រដ្ឋាភិបាល​គ្រោង​​​​​ដំឡើង​ឧបករណ៍​លួច​ស្តាប់​យក​ការណ៍​​លើ​​បណ្តាញ​​​ទូរស័ព្ទ និង​អិុនធឺណិត

មន្ត្រី​ក្រសួង​មហាផ្ទៃ​មួយរូប​បាន​បញ្ជាក់​កាលពី​ម្សិលមិញ​ថា រដ្ឋាភិបាល​​កំពុង​មាន​គម្រោង​ដំឡើង​ឧបករណ៍​​លួច​ស្ដាប់សំឡេង​​​​លើ​បណ្ដាញ​របស់​​ក្រុម​ហ៊ុន​ផ្ដល់​សេវា​ទូរស័ព្ទ​ចល័ត និង​អុីនធើណិត​ទាំង​អស់​នៅ​ទូទាំង​​ប្រទេស ដោយ​ធ្វើ​ឲ្យ​មាន​ក្តី​បារម្ភចំពោះ​​​​​​​​​​អធិការកិច្ច​ដែល​ក្រសួង​មហាផ្ទៃ​ បាន​អនុវត្ត​ដោយ​ស្ងាត់ៗទៅលើ​​បណ្ដាក្រុម​ហ៊ុន​ទូរគមនាគមន៍​នៅក្នុង​​​​ប្រទេស​​កាលពី​ខែ​តុលា។

លោក ឆៃ ស៊ីណារិទ្ធ ប្រធាន​នាយកដ្ឋាន​កណ្ដាល​សន្តិសុខ​នៃ​ក្រសួង​មហាផ្ទៃ​ បាន​មាន​ប្រសាសន៍​ថា “យើង​កំពុង​រង់ចាំ​សេចក្ដី​សម្រេច​​ពី​ថ្នាក់​លើ​ដើម្បី​​ដំឡើង​ឧបករណ៍​ស្ដាប់​សំឡេង​។ ប៉ុន្តែ​អ្វី​ដែល​សំខាន់​សម្រាប់​យើង​​នៅ​ពេល​នេះគឺ​ថា យើង​អាច​គ្រប់គ្រង​​បាន​​​ដោយ​តឹង​រ៉ឹង​លើ​​​អ្នក​​ប្រើ​ប្រាស់​ [បណ្តាញ​] អុីនធើណិត​ និង​ទូរស័ព្ទ​ចល័ត​”។

កាលពី​ខែ​តុលា មន្ត្រី​មកពី​នាយកដ្ឋាន​កណ្ដាល​សន្តិសុខ​ បាន​ចុះ​ទៅ​កាន់​ទីស្នាក់​ការ​កណ្ដាល​​របស់​បណ្ដា​ក្រុម​ហ៊ុន​ផ្តល់សេវា​​ទូរស័ព្ទ​ចល័ត​ និង​​អុីនធើណិត​ ដើម្បី​ពិនិត្យ​​មើល​ឧបករណ៍​បណ្ដាញ​របស់​​ក្រុម​ហ៊ុន​ទាំង​នោះ ហើយ​​បាន​ពិនិត្យ​មើល​​ឯកសារ​ទូទាត់​វិក្កយបត្រ និង​ Data Log របស់​ពួកគេ​។ ​កិច្ច​ប្រជុំ​បាន​​ធ្វើ​ឡើង​បន្ទាប់ពី​​មាន​​លិខិត​មួយ​ច្បាប់​ចុះ​ថ្ងៃទី​៧ ខែ​តុលា ​ដែល​ក្នុង​នោះ​លោក ម៉ៅ ចរិយា ប្រធាន​បញ្ញត្តិករ​ទូរគមនាគមន៍​កម្ពុជា (TRC) បាន​បញ្ជា​ឲ្យ​ក្រុម​ហ៊ុន​​ទូរគមនាគមន៍​ និង​ក្រុម​ហ៊ុន​ផ្តល់​សេវា​អីុនធើណិត​ចំនួន​១២ ​សហ​ការ​​ជា​មួយ​​មន្ត្រី​ស៊ើបអង្កេត។

ឧត្ដមសេនីយ៍​ទោ ឆៃ ស៊ីណារិទ្ធ បាន​មាន​ប្រសាសន៍​​កាល​ពី​ម្សិល​មិញ​ថា បច្ចុប្បន្ន​​នាយក​ដ្ឋាន​របស់​លោក​មិន​ទាន់​មាន​ “ឧបករណ៍​ស្ដាប់សំឡេង​​” ​នៅ​ឡើយ​ទេ ហើយ​កំពុង​រង់ចំា​ថវិកា​ដើម្បី​ទិញ និង​​ដំឡើង​ឧបករណ៍​ទាំង​នោះ​។ លោក​បាន​លើក​ឡើង​ថា “យើង​​មិន​ទាន់​មាន​​ឧបករណ៍​ស្ដាប់​​សំឡេង​នៅ​ឡើយ​​​ទេ ប៉ុន្តែ​យើង​ពិត​ជា​មាន​គម្រោង​ដំឡើង​វា​។ ពេល​នេះ យើង​គ្មាន​ថវិកា​ដើម្បី​ធ្វើ​វា​ទេ”។

លោក​បាន​មាន​ប្រសាសន៍​បន្ថែម​ទៀត​ថា នៅ​ពេល​ដំឡើង​ឧបករណ៍​នេះរួច​ មាន​តែ​ដីកា​របស់​​តុលាការ​ប៉ុណ្ណោះ​​ដែល​​អាច​អនុញ្ញាត​ឲ្យ​ប្រើ​ប្រាស់​វា​បាន​។ លោក​បាន​បន្ត​ថា ” យើង​មាន​សិទ្ធិ​ស្ដាប់គណនី​​ណាមួយ​របស់​អ្នក​​ប្រើ​ប្រាស់​​បាន​ ប្រសិន​បើ​តុលាការ​ចេញ​ដីកា​ដែល​អនុញ្ញាត​ឲ្យ​យើង​ធ្វើ​ដូច្នោះ។ យើងមិន​​អាច​ធ្វើ​អ្វី​តាម​ចិត្ត​ចង់​បាន​ឡើយ ពី​ព្រោះ​វា​ប៉ះពាល់​សិទ្ធិ​ប្រជា​ពលរដ្ឋ​”។

នៅ​ក្នុង​បទសម្ភាស​មួយ​កាលពី​សប្ដាហ៍មុន លោក ឆៃ ស៊ីណារិទ្ធ បាន​មាន​ប្រសាសន៍​ថា អធិការកិច្ច​កាលពី​ខែ​តុលា ត្រូវបាន​ធ្វើ​ឡើងក្នុង​បំណង​​តាម​​ប្រមាញ់​ជន​ឆបោក​ដែល​ប្រើ​ប្រាស់​ប្រព័ន្ធ​សំឡេង​ VoIP ដើម្បី​ធ្វើ​សកម្មភាព​បោក​ប្រាស់​តាម​អុីនធើណិត​។

កាល​ពី​ម្សិល​មិញ​ លោក ផៃ ស៊ីផាន អ្នកនាំពាក្យ​រដ្ឋាភិបាល​​​ ក៏​បានមាន​ប្រសាសន៍​ដែរថា រដ្ឋាភិបាល​នឹង​​ប្រើ​ប្រាស់​ឧបករណ៍​ស្តាប់សំឡេង​ “ជា​ផ្លូវ​ការ​” លុះ​ត្រា​តែ​មាន​ការ​សម្រេច​ពី​តុលាការ​ប៉ុណ្ណោះ​។ លោក​បាន​មាន​​ប្រសាសន៍​ទៀត​ថា “យើង​នឹង​ស្ដាប់​​​ការ​សន្ទនា​របស់​ជនសង្ស័យដោយ​មាន​ការ​ព្រមព្រៀងពី​ព្រះរាជអាជ្ញា​ និង​ចៅក្រម​ស៊ើបសួរ​។ ប៉ុន្តែ​​បើគេ​ស្ដាប់​​ដោយ​គ្មាន​ការ​សម្រេច​ពី​ព្រះរាជអាជ្ញា​ ឬ​ចៅក្រម​ស៊ើបសួរ គេ​មិន​អាច​ប្រើ​ប្រាស់​ទិន្នន័យ​នោះ​ជា​ផ្លូវ​ការ​បានទេ​។ ខ្ញុំ​សូម​បញ្ជាក់​ថា អាជ្ញាធរ​មិន​អាច​​ដាក់​ឧបករណ៍​ស្ដាប់​សំឡេង​​លើ​គណនី​ទូទៅ​បានទេ​ ពីព្រោះ​ច្បាប់​មិន​អនុញ្ញាត​។ ប៉ុន្តែគេ​អាច​ធ្វើ​ដូច្នេះ​បានសម្រាប់​ករណី​ ឬ​បញ្ហាដែល​ពាក់​ព័ន្ធ​តុលាការ និង​សន្តិសុខ​ជាតិ”។

កាលពី​ម្សិលមិញ បណ្ដា​អង្គការ​សិទ្ធិ​មនុស្ស​​បាន​ថ្កោល​ទោស​​​យ៉ាង​​ខ្លាំង​ចំពោះ​ការ​ប្រើ​ប្រាស់​ឧបករណ៍​ស្តាប់​សំឡេង​លួច​យក​ការណ៍​ពី​សំណាក់​រដ្ឋាភិបាល​​ដែល​ខ្វះ​តម្លាភាព​នៅ​ក្នុង​ប្រព័ន្ធ​តុលាការ​មួយ​ដែល​ខ្វះ​ភាព​ឯករាជ។

លោក ព្រាប កុល នាយកប្រតិបត្តិ​អង្គការ​តម្លាភាព​អន្តរជាតិ​ប្រចាំ​កម្ពុជា បានលើក​ឡើង​នៅក្នុង​អុីម៉េល​មួយ​កាលពី​ម្សិលមិញ​ថា “ទោះ​បី​ជា​ការ​ធ្វើ​អធិការកិច្ច​ឧបករណ៍​បណ្ដាញ និង​ការ​​ប្រើ​ប្រាស់​ទិន្នន័យ​ទំនាក់​ទំនង​ក្រោម​ដីកា​បង្គាប់​ផ្លូវ​ការ​របស់​តុលាការ​សម្រាប់​ការ​​ស៊ើបអង្កេត​ស្រប​ច្បាប់​ក្ដី ក៏​វា​ជា​ក្ដី​បារម្ភ​​​​ខ្លាំង​​លើ​​សិទ្ធិ​ឯកជន​របស់​បុគ្គល​ម្នាក់ៗ​ ដែល​ជា​អតិថិជន​របស់​បណ្ដាញ​ទូរគមនាគមន៍ ជា​ពិសេស​​អ្នក​នយោបាយ​​ សកម្មជន និង​អ្នក​ការទូត​”។

លោក​បាន​មាន​ប្រសាសន៍​ទៀត​ថា ការ​ធានា​ថា​ឧបករណ៍​លួច​ស្ដាប់​សំឡេង​នឹង​ត្រូវ​បាន​ប្រើ​ប្រាស់​លុះ​ត្រា​តែ​មាន​ការ​សម្រេច​ពី​តុលាការ​​បាន​ផ្ដល់​ការ​ជឿជាក់​តិច​តួច​ប៉ុណ្ណោះ ពីព្រោះ​ “តុលាការ​មិន​អាច​ធានា​អះអាង​ជា​សាធារណៈ​​​​បាន​ចំពោះ​ភាព​ឯករាជរបស់​ខ្លួន និង​សមត្ថភាព​របស់​ខ្លួន​​ក្នុង​ការ​ការ​ពារ​ព័ត៌មាន​ប្រមូល​បាន​តាម​រយៈ​ការ​អនុញ្ញាត​នេះ​”។

លោក ហ្វីល រ៉ូបឺតសុន (Phil Robertson) អនុប្រធាន​​អង្គការ​ឃ្លាំមើល​សិទ្ធិ​មនុស្ស​​ប្រចាំ​តំបន់​អាស៊ី​ បាន​លើក​ឡើង​​តាម​អុីម៉េល​ថា ​ការ​ដំឡើង​ឧប​ករណ៍​​ស្តាប់​សំឡេង​នេះ​ប្រហែល​ជាមាន​ហេតុផល​​មិន​ល្អ​​លើស​ពី​អ្វី​ដែល​មន្ត្រី​បាន​ទទួល​ស្គាល់​។ លោក​បាន​មាន​ប្រសាសន៍ថា “លើស​ពី​ការ​ប្រមូល​ព័ត៌មាន រដ្ឋាភិបាល​កម្ពុជា​ក៏​ប្រហែល​ជា​មាន​បំណង​ធ្វើ​ឲ្យ​មាន​ការ​​​ភ័យ​ខ្លាច​ និងការ​ចាប់​ពិរុទ្ធ​ខ្លួន​ឯង​​ផង​ដែរ​ក្នុង​ចំណោម​សកម្មជន ដែល​ពីមុន​​ធ្លាប់​តែ​​គិត​ថា ការ​អង្កេត​តាម​ដាន​អុីនធើណិត​ហួស​ពី​សមត្ថភាព​របស់​អាជ្ញាធរ​”៕ សុខុម​ (រាយការណ៍​បន្ថែម​ដោយ​ Matt Blomberg)​​​​​​​​​​​​​

 

© 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.