32 C
Phnom Penh

កំណត់ហេតុ​បញ្ជាក់​ថា​មិនឃើញ​ការ​ចូល​សម្រាក​របស់បុរស​ម្នាក់ពី​មណ្ឌល​​​សង្គម​​​កិច្ច​​​ព្រៃ​​​ស្ពឺ

ដោយ ឌឹ ខេមបូឌា ដេលី

បទវិភាគ

បុគ្គលិក​​​នៅ​​​មន្ទីរ​​​ពេទ្យ​​​បង្អែក​​​រាជ​​​ធានី​​​ភ្នំពេញ​​​បាន​​​លើក​​​ឡើង​​​កាល​​​ពី​​​ម្សិលមិញ​​​ថា ពួក​​​គេ​​​​​​មិន​​​មាន​​​របាយការណ៍​​​អំពី​​​ការមកសម្រាកព្យាបាល​​​​​កាល​​​ពី​​​ពេល​​​ថ្មី​​​ៗ​​​នេះ​​​របស់​​​បុរស​​​ម្នាក់​​​ ដែល​​​​បាន​​​ស្លាប់​​​កាល​​​ពី​​​ចុង​​​ខែ​​​មុន​​​​​​នៅ​​​មជ្ឈមណ្ឌល​​​សង្គម​​​កិច្ច​​​ព្រៃ​​ស្ពឺ​​​ឡើយ​​​ ដោយ​​​ច្រានចោលការ​​​អះ​​​របស់​​​​មន្ត្រី​​​ក្រុង​​​​ម្នាក់​​​។

យោង​​​តាម​​​អង្គការ​​​សិទ្ធិ​​​មនុស្ស​​​លី​​​កាដូ​​​បាន​​​ឲ្យ​​​ដឹង​​​ថា ទាំង​​​ការ​​​ឆែក​​​មើល​​​ឯកសារ​​​ដោយ​​​ប្រធាន​​​រដ្ឋបាល​​​នៅ​​​មន្ទីរ​​​ពេទ្យ​​​នេះ និង​​​ការ​​​ពិនិត្យ​​​មើក​​​ការ​​​កត់​​​ត្រា​​​ប្រចាំ​​​ថ្ងៃ​​​របស់​​​មន្ទីរ​​​ពេទ្យ​​​សម្រាប់​​​ខែ​​​វិច្ឆិកា​​​ មិន​​​មាន​​​ភ័ស្តុតាង​​​ថា លោក សូ ភា ដែល​​​បាន​​​មក​​​សម្រាកព្យាបាល​ដោយ​​​ដោយ​​​សារ​​​សុខ​​​ភាព​​​មិន​​​ល្អ​​​នៅមជ្ឈមណ្ឌល​​​ព្រៃ​​​ស្ពឺ​​​កាល​​​ពី​​​ថ្ងៃ​​​ទី​​​២ ខែ​​​វិច្ឆិកា​​​ ហើយ​​​បាន​​​ស្លាប់​​​នៅ​​​ទៅ​​​នោះ​​​កាល​​​ពី​​​ថ្ងៃ​​​ទី​​​២៦​​​ ខែ​​​វិច្ឆិកា មក​ទីនោះឡើយ។

កាល​​​ពី​​​ថ្ងៃ​​​អាទិត្យ​​​អង្គការ​​​ឃ្លាំ​​​មើល​​​សិទ្ធិ​​​មនុស្ស​​​ និ​​​ង​​​អង្គការ​​​លីកាដូ​​​បាន​​​ចេញ​​​សេចក្តី​​​ថ្លែង​​​ការណ៍​​​មួយ​​​ចោទ​​​ប្រកាន់​​​មជ្ឈមណ្ឌល​​​សង្គម​​​កិច្ច​​​ព្រៃ​​​ស្ពឺ​​​ថា មិន​​​បាន​​​ថែទាំ​​​លោក សូ ភា ឲ្យ​​​បាន​​​ត្រឹម​​​ត្រូវ​​​។

អង្គការ​​​សិទ្ធិ​​​មនុស្ស​​​នេះបាន​​​អំពាវ​​​នាវ​​​ដដែលៗយូរ​​​មក​​​ហើយ​​​ដល់​​​រដ្ឋាភិបាល​​​ឲ្យ​​​បិទ​​​មជ្ឈមណ្ឌល​​​នេះ​​​ និង​​​មជ្ឈមណ្ឌល​​​ផ្សេង​​​ៗ​​​ទៀត​​​ដូច​នេះនៅ​​​ទូទាំង​​​ប្រទេស​​​ ដែល​​​ជា​​​កន្លែង​​​ឃំុ​​​ខ្លួន​​​បណ្តោះ​​​អាសន្ន និង​​​ក្រៅ​​​ប្រព័ន្ធ​​​តុលាការ​​​ដល់​​​ជន​​​អនាថា​​​ ស្ត្រី​​​រក​​​ស៊ី​​​ផ​​​្លូវ​​​ភេទ និង​​​អ្នក​​​ញៀន​​​ថ្នាំ​​​ជាដើម។ អតីត​​​អ្នក​​​ជាប់​​​ឃុំ​​​បាន​​​រៀប​​​រាប់​​​ពី​​​ស្ថាន​​​ភាពមិនល្អ​​​ទាំង​​​នោះ ហើយ​​​បាន​​​និយាយ​​​ថា មជ្ឈ​មណ្ឌល​​​នេះ​​​ពោរ​​​ពេញ​​​ដោយ​​​ការ​​​រំលោភ​​​បំពាន​​​លើរាង​​​កាយ​​​។

អង្គការ​​​សិទ្ធិ​​​មនុស្ស​​​មិន​​​អាច​​​កំណត​​​់​​​មូល​​​ហេតុ​​​នៃ​​​ការ​​​ស្លាប់​​​របស់​​​លោក សូ ភា បាន​​​ឡើយ​​​ ពីព្រោះ​​​សាក​​​សព​​​របស់​​​លោក​​​ត្រូវ​​​បាន​​​បូជា​​​នៅ​​​វត្ត​​​មួយ​​​ក្បែរ​​​មជ្ឈមណ្ឌល​​​នេះ​​​រួច​​​ហើយ ហើយ​​​មិន​​​​​​ដែល​​​​​​ធ្វើ​​​កោសល្យ​​​វិច័យ​​​ឡើយ​​​។

ឆ្លើយ​​​តប​​​ទៅ​​​នឹង​​​ការ​​​អះ​​​អាង​​​របស់​​​អង្គកា​​​រ​​​សិទ្ធិមនុស្ស​​​នៅ​​​ថ្ងៃ​​​ដដែល​​​ដែល​​​អង្គការ​​​នេះ​​​បាន​​​ចេញ​​​សេចក្តី​​​ថ្លែង​​​ការណ៍​​​នោះ លោក សន សុផល​​​ ប្រធានមន្ទីរ​​​សង្គម​​​កិច្ច​​​រាជ​​​ធានី​​​ភ្នំពេញ​​​បាន​​​មាន​​​ប្រសាសន៍​​​ថា លោក​​​ សូ ភា ត្រូវ​​​បាន​​​បញ្ជូន​​​ទៅ​​​មន្ទីរ​​​ពេទ្យ​​​បង្អែក​​​រាជ​​​ធាន​​​ី​​​អំឡុង​​​ពេល​​​គាត់​​​ស្នាក់​​​នៅ​​​មជ្ឈមណ្ឌល​​​នេះ​​​យ៉ាង​​​តិច​​​ក៏ពីរ​​​លើកដែរ​​​។​ លោក​​​បានមាន​​​ប្រសាសន៍​​​នៅ​​​ពេល​​​នោះ​​​ថា “យើង​​​បាន​​​បញ្ជូន​​​គាត់​​​ទៅព្យាបាល​​​នៅ​​​មន្ទីរ​​​ពេទ្យ​​​ ប៉ុន្តែ គាត់​​​បាន​​​ស្លាប់​​​ដោយ​​​សារ​​​គាត់​​​មាន​​​ជំងឺ​​​ធ្ងន់​​​ធ្ងរ​​​”។

អង្គការ​​​លីកាដូ​​​បាន​​​លើក​​​ឡើង​​​ថា បុគ្គលិក​​​នៅ​​​​​​មជ្ឈមណ្ឌល​​​នេះ និង​​​សាក្សី​​​មួយ​​​ចំនួន​​​ទៀត​​​ដែល​​​ដឹង​​​ពី​​​ករណី​​​នេះ​​​បាន​​​ប្រាប់​​​អ្នក​​​សើុប​​​អង្កេត​​​ថា លោក សូ ភា បាន​​​មកដល់​​​មាន​​​រាង​​​កាយ​​​ស្គាំង​​​ស្គម មាន​​​ជំងឺ និង​​​មាន​​​ស្នាម​​​កន្ទួល​​​លើ​​​ដង​​​ខ្លួន​​​ ហើយ​​​គ្មានមូលហេតុណា​​អនុញ្ញាត​​​ឲ្យគាត់​​​ចេញ​​​ពី​​កន្លែង​​​នេះ​​​ឡើយ​​​។

អង្គការ​នេះលើកឡើង​​ថា សន្តិសុខ​​​ម្នាក់​​​បាន​​​ប្រាប់​​​ក្រុម​​​អ្នក​​​សើុប​​​អង្កេត​​​ថា ពួក​​​គេ​​​មិន​​​អាច​​​នាំ​​​បុរស​​​នេះ​​​ទៅ​​​កាន់​​​មន្ទី​​​រ​​​ពេទ្យ​​​បាន​​​ទេ​​​ ពីព្រោះ​​​ពួក​​​គេ​​​ “ជាប់​​​រវល់​​​ខ្លាំង​​​ណាស់”។

កាល​​​ពី​​​ម្សិល​​​មិញ​​​ បុគ្គលិក​​​ម្នាក់​​​នៅ​​​មន្ទីរ​​​ពេទ្យ​​​បង្អែក​​​រាជ​​​ធានី​​​បាន​​ផ្តល់ព័ត៌មាន​ពីការ​លើក​ឡើង​របស់​​​​អង្គការ​​​លីកាដូ។ មន្ទីរ​​​ពេទ្យ​​​នេះ​​​ដែល​​​ជា​​​​អគារ​​​ដ៏ចំណាស់​​​ស្ថិត​​​នៅ​​​តាម​​​ផ្លូវ​​​លេខ​​​៦៩១​​​​​​ខាង​​​ជើង​​​ពហុ​​​កីឡា​​​ដ្ឋាន​​​ជាតិ​​​អូឡាំពិក​​​នោះ មិន​​​មាន​​​របាយការណ៍​​​អេឡិចត្រូនិក​អំពី​​​អ្នក​​​ជំងឺ​​​ឡើយ​​​។

ប៉ុន្តែ លោក ចាន់ សុខ​​​ជា ប្រធាន​​​រដ្ឋ​​​បាល​​​​​​បាន​​​មាន​​​ប្រសាសន៍​​​ថា លោក​​​ឆែករក​​​មើល​​​ឯកសារ​​​​​​របស់​​​មន្ទីរ​​​ពេទ្យ​​​នេះ​​​រក​មើល​​​អ្នក​​​ជំងឺឈ្មោះ​​​ សូ ភា ​​​​​សម្រាប់​​​ខែ​​​វិច្ឆិកា​​​ តែរកមិន​ឃើញ​ឡើយ។ លោក​​​បាន​​​មាន​​​ប្រសាសន៍​​​ថា “ខ្ញុំ​​​គិត​​​ថា គាត់​​​មិន​​​បាន​​​មក​​​ទី​​​នេះ​​​ទេ​​​។ ប្រសិន​​​បើ​​​គាត់​​​មក​​​ទី​​​នេះ​​​ គាត់​​​នឹង​​​មាន​​​ឈ្មោះ​​​ក្នុង​​​បញ្ជី​​​ហើយ​​​”។

សៀវ​​​ភៅ​​​កត់ត្រា​​​ឈ្មោះ​​​អ្នក​​​ជំងឺ​​​ថ្មីទាំងអស់​រៀង​​​រាល់​​​ថ្ងៃ​​​របស់​​​មន្ទីរ​​​ពេទ្យ​​​ចាប់​​​ពី​​​ថ្ងៃ​​​ទី​​​៥​​​ ខែវិច្ឆិកា ដល់​​​ថ្ងៃ​​​ទី​​​៣០​​​ខែវិច្ឆិកា ដែល​​​អ្នក​​​យក​​​ព័ត៌​​​មាន​​​បាន​​​ពិនិត្យមើល​​​មិនឃើញមាន​​​ឈ្មោះ​​​​​​លោក សូ​​​ ភា ឡើយ​​​។

នៅ​​​ពេល​​​ត្រូវ​​​បាន​​​ទាក់​​​ទង​​​កាល​​​ពី​​​ម្សិលមិញ  លោក សុផល ប្រធាន​​​មន្ទីរ​​​សង្គម​​​កិច្ច​​​បាន​​​អះ​​​អាង​​​ជា​​​ថ្មី​​​ម្តង​​​ទៀត​​​ថា បុរស​​​រូប​​​នេះ​​​ត្រូវ​​​​​​បាន​​​អនុញ្ញាត​​​ឲ្យចេញពី​មជ្ឈមណ្ឌល​​​សង្គម​​​កិច្ច​​​ព្រៃ​​​ស្ពឺដើម្បីព្យាបាល​ជំងឺ។ លោក​​​បាន​​​មាន​​​ប្រសា​សន៍​​​ថា “គាត់​​​បាន​​​និយាយ​​​ថា គាត់​​​មាន​​​ជំងឺ​​​ ហើយ​​​បាន​​​សុំ​​​ចេញទៅក្រៅ​​​ដើម្បី​​​ទិញ​​​ថ្នាំ ដូច្នេះ​​​យើង​​​បាន​​​អនុញ្ញាតឲ្យ​​​គាត់​​​ចេញទៅក្រៅ​​”។ លោក សុផល​​​ បាន​​​មាន​​​ប្រសាសន៍​​​ថា របាយការណ៍​​​គ្រូពេទ្យ​​​នៅ​​​មជ្ឈមណ្ឌល​​​នេះ ដែល​​លើកឡើងពីការ​​​មក​​ព្យាបាលរបស់​​​លោក សូ ភា បាន​​​បង្ហាញ​​​ថា បុរស​​​រូប​​​នេះ​​​មាន​​​ផ្ទុក​​​ជំងឺ​​​​​​អេដស៍ និង​​​ជំងឺ​​​របេង​​​ ប៉ុន្តែ មិន​​​​​​បាន​​​និយាយ​​​លម្អិត​​​ថា តើ​​​របាយការ​ណ៍នេះ​​​ពី​​​ណា​​​មក​​​ ឬ​​​​​​ទទួល​​​បាន​​​នៅ​​​ពេល​​​ណា​​​នោះ​​​​​​ឡើយ​​​។

ហើយ​​​នៅ​​​ពេល​​​ត្រូ​​​វ​​​បាន​​​សុំឲ្យ​បញ្ជាក់​​​អំពី​​​កាល​​​បរិច្ឆេទ​​​ដែល​​​លោក សូ ភា ត្រូវ​បាន​​បញ្ជូន​ទៅ​​សម្រាក​ព្យាបាល​​​នៅ​​​មន្ទី​​​រ​​​ពេទ្យ​​​បង្អែក​​​នេះ​​​ លោក​​​បាន​​​ដាក់​​​ទូរស័ព្ទអ្នកយកព័ត៌មាន​​​​ចុះ​​​។

លោក សុខជា ប្រធាន​​​រដ្ឋបាល​​​នៅ​​​មន្ទីរ​​​ពេទ្យ​​​នេះ​​​បាន​​​មាន​​​ប្រសាសន៍​​​ថា មិន​​​មាន​​​របាយ​ការណ៍​​ពីលោក សូ ភា នៅ​​​ក្នុង​​​ឯកសារ​​​​​​ជំងឺ​​​ឆ្លងរបស់លោក​ឡើយ។ ក្រុម​​​មន្ត្រី​​​នៅ​​​មជ្ឈមណ្ឌល​​​សង្គម​​​កិច្ច​​​ព្រៃ​​​ស្ពឺ​​​មិន​​​អាច​​​ទាក់​​​ទង​​​បាន​​​ទេ​​​៕សារុន​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស