30 C
Phnom Penh

បុរស​​​ពី​​​រ​​​នាក់​​​ត្រូវ​​​បាន​​​ចាប់ខ្លួន​​​ពេល​​​ព្យាយាម​​​ជួញ​​​ដូរ​​​ស្ត្រី​​​ខ្មែរ​​​ទៅ​​​ប្រទេស​​​ចិន​​​

ដោយ ឌឹ ខេមបូឌា ដេលី

បទវិភាគ

នគរ​​​បាល​​​បាន​​​ឲ្យ​​​ដ​​​ឹង​​​កាល​​​ពី​​​ម្សិលមិញ​​​ថា នគរ​​​បាល​​​ប្រឆាំង​​​ការ​​​ជួញ​​​ដូរ​​​មនុស្ស​​​បាន​​​ចាប់​​​​​​ខ្លួន​​​បុរស​​​ពីរ​​​នាក់​​​កាល​​​ពី​​​ថ្ងៃ​​​ច័ន្ទ នៅ​​​អាកាស​​​យាន​​​ដ្ឋាន​​​អន្តរ​​​ជាតិ​​​ភ្នំពេញ​​​ ខណៈ​​​ពួក​​​គេ​​​កំពុង​​​ព្យាយាម​​​ជួញ​ដូរ​​​ស្ត្រី​​​ម្នាក់​​​ទៅ​​​កាន់​​​ប្រទេស​​​ចិន​​​ដើម្បី​​​រៀប​​​ការ​​​ជាមួយ​​​បុរ​​​ស​​​ចិន​​​នៅ​​​ទី​​​នោះ​​​។

​​​លោក កែវ ធា នាយ​​​ការិយាល័យ​​​នគរ​​​បាល​​​ប្រឆាំង​​​ការ​​​ជួញ​​​ដូរ​​​មនុស្ស​​​និង​ការពារ​អនីតិជន​នៃ​ស្នងការដ្ឋាន​នគរបាល​រាជ​​​ធានី​​​​ភ្នំពេញ​​​​បាន​​​ឲ្យ​​​ដឹង​​​ថា ​​​ លោក​​​ Xu Xiandai អាយុ​​​៣០​​​​​​ឆ្នាំ​​​ជា​​ជន​​​ជាតិ​​​ចិន​​​ និង​​​លោក​​​ ហេង សេង អាយុ​​​៥៣​​​ឆ្នាំ​​​ជា​​​ជន​​​ជាតិ​​​ខ្មែរ​​​ ត្រូវ​​​បាន​​​ចាប់ខ្លួន​​​នៅ​​​ម៉ោង​​​ប្រហែល​​​៧​​​ព្រឹក​​​ ខណៈ​​ពួក​​​គេ​​​ព្យាយាម​​​នាំ​​​ស្ត្រី​​​ខ្មែរ​​​អាយុ​​​២២​​​ឆ្នាំ​​​ម្នាក់​​​ធ្វើ​​​ដំណើរ​​​ទៅ​​​កាន់​​​ប្រទេស​​​ចិន​​​។

លោក​​​​​​បាន​​​មាន​​​ប្រសាសន៍​​​ថា “ពួក​​​គេ​​​ជិត​​​នឹង​​​បញ្ជូន​​​ស្ត្រី​​​ម្នាក់​​​នេះ​​​ទៅ​​​លក់​​​ក្នុង​​​ប្រទេស​​​ចិន​​​ទៅ​​​ហើយ​​​”។ លោក​​​បាន​​​បន្ថែម​​​ថា នគរ​​​បាល​​​បាន​​​សើុប​​​អង្កេត​​​បុរស​​​ទាំង​​​ពីរ​​​នាក់​​​នេះ​​​អស់​​​រយៈ​​​ពេល​​​មួយ​​​ខែ​​​មក​​​ហើយ​​​។

លោក កែវ ធា បាន​​​លើក​​​ឡើង​​​ទៀត​​​ថា បុរស​​​ទាំង​​​ពីរ​​​នាក់​​​នេះ​​​បាន​​​បញ្ជូន​​​ស្ត្រី​​​ខ្មែរ​​​​ចំនួន​​​​ពីរ​​​នាក់​​​ទៅ​​​ប្រទេស​​​ចិន​​​រួច​​​ហើយ​​​ក្នុង​​​ពេល​​​ថ្មី​​​ៗ​​​នេះ ហើយ​​​ថា ស្ត្រី​​​ខ្មែរ​​​ចំនួន​​​ពីរ​​​នាក់​​​ផ្សេង​​​ទៀត​​​កំពុង​​​ត្រូវ​​​បាន​​​គេ​​​រៀប​​​ចំ​​​លិខិត​​​ឆ្លង​​​ដែន​​​ឲ្យ​​​សម្រាប់​​​ការ​​​ធ្វើ​​​ដំណើរ​​​ដូច​​​គ្នា​​​នេះ​​​។

លោក​​​បាន​​​មាន​​​ប្រសាសន៍​​​បន្ថែម​​​ថា “ហេង សេង គឺ​​​ជា​​​ឈ្មួញ​​​កណ្តាល​​​ដែល​​​រៀប​​​ចំ​​​លិខិត​​​ឆ្ល​​​ង​​​ដែន​​​​​​ ទិដ្ឋាការ និង​​​អ្វី​​​ផ្សេង​​​ៗ​​​ទៀត​​​នៅ​​​ក្នុង​​​ប្រទេស​​​កម្ពុជា​​​ ហើយ​​​យក​​​ប្រាក់​​​ចំនួន​​​៧.០០០​​​ដុល្លារ​​​ពី​​​ Xu Xiandai​។ បុរស​​​ជន​​​​​​ជាតិ​​​ចិន​​​នេះ​​​នាំ​​​ស្ត្រី​​​ទៅ​​​ឲ្យ​​​ថៅ​​​កែ​​​របស់​​​ខ្លួន​​​ [នៅ​​​ក្នុង​​​ប្រទេស​​​ចិន​​​] ហើយ​​​យក​​​ប្រាក់​​​ចំនួន​​​៩.០០០ដុល្លារ​​​ពី​​​ថៅ​​​កែ​​​រូប​​​នេះ​​​ រីឯ​​​ថៅកែ​រូប​នេះ​​​​វិញ​​​លក់​​​ស្ត្រី​​​បន្ត​​​ទៅ​​ឲ្យ​​​អ្នក​​​ផ្សេង​​​ទៀត​​​ [ដើម្បី​​​រៀប​​​ការ​​​] ហើយ​​​យក​​​ប្រាក់​​​ជាង​​​១០.០០០ដុល្លារ​​​”។

លោក កែវ ធា បាន​​​ឲ្យ​​​ដ​​​ឹង​​​បន្ត​​​ទៀត​​​ថា លោក​​​​​​ Xu Xiandai  បាន​​​បន្លំ​​​ខ្លួន​​​​​​ជា​​​កម្មករ​​​សំណង់​​​នៅ​​​ក្នុង​​​រាជ​​​ធានី​​​ភ្នំពេញ ខណៈ​កំពុង​​​ប្រកប​​​របរ​ជួញ​​​ដូរ​​​មនុស្ស​​​នេះ​​​។ លោក​​​បាន​​​មាន​​​ប្រសាសន៍​​​ថា “គាត់​​​បាន​​​និយាយ​​​ថា គាត់​​​គឺ​​​ជា​​​កម្មករ​​​សំណង់​​​ ប៉ុន្តែ គាត់​​​មិន​​​មែន​​​ជា​​​កម្មករ​​​សំណង់​​​នោះ​​​ទេ​​​។ គាត់​​​ទៅមក​​​ៗ​​​រវាង​​​ប្រទេសកម្ពុជា​​​និង​​​ប្រទេស​​​ចិន”​​​។បុរសទាំង​​​ពីរ​​​នាក់​​​នេះ​​​នឹង​​​ត្រូវ​​​បញ្ចូន​​​ទៅ​​​តុលាការ​​​នៅ​​​ថ្ងៃ​​​នេះ​​​។

ស្ត្រី​​​ខ្មែរ​​​ចំនួន​​​ពីរ​​​នាក់​​​ដែល​​​ត្រូវ​​​បាន​​​បញ្ចូន​​​ត្រឡប់​​​​​​​ពី​​​ប្រទេស​​​ចិន​​​មក​​​វិញ​​​កាល​​​ពី​​​ថ្ងៃ​​​ទី​​​៨ ខែ​​​ធ្នូ​​​​​​បាន​​​និយាយ​​​រៀប​​​រាប់​​​អំពី​​​ភាព​​​ឈឺ​​​ចាប់​​​របស់​​​ខ្លួន​​​​​​បន្ទាប់​​​ពី​​​រៀប​​​ការ​​​ជាមួយ​​​បុរស​​​ចិន​​​ដែល​​​រំលោភ​​​បំពាន​​​ទាំង​​​ផ្លូវ​​​ភេទ​​​ និង​​​ផ្លូវ​​​កាយ​​​នោះ​​​។

ប្រហែល​​​មួយ​​​សប្តាហ៍​​​មុន​​​ពេល​​​ពួក​​​គេ​​​ត្រូវ​​​បាន​​​បញ្ជូន​​​មក​​​វិញ​​​​​​ ស្ត្រី​​​ចំនួន​​​បួន​​​នាក់​​​ផ្សេង​​​ទៀត​​​ក៏​​​ត្រូវ​​​បាន​​​បញ្ជូន​​​ត្រឡប់​​​​ពី​​​ប្រទេស​​​ចិន​​មក​​​វិញ​​ផង​​​ដែរ​​​ បន្ទាប់​​​ពី​​​​បាន​​​ភៀសខ្លួន​​​ទៅ​​​ជ្រក​​​​​​នៅ​​​ស្ថាន​​​កុង​​​ស៊ុល​​​កម្ពុជា​​​​​​ក្នុង​​ក្រុង​គ័ង​​​ចូវ ​​​ជា​​​ទី​​​ដែល​​​​​​​​ពួក​​​គេ​​​បាន​​​គេច​​​ចេញ​​​ពី​​​ស្ថាន​​​ភាព​​​ស្រដៀង​​​គ្នា​​​នេះ​​​៕ស៊ុយ​​​ឈាង

​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស