28 C
Phnom Penh

អង្គការ​ WWF ធ្វើ​ពហិការ​មិនចូល​រួម​​ការ​ពិគ្រោះ​យោបល់​ទាក់​ទិន​ទំនប់​វារីអគ្គិសនី​ដន​សាហុង

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ អង្គការ​ World Wildlife Fund (WWF) បាន​លើក​ឡើង​ថា ខ្លួន​នឹង​ធ្វើ​ពហិការ​​មិន​ចូល​រួម​នៅ​ក្នុង​ការ​ពិគ្រោះយោបល់​ជា​សាធារណៈ​ក្នុង​តំបន់​​ដែល​គ្រោង​ធ្វើ​ឡើង​នៅ​ថ្ងៃ​នេះ​ពាក់​ព័ន្ធ​នឹង​ទំនប់​វារីអគ្គិសនី​ដនសាហុង ដ៏​ចម្រូង​ចម្រាស​របស់​​ប្រទេស​ឡាវ​ ដោយ​ចោទ​ប្រកាន់​អ្នក​ដែល​នៅ​ពីក្រោយ​គម្រោង​នេះ​ថា មិន​គិត​គូរ​ពី​ផល​ប៉ះពាល់​ដ៏​ធំធេង​​លើ​សហគមន៍​ មច្ឆជាតិ​ និង​ផ្សោតទឹក​សាប ដែល​ជិត​ផុតពូជ​របស់​ប្រទេស​កម្ពុជា​។

បន្ទាប់ពី​មាន​ការ​រិះគន់​ពី​សកម្មជន​ការ​ពារ​បរិស្ថាន​អស់​ជា​ច្រើន​ខែ​មក ​រដ្ឋាភិបាល​ឡាវ​​បាន​យល់​ព្រម​ផ្អាក​ការ​សាង​សង់​ទំនប់​នេះ​កាលពី​ខែ​មិថុនា រហូត​ដល់​ការ​ពិភាក្សា​ពិគ្រោះ​យោបល់​គ្នា​រយៈ​ពេល​៦​ខែ​ជាមួយ​ប្រទេស​ជិត​ខាង​ខ្លួន​ត្រូវ​បាន​បញ្ចប់​​ជាមុន​សិន​។ ទំបន់​វារីអគ្គិសនី​នេះ​ត្រូវ​បាន​រិះគន់​ថា សាង​សង់​​​កាត់​ទន្លេ​មេគង្គ ដោយ​មាន​ចម្ងាយ​ត្រឹម​តែ​២គីឡូម៉ែត្រ​​​បុ៉ុណ្ណោះ​ពី​ព្រំដែន​កម្ពុជា​។

អង្គការ​ WWF បាន​ស្វាគមន៍​​ចំពោះ​សេចក្ដី​សម្រេច​នេះ​នៅ​ពេល​នោះ ប៉ុន្តែ​​​កាលពី​ម្សិល​មិញ អង្គការ​នេះ​បាន​លើក​ឡើង​ថា ដំណើរ​ការ​ពិភាក្សា​ពិគ្រោះ​យោបល់​នេះ​បរាជ័យ​ ហើយ​បាន​ប្រកាស​ថា ខ្លួន​នឹង​មិន​ចូល​រួម​ក្នុង​កិច្ច​ប្រជុំ​ដែល​នឹង​ធ្វើ​ឡើង​នៅ​ក្នុង​ថ្ងៃ​នេះ ក្នុង​ក្រុង​​បា៉ក់សេ​ ប្រទេស​ឡាវ​ នេះ​ឡើយ​។ កិច្ច​ប្រជុំ​នេះ​ត្រូវ​បាន​រៀបចំ​ដោយ​គណៈកម្មការ​ទន្លេមេគង្គ​ ជា​ស្ថាប័ន​អន្តរ​រដ្ឋាភិបាល​​ ដែល​មាន​តំណាង​ពី​ប្រទេស​កម្ពុជា​ ឡាវ ថៃ និង​ប្រទេស​វៀតណាម​​ជា​សមាជិក​។

លោក​ ទៀក សេង ប្រធាន​​ផ្នែកអភិរក្ស​​មហា​​អនុតំបន់​មេគង្គ​របស់​អង្គការ​ WWF បាន​លើក​ឡើង​នៅ​ក្នុង​សេចក្ដី​ថ្លែង​ការណ៍​មួយ​ថា ” ដោយ​សារ​គ្មាន​ការ​បញ្ជាក់​ច្បាស់​លាស់​ពី​គណៈកម្មការ​ទន្លេ​មេគង្គ​អំពី​ទំហំ និង​លទ្ធផល​ដែលគេ​រំពឹង​ទុក​ពាក់​ព័ន្ធ​នឹង​ដំណើរ​ការ​​ពិគ្រោះ​យោបល់​ ហើយ​ដោយ​សារ​ការ​ចង្អុល​បង្ហាញ​​ទាំង​អស់​បញ្ជាក់​ថា ទំនប់​វារីអគ្គិសនី​នេះ​នៅ​តែ​ត្រូវ​បាន​សាង​សង់​ដដែល​នោះ យើង​​​មើល​ឃើញ​ថា ការ​ចូល​រួម​​​នៅ​ក្នុង​ការ​ពិភាក្សា​ពិគ្រោះយោបល់​នេះ​មិន​សូវ​ជា​មាន​​អត្ថប្រយោជន៍​អ្វី​ឡើយ​”៕ ស៊ុយឈាង​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស