ទោះបីជាមានការសន្យាពីស្នងការនគរបាលខេត្តកំពង់ចាមថា នឹងផ្តល់ការលើកលែងទោសដល់មន្ត្រីនគរបាលដែលសារភាពថា ខ្លួនបានប្រើប្រាស់គ្រឿងញៀនដោយខុសច្បាប់ក៏ដោយ ក៏មន្ត្រីនៅក្រសួងមហាផ្ទៃមួយរូបបានលើកឡើងថា មន្ត្រីនគរបាលចំនួនពីរនាក់ ដែលបានសារភាពគួរតែត្រូវបានបណ្តេញចេញពីតំណែងដែរ។
កាលពីថ្ងៃទី២ ខែធ្នូ លោក បែន រ័ត្ន ស្នងការនគរបាលខេត្តកំពង់ចាមបានប្រកាសនៅក្នុងសេចក្តីថ្លែងការណ៍មួយថា មន្ត្រីនគរបាលនៅក្នុងខេត្តរបស់លោក ដែលប្រើប្រាស់គ្រឿងញៀន ត្រូវតែជូនដំណឹងដល់ថ្នាក់លើរបស់ខ្លួន ហើយទទួលយកការព្យាបាល បើពុំដូច្នោះទេ នឹងប្រឈមការផ្តន្ទាទោស។ សេចក្តីថ្លែងការណ៍េនះ ក៏បានលើកឡើងដែរថា មន្ត្រីនគរបាលណាដែលមកសារភាពមុនថ្ងៃទី១ ខែមករា នឹងត្រូវអនុញ្ញាតឲ្យបន្តការងារជាកងកម្លាំងនគរបាលរបស់ខ្លួនបន្តទៀត។
ឧត្តមសេនីយ៍ត្រី បែន រ័ត្ន បានលើកឡើងកាលពីម្សិលមិញថា ការប្រើប្រាស់ថ្នាំញៀនប្រភេទមេតាំហ្វេតាមីន គឺមិនមែនជារឿងចម្លែកទេនៅក្នុងជួរនគរបាលក្នុងខេត្តកំពង់ចាម ហើយថា ចាប់តាំងពីលោកបានចេញសេចក្តីថ្លែងការណ៍មកមន្ត្រីនគរបាលពីរនាក់នៅក្នុងខេត្តនេះបានមកសារភាពថា ខ្លួនពិតជាប្រើប្រាស់គ្រឿងញៀនមែន។
ទោះជាយ៉ាងណាលោក ខៀវ សុភ័គ អ្នកនាំពាក្យក្រសួងមហាផ្ទៃ ដែលពីមុនលើកឡើងថា ឧត្តមសេនីយ៍ត្រី បែន រ័ត្ន គួរតែបានស្នើសុំការអនុញ្ញាតពីក្រសួងមុនពេលចេញសេចក្តីថ្លែងការណ៍នោះបានឲ្យដឹងថា មន្ត្រីនគរបាលចំនួនពីរនេះរូបគួរតែត្រូវបានបណ្តេញចេញពីតំណែង។
លោកបានមានប្រសាសន៍ថា “ប្រសិនបើលោកដឹងថា មន្ត្រីនគរបាលរបស់លោកកំពុងប្រើប្រាស់គ្រឿងញៀន ហេតុអ្វីបានជាលោកមិនចាត់វិធានការដាក់ពិន័យ[ពួកគេ]?។ ខ្ញុំគិតថា យកល្អគួរតែបណ្តេញពួកគេចេញពីតំណែងនគរបាល”។
ប៉ុន្តែ ដោយសារឧត្តមសេនីយ៍ត្រី បែន រ័ត្ន បានផ្តល់ការលើកលែងទោសជាផ្លូវការដល់មន្ត្រីនគរបាលរបស់លោកនោះ ឧត្តមសេនីយ៍ ខៀវ សុភ័គ បានទទួលស្គាល់ថា ពួកគេទំនងជានឹងត្រូវបានអនុញ្ញាតឲ្យកាន់តំណែងរបស់ខ្លួនដដែល។
លោក ខៀវ សាម៉ុន ប្រធាននាយកដ្ឋានប្រឆាំងគ្រឿងញៀននៃក្រសួងមហាផ្ទៃបានលើកឡើងថា យោងតាមកាលទេសៈធម្មតា មន្ត្រីនគរបាលណាដែលត្រូវបានរកឃើញថាបានប្រើប្រាស់សារធាតុញៀនដោយខុសច្បាប់ គឺគួរតែត្រូវបានហៅឲ្យទៅធ្វើតេស្តរកសារធាតុញៀន ដោយថ្នាក់លើរបស់ខ្លួន។
លោកបានមានប្រសាសន៍ថា “ប្រសិនបើគេរកឃើញថា ពួកគេមានជាប់ពាក់ព័ន្ធនឹងការប្រើប្រាស់គ្រឿងញៀន ពួកគេគួរតែត្រូវបានបណ្តេញចោល”។ លោកបានបន្ថែមថា ទង្វើរបស់លោកឧត្តមសេនីយ៍ត្រី បែន រ័ត្ន “អាចនឹងធ្វើឲ្យប៉ះពាល់ដល់កេរ្តិ៍ឈ្មោះរបស់នគរបាលជាតិ”។
ឧត្តមសេនីយ៍ត្រី អ៊ាវ ចំរើន ស្នងការនគរបាលខេត្តកណ្តាលបានលើកឡើងថា ទោះបីជាលោកស្វាគមន៍ចំពោះការខំប្រឹងប្រែងដោះស្រាយការប្រើប្រាស់គ្រឿងញៀនក្នុងចំណោមនគរបាលក្នុងខេត្តកំពង់ចាម ដែលជាខេត្តជាប់ខេត្តកណ្តាលក៏ដោយ ក៏លោកគ្មានបំណងធ្វើតាមស្នងការនគរបាលខេត្តកំពង់ចាមទេ បើគ្មានការអនុញ្ញាតពីក្រសួងមហាផ្ទៃនោះ។ លោកបានមានប្រសាសន៍ថា “ប្រសិនបើមន្ត្រីនគរបាលណាម្នាក់នៅក្នុងខេត្តរបស់ខ្ញុំមានជាប់ពាក់ព័ន្ធនឹងការប្រើប្រាស់គ្រឿងញៀន យើងនឹងដាក់ទោសទណ្ឌពួកគេតាមច្បាប់”៕ស៊ុយឈាង