន​​​លើក​​​ឡើង​​​ទៀត​​​ថា អ្នក​​​តវ៉ា​​​គឺ​​​គ្រាន់​​​តែ​​​​​​​​​​​​​ជា “ឧបករណ៍”​​​ របស់​​​អ្នក​​​នយោបាយ​​​តែ​​​ប៉ុណ្ណោះ តែ​​​ទោះ​​​ជា​​​យ៉ាង​​​ណា​​​ លោក​​​បាន​​​បដិសេធ​​​មិន​​​បញ្ជាក់​​​ថា ជា​​​នរណា​​​ឡើយ​​​។

លោក​​​បាន​​​មាន​​​ប្រសាសន៍​​​ថា “បញ្ហា​​​នយោបាយ​​​ត្រូវ​​​តែ​​​ត្រូវ​​​បាន​​​ដោះ​​​ស្រាយ​​​ជា​​​មួយ​​​នយោបាយ ប៉ុន្តែ ការ​​​តវ៉ា​​​នេះ​​​គឺ​​​ជា​​​បញ្ហា​​​ស្រប​​​ច្បាប់​​​មួយ​​​ ហើយ​​​ត្រូវ​​​តែ​​​ដោះ​​​ស្រាយ​​​ជាមួយ​​​ច្បាប់​​​រដ្ឋ​​​។ ខ្ញុំ​​​មិន​​​ព្រួយ​​​បារម្ភ​​​ចំពោះ​​​ការ​​​តវ៉ា​​​​​​នេះ​​​ទេ ព្រោះ​​​ខ្ញុំ​​​គ្រាន់​​​តែ​​​បំពេញ​​​ការ​​​ងារ​​​របស់​​​ខ​​​្ញុំ​​​ជា​​​ឯក​​​អគ្គ​​​រាជ​​​ទូត​​​តែ​​​ប៉ុណ្ណោះ”។

ក្នុង​​​ចំណោម​​​មនុស្ស​​​ទាំង​​​១៧​​​នាក់​​​ដែល​​​ត្រូវ​​​បាន​​​បញ្ជូន​​​ទៅ​​​ពន្ធនាគារ​​​រួម​​​មាន​​​ ព្រះ​​​សង្ឃ​​​ សកម្មជន​​​មក​​​ពី​​​គណបក្ស​​​សង្គ្រោះ​​​ជាតិ​​​ និង​​​ស្ត្រី​​​ចំនួន​​​ប្រាំពីរ​​​នាក់​​​មក​​​ពី​​​តំបន់​​​បឹង​​​កក់​​ ដែល​​​ត្រូវ​​​បាន​​​ផ្តន្ទាទោស​​​ឲ្យ​​​ជាប់​​​ពន្ធនាគារ​​​ក្នុង​​​ម្នាក់​​​ៗ​​​រយៈ​​​ពេល​​​មួយ​​​ឆ្នាំ​​​កាល​​​ពី​​​ខែ​​​មុន​​​ ពី​​​បទ​​​យក​​​គ្រែ​​​ដាក់​​​ចំ​​​កណ្តាល​​​មហាវិថី​​​ព្រះមុនីវង្ស​​​ អំឡុង​​​ការ​​​តវ៉ា​​​មួយ​​​​​​ចំពោះ​​​ទឹក​​​ជំនន់​​​ដែល​​​ជន​​​់លិច​​​ផ្ទះសំបែង​​​របស់​​​ពួក​​​គាត់​​​ម្តង​​​ហើយ​​​ម្តង​​​ទៀត​​​។

កាល​​​ពី​​​ម្សិលមិញ សកម្មជន​​​ប្រឆាំង​​​ការ​​​បណ្តេញ​​​ចេញ​​ប្រហែល​​​២០​​​នាក់​​​បាន​​​នាំ​​​គ្នា​​​ធ្វើ​​​ដំណើរ​​​ទៅ​​​កាន់​​​ទីស្នាក់​​​ការ​​​កណ្តាល​​​របស់​​​​​​គណបក្ស​​​សង្គ្រោះ​​​ជាតិ ​​​ដើម្បី​​ជំរុញ​​​ឲ្យ​​​លោក​​​ សម រង្ស៊ី ប្រធាន​​​គណបក្ស​​​នេះ​​​ស្នើ​​​សុំ​​​លោក​​​ ហ៊ុន សែន ឲ្យ​​​​​​ដោះ​​​លែង​​​សកម្មជន​​​ដែល​​​កំពុង​​​ជាប់​​​ពន្ធនាគារ​​​។

នៅ​​​ក្នុង​​​វីដេអូ​​​ឃ្លីប​​​មួយ​​​បង្ហោះ​​​នៅ​​​លើ​​​ទំព័រ​​​ហ្វេស​​​ប៊ុក​​​របស់​​​លោក​​​ លោក សម រង្ស៊ី បាន​​​ប្រាប់​​​ថា លោក​​​បាន​​​ជួប​​​ជាមួយ​​​សកម្ម​​​ជន​​​មួយ​​​ចំនួន​​​កាល​​​ពី​​​ថ្ងៃ​​​អាទិត្យ​​​ ហើយ​​​​​​លោក​​​នឹង​​​ព្យាយាម​​​​​​​​​​​​​​​​​​​​​​​​ ដើម្បី​​​ធ្វើ​​​យ៉ាង​​​ណា​​​ឲ្យ​​​មាន​​​ការ​​​ដោះ​​​លែង​​​សកម្មជន​​​ទាំង​​​នោះ​​​​​​៕ស៊ុយឈាង​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស