មន្ត្រីបាននិយាយកាលពីម្សិលមិញថា មេបញ្ជាការរងនៃកងយោធពលខេមរភូមិន្ទមួយរូប ត្រូវបានចាប់ខ្លួនកាលពីថ្ងៃពុធនៅគេហដ្ឋានរបស់គាត់ក្នុងក្រុងកំពត តាមការសង្ស័យពីបទលក់ឈើប្រណីតខុសច្បាប់ ដែលគាត់រឹបអូសបានអំឡុងពេលឆ្មក់បង្ក្រាបគ្មានការអនុញ្ញាតលើឈ្មួញឈើខុសច្បាប់។
វរសេនីយ៍ឯក ទិត្យ គឹមសេង មេបញ្ជាការរងតំបន់ប្រតិបត្តិការសឹករងខេត្តកំពត ត្រូវបានចាប់ខ្លួននៅវេលាម៉ោង១២និង៣០នាទីថ្ងៃត្រង់នៅឯគេហដ្ឋានរបស់គាត់ក្នុងសង្កាត់អណ្ដូងខ្មែរ នេះបើយោងតាមការលើកឡើងរបស់លោក ខាន់ សុផល ព្រះរាជអាជ្ញារងអមសាលាដំបូងខេត្តកំពត ដែលបានដឹកនាំការស៊ើបអង្កេតលើមេបញ្ជាការរងរូបនេះ អមដោយរដ្ឋបាលព្រៃឈើខេត្ត និងមន្ត្រីកងរាជអាវុធហត្ថ។
លោកបានមានប្រសាសន៍ថា “យើងបានចាប់ខ្លួនគាត់កាលពីម្សិលមិញតាមការសង្ស័យពីបទរឹបអូសឈើពីឈ្មួញដែលគាត់បានរក្សាទុកនៅផ្ទះរបស់គាត់ ហើយបន្ទាប់មកលក់បន្តឲ្យទៅឈ្មួញផ្សេងៗទៀត ដោយមិនរាយការណ៍ពីសកម្មភាពរបស់ខ្លួនប្រាប់ព្រះរាជអាជ្ញា ឬអាជ្ញាធរថ្នាក់លើផ្សេងទៀត”។
លោក ខាន់ សុផល បានមានប្រសាសន៍ថា មន្ត្រីកងយោធពលខេមរភូមិន្ទរូបនេះត្រូវបានសាកសួរកាលពីម្សិលមិញ ហើយបានឲ្យដឹងថា ដោយសារតែពេលនេះសមត្ថកិច្ចកំពុងស៊ើបអង្កេត លោកមិនអាចលាតត្រដាងថា ឈើខុសច្បាប់ដែលវរសេនីយ៍ឯក ទិត្យ គឹមសេង រឹបអូសបានមានចំនួនប៉ុន្មាន ឬឈើដែលគាត់បានលក់មានតម្លៃប៉ុន្មានបានទេ។ លោកមានប្រសាសន៍ទៀតថា “យើងបានចាត់វិធានការបន្ទាប់ពីទទួលបានការរាយការណ៍ពីប្រជាពលរដ្ឋក្នុងមូលដ្ឋានថា គាត់ជាប់ពាក់ព័ន្ធនឹងការជួញដូរឈើ ប៉ុន្តែយើងកំពុងស៊ើបអង្កេតករណីនេះនៅឡើយ”។
លោកបានលើកឡើងបន្តថា ការឆែកឆេរគេហដ្ឋានរបស់លោក ទិត្យ គឹមសេង បានរកឃើញឈើប្រណីតលេខ១ចំនួនពីរប្រភេទដូចជា ឈើដួងចែម និងធ្នង់ចំនួន២៦សន្លឹក ដែលក្នុងមួយប្រភេទៗមានចំនួនសរុបប្រហែល០,៦២៨ម៉ែត្រគូប ដែលគេជឿថា គាត់រឹបអូសបាននៅក្នុងការឆ្មក់បង្ក្រាបក្រៅផ្លូវការមួយក្នុងស្រុកទឹកឈូរ។
លោកមានប្រសាសន៍ថា “យើងរកឃើញឈើមិនច្រើនទេនៅផ្ទះរបស់គាត់ ប៉ុន្តែរឿងនោះមិនសំខាន់ទេ។ អ្វីដែលសំខាន់គឺថា តើឈើទាំងនោះមានប្រភពចេញពីណា ហើយគាត់មានបំណងយកឈើទាំងនោះទៅធ្វើអ្វី”។ លោកបានលើកឡើងបន្តថា លោក ទិត្យ គឹមសេង នឹងត្រូវបញ្ជូនខ្លួនទៅកាន់សាលាដំបូងខេត្តដើម្បីធ្វើការសាកសួរ។
កាលពីម្សិលមិញ លោក អ៊ុង វណ្ណរិទ្ធ មេបញ្ជាការតំបន់ប្រតិបត្តិការសឹករងខេត្តកំពត បានបដិសេធមិនឆ្លើយបំភ្លឺជុំវិញការចាប់ខ្លួនមេបញ្ជាការរងរបស់លោកទេ ចំណែកឯលោក ធុក ប៊ុនថន នាយសេនាធិការនៃកងយោធពលខេមរភូមិន្ទប្រចាំខេត្តនេះវិញ បានមានប្រសាសន៍ថា លោកមិនដឹងច្បាស់ពីករណីនេះទេ ដូច្នេះហើយលោកមិនអាចឆ្លើយបំភ្លឺបានឡើយ៕ សុខុម