29 C
Phnom Penh

អង្គការ​​​សហ​​​ប្រជា​​​ជាតិ​​​ត្រឡប់​​​ទៅ​​​កាន់​​​ខេត្ត​​​រតនគិរី​​​វិញ​​​ ដើម្បី​​​ជួប​​​ជា​​​មួយ​​​ជន​​​ជាតិ​​​ភាគ​​​តិច​​​ម៉ុងតាញ៉ា​​​

ដោយ ឌឹ ខេមបូឌា ដេលី

បទវិភាគ

បន្ទាប់​​​ពី​​​មាន​​​ភាព​​​ជាប់​​​គាំង​​​ជិត​​​ពីរ​​​សប្តាហ៍​​​ កាល​​​ពីម្សិលមិញ​​​ក្រសួង​​​មហាផ្ទៃ​​​បាន​​​បញ្ជូន​​​មន្ត្រី​​​ឲ្យទៅ​​​ចូល​​​រួម​​​ជាមួយ​​​តំណាង​​​មក​​​ពី​​​អង្គការ​​​សហ​​​ប្រជា​​​ជាតិ ដោយ​​​ធ្វើ​​​ដំណើរ​​​ទៅ​​​ជួប​​​ក្រុម​​​អ្នក​​​ស្វែង​​​រក​​​សិទ្ធិ​​​ជ្រក​​​កោន​​​ជន​​​ជាតិ​​​ភាគ​​​តិច​​​ម៉ុងតាញ៉ា​​​ចំនួន​​​១៣​​​នាក់​​​ដែល​​​កំពុង​​​លាក់​​​ខ្លួន​​​នៅ​​​ក្នុង​​​ព្រៃ​​​ក្នុង​​​ខេត្ត​​​រតនគិរី​​​ចាប់​​​តាំង​​​ពី​​​ពួក​​​គេ​​​បាន​​​ឆ្លង​​​កាត់​​​ព្រំ​​​ដែន​​​ពី​​​ប្រទេស​​​វៀតណាម​​​ចូល​​​មក​​​ប្រទេស​​​កម្ពុជា​​​កាល​​​ពី​​​ប្រាំមួយ​​​សប្តាហ៍​​​កន្លង​​​មក​​​នេះ​​​។

​​​ចាប់​​​តាំង​​​ពី​​​ចុង​​​ខែ​​​មុន​​​មក​​​ ការិយាល័យ​​​ឧត្តម​​​ស្នង​​​ការ​​​អង្គការ​​​សហ​​​ប្រជា​​​ជាតិ​​​ទទួល​​​បន្ទុក​​​សិទ្ធិ​​​មនុស្ស (OHCHR) និង​​​ការិយាល័យ​​​ឧត្តម​​​ស្នង​​​ការ​​​អង្គការ​​​សហ​​​ប្រជា​​​ជាតិ​​​ទទួល​​​បន្ទុក​​​ជន​​​ភៀស​​​ខ្លួន​​​​​​​​​ (UNHCR) បាន​​​ព្យាយាម​​​បញ្ចុះ​​​បញ្ចូល​​​រដ្ឋាភិបាល​​​ឲ្យ​​​អនុញ្ញាត​​​ឲ្យ​​​ក្រុម​​​ជន​​​ជាតិ​​​ភាគ​​​តិច​​​ម៉ុងតាញ៉ា​​​បាន​​​មក​​​រាជ​​​ធានី​​​ភ្នំពេញ​​ដើម្បី​​​ស្នើ​​​សុំ​​​សិទ្ធិ​​​ជ្រក​​​កោន​​​។

លោក សុខ ផល អគ្គនាយក​​​នៃ​​​អគ្គ​​​នាយកដ្ឋាន​​​អន្តោប្រវេសន៍​​​នៃ​​​ក្រសួង​​​មហាផ្ទៃ​​​បាន​​​លើក​​​ឡើង​​​ថា លោក​​​បាន​​​អនុញ្ញាត​​​ឲ្យ​​​មាន​​​ការ​​​ធ្វើ​​​ដំណើរ​​​ ប៉ុន្តែ ​​​​​​មិន​​​អាច​​​បញ្ជាក់​​​ពី​​​ពេល​​​វេលា​​​ដែល​​​មន្ត្រី​​​នឹង​​​ជួប​​​ជាមួយ​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​ឡើយ​​​។ ក្រុម​​​ជន​​​ជាតិ​​​ភាគ​​​តិច​​​នេះ​​​លើក​​​ឡើង​​​ថា ខ្លួន​​​គេច​​​ពី​​​ការ​​​ប្រើ​​​អំពើ​​​ហិង្សានិង​​​ការ​​​ផ្តន្ទាទោស​​​​​​ពី​​​សំណាក់​​​រដ្ឋាភិបាល​​​​​​វៀតណាម​​​​​​។

ឧត្តម​​​សេនីយ៍ សុខ ផល បាន​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា “ខ្ញុំ​​​បាន​​​បញ្ជូន​​​មន្ត្រី​​​របស់​​​ខ្ញុំ​​​ឲ្យ​​​ទៅ​​​ចូល​​​រួម​​​ជាមួយ UNHCR និង [OHCHR] រួច​​​ហើយ​​​ ប៉ុន្តែ ខ្ញុំ​​​មិន​​​ដឹង​​​ទេ​​​ថា តើ​​​ពួក​​​គេ​​​អាច​​​ជួប​​​ជន​​​ជាតិ​​​ភាគ​​​តិច​​​ម៉ុងតាញ៉ា​​​​​​ហើយ​​​ឬនៅ​​​នោះ​​​។ ខ្ញុំ​​​បាន​​​ប្រាប់​​​អាជ្ញាធរ​​របស់​​​ខ្ញុំ​​​ឲ្យ​​​ធ្វើ​​​របាយការណ៍​​​មក​​​ខ្ញុំ​​​​​​នៅ​​​ពេល​​​ពួក​​​​​​គេ​​​ទទួល​​​បាន​​​ព័ត៌​​​មាន​​​ ឬ​​​ប្រសិន​​​បើ​​​ពួក​​​គេ​​​បាន​​​ជួប​​​ជា​​​មួយ​​​ជន​​​ជាតិ​​​ភាគ​​​តិច​​​ម៉ុងតាញ៉ា​​​”។

លោក​​​ស្រី Wan-Hea Lee តំណាង​​​ប្រចាំ​​​ប្រទេស​​​របស់​​​ OHCHR បាន​​​បញ្ជាក់​​​កាល​​​ពី​​​ម្សិល​​​មិញ​​​ថា គណៈប្រតិភូ​​​របស់​​​អង្គការ​​​សហ​​​ប្រជា​​​ជាតិ​​​ និង​​​រដ្ឋាភិបាល​​​ “បាន​​​ធ្វើ​​​ដំណើរ​​​ក្នុង​​​ថ្ងៃ​​​នេះ​​​ទៅ​​​កាន់​​​ខេត្ត​​​រតនគិរី​​​ ដើម្បី​​​ជួប​​​ជាមួយ​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​ ដែល​​​កំពុង​​​ស្វែង​​​រក​​​សិទ្ធិ​​​ជ្រក​​​កោន​​​”។

លោក ឆាយ ធី អ្នក​​​សម្រប​​​សម្រួល​​​នៅ​​​អង្គការ​​​សិទ្ធិ​​​មនុស្ស​​​អាដ​​​ហុក​​​ប្រចាំ​​​ខេត្ត​​​រតនគិរី​​​បាន​​​លើក​​​​​​ឡើង​​​ថា ក្រុម​​​ការ​​​ងារ​​​បាន​​​ទៅ​​​ដល់​​​ខេត្ត​​​រតនគិរី​​​កាល​​​ពី​​​រសៀល​​​ម្សិលមិញ ហើយ​​​មាន​​​ផែន​​​ការ​​​ជួប​​​ជាមួយ លោក ថោង សាវុន ​​​អភិបាល​​​ខេត្ត​​​​​​ក្នុង​​​ថ្ងៃ​​​នេះ។

ជន​​​ជាតិ​​​ភាគ​​​តិច​​​ម៉ុងតាញ៉ា​​​ចំនួន​​​១៣​​​នាក់​​​ដែល​​​ជា​​​សមាជិក​​​នៃ​​​ក្រុម​​​ជន​​​ជាតិ​​​ភាគ​​​តិច​​​​​​ ដែល​​​ប្រមូល​​​ផ្តុំ​​​​​​គ្នា​​​នៅ​​​តំបន់​​​ខ្ពង់​​​រាប​​​កណ្តាល​​​ប្រទេស​​​វៀតណាម កំពុង​​​លាក់​​​ខ្លួន​​​ក្នុង​​​ស្រុក​​​លំផាត់​​​ ខេត្ត​​​រតនគិរី ហើយ​​​មក​​​ទល់​​​ពេល​​​នេះ​​​កំពុង​​​តែ​​​​​​គេច​​​ពី​​​នគរ​​បាល​​​មូល​​​ដ្ឋាន​​​ដែល​​​​​​ហៅ​​​ក្រុម​​​នេះ​​​ថា ជា​​​ “ជន​​​អន្តោប្រវេសន៍​​​ខុស​​​ច្បាប់” ហើយ​​​គំរាម​​​និរទេស​​​ពួក​​​គេ​​​ប្រសិន​​​បើ​​​ចាប់​​​ពួក​​​​​​គេ​​​បាន​​​។

ដំណើរ​​​ទៅ​​​​​​ខេត្ត​​​រតនគិរី​​​កាល​​​ពី​​​ម្សិល​​​មិញ ត្រូវ​​​បាន​​​ធ្វើ​​​ឡើង​​​ បន្ទាប់​​​ពី​​​គណៈប្រតិភូ​​​របស់​​​អង្គការ​​​សហ​​​ប្រជា​​​ជាតិ​​​បាន​​​ត្រឡប់​​​មក​​​រាជ​​​ធានី​​​ភ្នំពេញ​​​វិញ​​​កាល​​​ពី​​​ថ្ងៃ​​​ទី​​​៥ ខែ​​​ធ្នូ បន្ទាប់​​​ពី​កា​​​រ​​​ចារចា​​​រយៈ​​​ពេល​​​បី​​​ថ្ងៃ​​​សុំ​​​ជួប​​​​​​​​​​​​​​ជាមួយ​​​អ្នក​​​ស្វែង​​​រក​​​សិទ្ធិ​​​ជ្រក​​​កោន​​​មិន​​​បាន​​ទទួល​​​ជោគ​​​ជ័យ ដោយ​​​​​​​​​អាជ្ញាធរ​​​មូល​​​ដ្ឋាន​​លើក​​​ឡើង​​​ថា ទាល់​​​តែ​​​ពួក​​​គេ​​​មាន​​​លិខិត​​​អនុញ្ញាត​​​ពី​​​ក្រសួង​​​មហាផ្ទៃ​​​។

សេចក្តី​​​ថ្លែង​​​ការ​​ណ៍​​​មួយ​​​របស់​​​ក្រសួង​​​មហាផ្ទៃ​​​ចេញ​​​កាល​​​ពី​​​ព្រឹក​​​ថ្ងៃ​​​ពុធ​​​ ​​បាន​​​ដក​​​ស្រង់​​​លិខិត​​​ចុះ​​​ថ្ងៃ​​​ទី​​​៥ ខែ​​​ធ្នូ របស់​​​លោក​​​ ស ខេង រដ្ឋមន្ត្រី​​​​​​ក្រសួង​​​មហាផ្ទៃ​​​ផ្ញើ​​​ជូន​​​លោក ហ្សង់ហ្វ្រង់​​​ស័រ កូតាំង ឯក​​​អគ្គរដ្ឋ​​​​​​សហភាព​​​អឺរ៉ុប​​​ប្រចាំ​​​ប្រទេស​​​កម្ពុជា ដែល​​​មាន​​​ខ្លឹម​​​សារ​​​ថា “ប្រសិន​​​បើ​​​ទី​​​តាំង​​​របស់​​​ពួក​​​គេ​​​ត្រូវ​​​បាន​​​បង្ហាញ​​​ ខ្ញុំ​​​ស្វាគមន៍​​​ដោយ​​​​​​ឲ្យ​​​មន្ត្រី​​​របស់​​​យើង​​​ទៅ​​​ចូល​​​រួម​​​ជាមួយ​​​ក្រុម​​​ការ​​​ងារ​​​មក​​​ពី​​​អង្គការ​​​សហ​​​ប្រជា​​​ជាតិ ឬ​​​អនុញ្ញាត​​​ឲ្យ​​​អង្គការ​​​សហ​​​ប្រជា​​​ជាតិ​​​ទាក់​​​ទង​​​ជាមួយ​​​ក្រុម​​​ជន​​​ជាតិ​​​ភាគ​​​តិច​​​នេះ​​​”។

