29 C
Phnom Penh

អ្នក​ទោស​ជន​ជាតិ​រុស្សីម្នាក់​​ប៉ុនប៉ងធ្វើអត្តឃាត​បន្ទាប់​ពី​រត់គេច​ខ្លួន​មិន​សម្រេច

ដោយ ឌឹ ខេមបូឌា ដេលី

បទវិភាគ

លោក សំ សុផល ប្រធាន​​​ពន្ធនាគារ​​​ខេត្ត​​​ព្រះសីហនុ បាន​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា អ្នកទោស​​​ជ​​​ន​​​ជាតិ​​​រុស្សី​​​ម្នាក់​​​ដែល​​​កំពុង​​​រង​​​់ចាំ​​​ការ​​​ជំនុំ​​​ជម្រះ​​​នៅ​​​ពន្ធនាគារ​​​ខេត្ត​​​ព្រះ​​​សីហនុ កាល​​​ពី​​​ថ្ងៃ​​​អាទិត្យ​​​បាន​​​ព្យាយាម​​​រត់​​​គេ​​​ច​​​តាម​​​ដំបូល​​​មណ្ឌល​​​សុខ​​​ភាព​​​របស់​​​ពន្ធ​​​នាគារ​​​បន្ទាប់​​​មក​​​បាន​​​ប៉ុនប៉ង​​​ធ្វើ​​​អត្តឃាត​​​នៅ​ពេល​​​ផែនការ​​​បរាជ័យ​​​។

លោក សុផល បាន​​​មាន​​​ប្រសាសន៍​​​ថា កាល​​​ពី​​​ថ្ងៃ​​​សៅរ៍ រ៉ូសាន គូវ៉ាន់​​​ឌីកូវ អាយុ​​​៣១​​​ឆ្នាំ ដែល​​​កំពុង​​​ត្រូវ​​​បាន​​​ឃុំ​​​ខ្លួន​​​បណ្តោះ​​​អាសន្ន​​​នៅ​​​ពន្ធនាការ​​​នេះ​​​ដោយ​​​ចោទ​​​ប្រកាន់​​​ពីបទ​​​ប្រើ​​​អំពើ​​​ហិង្សា​​​ដោយ​​​ចេតនានោះ​​​ បាន​​​ត្អូញ​​​ត្អែរ​​​ពីការ​​​ឈឺ​​​ស្មា​​​ ហើយ​​​ត្រូវ​​​បាន​​​បញ្ជូន​​​ទៅ​​​ស្នាក់​​​នៅ​​​ក្នុង​​​មណ្ឌល​​​សុខភាព​​​របស់​​​ពន្ធ​​​នាគារ​​​មួយ​​​យប់។

លោក​​​បាន​​​មាន​​​ប្រសាសន៍​​​ថា នៅ​​​ម៉ោង​​​ប្រហែល​​​៣​​​រំលង​​​អធ្រាត្រ​​​ថ្ងៃ​​​អាទិត្យ​​​ គូវ៉ាន់​​​ឌីកូវ​​​ បាន​​​ឡើង​​​លើ​ពិដាន​​​បន្ទប់​​​ ដែល​​​ស្ថិត​​​នៅ​​​ជិត​​​បរិវេណ​​​ពន្ធនាគារ​​​ ហើយ​​​បាន​​​ចេញ​​​តាម​​​ប្រហោង​​​ស័ង្កសី​​​។

លោក​ សុផល បានមាន​ប្រសាសន៍ថា នៅ​​​ពេល​​​​​​ជន​​​នេះ​​​ព្យាយាម​​​លោត​​​ចុះ​​​ពី​​​ដំបូល​​​ ហើយ​​​ផ្លោះ​​​របង​​​ព័ទ្ធ​​​ជុំវិញ​​​បរិវេណ​​​នោះ គាត់​​​បាន​​​ធ្លាក់​​​​​​មក​​​ដី​​​ ធ្វើ​​​ឲ្យ​​​សន្តិសុខ​​​ដែល​​​យាម​​​នៅ​​​ខាង​​​ក្រៅ​​​ទ្វារ​​​ភ្ញាក់​​​។ លោក​​​បាន​​​មាន​​​ប្រសាសន៍​​​ថា ប៉ុន្តែ មុន​​​ពេល​​​សន្តិសុខ​​​ចូលទៅជិត គូវ៉ាន់ឌីកូវ បាន​​​យក​​​បំណែក​​កញ្ចក់​​​ដែល​​​គាត់​​​បាន​​​ធ្វើ​​​ឲ្យ​​​បែក​​​នៅ​​​ពេលគាត់​​​ធ្លាក់​​​នោះ មក​​​អារក​​​របស់​​​ខ្លួន​​​។

លោក សុផល​​​ បាន​​​មាន​​​ប្រសាសន៍​​​ថា “ខ្ញុំ​​​មិន​​​ដឹង​​​ថា ហេតុ​​​អ្វី​​​បាន​​​ជា​​​អ្នក​​​ទោស​​​រូប​​​នេះ​​​ព្យា​យាម​​​ធ្វើ​​​អត្តឃាត​​​ទេ​​​។ ខ្ញុំ​​​គិត​​​ថា ដោយសារ​​​ជន​​​នេះ​រត់​គេច​ខ្លួន​មិន​បាន​សម្រេចហើយ​​​មើល​​​ទៅ​​​”។ លោក​​​បាន​​​បន្ថែម​​​ថា ជន​​​ជាតិ​​​រុស្សី​​​រូប​​​នេះ​​​កំពុង​​សម្រាកព្យាបាល​​​របួស​​​របស់​​​ខ្លួន​​​នៅ​​​មន្ទីរ​​​ពេទ្យ​​​ខេត្ត​​​។

លោក​​​ អេ ឃាង ចៅក្រម​​សាលា​​​ដំបូង​​​ខេត្ត​​​បាន​​​មាន​​​ប្រសាសន៍​​​ថា គូវ៉ាន់​​​ឌីកូវ ត្រូវ​​​បាន​​​ចាប់​​​ខ្លួន​​​កាល​​​ពី​​​ថ្ងៃ​​​ទី​​​២៧​​​ ខែ​​​តុលា​​​ ពីបទ​​​យក​កាំបិតចាក់​​​បុរ​​​សជន​ជាត​ិខ្មែរ​​​ម្នាក់​​​ឲ្យ​រង​របួស​ស្រាល អំឡុង​​​ការ​​​វាយ​​​តប់​​​គ្នា​​​នៅ​​​រង្គសាល​​​មួយ​​​៕សារុន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស