31 C
Phnom Penh

លោក​​​ ហ៊ុន សែន មាន​​​មន្ទិល​​​ចំពោះការ​​​ពិត​​​នៃការ​​​​​​​​​ផ្ទុះករណី​​​​​​ឆ្លង​​​មេរោគ​​​អេដស៍

ដោយ ឌឹ ខេមបូឌា ដេលី

បទវិភាគ

ឃុំ​​​រកា/ខេត្តបាត់​​​ដំបង- កាល​​​ពីម្សិលមិញ​​​ ខណៈ​​​​​​នគរ​​​បាល​​​ឆែក​​​ឆេរ​​​ផ្ទះ​​​របស់​​​គ្រូពេទ្យ​​​គ្មាន​​​អាជ្ញាប័ណ្ណ​​​ដែល​​​ជាប់​​​សង្ស័យ​​​ថា​​​​​​ ជា​​​អ្នក​​​ធ្វើ​​​ឲ្យ​​​មេរោគ​​​អេដស៍​​​ឆ្លង​​​រាល​​​ដាល​​​ទៅ​​​ប្រជា​​​ពល​​​រដ្ឋ​​​ជាង​​​១០០នាក់​​​នៅ​​​ទី​​​នេះ លោក​​​នាយក​​​រដ្ឋមន្ត្រី ហ៊ុន សែន​​​ បាន​​​មាន​​​ប្រសាសន៍​​​នៅ​​​ក្នុង​​​រាជ​​​ធានីភ្នំពេញ​​​ថា លោក​​​មាន​​​មន្ទិល​​​យ៉ាង​​​ខ្លាំង​​​ចំពោះ​​​ភាព​​​ត្រឹម​​​ត្រូវ​​​​​​នៃ​​​ឧបករណ៍ពេទ្យ​​​ ដែល​​​ត្រូវ​​​បាន​​​ប្រើ​​​ប្រាស់​​​សម្រាប់​​​ការ​​​ធ្វើ​​​តេស្ត​​​ឈាម​​​ជា​​​ច្រើន​​​ជុំ​​​។front

ចាប់​​​តាំង​​​ពី​​​មណ្ឌល​​​សុខ​​​ភាព​​​ឃុំ​​​រកា ក្នុ​​​ង​​​ស្រុក​​​សង្កែ​​​ បាន​​​ចាប់​​​ផ្តើម​​​ធ្វើ​​​តេស្ត​​​បឋម​​​រក​​​មេរោគ​​​អេដស៍​​​កាល​​​ពី​​​ថ្ងៃ​​​ទី​​​៨​​​ ខែ​​​ធ្នូ​​​មក​​​ មាន​​​ប្រជា​​​ពល​​​រដ្ឋ​​​ប្រហែល​​​១១០​​​នាក់​​​​​​រួ​​​ម​​​ទាំង​​​កុមារ​​​១៩​​​​​​នាក់​​​ផង ត្រូវ​​​បាន​​​ពិនិត្យ​​​ឃើញ​​​ផ្ទុក​​​មេរោគ​​​អេដស៍។​​​ យោង​​​តាមប្រធាន​​​មណ្ឌល​​​សុខភាព​​​នេះ​​​បាន​​​ឲ្យ​​​ដឹង​​​ថា មនុស្ស​​​ប្រាំ​​​នាក់​​​ទៀត​​​ត្រូវ​​​បាន​​​ពិនិត្យ​​​ឃើញ​​​ផ្ទុកមេរោគ​​​អេដស៍​​​កាល​​​ពី​​​ព្រឹក​​​ម្សិលមិញ​​​។

ប៉ុន្តែ ថ្លែង​​​ទៅ​​​កាន់​​​និស្សិត​​​ និង​​​មន្ត្រី​​​រដ្ឋាភិបាល​​​ប្រមាណ​​​១.០០០នាក់​​​នៅ​​​ក្នុង​​​ពិធី​​​ប្រគល់​​​សញ្ញាបត្រ​​​នៅ​​​វិទ្យាស្ថាន​​​ជាតិ​​​អប់​​​រំ លោក ហ៊ុន សែន បាន​​​មាន​​​ប្រសាសន៍​​​ថា លោក​​​មិន​​​ប្រាកដ​​​ទាំង​​​ស្រុង​​​ថា ​​​លទ្ធផល​​នៃ​​​ការ​​​ផ្ទុក​​​​​​មេរោគ​​​ជា​​​ច្រើន​​​គឺ​​​ដោយសារ​​​កំហុស​​​ឧបករណ៍​​​ធ្វើ​​​តេស្ត​​​ឈាម​​​នោះ​​​ទេ ប៉ុន្តែ លោក​​​ឆ្ងល់​​​ត្រង់​​​ការ​​​ផ្ទុះ​​​ករណី​​​មេរោគ​​​នេះ​​​។

​​​ លោក​​​បាន​​​មាន​​​ប្រសាសន៍​​​ថា “រហូត​​​មក​​​ទល់​​​ពេល​​​នេះ​​​៩៩ភាគ​​​រយ​​​ខ្ញុំ​​​មិន​​​ជឿ​​​ថា វា​​​ជាជំងឺ​​​អេដស៍​​​ទេ​​​។ បើ​​​ក្នុង​​​ចំណោម​​​មនុស្ស​​​៨០០នាក់​​​ មាន​​​១០៦​​​នាក់​​​កើត​​​អេដស៍​​​ វា​​​ងាប់​​​អស់​​​ហើយ​​​។ បើ​​​យើង​​​ធ្វើ​​​តេស្ត​​​ដោយ​​​ប្រើ​​​មា៉ស៊ីុន​​​ទាំង​​​នោះ ​​​ពួក​​​យើង​​​ពាក់​​​កណ្តាល​​​ប្រហែល​​​ជា​​​ត្រូវ​​​កើត​​​អេដស៍​​​​​​ដែរហើយ​​​។ ខ្ញុំ​​​នៅ​​​តែ​​​មិន​​​ជឿ ខ្ញុំ​​​មិន​​​ជឿទេ​​​​​​”។​​​

លោក​​​បាន​​​មាន​​​ប្រសាសន៍​​​ទៀត​​​ថា ចាំបាច់​​​ត្រូវ​​​បើ​​​ប្រាស់​​​គ្រប់​​​​​​ “ធនធាន​​​បច្ចេកវិទ្យា​​​” ដែល​​​មាន​​​មុន​​​ពេល​​​ឈាន​​​ដល់​​​ការ​​​សន្និដ្ឋាន​​​។ លោក​​​បាន​​​បន្ត​​​ថា “មនុស្ស​​​ចាស់​​​អាយុ​​​៨០​​​ឆ្នាំ​​​កើត​​​អេដស៍​​​? ហើយ​​​ក្មេង​​​ៗក៏​​​កើត​​​អេដស៍​​​ដែរ​​​? ដូច្នេះ​​​យើ​​​ង​​​មិន​​​ត្រូវ​​​ធ្វើ​​​ការ​​​សន្និដ្ឋាន​​​ភ្លាមៗ​​​ទេ​​​។ យើង​​​ត្រូវ​​​ប្រើ​​​ប្រាស់​​​គ្រប់​​​ធន​​​ធាន​​​បច្ចេកវិទ្យា​​​​​​ដែល​​​មាន​​​។ យើង​​​គ្មាន​​​​​​ន័យ​​​ថា យើង​​​មើល​​​ងាយ​​​គ្រូពេទ្យ​​​ និ​​​ងឧបករណ៍​​​ពេទ្យ​​​របស់​​​យើង​​​ទេ​​​ ប៉ុន្តែ វា​​​ពិបាក​​​នឹង​​​ជឿ​​​ណាស់​​​”។

យោង​​​តាម​​​លោក មាន​​​ ឈីវុន ប្រធាន​​​មជ្ឈមណ្ឌល​​​ជាតិ​​​ប្រយុទ្ធ​​​នឹង​​​ជំងឺអេដស៍ សើស្បែក និង​​​កាម​​​រោគ បាន​​​ឲ្យ​​​ដឹង​​​ថា ក្នុង​​​ចំណោម​​​អ្នក​​​ភូមិ​​​៩០​​​នាក់​​​ដែល​​​បាន​​​​​​​​​ធ្វើ​​​តេស្ត​​​នៅ​​​មណ្ឌល​​​សុខភាព​​​ឃុំ​​​ឃើញ​​​ផ្ទុក​​​មេរោគ​​​អេដស៍​​​គិត​​​មក​​​ទល់​​​ថ្ងៃ​​​អង្គារ មាន​​​៨៩​​​នាក់​​​ត្រូវ​​​បាន​​​បញ្ជាក់​​​ថា​​​មាន​​​ផ្ទុក​​​​​​មេរោគ​​​អេដស៍ ពេល​​​មក​​​​​​ធ្វើ​​​តេស្ត​​​ជា​​​លើក​​​ទី​​​២​​​នៅ​​​មន្ទីរ​​​ពេទ្យ​​​បង្អែក​​​ខេត្ត​​​កាល​​​ពី​​​ថ្ងៃ​​​ពុធ។

លោក​​​បាន​​​មាន​​​ប្រសាសន៍​​​ថា “មន្ត្រីសុខាភិបាល​​​នឹង​​​បន្ត​​​ធ្វើ​​​តេស្ត​​​ឈាម​​​ដើម្បី​​​ធានា​​​ភាព​​​ត្រឹម​​​ត្រូវ​​​នៃការ​​​ធ្វើ​​​តេស្ត​​​បឋម​​​។ លោក​​​មាន​​​ប្រសាសន៍​​​ទៀត​​​ថា ​​​​​​”យើង​​​មិន​​​ទាន់​​​មាន​​​តួលេខ​​​ពិត​​​ប្រាកដ​​​នៅ​​​ឡើយ​​​ទេ​​​។ អ្នក​​​ដែល​​ធ្វើ​​​តេស​​​្ត​​​ឃើញ​​​មាន​​​ផ្ទុក​​​មេរោគ​​​អេដស៍​​​ នៅ​​​តែ​​​ត្រូវ​​ការ​​​ធ្វើ​​​តេស្ត​​​បន្ថែមទៀត​​​”។

លោក​​​ មាន​​​ ឈីវុន បាន​​​លើក​​​ឡើង​​​បន្ថែម​​​ទៀត​​​ថា កាល​​​ពី​​​ថ្ងៃ​​​ម្សិលមិញ សំណាក​​​វិភាគ​​​ឈាម​​​​​​យក​​​ពីប្រជា​​​ពល​​​រដ្ឋ​​​ ដែល​​​បាន​​​ធ្វើ​​​តេស្ត​​​ឃើញ​​​មាន​​​ផ្ទុក​​​មេរោគ​​​អេដស៍​​​ ត្រូវ​​​បាន​​​បញ្ជូន​​​មក​​កាន់​​​វិទ្យាស្ថាន​​​ប៉ាស្ទ័រ​​​ក្នុង​​​រាជ​​​ធានី​​​ភ្នំពេញ ដើម្បី​​​ធ្វើ​​​តេស្ត​​​បន្ថែម​​​។

នៅ​​​ពេល​​​សាក​​​សួរ​​​ថា តើ​​​ប្រជា​​​ពល​​​រដ្ឋ​​​១៦​​​នាក់​​​ដែល​​​បាន​​​ធ្វើ​​​តេស្ត​​​​​​កាល​​​ពី​​​ថ្ងៃ​​​ពុធ​​​ នៅ​​​មណ្ឌល​​​សុខភាព​​​ឃុំ​​​ឃើញ​​​មាន​​​ផ្ទុក​​​មេរោគ​​​អេដស៍​​​ ពិនិត្យ​​​ឃើញ​​​ផ្ទុក​​​មេរោគ​​​អេដស៍​​​ជា​​​ថ្មី​​​ទៀត​​​នៅ​​​មន្ទីរ​​​ពេទ្យ​​​អង្អែក​​​ខេត្ត​​​កាល​​​ពីម្សិលមិញ​​​ឬ​​​យ៉ាង​​​ណា​​​នោះ​​​ លោក អីុម ចិត្រា ប្រធាន​​​ប្រតិបត្តិ​​​សុខាភិបាល​​​​​​ស្រុក​​​សង្កែ​​​ បាន​​​មាន​​​ប្រសាសន៍​​​ថា គេមិន​​​ឲ្យ​​​លោក​​​និយាយ​​​ជាមួយ​​​ប្រព័ន្ធ​​​ផ្សព្វផ្សាយទៀត​​​ទេ​​​​​​។ ​​​មុន​​​ពេល​​​ចុច​​​ផ្តាច់​​​​​​ទូរស័ព្ទ​​​ លោក​​​បាន​​​មាន​​​ប្រសាសន៍​​​ថា ​​​”អ្នក​​​ច្បាប់​​​មិន​​​អនុញ្ញាត​​​ឲ្យ​​​ខ្ញុំ​​​ប្រាប់​​​អស់​​​លោក​​​ទៀត​​​ទេ​​​”។

ទោះ​​​បី​​​ជា​​​លោក ហ៊ុន សែន មាន​​​មន្ទិល​​​ចំពោះ​​​ការ​​​ផ្ទុះ​​​ករណី​​​ផ្ទុក​​​មេរោគ​​​អេដស៍​​​មិនធ្លាប់​​​មាន​​​នៅ​​​ក្នុង​​​ឃុំ​​​រកា​​​ ដែល​​​អ្នក​​​ធ្វើ​​​តេស្ត​​​ឃើញ​​​ផ្ទុក​​​មេរោគ​​​អេដស៍​​​មាន​​​អាយុ​​​ពី​​​៤​​​ឆ្នា​ំ ដល់​​​៨០​​​ឆ្នាំ​​​ក្តី​​​ ក៏​​​លោក​​​ស្រី​​​ ម៉ារី អូឌីល អេម៉ុន (Marie-Odile Emond) តំណាង​​​អង្គការ​​​ UNAIDS ប្រចាំ​​​ប្រទេសកម្ពុជា ​​​បាន​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា លទ្ធផល​​​នៃ​​​ការ​​​ធ្វើ​​​តេស្ត​​​នៅ​​​ក្នុ​​​ងឃុំ​​​នេះ​​​អាច​​​ជឿ​​​ទុក​​​ចិត្ត​​​បាន​​​។

លោក​​​ស្រី​​​មាន​​​ប្រសាសន៍​​​ថា “វា​​​អាច​​​ទុក​​​ចិត្ត​​​បានខ្លាំង​​​។ មាន​​​ហានិភ័យ​​​​​​តិច​​​តួច​​​ណាស់​​​ដែល​​​ពិនិត្យ​​​ឃើញ​​​ផ្ទុក​​​មេរោគ​​​អេដស៍​​​ដោយ​​​​​​មិន​​​ត្រឹម​​​ត្រូវ​​​។ នោះជា​​​មូល​​​ហេតុ​​​ដែល​​​អ្នក​​​ត្រូវ​​​ធ្វើ​​​តេស្ត​​​ពិនិត្យ​​​ជា​​​លើក​​​ទី​​​២។ ការ​​​ធ្វើ​​​តេស្ត​​​ពិនិត្យ​​​ជា​​​លើក​​​ទី​​​២ ត្រូវ​​​បាន​​​បញ្ជាក់​​​”។

រហូត​​​ម​ក​​​​​​ទល់​​​ពេល​​​នេះ​​​ការ​​​សើុប​​​អង្កេត​​​​​​លើ​​​ការ​​​ផ្ទុះ​​​ករណី​​​ផ្ទុក​​​មេរោគ​​​អេដស៍​​​ បាន​​​ផ្តោត​​​​​​តែ​​​ទៅ​​​លើ​​​លោក យ៉ែម ជ្រិន គ្រូពេទ្យ​​​គ្មាន​​​អាជ្ញាប័ណ្ណ​​​ដែល​​​តែង​​​តែ​​​ព្យាបាល​​​មនុស្ស​​​ជា​​​ច្រើន​​​ក្នុង​​​ចំណោម​​​អ្នក​​​ភូមិ​​​នៅ​​​ក្នុង​​​ឃុំ​​​នេះ​​​​​​ដោយ​​​ការ​​​ចាក់​​​ថ្នាំ​​​ និង​​​បន្តោក​​​សេរ៉ូមប៉ុណ្ណោះ​​​​​​។

លោក យ៉ែម ជ្រិន ត្រូវ​​​បាន​​​នគរ​​​បាល​​​ខេត្ត​​​ឃាត់​​​ខ្លួន​​​យក​​​ទៅ​​​សួរ​​​នាំ​​​កាល​​​ពី​​​ថ្ងៃ​​​ពុធ​​​ ហើយ​​​កំពុ​​​ងស្ថិត​​​នៅ​​​ក្នុង​​​មន្ទីរ​​​ឃុំ​​​ឃាំង​​​នៅ​​​ឡើយ​​​គិត​​​មក​​​ទល់​​​ល្ងាច​​​ម្សិលមិញ។

ដឹក​​​នាំ​​​ដោយ​​​លោក ទិត្យ ប៊ុនណា អនុប្រធាន​​​ការិយាល័យ​​​វិទ្យាសាស្ត្រ​​​បច្ចេកទេស​​​នៃ​​​ក្រសួង​​​មហាផ្ទៃ​​​ នគរ​​​បាល​​​ខេត្ត​​​បាន​​​ឆែក​​​ឆេរ​​​ផ្ទះ​​​របស់​​​លោក យ៉ែម ជ្រិន កាល​​​ពីម្សិលមិញ ដើម្បី​​​ប្រមូល​​​ភ័ស្តុ​​​តាង​​​។

ដប​​​សេរ៉ូម គ្លុយ​​​កូស​​​ និង​​​វីតាមីនB-12  រាប់សិប​​​ដប​​​មាន​​​នៅ​​​រាយ​​​ប៉ាយ​​​ជុំ​​​វិញ​​​ផ្ទះ​​​របស់​​​គាត់​​​។ នគរ​​​បាល​​​ក៏​​​ប្រមូល​​​បាន​​​ម្ជុលសឺរាុំង​​​​​​យ៉ាង​​​ហោច​​​ណាស់​​​​​​ចំនួន​​​២០ដែរ​​​​​​ នៅ​​​ពេល​​​ពួក​​​គេ​​​ពិនិត្យ​​​មើល​​​សំណល់​​​ភ្នក់​​​ភ្លើង​​​ ដែល​​​ទើប​​​តែ​​​ដុត​​​ថ្មី​​​ៗ​​​នៅ​​​ខាង​​​ក្រោយ​​​ផ្ទះ​​​របស់​​​គាត់។

លោក ជេម ម៉ាក​​​ខេប (James McCabe)នាយក​​​​​​ផ្នែក​​​ប្រតិបត្តិការ​​នៅ​​​​​​អង្គ​​​ភាពគាំពារ​​​កុមារ​​​ ជា​​​អង្គភាព​​​របស់​​​នគរបាល​​​ដែល​​​ទទួល​​​បាន​​​ការ​​​ឧបត្ថម្ភ​​​គាំទ្រ​​​ពី​​​មូល​​​និធិកុមារ​​​កម្ពុជា​​​​​ ដែល​​​បាន​​​ជួយ​​​នៅ​​​ក្នុង​​​ការ​​​សើុប​​​អង្កេត​​​នេះ​​​ បាន​​​មាន​​​ប្រសាសន៍​​​ថា “អ្វី​​​គ្រប់​​​យ៉ាង​​​ដែល​​​ប្រមូល​​​បាន​​​នៅ​​​ទី​​​នេះ​​​ក្នុង​​​ថ្ងៃ​​​េនះ​​​ នឹ​​ង​​​ត្រូវ​​​យក​​​ទៅ​​​ធ្វើ​​​វិភាគ​​​កោសល្យ​​​វិច័យ​​​។ ភាព​​​ពិត​​​ប្រាកដ​​​គឺ​​​ថា នេះ​​​គឺ​​​ជា​​​ការ​​​សើុប​​​អង្កេត​​​ពេញ​​​លេញ​​​ ពីព្រោះ​​​យើង​​​ចាំ​​​បាច់​​​ត្រូវ​​​កំណត់​​​ថា ប្រភព​​​​​ចេញ​​​មក​​​ពី​​​ណា​​​”។

អ្នក​ជិត​ខាង​របស់​លោក​យ៉ែម​ ជ្រិន​ ម្នាក់​អាយុ​៦០ឆ្នាំ​ដែល​បដិសេធ​មិន​ប្រាប់​ឈ្មោះ​ព្រោះ​ខ្លាច​មាន​ការ​ធ្វើ​ទុក្ខបុកម្នេញ​នោះ​ បាន​លើក​ឡើង​​ថា​ គ្រូពេទ្យ​រូប​នេះ​​មាន​ការ​ធ្វេស​ប្រហែស​ចំពោះ​​ឧបករណ៍​ពេទ្យ​របស់​ខ្លួន​។​

លោក​បាន​និយាយ ថា​ “ខ្ញុំ​បាន​ឃើញ​ប្រពន្ធ​របស់​គាត់​បាន​ដុត​ឧបករណ៍​ពេទ្យ​ចោល​កាលពី​ពីរបី ថ្ងៃ​កន្លង​មក​នេះ​។ការ​ដុត​ថ្នាំពេទ្យ​និង​ម្ជុល​ចោល​ វា​មិន​ល្អ​នោះ​ទេ។វត្ថុ​ទាំង​នោះ​ អាច​​បង្ក​គ្រោះ​ថ្នាក់​ដល់​ក្មេងៗ​និង​ប្រជា​ពលរដ្ឋ”។

លោក ហ៊ុន សែន​ ក៏បាន​មាន​ប្រសាសន៍​ទាក់​ទិន​នឹង​​ការ​ចោទ​​​លើ​លោក​ យ៉ែ​ ជ្រិន ក្នុង​សន្ទរកថា​របស់​លោក​កាល​ពី​ម្សិលមិញ​ផង​ដែរ។ លោក បាន​មាន​ប្រសាសន៍​ថា “គេ​និយាយ​ថា​ គ្រូ​ពេទ្យ​ម្នាក់​ជា​អ្នក​ធ្វើ​ឲ្យ​មាន​ការ​ឆ្លង​រាល​ដាល​នេះ​។ អ៊ីចឹង​ អាការ​ឆ្លង​នឹង​ វា​កើតឡើង​យ៉ាង​ម៉េច​អាឡូវ​?។ វា​មាន​ន័យ​ថា គាត់​[គ្រូពេទ្យ] មាន​ផ្ទុក​មេរោគ​អេដស៍។ ហេតុដូច្នេះ​ គាត់​ចាក់​ថ្នាំ​ខ្លួន​ឯង​ជា​មុន​សិន​ មុនពេល​ចាក់​ថ្នាំ​​ឲ្យ​គេ។ វា​មិន​អាច​ទៅ​រួច​ទេ​។ វា​មិន​ទំនង​ទាល់​តែ​សោះ​”។​

លោក​ បាន​មាន​ប្រសាសន៍​បន្ថែម​ថា “ប៉ុន្តែ​ តើ​យើង​អាច​សួរ​​ឲ្យ​ច្បាស់​បានទេ។ តើ​មនុស្ស​ទាំង​១០៦នាក់​ដែល​បង្ហាញ​រោគ​សញ្ញា[អេដស៍​]​​ សុទ្ធ​តែ​គាត់​ជា​អ្នក​ព្យា​បាល​ ឬយ៉ាង​ម៉េច​?”។

លោក ឈីវុន បាន​លើក​ឡើង​​កាល​ពី​ថ្ងៃ​ពុធ​ថា មណ្ឌល​សុខ​ភាព​ឃុំ​ កំពុង​រៀប​​ចំ​ធ្វើការ​ស្ទង់​មតិ​ដើម្បី​ជួយ​កំណត់​ប្រភព​នៃ​ការ​​ឆ្លង​មេរោគ​អេដស៍​នេះ។

មន្រ្តី​ប៉ូលិស​ក្រសួង​មហា​ផ្ទៃ​កំពុង​ពិនិត្យសម្ភារដែល​លោក យ៉ែម ជ្រិន​ បានបោះ​ចោលនៅខាង​ក្រៅ​ផ្ទះរបស់គាត់ក្នុង​ឃុំ​រកា កាលពីម្សិលមិញ។ អេឡិក ខុនស៊ីកលីអូ
មន្រ្តី​ប៉ូលិស​ក្រសួង​មហា​ផ្ទៃ​កំពុង​ពិនិត្យសម្ភារដែល​លោក យ៉ែម ជ្រិន​ បានបោះ​ចោលនៅខាង​ក្រៅ​ផ្ទះរបស់គាត់ក្នុង​ឃុំ​រកា កាលពីម្សិលមិញ។ អេឡិក ខុនស៊ីកលីអូ

យោង​តាម​​សេច​ក្ដី​ប្រកាស​ព័ត៌​មាន​រួម​មួយ​​ដែល​ចេញ​កាល​ពី​ម្សិល​មិញ​បាន​ឲ្យ​ដឹង​ថា​ ​ ឥឡូវនេះ មជ្ឈមណ្ឌល​ជាតិ​ប្រយុទ្ធ​នឹង​ជំងឺ​អេដស៍​ សើស្បែក​និង​កាម​រោគ​ បាន​ចូល​រួម​ជាមួយ​​អង្គការ​សុខ​ភាព​ពិភពលោក​ មជ្ឈ​មណ្ឌល​ទប់​ស្កាត់​និង​គ្រប់​គ្រង​​ជំងឺ​របស់​សហរដ្ឋ​អាមេរិក​ UNAIDS និង UNICEF ដើម្បី​​ធ្វើការ​ស៊ើប​អង្កេត​ឲ្យ​ពេញលេញ​​រក​ប្រភព​ដែល​ធ្វើ​ឲ្យ​មាន​”ការ​ឆ្លង​នេះ”។

លោក ម៉ម​ ប៊ុនហេង​ រដ្ឋ​មន្ត្រី​ក្រសួង​សុខា​ភិបាល​ ក៏បាន​ចុះ​ទៅ​ភូមិ​​រកា​​ ជាមួយ​លោក​អភិបាល​ខេត្ត​ ចាន់ សុផល​ ផង​ដែរ​កាល​ពី​​ព្រឹក​ម្សិល​មិញ ប៉ុន្តែ​អ្នក​ភូមិ​ដែល​សង្ឃឹម​ថា​នឹង​ទទួល​បាន​ចម្លើយ​និង​ថ្នាំ​ពន្យារជីវិត​បែរជា​ខក​ចិត្ត​ទៅវិញ។​

លោក ម៉ម ប៊ុនហេង បាន​ប្រញាប់​ញាល់​ចុះ​ទៅ​ពិនិត្យ​ស្ថាន​ភាព​នៅ​មណ្ឌល​សុខភាព​ឃុំ​​​​​​​​​​​​​​​​​​​​​​ដោយ​​បាន​អង្អែល​ក្បាល​ និ​ង​បិចថ្ពាល់​ក្មេង​ៗ ហើយ​បាន​ថ្លែង​ទៅ​កាន់​អ្នក​ភូមិ​ប្រហែល​៣០០នាក់​ដែល​រង់​ចាំ​នៅក្បែ​នោះ​។

រដ្ឋមន្ត្រី​រូប​នេះ​បាន​ធានា​ចំពោះ​អ្នក​ភូមិ​ថា ​ក្រុម​ការងារ​នឹង​មក​ដល់​ឃុំ​នេះ​ក្នុង​ពេល​ឆាប់​ៗ​ដើម្បី​សិក្សា​អំពី​ការ​ឆ្លង​នេះ​ ហើយ​​បន្ទាប់​មក​លោក​បាន​ណែនាំ​អ្នកភូមិ​ឲ្យ​ចេះ​ការ​ពារ​សុវត្ថិភាព​នៅ​រដូវ​រងា។

លោក​បាន​មាន​ប្រសាសន៍​ថា “សូម​​អ្នក​ភូមិ​ទាំង​អស់​គ្នា​ ត្រូវ​ប្រាកដ​ថា​មាន​ពាក់​ខោអាវ​រងា ហើយ​ត្រូវ​ប្រុង​ប្រយ័ត្ន​អំពី​អគ្គិភ័យ​នៅ​ពេល​រដូវ​ធ្លាក់​ខ្យល់​នេះ​ ព្រោះ​ជួន​កាល​ក្មេង​ៗ​អាច​ធ្វើ​ឲ្យ​​មាន​ការ​ឆាប​ឆេះ​”។

បន្ទាប់​មក​លោក ម៉ម ប៊ុនហេង ​បាន​ចែក​​ស្រោម​ដៃ​-ជើង​ និង​សារ៉ុង​ដល់​អ្នក​ភូមិ​មុន​ពេល​និយាយ​ជាមួយ​អ្នក​យក​ព័ត៌​មាន​មួយ​ភ្លែត​។ លោក​បាន​មាន​ប្រសាសន៍​ថា “យើង​នឹង​ផ្តល់​ព័ត៌មាន​ឲ្យ​ច្បាស់​លាស់​នៅ​ពេល​គេ​ដឹង​អំពី​មូល​ហេតុ​នៃ​ការ​ឆ្លង​នេះ​។ ខ្ញុំ​សូម​ឈប់​និយាយ​ត្រឹម​នេះ​ ព្រោះ​ខ្ញុំ​ខ្លាច​ក្រែង​ថា ប្រសិន​បើ​ខ្ញុំ​និយាយ​ច្រើន​ ខ្ញុំ​អាច​និយាយ​អ្វី​ខុស​”។

អ្នក​ភូមិ​ម្នាក់​ឈ្មោះ សំ ឡម អាយុ​៨០​ឆ្នាំ ដែល​​ធ្វើ​តេស្ត​ឈាម​នៅ​មណ្ឌល​សុខភាព​​ឃើញ​មាន​ផ្ទុក​មេរោគ​អេដស៍​កាល​ពី​ថ្ងៃ​ពុធ មិន​សប្បាយ​ចិត្ត​ចំពោះការ​ចុះ​មក​សួរ​សុខ​ទុក្ខ​របស់​លោក​ ម៉ម ប៊ុន​ហេង ឡើយ​។

លោក​តា​បាន​មាន​ប្រសាសន៍​ថា “ព្រឹក​នេះ​រដ្ឋមន្ត្រី​ក្រសួង​សុខាភិបាល និង​លោក​អភិបាល​ខេត្ត​ហាក់​បី​ដូច​ជា​មិន​ផ្តោត​សំខាន់​លើ​ប្រជាពល​រដ្ឋ​ដែល​ឆ្លង​មេរោគ​អេដស៍​ឡើយ​។ ពួកគេ​មិន​យក​ចិត្ត​ទុក​ដាក់​នោះទេ​”។

លោក​តា​បាន​មាន​ប្រសាសន៍​បន្ថែម​ថា លោក​តា​ និង​អ្នក​ឆ្លង​មេរោគ​អេដស៍​ផ្សេង​ៗ​ទៀត​សុទ្ធ​តែ​មាន​ជីវភាព​ក្រីក្រ​ ហើយ​សង្ឃឹម​ថា នឹង​មាន​ការ​ចែក​ថ្នាំ​​ពន្យារ​ជីវិត​។

លោក ឈីវុន ដែល​ក៏​បាន​ចុះទៅ​ដល់​ឃុំ​នេះ​ដែរ​នោះ​​បាន​លើក​ឡើង​ថា ថ្នាំ​ប្រភេទ​នេះ​គឺ​ចែក​ជូន​ដោយ​ឥត​គិត​ថ្លៃ​នៅ​មន្ទីរ​ពេទ្យ​បង្អែក​​ខេត្ត​ និង​ស្រុក ប៉ុន្តែ ថា មន្ត្រី​​​មិន​ហ៊ាន​យក​ថ្នាំ​នេះ​មក​​ឃុំ​នេះ​ឡើយ​។ លោក​បាន​​មាន​ប្រសាសន៍​ថា “យើង​មិន​អាច​យក​មក​បាន​ទេ​ ព្រោះ​វា​មើល​ទៅ​ដូច​ជា​​យក​ស្ករគ្រាប់​មក​ចែក​អ៊ីចឹង”៕ សុខុម និង​ ស៊ុយឈាង (រាយការណ៍​បន្ថែម​ដោយ​ ហ៊ុល រស្មី)​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស