40.6 C
Phnom Penh

អង្គការ​​​សហ​​​ប្រជា​​​ជាតិ និង​​​រដ្ឋាភិបាល​​​​​​ឯកភាព​​​បំពេញ​​​បេសកកម្ម​​​រួមគ្នា​​​ដើម្បី​​​ស្វែង​​​រក​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិលមិញ អង្គការ​​​សហ​​​ប្រជា​​​ជាតិ​​​បាន​​​លើក​​​ឡើង​​​ថា ខ្លួន​​​ទទួល​​​បាន​​​ការ​​​អនុញ្ញាត​​​ពី​​​ក្រសួង​​​មហាផ្ទៃ​​​ដើម្បី​​​ស្វែង​​​រក​​​ក្រុម​​​ជន​​​ជាតិ​​​ភាគ​​តិច​​​ម៉ុង​​​តាញ៉ា ដែល​​​កំពុង​​​លាក់​​​ខ្លួន​​​ក្នុង​​​ខេត្ត​​​រតនគិរី ហើយ​​​បញ្ជូន​​​ពួកគេ​​​មក​​​រាជ​​​ធានី​​​ភ្នំពេញ​​​ជា​​​ទី​​​ដែល​​​ពួក​​​គេ​​​អាច​​​ដាក់​​​ពាក្យ​​​សុំ​​​សិទ្ធិ​​​ជ្រក​​​កោន។ 

លោកស្រី Wan-Hea Lee ប្រធាន​​​ប្រចាំ​​​ប្រទេស​​​របស់​​​ការិយាល័យ​​​ឧត្តម​​​​​​ស្នង​​​ការ​​​អង្គការ​​​សហ​​​ប្រជា​​​ជាតិ​​​ទទួល​​​បន្ទុក​​​សិទ្ធិ​​​មនុស្ស​​​ (OHCHR) បាន​​​លើក​​​ឡើង​​​តាម​​​រយៈ​​​អីុម៉េល​​​កាល​​​ពី​​​ម្សិល​​​មិញ​​​ថា ​​​ការិយាល័យ​​​ឧត្តម​​​​​​ស្នង​​​ការ​​​អង្គការ​​​សហ​​​ប្រជា​​​ជាតិ​​​ទទួល​​​បន្ទុក​​​សិទ្ធិ​​​មនុស្ស​​​ និង​​​ការិយាល័យ​​​ឧត្តម​​​ស្នង​​​ការ​​​អង្គការ​​​សហប្រជាជាតិ​​​ទទួល​​​បន្ទុក​​​ជន​​​ភៀស​​​ខ្លួន​​​ (UNHCR) ព្រម​​​ទាំង​​​​​​ក្រសួង​​​មហាផ្ទៃ​​​នឹង​​​ចុះ​​​បេសកកម្ម​​​រួម​​​គ្នា​​​មួ​​​យ​​​ទៅ​​​ខេត្ត​​​រតនគិរី​​​ក្នុង​​​ពេល​​​ឆាប់ៗ​​​។

លោក​​​ស្រី Lee បាន​​​មាន​​​ប្រសាសន៍​​​ថា “​​​ក្រសួង​​​បាន​​​ប្រាប់​​​ថា ថ្មីៗ​​​នេះ​​​ខ្លួន​​​មិន​​​បាន​​​ដឹង​​​​​​អំពី​​​​​​វត្តមាន​​​របស់​​​ជន​​​ជាតិ​​​ភាគ​​​តិច​​​ម៉ុងតាញ៉ា​​​នៅ​​​ក្នុង​​​ខេត្ត​​​រតនគិរី​​​ឡើយ។ ប្រសិនបើ​​​វត្តមាន​​​របស់​​​ពួក​​​គេ​​​ត្រូវ​​​បាន​​​បញ្ជាក់​ ហើយ​​​ពួក​​​គេ​​​បង្ហាញ​​​​​​ថា ខ្លួន​​​ចង់​​​ដាក់​​​ពាក្យ​​​សុំ​​​សិទ្ធិ​​​ជ្រក​​​កោន​​​នោះ ​​​​​​​​​​​​​​​​​​​​​​​​​​​​​​​​​​​​​​​​​វា​​​មាន​​​ការ​​​ឯកភាព​​​ថា គេ​​​នឹង​​​នាំ​​​ពួក​​​គេ​​​មក​​​រាជ​​​ធានី​​​ភ្នំពេញ​​​ដើម្បី​​​​​​ជួយ​​​ឲ្យ​​​ពួក​​​គេ​​​ធ្វើ​​​ដូច្នោះ”។

ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​មួយ​​​ក្រុម​​​មាន​​​គ្នា​​​១៣​​​នាក់​​​​​​ កំពុង​​​តែ​​​លាក់​​​ខ្លួន​​​នៅ​​​ក្នុង​​​ព្រៃ​​​ភាគ​​​ខាង​​​ជើង​​​ខេត្ត​​​រតនគិរី អស់​​​រយៈ​​​ពេល​​​ប្រាំមួយ​​​សប្តាហ៍​​​កន្លង​​​មក​​​ហើយ​​​។ ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​នេះ​​​គឺ​​​ជា​​​ក្រុម​​​ជន​​​ជាតិ​​​ភាគ​​​តិច​​​ដែល​​​ប្រមូល​​​ផ្តុំ​​​គ្នា​​​នៅ​​​តំបន់​​​ខ្ពង់​​​រាប​​​កណ្តាល​​​ប្រទេស​​​វៀតណាម។ ក្រុម​​​នេះ​​​បាន​​​អះ​​​អាង​​​ថា ខ្លួន​​​បាន​​​រត់​​​គេច​​​ពី​​​ការ​​​ប្រើ​​​អំពើ​​​ហិង្សា​​​ពី​​​សំណាក់​​​រដ្ឋាភិ​​​បាល​​​វៀតណាម​​​។

ក្រសួង​​​មហាផ្ទៃ​​​បាន​​​បញ្ជាក់​​​កាល​​ពី​​​ម្សិលមិញ​​​ថា ខ្លួន​​​កំពុង​​​តែ​​​រៀប​​​ចំ​​​សហការ​​​ជាមួយ​​​អង្គការ​​​សហ​​​ប្រជា​​​ជាតិ​​​ដើម្បី​​​តាម​​​ស្វែង​​​រក​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​ទាំង​​​នេះ​​​។

លោក ខៀវ សុភ័គ អ្នក​​​នាំ​​​ពាក្យ​​ក្រសួង​​​នេះ​​​បាន​​​លើក​​​ឡើង​​​ក្នុង​​​សេចក្តី​​​ថ្លែង​​​ការណ៍​​​មួយ​​​ថា “មក​​​ទល់​​​ពេល​​​នេះ​​​ យើង​​​មិន​​​ដឹង​​​ថា​​​ ពួក​​​គេ​​​លាក់​​​ខ្លួន​​​នៅ​​​ទី​​​ណា​​​នោះ​​​ឡើយ​​​។ ប៉ុន្តែ ប្រសិន​​​បើ​​​ទីតាំង​​​នោះ​​​ត្រូវ​​​បាន​​​បង្ហាញ​​​ ខ្ញុំ​​​ស្វាគមន៍​​​ចំពោះ​​​ការ​​​ចូល​​​រួម​​​របស់​​​មន្ត្រី​​​យើង​​​ជា​​​មួយ​​​ក្រុម​​​ការងារ​​​មក​​​ពី​​​អង្គការ​​​សហ​​​ប្រជា​​​ជាតិ​​​ ឬ​​​អនុញ្ញាត​​​ឲ្យ​​​អង្គការ​​​សហ​​​ប្រជា​​​ជាតិ​​​ទាក់​​​ទង​​​ជា​​​មួយ​​​ក្រុម​​​នេះ”។

ឧត្តម​​​សេនីយ៍ ខៀវ សុភ័គ បាន​​​លើក​​​ឡើង​​​កាល​​​ពី​​​មុន​​​ថា លោក​​​មិន​​​ចាត់​​​ទុក​​​ថា ក្រុម​​​ជន​​​ជាតិ​​​ភាគ​​​តិច​​​ម៉ុងតាញ៉ា​​​ជា​​​អ្នក​​​ស្វែង​​​រក​​​សិទ្ធិ​​​ជ្រក​​​កោន​​​ស្រប​​​ច្បាប់​​​ឡើយ​​​ ហើយ​​​បាន​​​ហៅ​​​​​​ពួក​​​គេ​​​ថា ជា​​​ជន​​​ “អន្តោប្រវេសន៍​​​ខុស​​​ច្បាប់”។

ការ​​​ទាក់​​​ទង​​​តាម​​​ទូរស័ព្ទ​​​កាល​​​ពី​​​ម្សិលមិញ​​​ ជា​​​ច្រើន​​​លើក​​​ច្រើន​​​សា​​​ទៅ​​​កាន់​​​ឧត្តម​​​សេនីយ៍​​​ ខៀវ សុភ័គ និង​​​លោក សុខ ផល​​​ អគ្គនាយក​​​នៃ​​​អគ្គនាយក​​​ដ្ឋាន​​​អន្តោប្រវេសន៍​​​នៅ​​​ក្រសួង​​​មហាផ្ទៃ​​​​​​​​​​​​​​​​​​មិន​​​ទទួល​​​​​​បាន​​​ជោគ​​​ជ័យ​​​នោះ​​​ទេ​​​។

លោក​​​ ថោង សាវុន អភិបាល​​​ខេត្ត​​​រតនគិរី​​​បាន​​​លើក​​​ឡើង​​​ថា លោក​​​នៅ​​​មិន​​​ទាន់​​​​​​ទទួល​​​បាន​​​លិខិត​​​ពី​​​ក្រសួង​​​មហាផ្ទៃ​​​ ដែល​​​អនុញ្ញាត​​​ឲ្យ​​​អង្គការ​​​សហ​​​ប្រជា​​​ជាតិ​​​ជួប​​​ជា​​​មួយ​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា​​នៅ​​​ឡើយ​​​ទេ។ លោក​​​បាន​​​មាន​​​ប្រសាសន៍​​​ថា “យើង​​​នឹង​​​មិន​​​អនុញ្ញាត​​​ឲ្យ​​​ UNHCR ជួប​​​ជាមួយ​​​មនុស្ស​​​នៅ​​​ក្នុង​​​ព្រៃ​​​ឡើយ​​​ ប្រសិន​​​បើ​​​ពួក​​​គេ​​​គ្មាន​​​លិខិត​​​អនុញ្ញាត​​​ពី​​​ថ្នាក់​​​លើ​​​ទេ​​​នោះ​​​​​​​​”។

អំឡុង​​​ពេល​​​ក្រុម​​​ស្វែង​​​រក​​​សិទ្ធិ​​​ជ្រក​​​កោន​​​ទាំង​​​នេះ​​​​​លាក់​​​ខ្លួន​​​ក្នុង​​​ខេត្ត​​​រតនគិរី​​​ ក្រុម​​​ជន​​​ជាតិ​​​ដើម​​​ភាគ​​​តិច​​​ចារ៉ាយ​​​ដែល​​​ជា​​​ក្រុម​​​មួយ​​​ក្នុង​​​ចំណោម​​​កុលសម្ព័ន្ធ​​​ប្រហែល​​​៣០​​​ដែល​​​បង្កើត​​​បាន​​​ជា​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា​​នោះ​​​បាន​​​ផ្តល់​​​អាហារ​​​ និង​​​ជម្រក​​​ដល់​​​ពួក​​​គេ។

អ្នក​​​ភូមិ​​​ជន​​​ជាតិ​​​ដើម​​​ភាគ​​​តិច​​​ចារ៉ាយ​​​ម្នាក់​​​ដែល​​​​​​បាន​​​ចូល​​​រួម​​​ជា​​​មួយ​​​​​​ជន​​​ជាតិ​​​ដើម​​​ភាគ​​​តិច​​​ចារ៉ាយ​​​មួយ​​​ក្រុម​​​ដែល​​​​​​ធ្វើ​​​ដំណើរ​​​មក​​​រាជ​​​ធានី​​​ភ្នំពេញ ដើម្បី​​​ចូល​​​រួម​​​ទិវា​​​សិទ្ធិ​​​មនុស្ស​​​នោះ​​​បាន​​​លើក​​​ឡើង​​​ថា  ទោះ​​​បី​​​ជា​​​មានការ​​​ព្រួយ​​​បារម្ភ​​​អំពី​​​សុខភាព​​​របស់​​​ក្រុម​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា​​ក៏​​​ដោយ​​​ ក៏​​​គេ​​​គ្មាន​​​ផែនការ​​​​​​ផ្លាស់​​​ប្តូរ​​​ទីតាំង​​​របស់​​​ពួកគេ​​​ដែរ​​​។

អ្នក​​​ភូមិ​​​រូប​​​​​​នេះ​​​ ​​​​​​ដែល​​​ស្នើ​​​សុំ​​​មិន​​​បញ្ចេញ​​​ឈ្មោះ​​​ព្រោះ​​​ខ្លាច​​​ក្រែង​​​មាន​​​ការ​​​ធ្វើ​​​ទុក្ខ​​​បុក​​​ម្នេញ​​​បាន​​​និយាយ​​​ថា “យើង​​​គ្មាន​​​ផែនការ​​​​​​ប្តូរ​​​ទីតាំង​​​ពួក​​​គេ​​​ពី​​​ក្នុង​​​ព្រៃ​​​ឡើយ​​​ ព្រោះ​​​អ្នក​​​ភូមិ​​​មិន​​​អាច​​​ជួយ​​​ពួក​​​គេ​​​បាន​​​ឡើយ​​​ ខណៈ​​​អាជ្ញាធរ​​​កំពុង​​​យាម​​​នៅ​​​តាម​​​​​​ផ្លូវ​​​ ហើយ​​​កំពុង​​​ស្វែង​​​រក​​​ពួកគេ​​​​​​នោះ​​​”។

អ្នក​​​ភូមិ​​​រូប​​​នេះ​​​បាន​​​លើក​​​ឡើង​​​ទៀត​​​ថា វា​​​ក៏​​​មាន​​​ការ​​​លំបាក​​​ក្នុង​​​ការ​​​យក​​​អាហារ​​​ទៅ​​​ឲ្យ​​​ជន​​​ជាតិ​​​ដើម​​​ភាគតិច​​​ម៉ុងតាញ៉ា​​​ផង​​​ដែរ​​​ ដោយសារ​​​វត្តមាន​​​យ៉ាង​​​ច្រើន​​​របស់​​​នគរ​​​បាល​​​នេះ។

អ្នក​​​ភូមិ​​​រូប​​​​​​នេះ​​​បាន​​​និយាយ​​​បន្ថែម​​​ដោយ​​​ប្រើ​​​ពាក្យ​​​ផ្សេង​​​ទៀត​​​ ដែល​​​សំដៅ​​​ទៅ​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​ថា “ជន​​​ជាតិ​​​ភាគ​​​តិច​​​ Degar ទាំង​​​អស់​​​ ឥឡូវ​​​នេះ​​​កំពុង​​​តែ​​​​​​លាក់​​​ខ្លួន​​​​​​នៅ​​​កន្លែង​​​ផ្សេង​​​ៗ​​​គ្នា​​​ក្នុង​​​ព្រៃ​​​ ព្រោះ​​​អាជ្ញាធរ​​​មក​​​កាន់​​​តែ​​​កៀក​​​ទៅ​​​ៗ​​​ហើយ។ អ្នក​​​ខ្លះ​​​កំពុង​​​មាន​​​ជំងឺ​​​គ្រុន​​​​​​ក្តៅ ហើយ​​​មាន​​​សុខភាព​​​មិន​​​ល្អ​​​ឡើយ​​​”។

អ្នក​​​ភូមិ​​​រូប​​​នេះ​​​បាន​​​លើក​​​ឡើង​​​បន្ថែម​​​ទៀត​​​ថា គាត់​​​ទទួល​​​បាន​​​ដំណឹង​​​មក​​​ថា ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​បន្ថែម​​​ទៀត​​​កំពុង​​​តែ​​​មាន​​​ផែនការ​​​គេច​​​ពី​​​ប្រទេស​​​វៀតណាម​​​មក​​​កម្ពុជា ប៉ុន្តែ​​​ថា ភូមិ​​​របស់​​​គាត់​​​​​​នឹង​​​មិន​​​អាច​​​ផ្តល់​​​ជំនួយ​​​ដល់​​​អ្នក​​​ស្វែងរក​​​សិទ្ធិ​​​ជ្រក​​​កោន​​​ក្នុង​​​ចំនួន​​​ច្រើន​​​បន្ថែម​​​ទៀត​​​​​​បាន​​​ឡើយ​​​។ ​​​​​​​​​​​​​​​​​​​​​​​​​គាត់​​​បាន​​​និយាយ​​​​​​ថា “យើង​​​នឹង​​​ជួយ​​​ពួកគេ ​​​ប្រសិន​​​បើ​​​មាន​​​មនុស្ស​​​បន្ថែម​​​ទៀត​​​ឆ្លង​​​ព្រំ​​​ដែន​​​មក​​​ ប៉ុន្តែ បើ​​​មាន​​​រាប់​​​រយ​​​នាក់​​​នោះ ​​​យើង​​​នឹង​​​មិន​​​អាច​​​ជួយ​​​បាន​​​ឡើយ​​​ ព្រោះ​​​យើង​​​ក៏​​​មានការ​​​ខ្វះខាត​​​ស្បៀង​​​​​​អាហារ​​​ដែរ​​​”។

រដ្ឋាភិបាល​​​វៀតណាម​​​​​​​​​បាន​​​ចាប់​​​ផ្តើម​​​បង្ក្រាប​​​លើ​​​ព្រះវិហារ​​​គ្រិស្ត​​​និកាយ​​​ប្រូតេស្តង់​​​​​​​​​​​​​​​របស់​​​ជន​​​ជាតិ​​ភាគតិច​​​ម៉ុង​​​តាញ៉ា​​​នៅ​​​ក្នុង​​​ឆ្នាំ​​​២០០១ ដោយ​​​ធ្វើ​​​ឲ្យ​​​ពួក​​​គេ​​​​​រាប់​​​ពាន់​​​នាក់​​​បាន​​​គេច​​​ខ្លួន​​​មក​​​កម្ពុជា​​​កាល​​​ពី​​​ជាង​​​១០​​​ឆ្នា​​ំមុន​​​។ហើយ​​​ក្នុង​​​នោះ​​​មាន​​​ប្រហែល​​​២.០០០នាក់​​​ត្រូវ​​​​​បាន​​​ផ្តល់​​​សិទ្ធិ​​​ជ្រក​​​កោន​​​នៅ​​​ក្នុង​​​ប្រទេស​​​សហរដ្ឋអាមេរិក និង​​​បណ្តា​​​ប្រទេស​​​ផ្សេង​​​ៗ​​​ទៀត​​​ ខណៈ​​​អ្នក​​​ដែល​​​នៅ​​​សេសសល់​​​ត្រូវ​​​បាន​​​និរទេស​​​ខ្លួន​​​មក​​​ប្រទេស​​​វៀតណាម​​​វិញ។ មាន​​​សេចក្តី​​​រាយការណ៍​​​ថា ពួកគេ​​​ត្រូវ​​​បាន​​​បញ្ជូន​​​ទៅ​​​ពន្ធនាគារ​​​ ហើយ​​​ត្រូវ​​​​​​បាន​​​​​​ធ្វើ​​​ទារុណកម្ម​​​នៅ​​​ទី​​​នោះ​​​​​​​​​​​​​​​​​​៕ស៊ុយ​​​ឈាង (រាយការណ៍​​​បន្ថែម​​​ដោយ​​​ George Wright និង Chris Mueller)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស