មន្ត្រី​​​អាកាស​​​ចរ​​​កម្ពុជា​​​​​​លើក​​​ឡើង​​​ថា កម្ពុជា​​​គ្មាន​​​ការ​​​ទទួល​​​ខុស​​​ត្រូវ​​​ចំពោះ​​​យន្ត​​​ហោះ ដែល​​​បោះ​​​បង់​​​ចោល​​​នៅ​​​វៀតណាម​​​ឡើយ​​​

កាល​​​ពី​​​ម្សិលមិញ មន្ត្រី​​​​​​អាកាសចរ​​​កម្ពុជា​​​បាន​​​ឲ្យ​​​ដ​​​ឹង​​​ថា រដ្ឋាភិបាល​​​​​​គ្មាន​​​បំណង​​​ទទួល​យក​​​យន្ត​​​ហោះ Boeing 727-200 ដែល​​​គ្រប់​​​គ្រង​​​ដោយ​​​ក្រុម​​​ហ៊ុន​​​អាកាសចរ​​​មួយ​​​នៅ​​​​​​កម្ពុជា ដែល​​​ឥឡូវ​​​នេះ​​​បាន​​​បិទ​​​​​​ទៅ​​​ហើយ​​​នោះ​​​មក​​​វិញ​​​ឡើយ​​​។ យន្តហោះ Boeing 727-200 ​​​ត្រូវ​​​បាន​​​យក​​​ទៅ​​​ចត​​​ចោល​​​នៅ​​​ក្នុង​​​អាកាស​​​យានដ្ឋាន​​​អន្តរ​​​ជាតិ Noi Bai ក្នុង​​​ទី​​​ក្រុង​​​ហាណូយ​​​អស់​​​រយៈ​​​ពេល​​​ប្រាំពីរ​​​ឆ្នាំ​​​មក​​​ហើយ​​​។

យោង​​​តាម​​​ប្រព័ន្ធ​​​ផ្សព្វផ្សាយ​​​របស់​​​ប្រទេស​​​វៀតណាម​​​បាន​​​ឲ្យ​​​ដ​​​ឹង​​​ថា យន្ត​​​ហោះ​​​នេះ​​​​​​ជា​​​យន្ត​​​ហោះ​​​តែ​​​មួយ​​​គត់​​​ដែល​​​គ្រប់​​​គ្រង​​​ដោយ​​​ក្រុមហ៊ុន​​​អាកាសចរ Air Dream ​​​​​​​​​មាន​​​មូល​​​ដ្ឋាន​​​នៅ​​​ក្នុង​​​ខេត្ត​​​សៀម​​​រាប​​​​​​នឹង​​​ត្រូវ​​​ដាក់​​​ដេញ​​​ថ្លៃ​​​​​​ដើម្បី​​​ទទួល​​​បាន​​​ប្រាក់​​​ជាង​​​៦០០.០០០​​​ដុល្លារ​​​​​​ សម្រាប់​​​ថ្លៃ​​​ជួល​​​ចំណត​​​ដែល​​​គេ​​​មិន​​​បាន​​​បង់​​​អស់​​​ជា​​​ច្រើន​​​ឆ្នាំ​​​នេះ​​​មក​​​វិញ​​​។

យន្ត​​​ហោះ​​​នេះ​​​បាន​​​ចុះ​​​ចត​​​នៅ​​​អាកាសយាន​​​ដ្ឋាន Noi Bai សម្រាប់​​​ការ​​​ថែ​​​ទាំ​​​​​​កាល​​​ពី​​​ឆ្នាំ​​​២០០៧​​​ ហើយ​​​ក្រោយ​​​មក​​​ត្រូវ​​​បាន​​​បោះ​​​បង់​​​ចោល​​​នៅ​​​ទី​​​នោះ​​​។

កាល​​​ពី​​​ម្សិលមិញ ប្រព័ន្ធ​​​ផ្សព្វផ្សាយ​​​តាម​​​អីុនធើណិត​​​មួយ​​​មាន​​​ឈ្មោះ​​​ថា VietnamNet បាន​​​ចុះ​​​ផ្សាយ​​​ថា រដ្ឋបាល​​​អាកាស​​​ចរ​​​ស៊ីវិល​​​វៀតណាម​​​ (CAAV) បាន​​​សម្រេច​​​ដាក់​​​យន្ត​​​ហោះ​​​នេះ​​​សម្រាប់​​​ការ​​​ដេញ​​​ថ្លៃ​​​បន្ទាប​​​់​​​ពី​​​សំណើ​​​ជា​​​ច្រើន​​​លើក​​​ច្រើន​​​សា​​​ឲ្យ​​​បញ្ជូន​​​យន្ត​​​ហោះ​​​នេះ​​​ទៅ​​​ឲ្យ​​​អាជ្ញាធរ​​​កម្ពុជា​​​ ក៏​​​ដូច​​​ជា​​​ក្រុមហ៊ុន​​​អាកាស​​​ចរRoyal Khmer Airlines ដែល​​​ជា​​​ក្រុម​​​ហ៊ុន​​​មេ ​​​របស់​​​ក្រុម​​​ហ៊ុន Air Dream មិន​​​មាន​​​ការ​​​ឆ្លើយ​​​តប​​​នោះ​​​។

អត្ថបទ​​​របស់ VietnamNet មាន​​​ខ្លឹម​​​សារ​​​ដូច្នេះ​​​ថា  “លោក Luu Van Doan ប្រធាន​​​ផ្នែក​​​ច្បាប់​​​របស់​​​ CAAV បាន​​​លើក​​​ឡើង​​​ថា រដ្ឋបាល​​​របស់​​​លោក​​​នឹង​​​បង្កើត​​​ក្រុម​​​ប្រឹក្សា​​​ដេញ​​​ថ្លៃ​​​មួយ​​​ ដើម្បី​​​លក់​​​យន្ត​​​ហោះ​​​របស់​​​ក្រុមហ៊ុន​​​អាកាស​​​ចរ​​​ Royal Khmer Airlines “។ អត្ថបទ​​​នេះ មាន​​​ខ្លឹម​​​សារ​​​បន្ត​​​ទៀត​​​ថា “ដោយ​​​សារ​​​យន្តហោះ​​​នេះ​​​វា​​​ចាស់​​​ហួស​​​សម័យ​​​ទៅ​​​ហើយ​​​ ហេតុ​​​ដូច្នេះ​​​វា​​​ប្រហែល​​​ជា​​​ត្រូវ​​​បាន​​​ដាក់​​​ដេញ​​​ថ្លៃ​​​លក់​​​ឡាយឡុង​​​ជា​​​របស់​​​អេត​​​ចាយ​​​​​​​​​​​​។ ប្រាក់​​​ចំណូល​​​នឹង​​​ត្រូវ​​​កាត់​​​ចេញ​​​ពី​​​ថ្លៃ​​​ចំណាយ​​​លើ​​​នីតិវិធី​​​ដេញថ្លៃ និង​​​ថ្លៃ​​​ចំណត​​​ ដែល​​​គិត​​​ជា​​​ទឹក​​​ប្រាក់​​​ចំនួន​​​ ៦០៥.៨០០ដុល្លារ​​​”។

ក្រុមហ៊ុន​​​អាកាស​​​ចរRoyal Khmer Airlines ជា​​​ក្រុមហ៊ុន​​​ឯកជន​​​ដែល​​​គ្រប់​​​គ្រង​​​ការ​​​ហោះ​​​ហើរ​​​រវាង​​​ប្រ​​​ទេស​​​កម្ពុជា​​​ វៀតណាម និង​​​ប្រទេស​​​កូរ៉េ​​​ខាងត្បូង​​​ ក៏​​​បាន​​​បិទ​​​ទ្វារ​​​ដែរ​​​កាល​​​ពី​​​ឆ្នាំ​​​២០០៧​​​។

លោក កែវ ស៊ីវន អគ្គនាយក​​​នៃ​​​លេខាធិការដ្ឋាន​​​​​​អាកាសចរ​​​ស៊ីវិល​​​កម្ពុជា​​​ (SSCA) ​​​បាន​​​លើក​​​ឡើង​​​ថា ដោយ​​​សារ​​​ក្រុម​​​ហ៊ុន Royal Khmer Airlines លែង​​​ចុះ​​​បញ្ជី​​​ជា​​​មួយ​​​លេខាធិការ​​​ដ្ឋាន​​​​​​អាកាសចរ​​​ស៊ីវិល​​​កម្ពុជា​​​នោះ​​​ អ៊ីចឹង​​​រដ្ឋាភិបាល​​​គ្មាន​​ការ​​​ទទួល​​​ខុសត្រូវ​​​ចំពោះ​​​យន្ត​​​ហោះ​​​នេះ​​​ឡើយ​​​ ហើយ​​​ក៏​​​គ្មាន​​​បំណង​​​ណា​​​មួយ​​​យក​​​យន្ត​​​ហោះ​​​នេះ​​​មក​​​វិញ​​​ដែរ​​​។ លោក​​​បាន​​​មាន​​​ប្រសាសន៍​​​ថា “បន្ទាប់​​​ពី​​​ក្រុម​​​ហ៊ុន​​​បាន​​​ឈប់​​​ធ្វើ​​​ប្រតិបត្តិការ​​​ ក្រុម​​​ហ៊ុន​​​នេះ​​​ត្រូវ​​​បាន​​​ដក​​​ចេញ​​​ពី​​​បញ្ជី​​​។ ប្រសិន​​​បើ​​​យន្ត​​​ហោះ​​​នេះ​​​ត្រូវ​​​បាន​​​ដក​​​ចេញ​​​ពី​​​បញ្ជី​​​របស់​​​យើង​​​រួច​​​ហើយ​​​នោះ​​​ អ៊ីចឹង​​​តួនាទី​​​របស់​​​យើង​​​ក៏​​​ត្រូវ​​​បាន​​​បញ្ចប់​​​ដែរ​​​”។

លោក ស៊ីវន បាន​​​បន្ថែម​​​ថា ក្រុម​​​ហ៊ុន​​​អាកាស​​​ចរ Royal Khmer Airlines ត្រូវ​​​បាន​​​គ្រប់​​​គ្រង​​​ដោយ​​​ពាណិជ្ជករ​​​ជ​​​ន​​​ជាតិ​​​កូរ៉េ​​​ឈ្មោះ Song Dong-Zu ដែល​​​លេខាធិការ​​​ដ្ឋាន​​​​​​របស់​​​លោក​​​មិន​​​ដឹង​​​ថា នៅ​​​ទី​​​ណា​​​នោះ​​​។ លោក​​​បាន​​​មាន​​​ប្រសាសន៍​​​បន្ថែម​​​ថា “ឥឡូវ​​​នេះ​​​វា​​​គឺ​​​ជា​​​តួនាទី​​​របស់​​​ប្រទេស​​​វៀតណាម​​​ក្នុង​​​ការ​​​តាម​​​រក​​​ម្ចាស់​​​យន្ត​​​ហោះ​​​នេះ​​​ ឬ​​​ប្រសិន​​​បើ​​​ប្រទេស​​​វៀតណាម​​​ចង់​​​លក់​​​យន្ត​​​ហោះ​​​នេះ​​​នោះ​​​វា​​​ស្រេច​​​តែ​​​ប្រទេស​​​វៀតណាម​​​ទេ​​​”៕ស៊ុយឈាង​​​​​​​​​​​​​​​

​​​