អង្គការសហប្រជាជាតិបានបរាជ័យជាលើកទី២ក្នុងខែនេះនៅក្នុងកិច្ចខិតខំប្រឹងប្រែងរបស់ខ្លួន ដើម្បីអាចចូលទៅជាមួយក្រុមជនជាតិភាគតិចម៉ុងតាញ៉ា ដែលកំពុងលាក់ខ្លួនក្នុងខេត្តរតនគិរី បន្ទាប់ពីអភិបាលខេត្តបានបដិសេធមិនអនុញ្ញាតឲ្យមានការជួបជាមួយអ្នកស្វែងរកសិទ្ធិជ្រកកោនទាំងនេះដោយគ្មានលិខិតអនុញ្ញាតពីក្រសួងមហាផ្ទៃ និងក្រសួងការបរទេសនោះ។
លោក ងួន គឿន ស្នងការនគរបាលខេត្តដែលបានចូលរួមនៅក្នុងកិច្ចប្រជុំមួយរវាងអង្គការសហប្រជាជាតិ និងលោកអភិបាលខេត្ត ថោង សាវុន កាលពីម្សិលមិញបានលើកឡើងថា លោក សាវុន បានប្រាប់គណៈប្រតិភូអង្គការសហប្រជាជាតិថា ពួកគេនឹងមិនត្រូវបានអនុញ្ញាតឲ្យចូលទៅជួបក្រុមជនជាតិភាគតិចដែលអាជ្ញាធរមូលដ្ឋាននៅតែសង្ស័យថា មិនមែនជាជនជាតិភាគតិចម៉ុងតាញ៉ានោះឡើយ។
លោក ងួន គឿន ដែលពីមុនបានលើកឡើងថា នឹងនិរទេសក្រុមជនជាតិភាគតិចនេះទៅ ប្រទេសវៀតណាមវិញប្រសិនបើចាប់ខ្លួនពួកគេបាននោះ បានមានប្រសាសន៍ថា “យើងមិនអាចសហការជាមួយគណៈប្រតិភូអង្គការសហប្រជាជាតិដើម្បីធ្វើការក្នុងបញ្ហានេះបានឡើយ ព្រោះពួកគេគ្មានលិខិតអនុញ្ញាតពីក្រសួងមហាផ្ទៃ និងក្រសួងការបរទេស”។
លោក កុយ គួង អ្នកនាំពាក្យក្រសួងការបរទេសបានលើកឡើងកាលពីម្សិលមិញថា លោកមិនដឹងអ្វីទេពាក់ព័ន្ធនឹងរឿងនេះ។
លោកស្រី Wan-Hea Lee តំណាងប្រចាំប្រទេសរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានលើកឡើងថា អង្គការសហប្រជាជាតិនៅតែតាំងចិត្តរកឲ្យឃើញពីទីតាំងរបស់អ្នកស្វែងរកសិទ្ធិជ្រកកោន ហើយនាំពួកគេមករាជធានី។
លោកស្រី Lee បានលើកឡើងតាមរយៈអីុម៉េលមួយថា “អង្គការសហប្រជាជាតិនៅតែតាំងចិត្តធ្វើយ៉ាងណានាំក្រុមជនជាតិភាគតិចម៉ុងតាញ៉ាមករាជធានីភ្នំពេញឲ្យបាន ហើយខិតខំធ្វើឲ្យពួកគេទទួលបាននូវសិទ្ធិជ្រកកោនដែលស្របតាមអនុក្រឹត្យស្តីពីជនភៀសខ្លួនឆ្នាំ២០០៩ និងអនុសញ្ញាស្តីពីជនភៀសខ្លួនឆ្នាំ១៩៥១ ព្រមទាំងពិធីសាររបស់ខ្លួនផងដែរ។ អង្គការសហប្រជាជាតិកំពុងតែរង់ចាំវិធានការនេះអាចសម្រេចបានដូច្នេះ ព្រោះវាជារឿងបន្ទាន់មួយ”។ លោកស្រីបានបន្ថែមថា “អង្គការសហប្រជាជាតិមិនមានទស្សនពាក់ព័ន្ធនឹងគុណភាពនៃទំនាក់ទំនងផ្ទៃក្នុងនៅក្នុងក្រសួងមហាផ្ទៃឡើយ”។
ការបរាជ័យជាលើកទី២នេះកើតឡើងបន្ទាប់ពីគណៈប្រតិភូអង្គការសហប្រជាជាតិបានត្រឡប់មករាជធានីភ្នំពេញវិញកាលពីថ្ងៃទី៥ ខែធ្នូ ក្រោយពេលព្យាយាមដោយមិនបានការអស់រយៈបីថ្ងៃដើម្បីជួបជាមួយអ្នកស្វែងរកសិទ្ធិជ្រកកោន បន្ទាប់ពីអាជ្ញាធរខេត្តបានទាមទារនៅពេលនោះថា ទាល់តែមានលិខិតអនុញ្ញាតពីក្រសួងមហាផ្ទៃជាមុនសិន។ មន្ត្រីមកពីក្រសួងនេះក៏បានធ្វើដំណើរជាមួយគណៈប្រតិភូអង្គការសហប្រជាជាតិទៅកាន់ខេត្តរតនគិរីនៅក្នុងបេសកកម្មចុងក្រោយនេះផងដែរ។
សេចក្តីថ្លែងការណ៍មួួយរបស់ក្រសួងមហាផ្ទៃដែលចេញកាលពីសប្តាហ៍មុនដោយដកស្រង់ពីលិខិតចុះថ្ងៃទី៥ ខែធ្នូ របស់លោក ស ខេង រដ្ឋមន្ត្រីក្រសួងមហាផ្ទៃផ្ញើជូនលោក ហ្សង់ហ្វ្រង់ស័រ កូតាំង ឯកអគ្គរដ្ឋទូតរបស់សហភាពអឺរ៉ុបប្រចាំកម្ពុជា បានលើកឡើងថា អង្គការសហប្រជាជាតិនឹងត្រូវអនុញ្ញាតឲ្យជួបជាមួយក្រុមជនជាតិភាគតិច ប្រសិនបើវត្តមានរបស់ពួកគេត្រូវបានបញ្ជាក់។
ក្រុមជនជាតិភាគតិចម៉ុងតាញ៉ាចំនួន១៣នាក់ដែលជាសមាជិកនៃក្រុមជនជាតិភាគតិចដែលប្រមូលផ្តុំគ្នានៅតំបន់ខ្ពង់រាបភាគកណ្តាលប្រទេសវៀតណាមនោះ កំពុងលាក់ខ្លួននៅក្នុងព្រៃក្នុងស្រុកលំផាត់ខេត្តរតនគិរីអស់រយៈពេលពីរសប្តាហ៍មកហើយ ហើយមកទល់ពេលនេះកំពុងតែគេចពីនគរបាលមូលដ្ឋាន។
លោក Phil Robertson អនុប្រធានប្រចាំតំបន់អាស៊ីរបស់អង្គការឃ្លាំមើលសិទ្ធិមនុស្សបានចោទសួរចំពោះទង្វើរបស់រដ្ឋាភិបាលនៅក្នុងបញ្ហានេះ។ លោកបានលើកឡើងតាមរយៈអីុម៉េលមួយថា “នៅពេលមន្ត្រីថ្នាក់កំពូលក្នុងជួររដ្ឋាភិបាលកម្ពុជាចង់ឲ្យអ្វីៗអាចសម្រេចបាននៅតាមបណ្តាខេត្ត ពួកគេបានចេញបទបញ្ជា ហើយរឿងនោះអាចសម្រេចទៅបាន។ ហេតុដូច្នេះ ការដែលអង្គការសហប្រជាជាតិចាកចេញពីខេត្តរតនគិរីដោយដៃទទេជាលើកទី២នោះ វាសំដែងឲ្យឃើញពីក្តីព្រួយបារម្ភយ៉ាងខ្លាំងថា រដ្ឋាភិបាលក្រុងភ្នំពេញខ្វះការតាំងចិត្តក្នុងការការពារជនជាតិភាគតិចម៉ុងតាញ៉ាទាំងនេះ”៕ស៊ុយឈាង