28.4 C
Phnom Penh

កូនប្រុស​របស់​លោក ហ៊ុន សែន ​រិះគន់​ពលរដ្ឋខ្មែរ​ដែល​នាំ​គ្នា​ធ្វើ​ការ​តវ៉ា​នៅ​កូរ៉េ​ខាង​ត្បូង​

ដោយ ឌឹ ខេមបូឌា ដេលី

បទវិភាគ

នៅ​ក្នុង​វីដេអូឃ្លីប​ដែល​ចែក​រំលែក​យ៉ាង​សុសសាយ​តាម​រយៈ​បណ្ដាញ​ទំនាក់​ទំនង​សង្គម​កាលពី​ចុង​សប្ដាហ៍ លោក​ ហ៊ុន ម៉ាណែត កូន​ប្រុស​ច្បង​របស់​លោក​នាយក​រដ្ឋមន្ត្រី ហ៊ុន សែន ​បានអំពាវ​នាវ​ឲ្យ​ពលរដ្ឋ​ខ្មែរ​​ដែល​រស់​នៅ​ក្នុង​ប្រទេស​កូរ៉េ​កុំ​នាំគ្នា​តវ៉ា​ប្រឆាំង​​គណបក្ស​ប្រជា​ជន​កម្ពុជា​ ហើយ​​សូម​ដឹង​គុណ​ដល់​រដ្ឋាភិបាល​របស់​ឪពុក​លោក​វិញ ដែល​​បាន​បង្កើត​ទំនាក់​ទំនង​សាជាថ្មី​ជាមួយ​ប្រទេស​ដែល​មាន​សេដ្ឋកិច្ច​លូតលាស់​មួយ​នេះ។

លោក​ ហ៊ុន ម៉ាណែត ដែល​បាន​ធ្វើ​ដំណើរ​ទៅ​កូរ៉េ​ខាង​ត្បូង​ជាមួយ​ឪពុក​របស់​លោក ដើម្បី​ចូល​រួម​​កិច្ច​ប្រជុំ​កំពូល​រំឭក​ខួប​នៃ​ចំណង​មិត្តភាព​រវាង​អាស៊ាន និង​សាធារណរដ្ឋ​កូរ៉េ​ឆ្នាំ​២០១៤ បាន​ថ្លែង​​អំឡុង​​ពិធី​ជប់លៀង​អាហារ​ពេល​ល្ងាច​ជាមួយ​មន្ត្រី​​ ពលករ​ និង​និស្សិត​​កម្ពុជា​មួយ​ក្រុម​​​កាល​ពី​យប់​ថ្ងៃ​សុក្រ​​។

លោក​បាន​រិះគន់​​ពលករ​​ខ្មែរ​​ចំណាក​ស្រុក​មួយ​ក្រុម​តូច ដែល​ចេញ​មក​តវ៉ា​ប្រឆាំង​រដ្ឋាភិបាល​​របស់​លោក ហ៊ុន សែន នៅ​ក្នុង​ទីក្រុង​សេអ៊ូល​កាលពី​ថ្ងៃ​ទី​៧ ខែ​ធ្នូ ដោយ​លើក​ឡើង​ថា ពួកគេ​មិន​គួរ​​មាន​ការ​សរសើរ​នោះ​ទេ។

លោក​ ហ៊ុន ម៉ាណែត បាន​មាន​ប្រសាសន៍​ដោយ​សំដៅ​ដល់​សង្គ្រាម​ស៊ីវិល​រាប់​ទសវត្សរ៍​នៅ​ក្នុង​ប្រទេស​កម្ពុជា​ថា​ “ប្រសិន​បើ​យើង​គ្មាន​សន្តិភាព និង​ស្ថិរភាព​ទេ​នោះ វា​នឹង​គ្មាន​ភាព​ចម្រុង​ចម្រើន​ ឬ​ក៏​ទំនាក់​ទំនង​សាជាថ្មី​ជាមួយ​កូរ៉េ​ឡើយ​ ព្រោះ​ប្រវត្តិ​របស់​យើង​ជាមួយ​កូរ៉េ​ខាង​ត្បូង​ត្រូវ​បាន​កាត់​ផ្ដាច់​មុន​សង្គ្រាម​”។

លោក​ ហ៊ុន ម៉ាណែត បាន​ប្រាប់​ទៅ​កាន់​ពិធី​ជប់លៀង​អំឡុង​ពេល​ល្ងាច​នោះ​ថា “តើ​អ្នក​ដឹង​ទេថា នរណា​ជា​អ្នក​ផ្សារភ្ជាប់​ទំនាក់​ទំនង​នេះ​ឡើង​វិញ? គឺ​សម្ដេច​ [ហ៊ុន សែន​] នៅ​ក្នុង​ឆ្នាំ​១៩៩៦​។ ទំនាក់​ទំនង​ដំបូង​របស់​យើង គឺ​មាន​តែ​ជាមួយ​កូរ៉េ​ខាង​ជើង​ប៉ុណ្ណោះ”។

លោក ហ៊ុន ម៉ាណែត បាន​ពន្យល់​ថា ​ការ​បង្កើត​ទំនាក់​ទំនង​ឡើង​វិញ​ជាមួយ​កូរ៉េ​ខាង​ត្បូង​បាន​កើត​ឡើង​ទោះបីជា​មាន​ការ​ប្រឆាំង​ពី​​គណបក្ស​​រាជានិយម​ហ្វុ៊នស៊ិនប៉ិច​របស់​​ព្រះអង្គ​ម្ចាស់​ នរោត្តម រណឫទ្ធិ ​នាយក​រដ្ឋមន្ត្រី​ទី១​នៅ​ពេល​នោះ​ក៏​ដោយ​។ គណបក្ស​​រាជានិយម​ហ្វុ៊នស៊ិនប៉ិច​ បាន​ដឹក​នាំ​រដ្ឋាភិបាល​ចម្រុះ​នៅ​ពេល​នោះ​។

លោក​ ហ៊ុន ម៉ាណែត បាន​មាន​ប្រសាសន៍​បន្ថែម​ទៀត​ថា “នៅ​ពេល​យើង​កសាង​ទំនាក់​ទំនង​នេះ​ក្នុង​ឆ្នាំ​១៩៩៦​ មាន​ការ​ប្រឆាំង​​នៅ​​ក្នុង​រដ្ឋាភិបាល​របស់​យើង​ គឺ​មាន​ន័យ​ថា គេ​មិន​ចង់​កសាង​ទំនាក់​ទំនង​នេះ​ឡើយ​។ ប៉ុន្តែ​សម្ដេច​ [ហ៊ុន​ សែន​] បាន​តស៊ូ​ដើម្បី​​​កសាង​វា​ឡើង​រហូត​ដល់​មាន​ទំនាក់​ទំនង​កាន់​តែ​ខ្លាំង​ឡើងៗ​។ តាម​រយៈ​ទំនាក់​ទំនង​ដែល​កាន់​តែ​កើន​ឡើងៗ​​នេះ យើង​បាន​ចរចា​ដើម្បី​បង្កើត​ឲ្យ​មាន​ឱកាស​ដែល​អាច​នាំ​ពល​រដ្ឋ​របស់​យើង​ឲ្យ​មក​ធ្វើ​ការ និង​រៀន​សូត្រ​នៅ​​ទីនេះ​។ នេះ​គឺ​ជារឿង​វិជ្ជមាន​មួយ​”។

