28 C
Phnom Penh

អ្នកអូសរទេះនៅប៉ោយប៉ែតតវ៉ាចំពោះការឡើងថ្លៃដឹកទំនិញចេញចូល

ដោយ ឌឹ ខេមបូឌា ដេលី

បទវិភាគ

អាជ្ញាធរ​មូលដ្ឋាន​បាន​ឲ្យ​ដឹង​ថា អ្នក​អូស​រទេះ​ជាង​១០០​នាក់ ដែល​​ដឹក​ទំនិញ​ចេញ​ចូល​ច្រក​ព្រំដែន​កម្ពុជា​ថៃ បាន​នាំគ្នា​តវ៉ា​នៅ​ក្នុង​ក្រុង​ប៉ោយប៉ែត​កាលពី​ម្សិលមិញ ដោយ​អះអាង​ថា មន្ត្រី​គយ​បាន​ដំឡើង​ថ្លៃ​ដឹក​ទំនិញ​ចេញ​ចូល​​ដែល​​មិន​ផ្លូវ​ការ​ទ្វេដង​​​ក្នុង​ពេល​ថ្មីៗ​នេះ​។

លោក សែម មករា នាយរង​ប៉ុស្តិ៍​នៅ​ច្រក​ព្រំដែន​អន្តរជាតិ​ប៉ោយប៉ែត​ បាន​លើក​ឡើង​ថា បញ្ហា​នេះ​បាន​កើត​ឡើង​កាលពី​សប្ដាហ៍​មុន នៅ​ពេល​មន្ត្រី​គយ​​បាន​ផ្លាស់ទីតាំង​ទៅ​​ច្រក​ព្រំដែន​ថ្មី​ដែល​ស្ថិត​នៅ​​ក្បែរ​​ផ្សារ​រ៉ា​ និង​ដែល​មាន​ចម្ងាយ​កាន់​តែ​ឆ្ងាយ​ពីព្រំដែន​​ ហើយ​បាន​​ដំឡើង​ថ្លៃ​ដឹក​ទំនិញ​​ចេញ​ចូល​ដែល​ពួកគេ​បាន​ទារ​ពី​អ្នក​អូស​រទេះភ្លាមៗ​ ​។ លោក​​បាន​មាន​ប្រសាសន៍​ថា “អ្នក​អូស​រទេះ​ចង់​ឲ្យ​មន្ត្រី​គយ​ធ្វើ​ដូច​មុន”។

ការ​តវ៉ា​ប្រហែល​បីម៉ោង​បាន​បញ្ចប់​​បន្ទាប់​ពី​លោក ង៉ោ ម៉េងជ្រួន អភិបាល​ក្រុង​ប៉ោយ​ប៉ែត​បាន​ចរចា​ឲ្យ​មាន​កិច្ច​ព្រមព្រៀង​មួយ​​​ដែល​នឹង​ធានា​ថា មន្ត្រី​គយ​មិន​ទារ​ថ្លៃ​​​​ដឹក​ទំនិញ​ចេញ​ចូល​ណាមួយ​ពី​អ្នក​អូស​រទេះ​ ប៉ុន្តែ​ត្រូវ​យក​ពន្ធ​ដែល​​អាជីវករ​ ឬក្រុម​ហ៊ុន​ត្រូវ​បង់​ដើម្បី​​ដឹក​ទំនិញ​ឆ្លង​កាត់​ព្រំដែន​។

លោក ម៉េងជ្រួន បាន​មាន​ប្រសាសន៍​ថា “យើង​បាន​ស្នើ​មន្ត្រី​គយ​នៅ​ព្រំដែន​ឲ្យ​ឈប់​យក​ប្រាក់​ពី​អ្នក​អូស​រទេះ​ ដែល​ខំប្រឹង​រក​ប្រាក់​សម្រាប់​គ្រួសារ​របស់​ពួកគេ​”៕ ស៊ុយឈាង​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស