សិស្សនាយនគរបាលអាយុ២៧ឆ្នាំម្នាក់ ដែលត្រូវបានចោទប្រកាន់ពីបទសម្លាប់មិត្តស្រីរបស់ខ្លួន មុនពេលយកសពនាងទៅទម្លាក់ចោលក្នុងទន្លេសាបនោះ ត្រូវបានសាលាដំបូងរាជធានីភ្នំពេញធ្វើការសាកសួរកាលពីម្សិលមិញ ដែលលោកបានតវ៉ាថា ខ្លួនគ្មានទោសទេ។
ហុង កាលីឌីន ត្រូវបានចាប់ខ្លួនរយៈពេលមួយសប្ដាហ៍ បន្ទាប់ពីសាកសព សុង ដាវីន និស្សិតឆ្នាំទី១ ផ្នែកគណនេយ្យនៅវិទ្យាស្ថានវ៉ាន់ដា ត្រូវបានគេប្រទះឃើញកាលពីថ្ងៃទី៧ ខែតុលា នៅក្បែរច្រាំងទន្លេស្ថិតក្នុងខណ្ឌជ្រោយចង្វា។ ការធ្វើកោសល្យវិច័យបានបង្ហាញថា នាងត្រូវបានរំលោភ។
នៅក្នុងរថយន្តតូយ៉ូតាទុនដ្រារបស់ កាលីឌីន នគរបាលបានរកឃើញកាំភ្លើងខ្លីមា៉កឡុកមួយដើម ប្រដាប់តកាណុងចំនួនពីរ និងថ្នាំមេតំហ្វេតាមីនមួយកញ្ចប់តូច។
ប៉ុន្តែបន្ទាប់ពីការសាកសួររយៈពេលប្រហែល២ម៉ោងកាលពីម្សិលមិញ លោក ស្វាយ តុញ ចៅក្រមស៊ើបសួរបានមានប្រសាសន៍ថា មិនមានភ័ស្តុតាងគ្រប់គ្រាន់បង្ហាញពីពិរុទ្ធភាពរបស់ កាលីឌីន ទេ។ លោកចៅក្រម ស្វាយ តុញ បានមានប្រសាសន៍ថា “ករណីនេះពិបាកណាស់ ពីព្រោះ…យើងមិនមានភ័ស្តុតាងគ្រប់គ្រាន់ដើម្បីចោទប្រកាន់ជននេះឡើយ”។
លោកបានបន្ថែមថា ការស៊ើបអង្កេតនឹងបន្ត។ នៅក្រៅការិយាល័យរបស់ចៅក្រមរូបនេះ កាលីឌីន បាននិយាយថា ខ្លួនគ្មានទោសទេ ហើយបានលើកឡើងថា ខ្លួនបានជួបជនរងគ្រោះនៅពេលយប់មុនពេលសាកសពរបស់នាងត្រូវបានគេប្រទះឃើញ។ ជននេះបាននិយាយថា “ខ្ញុំបានដាក់នាងនៅផ្សារផេនសុល នៅពេលល្ងាច។ ខ្ញុំមិនដឹងថា បន្ទាប់ពីនោះនាងទៅណាទៀតឡើយ៕ សារុន