យោង​តាម​ការ​ប៉ាន់​ប្រមាណ​​កាលពី​ឆ្នាំ​មុន ដោយ​មជ្ឈមណ្ឌល​អប់រំ​ច្បាស់​សម្រាប់​សហ​គមន៍​​បាន​ឲ្យ​ដឹង​ថា បច្ចុប្បន្ន​ពលរដ្ឋ​ខ្មែរ​​ប្រហែល​៣០.០០០​នាក់​​កំពុង​ធ្វើ​ការ​នៅ​ក្នុង​ប្រទេស​កូរ៉េ​ខាង​ត្បូង​ ដោយ​ធ្វើ​ឲ្យ​​​ប្រទេស​នេះ​ក្លាយ​ជា​​កន្លែង​​​ផ្ដល់​​ការ​សម្រាប់​ពលករ​​​ខ្មែរ​ចំណាក​ស្រុក​​​​បន្ទាប់ពី​​​ប្រទេស​ម៉ាឡេស៊ី និង​ប្រទេស​ថៃ​​។

ទោះបី​ជា​លោក ហ៊ុន ម៉ាណែត បាន​អះអាង​យា៉ង​ដូច្នេះ​ក្ដី តែ​ការ​បង្កើត​ទំនាក់​ទំនង​​ឡើង​វិញ​ជាមួយ​កូរ៉េ​ខាង​ត្បូង​​​កាលពី​ខែ​ឧសភា​ ឆ្នាំ​១៩៩៦​ ​បី​ឆ្នាំ​ក្រោយ​ពី​ការ​បោះ​ឆ្នោត​ដែល​រៀបចំ​ឡើង​ដោយ​អង្គការ​សហប្រជា​ជាតិ​នោះ គឺ​ទទួល​បាន​ការ​គាំទ្រ​ពី​​​លោក​ ហ៊ុន សែន និង​ព្រះអង្គម្ចាស់​ នរោត្តម រណឫទ្ធិ ដែល​ជា​សហនាយក​រដ្ឋមន្ត្រី​​ដោយ​មាន​ការ​ដឹង​ឮ​ពី​សាធារណជន​។

ប៉ុន្តែ​​​សម្ដេច​ឪ​ នរោត្តម សីហនុ ព្រះបិតា​របស់​ព្រះអង្គម្ចាស់​​ នរោត្តម រណឫទ្ធិ ដែល​ជា​​មិត្ត​យ៉ាង​ជិតស្និទ្ធ​ជាមួយ លោក គីម អុីលស៊ុង ​​​អតីត​មេដឹកនាំ​ផ្ដាច់​ការ​របស់​កូរ៉េ​ខាង​ជើង​​ និង​ដែល​ប្រឆាំង​យ៉ាង​ដាច់​អហង្ការ​មិន​ឲ្យ​ទទួល​ស្គាល់​កូរ៉េ​ខាង​ត្បូង​នោះ​​ បាន​ប្ដេជ្ញា​ថា មិន​​​ឲ្យ​ប្រទេស​កម្ពុជា​ទទួល​ស្គាល់​ប្រទេស​នេះ​ឡើយ​។

លោក ហ៊ុន ម៉ាណែត ​បាន​ថ្លែង​នៅ​ក្នុង​​ពិធី​​ជប់​លៀង​អាហារ​ពេល​ល្ងាច​កាលពី​យប់​ថ្ងៃ​សុក្រ​នោះ​ថា ពលរដ្ឋខ្មែរ​ដែល​នាំគ្នា​តវ៉ា​នៅ​ក្នុង​ប្រទេស​កូរ៉េ​ខាង​ត្បូង​កាលពី​ថ្ងៃ​ទី​៧ ខែ​ធ្នូ ដោយអំពាវ​នាវ​សុំ​​ឲ្យ​មាន​ការ​ដោះ​លែង​សកម្មជន​នយោបាយ​ និង​​សង្គម​​ជាង​១០​នាក់​ ដែល​កំពុង​ជាប់​ពន្ធនាគារនោះ​​ មិន​បាន​លើក​សរសើរ​ដល់​ការ​តស៊ូ​របស់​គណបក្ស​ប្រជា​ជន​កម្ពុជា​ ដែល​នាំ​ឲ្យ​មាន​ការ​បង្កើត​ទំនាក់​ទំនង​ឡើង​វិញ​ជាមួយ​​ប្រទេស​ដែល​ពួកគេ​កំពុង​ធ្វើ​ការ​នេះ​ឡើយ​។

លោក​បាន​មាន​ប្រសាសន៍​ដោយ​ចោទ​ប្រកាន់​​អ្នក​តវ៉ា​​ដែល​ជា​ពលករ​ខ្មែរ​ចំណាក​ស្រុក​ថា​លាក់​ពុត​នោះ​ថា “ពួកគេ​ចាំ​តែ​ចាប់​កំហុស​​ត្រង់​ចំណុច​ខ្សោយ​របស់​យើង ​​ចំណុច​ខ្លះ​យើង​​ទទួល​ស្គាល់ តែ​ចំណុចខ្លះ​ទៀត​​មិន​សមហេតុ​សម​ផល​​ទេ​។ ពួកគេ​និយាយ​ថា ជន​អន្តោប្រវេសន៍​​វៀតណាម​​​ខុស​ច្បាប់​ត្រូវ​តែ​ចាប់​ខ្លួន ហើយ​បញ្ជូន​ទៅ​ប្រទេស​វៀតណាម​វិញ ប៉ុន្តែ​ស្របពេល​នោះ​ដែរ​ ពួក​គេ​មួយ​ចំនួន​​បាន​ស្នើ​កូរ៉េ​កុំ​ឲ្យ​ចាប់​​បញ្ជូន​​​ពួកគេ​​ត្រឡប់​មក​វិញអី​”។

លោក ហ៊ុន ម៉ាណែត ក៏​បាន​ការ​ពារ​​ចំពោះ​ការ​ចាប់​ខ្លួន​សកម្មជន​ក្នុង​ពេល​ថ្មី​​ៗ​នេះ​ដែរ​ ដែល​រួម​មាន​ទាំង​លោក មាជ សុវណ្ណរ៉ា មន្ត្រី​​របស់​គណបក្ស​​សង្គ្រោះ​ជាតិ​ផង​នោះ​ ហើយ​ថា អាជ្ញាធរ​កម្ពុជា​​គឺ​មាន​ការ​អត់ឱន​ជាង​អាជ្ញាធរ​ក្នុង​ប្រទេស​កូរ៉េ​ខាង​ត្បូង​ទៅ​ទៀត​។

លោក ហ៊ុន ម៉ាណែត បាន​មាន​​ប្រសាសន៍​ថា “មនុស្ស​មួយ​ចំនួន​បាន​​ផ្សព្វ​ផ្សាយ​ព័ត៌មាន​អំពី​ការ​ចាប់​ខ្លួន​លោក មាជ សុវណ្ណរ៉ា និង​អ្នក​តវ៉ា។ តាម​ពិត​ទៅ​ ប្រសិន​បើ​យើង​តាម​ដាន​រឿង​នេះ គឺ​​ពួកគេ​បាន​ធ្វើ​សកម្មភាព​អស់​​រយៈ​ពេល​ជាង​១ឆ្នាំ​មក​ហើយ​ ហើយ​យើង​មិន​បានធ្វើ​អ្វី​​លើ​ពួកគេ​ [ជា​ការ​ឆ្លើយ​តប​] នោះ​ទេ​”។ លោក​បាន​មាន​ប្រសាសន៍​បន្ត​ថា​ “ប្រសិន​បើ​ពួកគេ​ព្យាយាម​ទៅ​ធ្វើ​រឿង​នេះនៅ​ក្នុង​ប្រទេស​កូរ៉េ​ដោយ​​គ្មាន​ការ​អនុញ្ញាត​វិញ​នោះ ​​ពួកគេ​នឹង​ត្រូវ​បាន​ចាប់​ដាក់​ខ្នោះ ហើយ​បញ្ជូន​ចូលរថយន្ត​”៕ ស៊ុយឈាង​ ​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស