34 C
Phnom Penh

ត​ុលាការជំនុំ​ជម្រះ​រឿង​ក្តី​បុរស​ម្នាក់​ជាប់​ចោទ​ពី​បទ​សម្លាប់​ ក្មេងស្រី​អាយុ​១៣​ឆ្នាំ​ប្លន់​យក​ក្រវិល

ដោយ ឌឹ ខេមបូឌា ដេលី

បទវិភាគ

កាល​ពី​​ម្សិល​មិញ​ សាលា​ដំបូង​រាជ​ធានី​ភ្នំពេញ​បាន​បើក​សវនាការ​​ជំនុំជម្រះ​រឿងក្ដី​បុរស​ម្នាក់​ ដែល​ជាប់​ចោទ​ពី​សម្លាប់​ក្មេងស្រី​អាយុ​១៣​ឆ្នាំ​ម្នាក់នៅ​ក្នុង​ខណ្ឌ​ពោធិ៍សែនជ័យ កាលពី​ឆ្នាំ​មុន​ ដើម្បី​ប្លន់​យក​ក្រវិល​មាស​មួយ​គូ​តម្លៃ​​ប្រហែល​៥៦​ដុល្លារ​។

ជនសង្ស័យ​ឈ្មោះ ខុម បូរ៉ា អាយុ​២៤​ឆ្នាំ​ បដិសេធ​ថា ខ្លួន​មិន​បាន​សម្លាប់​ក្មេងស្រី​ឈ្មោះ កង បទុមវតី ​ ទេ ដោយ​និយាយ​ថា ​ខ្លួន​គ្រាន់​តែ​បាន​ជួយ​មិត្ត​ភក្ដិ​ម្នាក់​ក្នុង​ការ​​សម្លាប់​តែ​ប៉ុណ្ណោះ​ ដែល​បាន​កើត​ឡើង​កាលពី​ខែ​ធ្នូ​ ឆ្នាំ​២០១៣​។

បូរ៉ា បាន​និយាយ​ថា មិត្ត​ភក្ដិ​របស់​ខ្លួន​ដែល​កំពុង​រត់គេច​ខ្លួននៅ​ឡើយ​​ គឺ​ជា​មនុស្ស​ភេទ​ទី៣ ហើយ​ជា​អ្នក​ប្រើ​ប្រាស់​ថ្នាំញៀន​ដែលគេ​ស្គាល់ថា ឈ្មោះ ស្រី នាង។ បូរ៉ា​ ក៏​បាន​ប្រាប់​តុលាការ​ផង​ដែរ​ថា ខ្លួន​ក៏ជា​មនុស្សភេទ​ទី៣​ដែរ។ បូរ៉ា បាន​និយាយ​ថា ​ពីរ​ថ្ងៃ​​មុន​ការ​សម្លាប់​ បុរស​ទាំង​ពីរ​នាក់​នេះ​​បាន​រៀប​គម្រោង​​សម្លាប់​កង​ បទុមវតី ដើម្បី​ប្លន់​យក​​ក្រវិល​​​របស់​នាង​ទៅ​លក់​​ដែល​មាន​តម្លៃ​ប្រហែល​៥៦​ដុល្លារ។

ជន​នេះ​បាន​និយាយ​ថា “មិត្ត​ភក្ដិ​របស់​ខ្ញុំ​​​បាន​សុំ​ឲ្យ​ខ្ញុំ​ល្បួង​ក្មេងស្រី​រូប​នេះ​ទៅ​មើល​ការ​​ប្រណាំង​រថយន្ត​ហ្គោខាត (go-kart) ដើម្បី​សម្លាប់​នាង​។ យើង​បាន​នាំ​នាង​ទៅ​ព្រៃ​មួយ​​ចម្ងាយ​ប្រហែល​​៣០​ម៉ែត្រ​ពី​កន្លែង​ប្រណាំង​រថយន្ត​នោះ​”។

ជន​នេះ​បាន​និយាយ​ថា ពេល​នោះ​​ ស្រី នាង បាន​ច្របាច់​កក្មេងស្រី​នោះ ដោយ​ពាក់​ស្រោម​ដៃ​ពណ៌​ខ្មៅ​ដើម្បី​កុំ​ឲ្យ​ឃើញ​ក្រយៅ​ដៃ​របស់​ខ្លួន​នៅ​លើ​រាង​កាយ​របស់​ក្មេង​ស្រី​។

បូរា៉ា បាន​ប្រាប់​តុលាការ​ថា “ខ្ញុំ​មិន​មែន​ជា​ឃាតករ​ទេ។ ខ្ញុំ​គ្រាន់​តែ​ជួយ​ចាប់​នាង​តែ​ប៉ុណ្ណោះ។ មិត្ត​ភក្ដិ​របស់​ខ្ញុំ​គឺ​ជា​អ្នក​សម្លាប់​”។ ជន​នេះបាន​បន្ថែមថា “ខ្ញុំ​បាន​ខ្ទប់​មាត់​​ដើម្បី​កុំ​ឲ្យ​នាង​ស្រែក​”។

ទាំង​លោក​ មាស​ ច័ន្ទ​ពិសិដ្ឋ ព្រះរាជ​អាជ្ញាអម​សាលា​ដំបូង​រាជ​ធានី និង​លោកស្រី សន ស៊ូដាឡែន មេធាវី​តំណាង​ជនរងគ្រោះ​​បាន​សុំ​ឲ្យ​​ផ្ដន្ទាទោស​ បូរ៉ា ពីបទ​មនុស្ស​ឃាត​ដោយ​គិត​ទុក​ជា​មុន​។ លោកស្រី ស៊ូដាឡែន បាន​មាន​ប្រសាសន៍​ថា “វា​ជា​ករណី​​ឃោរឃៅ​បំផុត​ គ្រាន់​តែ​ក្រវិល​មាស​ទម្ងន់​៤ហ៊ុន​តែប៉ុណ្ណោះ​ ឈាន​ដល់​ការ​សម្លាប់”។

លោក​ គឹម យ៉ាន អាយុ​៥៧​ឆ្នាំ ជា​ឪពុក​របស់​ក្មេងស្រី​រងគ្រោះ​បាន​និយាយ​នៅ​ខាង​ក្រៅ​តុលាការ​ថា ​លោក​ស្វែង​រក​សំណង​ជាប្រាក់​ចំនួន​​៨.០០០​ដុល្លារ​ ហើយ​ឲ្យ​ផ្តន្ទាទោស​ បូរ៉ា ដាក់​ពន្ធនា​គារ។

លោក​ យ៉ាន បាន​និយាយ​ថា បន្ទាប់ពី​សព​កូនស្រី​របស់​លោក​ត្រូវ​បាន​គេ​ប្រទះ​ឃើញ​នៅ​ក្នុង​ប្រឡាយ​ទឹក​មួយ​នៅ​ក្នុង​សង្កាត់​កំបូល ដោយមាន​អាវ​ញាត់​​មាត់​របស់​នាងនោះ អ្នក​ជិត​ខាង​​​​​​បាន​ប្រាប់​លោក​ថា ក្មេង​ស្រី​នេះ​បាន​ដើរ​ចេញជាមួយ​ បូរ៉ា បន្ទាប់មក​លោក​បាន​តាម​ដាន បូរ៉ា ដោយ​ខ្លួន​ឯង ហើយ​ប្រជា​ពលរដ្ឋ​បាន​ចាប់​​ខ្លួន​ប្រគល់​ឲ្យ​នគរ​បាល​។

លោក ផាន់ ពឿន នាយ​ប៉ុស្តិ៍​សង្កាត់​បានមាន​ប្រសាសន៍​ថា មន្ត្រី​របស់​លោក​កំពុង​ស៊ើប​អង្កេត​ករណី​នេះនៅឡើយ ហើយ​សង្ស័យ​ថា ស្រី នាង បាន​រត់​គេច​ខ្លួន​ទៅ​ខេត្ត​កំពត ជា​ស្រុក​កំណើត​របស់​ខ្លួន​។

នៅ​ពេល​ត្រូវ​បាន​សួរ​ថា តើ​នគរ​បាល​រាជ​ធានី​ភ្នំពេញ​​បាន​សហការ​ជាមួយ​អាជ្ញាធរ​​​ខេត្ត​កំពត​ ដើម្បី​​​តាម​ដាន​ ស្រី នាង ឬយ៉ាង​ណា​នោះ​ លោក​បាន​មាន​ប្រសាសន៍​ថា “ភារកិច្ចរបស់​ខ្ញុំ​មាន​ដែន​កំណត់តែ​នៅ​ក្នុង​សង្កាត់​របស់​ខ្ញុំ​ប៉ុណ្ណោះ​”។ លោក លាង សំណាត ចៅក្រម​ប្រធាន​ក្រុម​ប្រឹក្សា​ជំនុំជម្រះ​គ្រោង​ប្រកាស​សាល​ក្រម​រឿង​ក្ដី​ បូរ៉ា នៅ​ថ្ងៃ​ទី​៦ ​ខែ​មករា៕ សារុន​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស