កាលពីម្សិលមិញ សាលាដំបូងរាជធានីភ្នំពេញបានផ្តន្ទាទោសបុរសជនជាតិអេស្ប៉ាញម្នាក់ពីបទសម្លាប់ទេសចរជនជាតិអង់គ្លេសម្នាក់នៅផ្ទះជួលមួយស្ថិតក្នុងខណ្ឌដូនពេញ រាជធានីភ្នំពេញកាលពីឆ្នាំមុនឲ្យជាប់ពន្ធនាគាររយៈពេល១០ឆ្នាំ។
រីខាដូ ពើរេស ប៊្លុនដេល (Ricardo Perez Blundell) អាយុ៤០ឆ្នាំត្រូវបានចាប់ខ្លួនកាលពីថ្ងៃទី១១ ខែសីហា ឆ្នាំ២០១៣ បន្ទាប់ពីម្ចាស់ផ្ទះនេះដែលស្ថិតនៅផ្លូវលេខ៦៣ បានកត់សម្គាល់ថា មានក្លិនស្អុយយ៉ាងខ្លាំងចេញពីបន្ទាប់របស់ជនជាតិអេស្ប៉ាញរូបនេះ ហើយបានទាក់ទងទៅនគរបាល។
នៅក្នុងបន្ទប់ មន្ត្រីនគរបាលបានប្រទះឃើញសាកសព ចន ខននែល (John Connell) អាយុ៤៣ឆ្នាំដែលស្អុយរលួយនៅក្រោមកម្រាល និងរុំសំពត់កៅស៊ូ ដែលគាត់បានមកសម្រាកវិស្សមកាលនៅក្នុងប្រទេសកម្ពុជា។
យោងតាមរបាយការណ៍នគរបាលដែលទទួលបានក្នុងរយៈពេលប៉ុន្មានថ្ងៃបន្ទាប់ពីត្រូវបានរកឃើញនោះ បានឲ្យដឹងថា បុរសទាំងពីរនាក់នេះជាអ្នកប្រើប្រាស់ថ្នាំញៀនដែលបានស្នាក់នៅបន្ទប់ជាមួយគ្នានៅក្នុងសង្កាត់ផ្សារថ្មី៣ បន្ទាប់ពីក្លាយជាមិត្តភក្តិនឹងគ្នាកាលពីខែកក្កដា ឆ្នាំមុន។
នៅក្នុងតុលាការកាលពីព្រឹកម្សិលមិញ លោក ជួន សុរាសី ចៅក្រមប្រធានក្រុមប្រឹក្សាជំនុំជម្រះបានផ្តន្ទាទោស ប៊្លុនដេល ពីបទសម្លាប់មិត្តភក្តិរបស់ខ្លួនឲ្យជាប់ពន្ធនាគាររយៈពេល១០ឆ្នាំ។
ចៅក្រម សុរាសី បាននិយាយថា សេចក្តីសម្រេចរបស់តុលាការធ្វើឡើងបន្ទាប់ពី “ស្តាប់ចម្លើយសាក្សី និង នគរបាល ដោយពិនិត្យភ័ស្តុតាង រួមទាំងឯកសារផ្សេងៗ និងតាមការសន្និដ្ឋានពីព្រះរាជអាជ្ញារងនិងមេធាវីរបស់ជនសង្ស័យ”។
នៅពេលត្រូវបានទាក់ទងតាមទូរស័ព្ទបន្ទាប់ពីសវនាការ ចៅក្រមរូបនេះបានមានប្រសាសន៍ថា សាកសព ចន ខននែល ត្រូវបានទុកក្នុងបន្ទប់នេះអស់២៦ថ្ងៃមុនពេលត្រូវបានរកឃើញ។លោកមិនបាននិយាយលម្អិតពីវិធីដែលជននេះបានប្រើដើម្បីសម្លាប់បុរសជនជាតិអង់គ្លេសនោះឡើយ ប៉ុន្តែបានមានប្រសាសន៍ថា តុលាការមានភ័ស្តុតាងគ្រប់គ្រាន់ដើម្បីដាក់បន្ទុកជនសង្ស័យរូបនេះ។
នៅខាងក្រៅតុលាការ ប៊្លុនដេល បានបដិសេធថា ខ្លួនមិនបានសម្លាប់អតីតមិត្តភក្តិរបស់ខ្លួនទេ ដោយលើកឡើងថា មិនមានភ័ស្តុតាងដើម្បីបង្ហាញថា គាត់ជាឃាតករឡើយ។ គាត់បាននិយាយថា “ខ្ញុំតក់ស្លុតយ៉ាងខ្លាំង ពីព្រោះខ្ញុំមិនបានសម្លាប់នរណាម្នាក់ទេ។ ខ្ញុំមិនជឿសាលក្រមនេះឡើយ។ ខ្ញុំមិនដឹងនិយាយដូចម្តេចឡើយ”។ គាត់បានបន្ថែមថា គាត់នឹងប្តឹងឧទ្ធរណ៍ជំទាស់សាលក្រមនេះ។
លោក គឹម ម៉េងឃី មេធាវីការពារ លោក ប៊្លុនដេល បានមានប្រសាសន៍តាមទូរស័ព្ទថា ជនរងគ្រោះបានស្លាប់បន្ទាប់ពីផឹកស្រាច្រើនពេក។ លោកបានមានប្រសាសន៍ថា “មុនពេលស្លាប់ គាត់បានផឹកស្រាច្រើនណាស់។ គាត់ប្រហែលជាស្លាប់ដោយសារគាំងបេះដូង។ គាត់បានស្លាប់ដោយអង្គុយនៅលើកៅអី”។
លោក ម៉េងឃី បានមានប្រសាសន៍ថា កូនក្តីរបស់លោកទើបតែដឹងថា ជនរងគ្រោះបានស្លាប់នៅថ្ងៃបន្ទាប់តែប៉ុណ្ណោះ ប៉ុន្តែមិនហា៊នរាយការណ៍ប្រាប់នគរបាល ពីព្រោះ គាត់បានបាត់លិខិតឆ្លងដែនរបស់ខ្លួន ហើយខ្លាចថា ពួកគេនឹងចោទប្រកាន់គាត់ថា បានរស់នៅក្នុងប្រទេសកម្ពុជាដោយខុសច្បាប់៕សារុន