កាលពីម្សិលមិញ ក្រសួងមហាផ្ទៃបានទទួលយកការដាក់ពាក្យសុំបង្កើតគណបក្សនយោបាយថ្មីមួយ ដែលដាក់ជូនដោយមេដឹកនាំនិរទេសខ្លួននៃក្រុមប្រឆាំងមួយ ដែលលោកនាយករដ្ឋមន្ត្រី ហ៊ុន សែន ផ្ទាល់បានចាត់ទុកថា ជាអង្គការភេរវកម្ម។
ចលនាអំណាចពលរដ្ឋខ្មែរ ដែលត្រូវបានដឹកនាំពីសហរដ្ឋអាមេរិកដោយមានលោក សួន សេរីរដ្ឋា ជាប្រធាននោះ កាលពីម្សិលមិញបានបង្ហោះច្បាប់ចម្លងនៃការដាក់សុំបង្កើតគណបក្សអំណាចពលរដ្ឋខ្មែរ តាមប្រព័ន្ធអុីនធើណិតដោយមានបោះត្រាកាលពីថ្ងៃទី១៥ ខែធ្នូពីក្រសួងមហាផ្ទៃ និងនាយកដ្ឋានកិច្ចការនយោបាយរបស់ក្រសួងនេះ។
លិខិតនោះមានខ្លឹមសារថា “ខ្ញុំនិងជនជាតិខ្មែរ៨០នាក់យល់ព្រមផ្ដួចផ្ដើមឲ្យមានការបង្កើតគណបក្សអំណាចពលរដ្ឋខ្មែរ”។
លោក ឆាន់ ចាន់សុភ័ក្ត្រ ប្រធាននាយកដ្ឋានកិច្ចការនយោបាយបានបញ្ជាក់ពីការទទួលបានពាក្យសុំនេះ ប៉ុន្តែបានបដិសេធមិនធ្វើអត្ថាធិប្បាយអំពីឱកាសនៃការទទួលបានការយល់ព្រម ឬយា៉ងណានោះឡើយ។ លោកបានមានប្រសាសន៍ថា “ខ្ញុំនឹងពិនិត្យមើល ហើយបញ្ជូនទៅមេរបស់ខ្ញុំដើម្បីធ្វើការសម្រេច”។
លោក ខៀវ សុភ័គ អ្នកនាំពាក្យក្រសួងមហាផ្ទៃ មិនអាចទាក់ទងបានទេកាលពីម្សិលមិញ។ ទោះជាយ៉ាងណា កាលពីខែកក្កដា នៅពេលលោក សួន សេរីរដ្ឋា បានប្រកាសពីផែនការរបស់លោកបង្កើតគណបក្សនយោបាយនោះ ឧត្ដមសេនីយ៍ ខៀវ សុភ័គ បានមានប្រសាសន៍ថា ក្រុមប្រឆាំងនេះទំនងជាមិនអាចឡើយ។ លោកបានមានប្រសាសន៍នៅពេលនោះថា “វាមិនស័ក្ដិសមសម្រាប់គាត់ក្នុងការដឹកនាំគណបក្សឡើយ ពីព្រោះគាត់មានដីកាចាប់ខ្លួនពីតុលាការ ដូច្នេះ តើគាត់អាចដឹកនាំគណបក្សដូចម្ដេចកើត?”។
បច្ចុប្បន្ននេះ លោក សួន សេរីរដ្ឋា កំពុងប្រឈមការផ្តន្ទាទោសកំបាំងមុខនៅសាលាដំបូងរាជធានីភ្នំពេញតាមការចោទប្រកាន់ពីបទញុះញង់ និងមានផែនការវាយប្រហារមកលើរដ្ឋាភិបាល ដែលការចោទប្រកាន់ទំាងពីរនេះលោកបានបដិសេធ។ ជនជាតិខ្មែរបីនាក់ទៀតដែលកំពុងប្រឈមការផ្តន្ទាទោសក្នុងករណីដូចគ្នានេះពីបទចែកចាយអាវយឺតរបស់់ចលនាអំណាចពលរដ្ឋខ្មែរក្នុងខេត្តបាត់ដំបងកាលពីឆ្នាំមុន ដោយមានបោះពុម្ពសារជំរុញឲ្យប្រជាជនកុំទៅបោះឆ្នោតនៅក្នុងការបោះឆ្នោតជាតិកាលពីខែកក្កដា ឆ្នាំ២០១៣។
លោក សួន សេរីរដ្ឋា គាំទ្រចលនាបះបោរអារ៉ាប់ស្ព្រីងដោយបើកចំហ ដែលនឹងបង្ខំឲ្យលោក ហ៊ុន សែន ចុះចេញពីតំណែង ប៉ុន្តែបានបដិសេធថា មិនបានគាំទ្រការប្រើប្រាស់អំពើហិង្សា ឬបានរំលោភច្បាប់ណាមួយឡើយ។
លោក សួន សេរីរដ្ឋា អះអាងថា លោកបានចាកចេញពីប្រទេសកម្ពុជាកាលពីឆ្នាំ២០០៧ ហើយបានត្រឡប់មកវិញដោយលួចលាក់ពីរបីលើកមកហើយ។ លោកបានចំណាយពេលភាគច្រើនរស់នៅសហរដ្ឋអាមេរិក ប៉ុន្តែបានលើកឡើងពីស្រុកបវេល ខេត្តបាត់ដំបងថា ជាអាសយដ្ឋានបច្ចុប្បន្នរបស់លោក នៅពេលដាក់ពាក្យសុំបង្កើតគណបក្សអំណាចពលរដ្ឋខ្មែរ និងអាសយដ្ឋាននៅក្នុងរាជធានីភ្នំពេញជាទីស្នាក់ការកណ្ដាលរបស់គណបក្ស។
លោក សុក សំអឿន មេធាវីរបស់លោកបានមានប្រសាសន៍ថា លោកមិនដឹងពីកន្លែងលាក់ខ្លួនបច្ចុប្បន្នរបស់កូនក្ដីលោកទេ ហើយលោកមិនបានចូលរួមក្នុងការដាក់ពាក្យសុំបង្កើតគណបក្សឡើយ៕ សារុន