ប៉ុន្តែ ទាំង​​​ក្រសួង​​​មហាផ្ទៃ​​​ និង​​​មន្ត្រី​​​ខេត្ត​​​នៅ​​​តែ​​​មាន​​​ការ​​​សង្ស័យ​​​ចំពោះ​​​ការ​​​អះ​​​អាង​​​របស់​​​ក្រុម​​​ជន​​​ជាតិ​​​ភាគ​​​តិច​​​នេះ​​​ដែល​​​ថា ខ្លួន​​​គឺ​​​ជា​​​ក្រុម​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា ដែល​​​មាន​​​សិទ្ធិ​​​ជ្រក​​​កោន​​​ស្រប​​​ច្បាប់​​​។

ក្រុម​​​ជន​​​ជាតិ​​​ដើម​​​ភាគ​​​តិច​​​ចារ៉ាយ​​​នៅ​​​កម្ពុជា​​​ជា​​​ក្រុម​​​ជន​​​ជាតិ​​​ដើម​​​ភាគ​​​តិច​​​មួយ​​​ក្នុង​​​ចំណោម​​​កុលសម្ព័ន្ធ​​​ប្រហែល​​​៣០​​​ដែល​​​បង្កើត​​​បាន​​​ជា​​​ជន​​​ជាតិ​​​ភាគ​​​តិច​​​ម៉ុងតាញ៉ា​​​នោះ​​​បាន​​​ផ្តល់​​​ស្បៀង​​​​​​​​អាហារ​​​ ន​​​​​​​​​ិង​​​ជម្រក​​​ដល់​​​ក្រុម​​​អ្នក​​​ស្វែង​​​រក​​​សិទ្ធិ​​​ជ្រក​​​កោន​​​ទាំង​​​នេះ​​​ ដែល​​​បាន​​​បំបែក​​​គ្នា​​​ជា​​​បី​​​ក្រុម​​​តូច​​​ៗ​​​ចាប់​​​តាំង​​​ពី​​​ពួក​​​គេ​​​ឆ្លង​​​កាត់​​​ព្រំដែន​​​មក​​​។

នៅ​​​ពេល​​​អង្គការ​​​សហ​​​ប្រជា​​​ជាតិ​​​កំពុង​​​នៅ​​​ក្នុង​​​ខេត្ត​​​នេះ​​​កាល​​​ពី​​​សប្តាហ៍​​​មុន ជន​​​ជាតិ​​​ដើម​​​ភាគ​​​តិច​​​ចារ៉ាយ​​​ បាន​​​បដិសេធ​​​​​​​​​ការ​​​ផ្តល់​​​ជំនួយ​​​ពី​​​សំណាក់​​​គណៈប្រតិភូ​​​របស់​​​អង្គការ​​​សហប្រជា​​​ជាតិ​​​ ដែល​​​ចង់​​​ជួយ​​​ផ្លាស់​​​ទីតាំង​​​របស់​​​ជន​​​ជាតិ​​​ភាគ​​​តិច​​​ម៉ុងតាញ៉ា​​​ ដោយ​​​ខ្លាច​​​ក្រែង​​​ថា​​​ប្រតិបត្តិការ​​​នេះ​​​ដែល​​​មិន​​​មាន​​​ការ​​​អនុញ្ញាត​​​ពី​​​រដ្ឋាភិបាល​​​​​​អាច​​​ធ្វើ​​​ឲ្យ​​​ប៉ះពាល់​​​ដល់​​​សុវត្ថិភាព​​​របស់​​​ក្រុម​​​ជនជាតិ​​​ភាគ​​​តិច​​​នេះ។

អ្នក​​​ភូមិ​​​ជន​​​ជាត​​​ិ​​​ដើម​​​ភាគ​​​តិច​​​ចារ៉ាយ​​​ម្នាក់​​​ដែល​​​ជួយ​​​មើល​​​​​​ថែ​​​ទាំ​​​ជន​​​ជាតិ​​​ភាគ​​​តិច​​​ម៉ុងតាញ៉ា និង​​​ដែល​​​ស្នើ​​​សុំ​​​លាក់​​​អត្ត​​​សញ្ញាណ​​​ ព្រោះ​​​ខ្លាច​​​ក្រែង​​​មាន​​​ការ​​​ធ្វើ​​​ទុក្ខ​​​បុក​​​ម្នេញ​​​បាន​​​លើក​​​ឡើង​​​កាល​​​ពី​​​ម្សិលមិញ​​​ថា អង្គការ​​​អាដហុក​​​បាន​​​ជូន​​​ដំណឹង​​​ដល់​​​គាត់​​​ថា តំណាង​​​អង្គការ​​​សហ​​​ប្រជា​​​ជាតិ​​​កំពុង​​​ត្រឡប់​​​ទៅ​​​តំបន់​​​នោះ​​​វិញ​​​ហើយ​​​។

អ្នក​​​ភូមិ​​​រូប​​​នេះ​​​បាន​​​លើក​​​ឡើង​​​ទៀត​​​​​​ថា ក្រុម​​​ជន​​​ជាតិ​​​ដើម​​​ភាគ​​​តិច​​​​​​ចារ៉ាយ នឹង​​​រង់​​​ចាំ​​​រហូត​​​ដល់​​​មាន​​​ការ​​​ចរចា​​​គ្នា​​​រវាង​​​អង្គការ​​​សហ​​​ប្រជា​​​ជាតិ ក្រសួង​​​មហាផ្ទៃ និង​​​មន្ត្រី​​​ខេត្ត​​​​​​​​​ មុន​​​ពេល​​​សម្រេច​​​ថា តើ​​​ត្រូវ​​​​​​ជូន​​​គណៈ​​​ប្រតិភូ​​​ទៅ​​​ជួប​​​ជន​​​ជាតិ​​​ភាគ​​​តិច​​​ម៉ុងតាញ៉ា ឬ​​​ក៏​​​អត់​​​។

អ្នក​​​ភូមិ​​​ជន​​​ជាតិ​​​ដើម​​​ភាគតិច​​​ចារ៉ាយ​​​រូប​​​នេះ​​​បាន​​​និយាយ​​​ថា “ខ្ញុំ​​​ទទួល​​​​​​បាន​​​ដំណឹង​​​ថា អង្គការ​​​សហ​​​ប្រជា​​ជាតិ​​​កំពុង​​​ត្រឡប់​​​ម​​​ក​​​វិញ ប៉ុន្តែ យើង​​​ត្រូវ​​​រង់​​​ចាំ​​​រហូត​​​ដល់​​​​​​មាន​​​កិច្ច​​​ប្រជុំ​​​​​​ជា​​​មុន​​​សិន មុន​​​ពេល​​​សម្រេច​​​ថា តើ​​​ត្រូវ​​​នាំ​​​ពួក​​​គេ​​​ទៅ​​​ជួប​​​ជាមួយ​​​​​​ក្រុម​​​ជន​​​ជាតិ​​​ភាគ​​​តិច​​​នេះ​​​ ឬក៏អត់”៕ស៊ុយ​​​ឈាង​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស