35 C
Phnom Penh

គណបក្ស​ប្រជាជន​កម្ពុជា​​និយាយ​ថា អាសនៈ​​សភា​ចំនួន​១២៣​​​គឺ​គ្រប់គ្រាន់​ហើយ​

ដោយ ឌឹ ខេមបូឌា ដេលី

បទវិភាគ

ឧបនាយក​រដ្ឋមន្ត្រី ប៊ិន ឈិន និង​លោក គួយ ប៊ុនរឿន មន្ត្រី​ជាន់​ខ្ពស់​របស់​គណបក្ស​ប្រឆាំង​ បាន​​មាន​ប្រសាសន៍​កាលពី​ម្សិលមិញ​ថា ពេល​នេះគណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​ កំពុង​ខ្វែង​គំនិត​គ្នា​នៅ​ឡើយជុំវិញ​ការ​បង្កើន​ចំនួន​​អាសនៈ​សភា​មុន​ការ​បោះ​ឆ្នោត​អាណត្តិ​ក្រោយ​។

​ក្រុម​ការ​ងារ​​កំណែទម្រង់​បោះ​ឆ្នោត​​ដែល​មាន​សមាសភាព​មន្ត្រី​មក​ពី​គណបក្ស​ធំៗ​ទាំង​ពីរ​ បាន​​ជួប​ជុំគ្នា​កាលពី​ពេល​រសៀល​ ដើម្បី​ពិភាក្សាអំពី​ការ​ធ្វើ​​វិសោធនកម្ម​ច្បាប់​ស្ដីពីការ​​បោះ​ឆ្នោត ក្រោយ​ពី​​​ការ​ពិភាក្សា​​កាលពី​ថ្ងៃ​សុក្រ​ ដែល​ក្នុង​នោះ​គណបក្ស​សង្គ្រោះ​ជាតិ​បាន​​បង្កើន​លទ្ធភាព​នៃ​ការ​ដំឡើង​​ចំនួន​អាសនៈ​សភា​។

​ទាក់​ទិន​នឹងចំណុច​​រាំុរ៉ៃ​​នៃ​វិវាទ​រវាង​គណបក្ស​ប្រជាជន​កម្ពុជា និង​គណបក្ស​ប្រឆាំង​ដែល​តែង​តែ​ស្នើ​សុំ​បង្កើន​អាសនៈ​សភា​បន្ថែម​ក្នុង​រយៈ​ពេល​១​ទសវត្សរ៍​មក​​នេះ លោក ប៊ិន ឈិន បាន​​ប្រាប់​ក្រុម​អ្នក​យកព័ត៌មាន​បន្ទាប់ពី​កិច្ច​ប្រជុំ​កាលពី​ម្សិលមិញថា គណបក្ស​កំពុង​កាន់​អំណាចនឹង​មិន​ពិចារណា​សំណើ​ចុង​ក្រោយ​នេះ​​ឡើយ។

ផ្ទុយ​មក​វិញ លោក​ ប៊ិន ឈិន បាន​មាន​ប្រសាសន៍​ថា គណបក្ស​កំពុង​កាន់​អំណាច​​នឹង​ព្យាយាម​​ធ្វើ​វិសោធនកម្ម​​ច្បាប់​ស្ដីពី​ការ​បោះ​ឆ្នោត ​ដើម្បី​ដកចេញមាត្រា​មួយដែល​តម្រូវ​ឲ្យ​មាន​ការ​​ពិនិត្យ​ផ្ទៀង​ផ្ទាត់​ចំនួន​អាសនៈ​រៀងរាល់​៥ឆ្នាំ​ម្ដង បន្ទាប់មក​ដាក់​ជំនួស​មាត្រា​ដែល​តម្រូវ​ឲ្យ​រក្សា​អាសនៈ​​ចំនួន​១២៣​នាពេល​​បច្ចុប្បន្ន​ មិន​កែ​ប្រែ​ជារៀង​រហូត។

​លោក​បាន​មាន​ប្រសាសន៍​​ថា “មាត្រា​៧​ ចែង​អំពី​ការ​កំណត់​ចំនួន​​អាសនៈ​ ហើយ​ការ​កំណត់​ចំនួន​​អាសនៈ​គឺ​ជា​បញ្ហា​ដ៏ចម្រូង​ចម្រាស”​​។ លោក​ក៏​បាន​​ស្នើសុំ​ឲ្យ​លុប​មាត្រា​៩ ដែល​ផ្ដល់​រូបមន្ត​គណនា​អាសនៈ​ផង​ដែរ​។ លោក​បាន​បន្ត​ថា “រាល់​​ពេល​ឆ្នាំ​ទី៣ [នៃ​អាណត្តិ​] ជិត​មក​ដល់​​ពេល​បោះ​ឆ្នោត​ យើង​តែង​តែ​​មាន​បញ្ហា​នេះ”។  លោក ប៊ិន ឈិន បាន​មាន​ប្រសាសន៍ទៀត​ថា ទាំង​​ប្រទេស​ជប៉ុន និង​ប្រទេស​ថៃ​​ សុទ្ធ​តែ​រក្សា​ចំនួន​អាសនៈ​សភា​ឲ្យ​នៅ​ដដែល​ ទោះបី​ជា​ចំនួន​​ប្រជា​ពលរដ្ឋ​​កើត​ឡើង​ក៏ដោយ​។

គណបក្ស​ប្រឆាំង​​បាន​ស្នើ​​សុំ​ដំឡើង​ចំនួន​អាសនៈ​សភា​អំឡុង​ពេល​ពិនិត្យ​ផ្ទៀង​ផ្ទាត់​ជា​ប្រចាំ​ចាប់​តាំង​ពី​ខ្លួន​ទទួល​បាន​អាសនៈ​សភា​ជា​លើក​ដំបូង​នៅ​ក្នុង​ឆ្នាំ​១៩៩៨​មក​ ដោយ​គូស​បញ្ជាក់​ពី​ការ​កើន​ឡើង​​យ៉ាង​ឆាប់​រហ័ស​នូវ​ចំនួន​ប្រជា​ជន​ក្នុង​ប្រទេស​ចាប់​តាំង​ពី​ឆ្នាំ​១៩៩៣​មក​។

គណបក្ស​ សម រង្ស៊ី បាន​ស្នើ​សុំ​១៣៨​អាសនៈ ឬ១៣៩អាសនៈ​អំឡុង​ពេល​ពិនិត្យ​ផ្ទៀង​ផ្ទាត់​នៅ​ឆ្នាំ​២០០២​ ១៤០​អាសនៈអំឡុង​ពេល​ពិនិត្យ​ផ្ទៀង​ផ្ទាត់​នៅ​ឆ្នាំ​២០០៦ និង​យ៉ាង​ហោច​ណាស់​១៣៣​អាសនៈ​អំឡុង​ពេល​ពិនិត្យ​ផ្ទៀង​ផ្ទាត់​​ក្នុង​ឆ្នាំ​២០១១។

ទោះ​ជាយ៉ាង​ណា គណបក្ស​ប្រជាជន​កម្ពុជា បាន​ច្រាន​ចោល​សំណើទាំង​នោះ​រាល់​លើក ដោយ​លើក​ឡើង​ពី​បញ្ហា​ថវិកា និង​ភ័ស្តុភារ​ ​ជា​មូលហេតុ​​ដូច​គ្នា​ដែល​លោក ប៊ិន ឈិន បាន​លើក​ឡើង​អំឡុង​សន្នីសិទ​កាសែត​កាលពី​ម្សិលមិញ។

លោក ប៊ិន ឈិន បានពន្យល់​ថា “​យើង​គិត​ថា យើង​គួរ​តែ​កំណត់​​អាសនៈ​​ចំនួន​១២៣​ ដើម្បីចៀសវាង​​បញ្ហា ពីព្រោះ​​ទី១ ថវិកា​ជាតិ​នឹង​មិន​ចំណាយ​ច្រើន​ពេកលើ​តំណាង​រាស្ត្រ​​នោះ​ទេ ហើយ​ទី២គ្មាន​កន្លែង​បន្ថែម​​សម្រាប់​តំណាង​រាស្ត្រ​អង្គុយ​ឡើយ​ ប្រសិន​បើ​ចំនួន​អាសនៈ​បន្ត​​កើន​ឡើង”។

ប៉ុន្តែ​លោក គួយ ប៊ុនរឿន មក​ពី​គណបក្ស​សង្គ្រោះ​ជាតិ​ បាន​មាន​ប្រសាសន៍​ថា គណបក្ស​ប្រឆាំង​​នឹង​បន្ត​ជំរុញ​ទាមទារ​អាសនៈ​ឲ្យ​លើស​ពី​១២៣នៅ​ក្នុង​រដ្ឋសភា​ ដែល​បានចាប់​ផ្ដើមពី​​ចំនួន​១២០​អាសនៈ​នៅ​ក្នុង​ឆ្នាំ​១៩៩៣។ លោក​បាន​មាន​ប្រសាសន៍​ទៀត​ថា “សម្រាប់​ជំពូក​២ នៃ​ [ច្បាប់ស្ដីពី​ការ​បោះ​ឆ្នោត​] យើង​កំពុង​ស្ថិត​ក្នុង​ដំណើរ​ការ​​​គិតគូរអំពី​ការ​កំណត់​ចំនួនអាសនៈ​នៅ​ក្នុង​រដ្ឋសភា​”៕ សុខុម​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស