ព្រះរាជអាជ្ញាអមសាលាដំបូងខេត្តព្រះសីហនុ ដែលបានយល់ស្របនឹងសេចក្តីជូនដំណឹង ដែលបង្គាប់ឲ្យមហាសេដ្ឋីរុស្ស៊ីដែលរត់គេចខ្លួន លោក សេរហ្គេ ប៉ូឡុនស្គី ចេញពីកោះឯកជនរបស់លោកនៅឯនាយឆ្នេរសមុទ្រខេត្តព្រះសីហនុ ត្រឹមថ្ងៃទី១៥ខែធ្នូនោះ បានមានប្រសាសន៍កាលពីថ្ងៃព្រហស្បតិ៍ថា តុលាការនឹងមិនចាត់វិធានការបន្ទាន់ដេញលោក ប៉ូឡុនស្គី នោះទេ។
សេចក្តីជូនដំណឹង ដែលជំរុញឲ្យមានការអនុវត្តដីកាសម្រេចរក្សាការពារកាលពីខែមិថុនា ដែលចេញដោយតុលាការខេត្ត តម្រូវឲ្យលោក ប៉ូឡុនស្គី ចាកចេញពីកោះ ដែកគោល ដោយសំអាងហេតុផលថា កោះនេះជាកម្មសិទ្ធិរបស់លោក នីកូឡាយ ដូរ៉ូសេនកូ ដែលជាគូប្រជែងរបស់លោក ប៉ូឡុនស្គី។ ប៉ូឡុនស្គី ត្រូវគេតាមចាប់នៅប្រទេសរុស្ស៊ីពីបទកេងបន្លំយកប្រាក់រាប់លានដុល្លារ។
លោកស្រី ចាត សូរស្មី ព្រះរាជអាជ្ញាតុលាការខេត្តព្រះសីហនុ បានមានប្រសាសន៍ថា “យើងបានបញ្ជូនសេចក្តីជូនដំណឹងមួយមានទាំងកាលកំណត់ឲ្យលោក ប៉ូឡុនស្គី ចាកចេញពីកោះដែកគោលដោយស្ម័គ្រចិត្ត។ ប៉ូឡុនស្គី កំពុងរស់នៅលើកោះដែកគោលនៅឡើយ ហើយយើងមិនទាន់បានកំណត់កាលបរិច្ឆេទអនុវត្ត[ដីកាសម្រេចរក្សាការពារ]ទេ”។
កាលពីថ្ងៃអង្គារ មេធាវីម្នាក់របស់លោក ដូរ៉ូសេនកូ ដែលជាម្ចាស់រួមគ្នាលើទ្រព្យមួយចំនួនជាមួយលោក ប៉ូឡុនស្គី បាននិយាយថា កូនក្តីរបស់លោកបានជំរុញឲ្យតុលាការអនុវត្តតាមដីកាសម្រេចរក្សាការពារ ដោយសារមានជម្លោះមួយចំនួននាពេលថ្មីៗនេះរវាងអ្នកទាំងពីរ។ កាលពីដើមខែមុន លោក ដូរ៉ូសេនកូ បានចោទលោក ប៉ូឡុនស្គី ថាបានបញ្ជាឲ្យមានការវាយតប់កូនប្រុសរបស់គាត់ ឈ្មោះ អូស្តាប។ លោក ប៉ូឡុនស្គី បានបដិសេធថាមិនបានជាប់ពាក់ព័ន្ធ និងបានប្តឹងពីបទបរិហារកេរ្តិ៍តបវិញ។
សេចក្តីថ្លែងមួយបង្ហោះតាមប្លុករបស់លោក ប៉ូឡុនស្គី បានឲ្យដឹងថា គាត់មិនបានល្មើសច្បាប់ទេ ហើយការដកស្រង់សម្តីមេធាវីរបស់លោក គឺលោក បែន សុនសម័យ បានឲ្យដឹងថា កូនក្តីរបស់លោកនឹងបន្តរស់នៅនិងធ្វើជំនួញលើកោះនេះជាធម្មតា។
ទាក់ទងបានកាលពីថ្ងៃព្រហស្បតិ៍ លោក នីកូឡាយ ដូរ៉ូសេនកូ បាននិយាយថា លោកភ្ញាក់ផ្អើលដែលលោក ប៉ូឡុនស្គី មិនទាន់បានចាកចេញ។លោកបាននិយាយថា “ខ្ញុំងឿងឆ្ងល់…ហេតុអ្វី ប៉ូឡុនស្គី មិនទាន់ត្រូវគេបង្ខំឲ្យចេញ។ វាប្រើពេលយូរម៉្លេះ”។
អូស្តាប ដូរ៉ូសេនកូ បាននិយាយថា លោកខ្លាចមានការវាយប្រហារទៀតពីសំណាក់លោក ប៉ូឡុនស្គី។ លោកបាននិយាយទៀតថា “គ្រួសាររបស់ខ្ញុំនិងរូបខ្ញុំទៅណាក៏ជិះក្នុងរថយន្តការពារគ្រាប់ដែរ ពីព្រោះខ្ញុំនៅបារម្ភខ្លាច ប៉ូឡុនស្គី និងបក្ខពួករបស់គាត់”៕មានិត