29 C
Phnom Penh

ម្ដាយ​ចុង​​សារភាព​ថា ខ្លួន​បាន​វាយ​ដំ​កូនចុង​យ៉ាង​ព្រៃផ្សៃ​រហូត​ដល់​ស្លាប់​

ដោយ ឌឹ ខេមបូឌា ដេលី

បទវិភាគ

នគរ​បាល​​​​បាន​និយាយ​ថា ​​កាលពីម្សិលមិញ​ស្ត្រីវ័យ​២៧​ឆ្នាំ​ម្នាក់ បាន​សារភាព​​​​ថា ខ្លួន​បាន​វាយ​ដំ​​​កូន​ប្រុស​ចុង​អាយុ​៦​ឆ្នាំ​របស់​ខ្លួន​​យ៉ាង​ព្រៃផ្សៃ​​​​​​នៅ​ផ្ទះ​របស់​ខ្លួន​ក្នុង​រាជធានី​ភ្នំពេញ​ រយៈ​ពេល​ជា​ច្រើន​ថ្ងៃ​ អំឡុង​​សប្ដាហ៍​មុន​​​បណ្ដាល​ឲ្យ​កុមារ​រងគ្រោះ​​​​ស្លាប់​ដោយ​សារ​របួស​ក្នុង​ធ្ងន់ធ្ងរ​។

​ស្ត្រី​ជា​ម្ដាយ​ចុង​​ដែល​មានឈ្មោះ​ថា សេង ស្រីទីន ត្រូវ​បាន​ចាប់​ខ្លួន​កាលពី​ថ្ងៃ​អាទិត្យ បន្ទាប់ពី​ជីដូន​របស់​កុមារ​រងគ្រោះពិនិត្យ​មើល​​សាកសព​​ ហើយ​ប្ដឹង​នគរ​បាល​ថា ​គាត់​សង្ស័យ​ថា ​ចៅប្រុស​របស់​គាត់​​​ត្រូវ​គេ​វាយ​ធ្វើ​បាប។ ក្មេងប្រុស​នេះ​បាន​ស្លាប់​កាលពី​ថ្ងៃ​សៅរ៍ ដោយ​សារ​​​ជំងឺ​ចុកពោះ​ ​​នេះ​បើ​តាម​​ការ​អះអាង​​ដំបូង​របស់​​ម្ដាយ​ចុង​។

យោង​តាម​លោក ហួ ម៉ិញវា៉ង នាយ​ការិយាល័យ​នគរ​បាល​ព្រហ្មទណ្ឌ​ខណ្ឌ​​បាន​ឲ្យ​ដឹង​ថា អំឡុង​ពេល​នគរ​បាលខណ្ឌ​សាកសួរ​កាលពី​ម្សិលមិញ ម្ដាយ​ចុង​​បាន​សារភាព​ថា ខ្លួន​បាន​វាយ​ដំ​កូនប្រុស​ចុង​ឈ្មោះ សារី វីរៈបុត្រ ជាច្រើន​លើក​ក្នុង​រយៈពេល​១សប្ដាហ៍​​មក​នេះ ខណៈ​ក្មេង​នេះ​ស្នាក់​នៅ​ផ្ទះ​ជាមួយ​​ខ្លួន​​ រួម​ជាមួយ​​ប្ដី​ឈ្មោះ ហន សារី អាយុ​២៩​ឆ្នាំ ដែល​ត្រូវ​ជា​ឪពុក​​បង្កើត​របស់​ក្មេង​ប្រុស​នេះ​នៅ​ក្នុង​សង្កាត់​ជើងឯក ខណ្ឌដង្កោ។

លោក​បាន​​មាន​ប្រសាសន៍​ថា ” ក្រោយ​ពេល​សាកសួរ​ ម្ដាយ​ចុង​បាន​សារភាព​ថា នៅ​ថ្ងៃ​ទី​១០ ខែ​ធ្នូ នាង​បាន​ប្រើ​​ដំបងវាយ​​​ក្មេងប្រុស​នេះ​លើ​ដង​ខ្លួន និង​​ក្បាល​ពោះ”។ លោក​បាន​លើក​ឡើង​បន្ត​ថា ម្ដាយ​ចុង សេង ស្រីទីន ​បាន​​សារភាព​ថា ​ខ្លួន​ក៏​បាន​​វាយ​ក្មេងប្រុស​នេះ​ដែរ​​កាលពី​ថ្ងៃ​ព្រហស្បតិ៍​។

​លោក​​ ហួ ម៉ិញវ៉ាង បាន​មាន​ប្រសាសន៍​ទៀត​​ថា “ម្ដាយ​ចុង​​បានអះអាង​ថា រូប​គេ​​គ្មាន​បំណង​សម្លាប់​កូន​ប្រុស​ចុង​របស់ខ្លួន​ទេ ប៉ុន្តែ​នាង​​វ៉ៃ​វា​ដោយ​សារ​តែ​វា​មិន​ស្ដាប់​នាង និង​ដោយ​សារ​វា​មិន​មែន​ជា​កូនប្រុស​បង្កើត​របស់​នាង​”។

លោក​ ឃួន យ៉ាណូ នាយ​ប៉ុស្តិ៍​សង្កាត់​បាន​មាន​ប្រសាសន៍​ថា ក្មេង​ប្រុស​នេះ​​រស់​នៅ​ជាមួយ​ជីដូន​ និង​អ្នក​មើល​ថែ​ឈ្មោះ គង់ ស៊ីណា អាយុ​៥១​ឆ្នាំ ​ក្នុង​ខណ្ឌ​ទួលគោក ប៉ុន្តែ​​ត្រូវ​ឪពុក​យក​មក​ស្នាក់​នៅ​​ជាមួយ​ខ្លួន និង​​ម្ដាយចុង​កាលពី​ថ្ងៃ​ទី​៦ ខែ​ធ្នូ។

លោក​បានមាន​ប្រសាសន៍​ទៀត​ថា “ជីដូន​បាន​ប្រាប់​នគរ​បាល​ថា កាលពី​ថ្ងៃ​ទី​៦ ខែ​ធ្នូ ឪពុក​របស់​ក្មេងប្រុស​រងគ្រោះ​បាន​​​យក​វា​ទៅ​​​លេង​ ប៉ុន្តែ​​​បន្ទាប​់​មក​កាលពី​ថ្ងៃ​សៅរ៍​ បាន​ទូរស័ព្ទ​ទៅ​គាត់​ថា វា​បាន​ស្លាប់​ដោយ​សារ​ចុកពោះ​។ ប៉ុន្តែ​អ្វី​ដែល​បានកើត​ឡើង​ពិត​ប្រាកដ​គឺ​ថា ម្ដាយ​ចុង​បាន​ទាត់​ធាក់​ក្មេង​ប្រុស​​នេះ​ជាច្រើន​ដង​ ដោយ​ថែម​ទាំង​ជាន់​លើ​វា​ទៀត​ផង”។

ហន សារី ឪពុក​របស់​ក្មេង​ប្រុស​​​រងគ្រោះ​​ ដែល​បាន​រៀបការ​ជាមួយ​ សេង ស្រីទីន ក្រោយ​ពីប្រពន្ធ​ដើម​បាន​ចែក​ឋាន​ទៅ​ ក៏​ត្រូវ​បាន​ចាប់​ខ្លួន​ដែរ​កាលពី​ថ្ងៃ​អាទិត្យ ប៉ុន្តែ​ត្រូវ​បាន​ដោះលែង​វិញ​កាលពី​ម្សិលមិញ បន្ទាប់ពី​នគរ​បាល​កំណត់​ថា គាត់​គ្មាន​វត្តមាន​អំឡុង​ពេល​វាយ​ដំ​។

​​​​​​​ កាលពី​ថ្ងៃ​អាទិត្យ អង្គភាព​គាំពារ​កុមារ​​​ ជា​អង្គភាព​នគរ​បាល​​ដែល​ទទួល​បាន​ការ​ឧបត្ថម្ភ​គាំទ្រ​ពី​មូលនិធិ​កុមារ​កម្ពុជា បាន​ធ្វើ​កោសល្យវិច័យ​​លើ​សាកសព​ក្មេង​ប្រុស​រងគ្រោះ​នៅ​មន្ទីរ​ពេទ្យ​បង្អែក​រាជធានី​ភ្នំពេញ​។

លោក​ ជេម ម៉ាកខេប (James McCabe) ​អ្នក​ស៊ើបអង្កេត​ជាន់​​ខ្ពស់​នៅ​អង្គភាព​គាំពារ​កុមារ​ បាន​​​មាន​ប្រសាសន៍​ថា ” ការ​ធ្វើ​កោសល្យវិច័យ​បាន​បង្ហាញ​ថា សេរីរាង្គ​ខាង​ក្នុង​របស់​ក្មេង​ប្រុស​នេះ​បាន​បាក់​បែក។ ការ​សារភាព​របស់​ម្ដាយ​ចុង​ត្រូវ​គ្នា​នឹង​​លទ្ធផល​នៃ​ការ​ធ្វើ​កោសល្យ​វិច័យ​។ មាន​ការ​​ប្រើ​កម្លាំង​​ខ្លាំង​ទើប​ធ្វើ​ឲ្យ​​ក្មេង​ប្រុស​នេះ​រងរបួស​ គឺ​នាង​បាន​ជាន់​លើ​វា​”។

លោក​​ ណុន មុនីរ័ត្ន នាយការិយាល័យ​បច្ចេកទេស​ និង​វិទ្យាសាស្ត្រ​នៃ​ស្នង​ការដ្ឋាន​​នគរ​បាល​រាជ​ធានី​ ដែល​ជា​អ្នក​ធ្វើ​​ការ​ពិនិត្យ​ដំបូង​លើ​សាកសព​របស់​ក្មេង​ប្រុស​រងគ្រោះ​នៅ​វត្ត​ស្ទឹងមានជ័យ ក្នុង​ខណ្ឌ​មានជ័យ បាន​មាន​ប្រសាសន៍​ថា ក្មេង​ប្រុស​នេះ​មិន​ទទួល​បាន​ការ​ព្យាបាល​របួស​ទេ។ លោក​មាន​ប្រសាសន៍​ទៀត​ថា “ស្នាម​ជាំ​លើ​ដង​ខ្លួន​បង្ហាញ​ថា ក្មេង​នេះ​ត្រូវ​គេ​ធ្វើ​ទារុណកម្ម​យ៉ាង​ព្រៃផ្សៃ​ ហើយ​បាន​ស្លាប់​ដោយ​សារ​ការ​​មិន​ទទួល​បានការ​ព្យាបាល​”។ លោក​បាន​លើក​ឡើង​បន្ថែម​ថា ប្រសិន​បើ​ម្ដាយ​ចុង​យក​ក្មេង​ប្រុស​នេះ​ទៅ​មន្ទីរ​ពេទ្យ​បន្ទាប់ពី​វាយ​ដំ​វា​រួច វា​ប្រហែល​ជារស់​។

លោក​ ហួ ម៉ិញវ៉ាង ​នាយការិយាល័យ​ព្រហ្មទណ្ឌ​ខណ្ឌ​បាន​មាន​ប្រសាសន៍​ថា សេង ស្រីទីន ត្រូវ​ចូល​ខ្លួន​ទៅ​​តុលាការ​​នៅ​ថ្ងៃ​នេះ ដើម្បី​ប្រឈម​ការ​ចោទ​ប្រកាន់​ពី​បទ​ធ្វើ​ទារុណ​កម្ម និង​អំពើ​ឃោរឃៅ​បណ្ដាល​ឲ្យ​មនុស្ស​ស្លាប់​៕ សុខុម (រាយការណ៍​បន្ថែម​ដោយ Alex Consiglio)​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស