40.3 C
Phnom Penh

រោងចក្រ​កាត់ដេរ​​ប្តេជ្ញា​ពង្រឹង​ការ​ប្រុងប្រយ័ត្ន​ចំពោះ​ពលកម្ម​កុមារ

ដោយ ឌឹ ខេមបូឌា ដេលី

បទវិភាគ

អង្គការ​ពលកម្ម​អន្តរជាតិ​បាន​ប្រកាស​កាលពី​ថ្ងៃ​អង្គារ​ថា សមាគម​រោងចក្រ​​​កាត់ដេរ​​​នៅ​​​កម្ពុជា GMAC នៅ​ថ្ងៃ​ព្រហស្បតិ៍​នឹង​ចុះ​ហត្ថលេខា​លើ​កិច្ច​ព្រមព្រៀង​មួយ សហការ​ជាមួយ​កម្មវីធី​រោងចក្រ​ល្អ​ប្រសើរ​របស់​អង្គការ​ពលកម្ម​អន្តរជាតិ​ (ILO) ដើម្បី​លុប​បំបាត់​ការ​ប្រើ​ពលកម្ម​កុមារ​ក្នុង​វិស័យ​កាត់ដេរ។

លោក វ៉ាន់ ស៊ូអៀង ប្រធាន GMAC ដែល​តំណាង​ឲ្យ​រោងចក្រ​កាត់ដេរ​នាំចេញ​ចំនួន​៥០០​របស់​ប្រទេស​កម្ពុជា បាន​ឲ្យ​ដឹង​ក្នុង​សេចក្តី​ប្រកាស​មួយ​ថា ក្រុម​នេះ​មាន​ស្រាប់​នូវ “នយោបាយ​មិន​អត់ឱន”​ ចំពោះ​ពលកម្ម​កុមារ។

លោក​បាន​មាន​ប្រសាសន៍​ថា “កិច្ចព្រមព្រៀង​នេះ​ពង្រឹង​ការ​ប្តេជ្ញា​របស់​យើងថែម​ទៀត និង​ផ្តល់​ដំណោះស្រាយ​វិជ្ជមាន​ដល់​កម្មករ​មិន​គ្រប់​អាយុ ដែល​គេ​មិន​បាន​អើពើ ហើយ​ត្រូវ​គេ​រកឃើញ​ធ្វើការ​ក្នុង​រោងចក្រ​សមាជិក​របស់​យើង”។

ទោះជា​យ៉ាងនេះ​ក្តី ពលកម្ម​កុមារ​នៅតែ​ជា​បញ្ហា​មួយ​ទាំង​ក្នុង​វិស័យ​កាត់ដេរ ទាំង​ក្នុង​វិស័យ​ផ្សេងទៀត។​​ កាលពី​ឆ្នាំ​មុន អង្គការ​ពលកម្ម​អន្តរជាតិ​បាន​ឲ្យ​ដឹង​ថា ជាង​១០​ភាគរយ​នៃ​កុមារ​កម្ពុជា៤៣០.០០០​នាក់​មាន​អាយុ​ចន្លោះ​៥​ឆ្នាំ​និង​១៧​ឆ្នាំ ត្រូវ​គេ​រក​ឃើញ​ថា​ជា​ពលករ​កុមារ។

លោកស្រី យឹម ពេជ្រម៉ាលីកា មន្ត្រី​ជាន់​ខ្ពស់​ផ្នែក​កម្មវិធី​រោងចក្រ​ល្អ​ប្រសើរ បាន​មាន​ប្រសាសន៍​កាលពី​ម្សិលមិញ​ថា ក្រុម​អ្នក​ត្រួត​ពិនិត្យ​ដែល​យក​គំរូ​តាង​ត្រួសៗពី​រោងចក្រ​កាត់ដេរ​របស់​ប្រទេស​កម្ពុជា បាន​រកឃើញ​ករណី​ពលកម្ម​កុមារ​មួយ​ចំនួន​តូច​នៅ​ឆ្នាំ​នេះ​តិចជាង​ឆ្នាំ​មុន គឺ​៣៤​ករណី​ធៀបនឹង​៦៧​ករណី។

លោក ដេវិដ វ៉ែល នាយក​ប្រចាំ​ប្រទេស​នៃ​មជ្ឈមណ្ឌល Solidarity Center ជា​ក្រុម​ការពារ​សិទ្ធិ​ពលកម្ម​មាន​មូលដ្ឋាន​នៅ​អាមេរិក បាន​និយាយ​ថា ការ​ខិតខំ​ដើម្បី​លុប​បំបាត់​ពលកម្ម​កុមារ ច្រើន​មិន​យក​ចិត្ត​ទុកដាក់​លើ​ការ​ពិត​ដែល​ថា ច្បាប់​ពិសេស​សម្រាប់​ក្មេង​ជំទង់​អាយុ​១៥​ឆ្នាំ​ទៅ​១៧​ឆ្នាំ ដែល​ត្រូវ​គេ​អនុញ្ញាត​ឲ្យ​ធ្វើ​ការ​ក្រោម​ច្បាប់​ការងារ ជាធម្មតា​ត្រូវ​បំពាន​ដោយ​និយោជក។ លោក​បាន​និយាយ​ថា “គ្មាន​វិស័យ​ណាមួយ​ក្នុង​ចំណោម​[វិស័យ]​ទាំង​នេះ​ មាន​ការ​ចែង​ឲ្យ​ពិត​ប្រាកដ​ទេ នោះ​ហើយ​ដែល​ការ​រំលោភ​បំពាន​ភាគច្រើន​កើត​ឡើង”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស