38.8 C
Phnom Penh

របាយការណ៍​បង្ហាញ​កង្វះ​ស្តង់ដា​សុវត្ថិភាព​ក្នុង​ឧស្សាហកម្ម​កាត់ដេរ

ដោយ ឌឹ ខេមបូឌា ដេលី

បទវិភាគ

របាយការណ៍​ថ្មី​មួយ​អំពី​គ្រោះថ្នាក់​ក្នុង​រោងចក្រ​កាត់​ដេរ បាន​លើក​ឡើង​អំពី​ការ​ខ្វះ​បទប្បញ្ញត្តិ​ដើម្បី​បង្ការ​អគ្គិភ័យ ហើយ​នឹង​កង្វះ​ទាំងស្រុង​នូវ​ស្តង់ដា​អគារ និង​ការ​ខកខាន​របស់​អាជ្ញាធរ​ក្នុង​ការ​ធ្វើ​អធិការ​កិច្ច​ឲ្យ​បាន​ហ្មត់ចត់។

របាយការណ៍​ស្តី​អំពី​ប្រវត្តិ​ហានិភ័យ​ផ្នែក​អគ្គិភ័យ​និង​សុវត្ថិភាព​ជីវិត​រៀបចំ​ដោយ​អង្គការ​ពលកម្ម​អន្តរជាតិ ជា​សេចក្តី​សង្ខេប​ដែល​ចេញ​កាលពី​ថ្ងៃ​អង្គារ​ ធ្វើ​ឡើង​បន្ទាប់ពី​មាន​គ្រោះថ្នាក់​ជាច្រើន​នៅ​រោងចក្រ​ក្នុង​ប្រទេស​កម្ពុជា ក្នុង​នោះ​មាន​អគ្គិភ័យ​មួយ​នៅ​រោងចក្រ​កាត់ដេរ​ឆាង សេង ក្រុង​ភ្នំពេញ​ កាលពី​ខែ​កក្កដា ដែល​បណ្តាល​ឲ្យ​ស្លាប់​មេការ​ជនជាតិ​ចិន​ម្នាក់ និង​របួស​៣​នាក់​ផ្សេងទៀត។

កាលពី​ខែ​តុលា មនុស្ស​យ៉ាង​ហោចណាស់​៨​នាក់​បាន​រងរបួស​ ក្នុង​ពេល​ដែល​មាន​ការ​បាក់ស្រុត​រោងចក្រ នីស៊ីគូ អិុនធើប្រាយ​ ក្នុង​ខេត្ត​តាកែវ ហើយ​កាលពី​ខែ​ឧសភា​ឆ្នាំ​មុន មួយ​ផ្នែក​នៃ​រោងចក្រ វីង ស្តា ហ្សូ ក្នុង​ខេត្ត​កំពង់ស្ពឺ បាន​បាក់​ស្រុត បណ្តាល​ឲ្យ​ស្លាប់​កម្មករ​២​នាក់។

ទន្ទឹម​នឹង​កង្វះ​ច្បាប់​ដើម្បី​ធានា​ថា រោងចក្រ​ប្រកាន់​ខ្ជាប់​នឹង​សុវត្ថិភាព​អគ្គិភ័យ​និង​ស្តង់ដា​អគារ របាយការណ៍​នេះ​ឲ្យ​ដឹង​ថា ​មិន​មាន​យន្តការ​ច្បាស់លាស់​នៅ​នឹង​កន្លែង ដែល​តម្រូវ​ឲ្យ​រោងចក្រ​រាយការណ៍​អំពី​អគ្គិភ័យ ឬ បញ្ហា​រចនា​សម្ព័ន្ធ ចំណែកឯ​អធិការ​កិច្ច​ការងារ “ធ្វើ​មិន​ទៀងទាត់​ដោយសារ​ការ​ខ្វះ​ថវិកា​និង​បុគ្គលិក”។

របាយការណ៍​ក៏​បង្ហាញ​បញ្ជី​អនុសាសន៍​សម្រាប់​អ្នក​ដើរតួ​សំខាន់ ដោយ​ជំរុញ​រដ្ឋាភិបាល​ឲ្យ​អនុវត្ត​ត្រឹមត្រូវ​នូវ​ស្តង់ដា​អគ្គិភ័យ​និងសុវត្ថិភាព​អគារ និង​អំពាវនាវ​ដល់​ក្រុមហ៊ុន​ល្បីៗ រោងចក្រ សហជីព និង​ម្ចាស់​រោងចក្រ ឲ្យ​ចូលរួម​ទទួល​ខុសត្រូវ​ចំពោះ​សុវត្ថិភាព​រោងចក្រ។

លោក ម៉េង ប៊ុណ្ណារិទ្ធ អ្នក​នាំពាក្យ​ក្រសួង​គ្រប់គ្រង​ដែនដី​បាន​និយាយ​កាលពី​ថ្ងៃ​អង្គារ​ថា ក្រសួង​របស់​លោក​បាន​ចាត់​វិធានការ​ដោះស្រាយ​បញ្ហា​ដែល​លើក​ឡើង​ក្នុង​របាយការណ៍​នេះ​ហើយ។​ លោក ប៊ុណ្ណារិទ្ធ បាន​និយាយ​ថា “យើង​បាន​​ដឹង​ថា ឧប្បត្តិហេតុ​ជាច្រើន​កើតឡើង​ដោយសារ​អគ្គិភ័យ ឬ​គ្មាន​សុវត្ថិភាព​អគារ។ ដូច្នេះ​ឥឡូវ​នេះ យើង​កំពុង​ខិតខំ​បង្កើត​ច្បាប់​ដើម្បី​បង្ការ​បញ្ហា​ទាំងនេះ”។ លោក​បាន​និយាយ​ថា “យើងនឹង​ទៅ​ពិនិត្យ​ឧប្បត្តិហេតុ បន្ទាប់ពីវា​កើតឡើង ដើម្បី​ឲ្យ​ដឹង​មូលហេតុ​ដែល​បង្ក​ឡើង”។

លោក គង់ អាទិត្យ អនុប្រធាន​សម្ព័ន្ធសហជីព​ប្រជាធិបតេយ្យ​កម្មករ​កាត់​ដេរ​កម្ពុជា ដែល​ជា​សហជីព​​ឯករាជ្យ​ធំ​បំផុត​ បាន​មាន​ប្រសាសន៍​ថា មន្ត្រី​រដ្ឋាភិបាល​គួរ​ពិនិត្យ​រោងចក្រ​​មុន​បញ្ហា​ណាមួយ​កើតឡើង។ “ក្រសួង​គ្រប់គ្រង​ដែនដី​គួរ​ចំណាយ​ថវិកា​របស់​ខ្លួន​មួយ​ចំនួន​ដើម្បី​ធ្វើ​កិច្ចការ​នេះ ពីព្រោះ​សុវត្ថិភាព​កម្មករ​គឺ​សំខាន់​បំផុត ហើយ​កុំ​បណ្តោយ​ឲ្យ​អ្វី​មួយ​ដូច​នៅ​រោងចក្រ​វីងស្តា​កើតឡើង​[ទៀត]”។

លោក កែន លូ អគ្គលេខាធិការ​សមាគម​រោងចក្រ​កាត់​ដេរ​នៅ​កម្ពុជា ដែល​តំណាង​រោងចក្រ​នាំ​ចេញ​៥០០​រោងចក្រ បាន​មាន​ប្រសាសន៍​ថា មុនពេល​រដ្ឋាភិបាល​ដាក់​ចេញ​ឲ្យ​ច្បាស់លាស់​នូវ​កាតព្វកិច្ច​របស់​រោងចក្រ​ឲ្យ​ស្ថិត​ក្រោម​ច្បាប់ សមាជិក​របស់​លោក​មាន​សិទ្ធិ​តិចតួច​​ក្នុង​ការ​ណែនាំ​រោងចក្រ​ទាំង​នោះ។

លោក កែន លូ បាន​និយាយ​ថា “បញ្ហា​សំខាន់​ដែល​សមាជិក​របស់​យើង​ជាច្រើន​លើក​ឡើង គឺ​ថា បទប្បញ្ញត្តិ​មិន​ច្បាស់”។ “​ប្រសិនបើ​បទប្បញ្ញត្តិ​មិន​ច្បាស់លាស់ តើ​រោងចក្រ​ធ្វើ​ដោយ​ស្មានៗ​ឬ? ខ្ញុំ​គិត​ថា អនុសាសន៍​នោះ​នឹង​មាន​ន័យ បើ​មាន​បទប្បញ្ញត្តិ​ច្បាស់លាស់”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស