កាលពីម្សិលមិញ ក្រសួងមហាផ្ទៃបានបញ្ជាក់ថា ប្រទេសចិននឹងសាងសង់អគ្គស្នងការដ្ឋាននគរបាលជាតិថ្មីនៅក្នុងរាជធានីភ្នំពេញ ដើម្បីសម្រួលដល់ការងារកាន់តែច្រើនឡើងនៃប្រតិបត្តិការសន្តិសុខក្នុងប្រទេសកម្ពុជា។
លោក ស ខេង រដ្ឋមន្ត្រីក្រសួងមហាផ្ទៃបានមានប្រសាសន៍យ៉ាងខ្លីអំពីតួនាទីរបស់ប្រទេសចិនក្នុងគម្រោងនេះ ខណៈដែលពិភាក្សាអំពីការដោះដូរដីរវាងក្រសួងរបស់លោក និងព្រះបរមរាជវាំងអំឡុងសន្និសីទកាសែតកាលពីសប្តាហ៍មុន។
លោកបានមានប្រសាសន៍ថា រដ្ឋាភិបាលកំពុងរៀបចំផែនការមេសម្រាប់ទីស្នាក់ការថ្មីនេះដែលនឹងសាងសង់លើដី ដែលក្រសួងកាន់កាប់បន្តពីព្រះបរមរាជវាំងស្ថិតនៅតាមតីរវិថីព្រះស៊ីសុវត្ថិ ទល់មុខសួនកម្សាន្តឌ្រីមលែនឌ៍ តាមសំណើរបស់ប្រទេសចិន ប៉ុន្តែ មិនបាននិយាយលម្អិតអំពីតួនាទីជាក់លាក់របស់ចិនឡើយ។
កាលពីម្សិលមិញ លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា ប្រទេសចិននឹងសាងសង់អគ្គស្នងការដ្ឋាននគរបានជាតិថ្មីដោយមិនគិតថ្លៃ។ ឧត្តមសេនីយ៍ ខៀវ សុភ័គ បានមានប្រសាសន៍ថា “ចិនផ្តល់អ្វីៗទាំងអស់ ទាំងអគារ និងការសាងសង់…ហើយចិននឹងចំណាយសម្រាប់អ្វីៗទាំងអស់”។
អ្នកនាំពាក្យរូបនេះបានមានប្រសាសន៍ថា ប្រទេសចិននឹងរ៉ាប់រងការចំណាយសម្រាប់ទីស្នាក់ការនោះ ដែលរំពឹងថា នឹងមានកម្ពស់ប្រាំពីរជាន់ដោយជំនួយឥតសំណង ប៉ុន្តែ លោកមិនផ្តល់តួលេខណាមួយទេ។
លោកបានមានប្រសាសន៍ ថា “អ្នកអាចស្រមៃមើលពីអគារទំនើបកម្ពស់ប្រាំពីរជាន់…”។ ឧត្តមសេនីយ៍ ខៀវ សុភ័គ បានមានប្រសាសន៍ថា អគ្គស្នងការដ្ឋាននគរបាលជាតិបច្ចុប្បន្ន ដែលស្ថិតនៅជាប់ក្រសួងមហាផ្ទៃតាមមហាវិថីព្រះនរោត្តមនោះ នឹងត្រូវប្រើសម្រាប់បណ្តុះបណ្តាលនគរបាល និងការងាររបស់ក្រសួងលោកផ្ទាល់ដែលកើនឡើង រួមទាំងនាយកដ្ឋានអត្តសញ្ញាណកម្ម និងនាយកដ្ឋានអន្តោប្រវេសន៍ដែលទើបបង្កើតថ្មី ។
អ្នកនាំពាក្យស្ថានទូតចិនបាននិយាយថា លោកមិនដឹងអំពីគម្រោងនេះទេ។ នគរបាលជាតិមិនអាចទាក់ទងបានទេកាលពីម្សិលមិញ។
ប្រទេសចិន គឺជាវិនិយោគិនបរទេសធំបំផុតរបស់ប្រទេសកម្ពុជា ហើយធ្លាប់បានរ៉ាប់រងសម្រាប់សាងសង់អគាររដ្ឋាភិបាលផ្សេងទៀតរួមទាំងទីស្តីការគណៈរដ្ឋមន្រ្តីដ៏ធំ ដែលស្ថិតនៅតាមមហាវិថីសហព័ន្ធរុស្សីផងដែរ។ ប្រទេសចិន ក៏ជាម្ចាស់បំណុលធំបំផុតរបស់កម្ពុជា ហើយបានលក់គ្រឿងសញ្វវុធយោធាបច្ចុប្បន្នរបស់ខ្លួនជាច្រើនដល់ប្រទេសកម្ពុជាផងដែរ៕សារុន