សកម្មជននិងព្រះសង្ឃដែលកំពុងហែក្បួនមកពីទូទាំងប្រទេសចូលក្រុងភ្នំពេញ ដើម្បីអបអរទិវាសិទ្ធិមនុស្សនៅថ្ងៃពុធនេះ បានជួបនឹងការបិទផ្លូវ និងប៉ូលិសប្រដាប់អាវុធនៅជាយក្រុងកាលពីព្រឹកថ្ងៃអង្គារ និងបានចរចាបើកផ្លូវទៅវត្ត ដែលពួកគេចង់ស្នាក់នៅ។
អ្នកហែក្បួនមួយក្រុមប្រហែល៧០នាក់ដែលធ្វើដំណើរតាមបណ្តោយផ្លូវជាតិលេខ២បានជួបនឹងការបិទផ្លូវដោយប៉ូលិសប្រហែល៣០នាក់ក្នុងខណ្ឌមានជ័យ នៅម៉ោងប្រហែល១១ព្រឹកថ្ងៃអង្គារ ដែលនៅទីនោះពួកគាត់ត្រូវបានរារាំងមិនឲ្យឆ្លងកាត់អស់រយៈពេលប្រហែលមួយម៉ោង។
ប៉ុន្តែពេលទាក់ទងបានកាលពីថ្ងៃអង្គារ អធិការប៉ូលិសខណ្ឌស្តីទីលោក ជឿម ស៊ីថា បានបដិសេធថា មន្ត្រីរបស់លោកមិនបានដាក់របាំងផ្លូវទេ។ លោកបាននិយាយថា “ទេ យើងមិនបានដាក់របាំងផ្លូវទេ វាជាពេលសម្រាប់ព្រះសង្ឃឆាន់”។ លោក ស៊ីថា បាននិយាយថា អាជ្ញាធរបានទាមទារឲ្យតំណាងអ្នកដើរក្បួនចុះហត្ថលេខាសន្យាថា ពួកគេនឹងមិនបិទផ្លូវ ពេលណាចូលដល់កណ្តាលក្រុង។ លោកបាននិយាយថា “យើងមិនបានឃាត់ពួកគេទេ យើងគ្រាន់តែឆែកពួកគេរកអាវុធ ហើយនិងការពារកុំឲ្យមានការកកស្ទះចរាចរណ៍ប៉ុណ្ណោះ”។
ពេលរបាំងផ្លូវបើក ក្រុមនេះ ដែលចាប់ផ្តើមការដើរពីស្រុកគិរីវង្សខេត្តតាកែវមក បានដើរតាមផ្លូវជាតិនិងកាត់តាមទីស្នាក់ការគណបក្សសង្គ្រោះជាតិក្នុងក្រុងភ្នំពេញ ហើយពួកគេបានជួបលោក សម រង្ស៊ី ប្រធានគណបក្ស និងលោកស្រី មួរ សុខហួរ សមាជិសភា ដែលបានអមដំណើរពួកគេទៅវត្តថាន់ នៅមហាវិថីនរោត្តម។
ព្រះតេជគុណ ប្រាក់ បូរា គ្រូសូត្រឆ្វេង បានស្វាគមន៍អ្នកហែក្បួននៅម៉ោងប្រហែល២រសៀល និងបានរិះគន់សេចក្តីរាយការណ៍ ដែលថាអាជ្ញាធរបានបញ្ជាឲ្យវត្តទាំងអស់នៅតាមបណ្តោយផ្លូវត្រូវចាក់សោខ្លោងទ្វារមិនឲ្យអ្នកដើរក្បួនចូលនោះ។ ព្រះអង្គបានមានសង្ឃដីកាថា “អាត្មាមិនសប្បាយចិត្តទេដែលអាជ្ញាធរមូលដ្ឋានបង្ខំវត្តឲ្យហាមប្រាមអ្នកហែក្បួនមិនឲ្យចូលស្នាក់នៅនោះ។ វត្តអារ៉ាមជាកន្លែងសម្រាប់មនុស្សគ្រប់គ្នា”។
បើតាមអង្គការសិទ្ធិមនុស្សអាដហុកឲ្យដឹងថា ប៉ុន្តែក្រុមហែទី២ដែលធ្វើដំណើរពីខេត្តរតនគិរី ក៏ត្រូវបានឃាត់ជាបណ្តោះអាសន្ននៅក្រៅក្រុងដោយប៉ូលិសដែរ ហើយទទួលបានការស្វាគមន៍មិនសូវកក់ក្តៅទេ។
យោងតាមអង្គការសិទ្ធិមនុស្សលីកាដូឲ្យដឹងថា ក្រុមដែលមានសមាជិកនៃសហគមន៍ជនជាតិដើមភាគតិចផ្សេងគ្នា៧នាក់មកពីខេត្តភាគឦសានប្រទេស ត្រូវគេហាមមិនឲ្យចូលវត្តគៀនឃ្លាំងក្នុងខណ្ឌជ្រោយចង្វា ដែលពួកគេចង់ស្នាក់នៅមួយយប់។
អង្គការលីកាដូ បានឲ្យដឹងថា សកម្មជនបានបន្តដំណើរទៅវត្តចាស់ក្បែរនោះ ដែលពួកគេបានទទួលការស្នាក់នៅ។ អ្នកដើរក្បួនប្រហែល១០០នាក់ផ្សេងទៀត ដែលដើរចូលក្រុងតាមផ្លូវជាតិលេខ៤ បានមកដល់វត្តស្ទឹងមានជ័យ ក្នុងខណ្ឌមានជ័យ ក៏ពើបប្រទះនឹងខ្លោងទ្វារចាក់សោដែរ។
ចៅអធិការស្តីទី ព្រះនាម ថៃ ប៊ុនធឿន នៅវត្តនេះ បានមានសង្ឃដីកាថា សេចក្តីសម្រេចរបស់ព្រះអង្គឃាត់អ្នកហែក្បួនមិនឲ្យចូលវត្តស្របតាមការប្រកាសរួមដែលចេញដោយគណៈសង្ឃគណៈមហានិកាយ និងគណៈសង្ឃគណៈធម្មយុត្តិកនិកាយកាលពីថ្ងៃសុក្រ ដែលហាមសង្ឃមិនឲ្យចូលរួមក្នុងការហែក្បួន។
បន្ទាប់ពីត្រូវបានបដិសេធនៅវត្តស្ទឹងមានជ័យ ក្រុមនេះទទួលបានការស្វាគមន៍នៅវត្តសាមគ្គីរង្សី ដែលចៅអធិការវត្ត ព្រះនាម សៀង សុវណ្ណារ៉ា បានមានសង្ឃដីកាថា ក្រុមនេះ “ស្នាក់នៅយ៉ាងសប្បាយ”កាលពីយប់មិញ៕មានិត